लाम्दिक् 6 - लिम्बु1 खे़ब्याङ् यहवे दाङ्बे़ल्ले़ मोसान् मे़त्तु, “आङ्गाॽ फारोन् थे मे़त्तुङ्ॽ, आल्ल खे़ने़ॽ के़निसुॽ॥ आङ्गाॽ आमनाहाॽ ले़प्मासिरे़ लागि आङ्गाॽ खे़न् के़साक्पा चाःत्तुङ्ॽ॥ खुने़ॽ कुलाजेॽओलाम् खे़ङ्हाॽ नाःप्मादेमासिरे़ लागि आङ्गाॽ खे़ल्ले़ के़साक्पा तुमुर याःन्दुङ्ॽ॥” निङ्वाॽफुमाङ्ङिल्ले़ मोसान् उःत्तुॽ 2 निङ्वाॽफुमाङ्ङिल्ले़ मोसान् मे़त्तु, “आङ्गाॽ यहवे दाङ्बाआ॥ 3 अब्राहाम, इसहाक नु याकुबओ आङ्गाॽ मुक्साम्दाङ्बा निङ्वाॽफुमाङ्ङिन् ओसेःन्धाक्सिङ्ङाआङ् वयाङ् कर आङ्गाॽ आसेसे मिङ् यहवे दाङ्बालाम् खे़ङ्हाॽरे़ओ ओसेःन्धाङ् मे़जोःक्सिङ्ङान्॥ 4 खे़ङ्हाॽ वेॽ लाजेॽबा मे़बोःक्खे़आङ् मे़युङे़बा कन् कनान लाजेन् माङ्हुप् चोगुङ् हे़क्क्याङ् खे़ङ्हाॽ पिनिङ् मे़त्तुङ्सिङ्ङाङ् माङ्हुप्पाङ् चोगुङ्ङाङ् वये़॥ 5 आङ्गाॽ आल्ल इस्राइलिहाॽरे़ खुन्छिॽ तुक्खे़ःन् नु मे़रिङ्ङिन् खे़प्सुङ्ङाङ् वाॽआ॥ मिस्रिहाॽरे़ खे़ङ्हाॽ योःग्बा योःग्मा मे़जोगुसिङ्आङ् वाॽ हे़क्क्याङ् आङ्गाॽ चोगुङ्बा माङ्हुप्पिन् निङ्वाॽ इःत्तुङ्ङाङ् वाॽ॥ 6 “कल्ले़चोगुल्ले़ इस्राइलिहाॽ मे़त्ते़से़ॽ, ‘आङ्गाॽ यहवे दाङ्बाआ, आङ्गाॽ खिनिॽ ताङ्से़ःप्निङ्ॽ हे़क्क्याङ् मिस्रिहाॽरे़ योक् के़म्जोगिबालाम् से़न्ने़निङ्ॽ॥ आङ्गाॽ मुक्साम्साबा आहुक्किल्ले़ साःप्सुङ्सिङ्ङाङ् मिस्रिहाॽ किप्मा के़घुबा खुम्दिङ् पिरुङ्सिङ् हे़क्क्याङ् खिनिॽ ताङ्से़ःप्निङ्ॽ॥ 7 आङ्गाॽ खिनिॽ आबाङे आमना पोङ्मारे़ लागि ताःक्निङ्, हे़क्क्याङ् आङ्गाॽ खिनिॽ निङ्वाॽफुमाङ् पोङ्ङा॥ खे़ब्याङ् आङ्गाॽ खिनिॽ यहवे दाङ्बा निङ्वाॽफुमाङ्आ, मिस्रिहाॽरे़ योक् के़म्जोगिबालाम् खुने़ॽ खिनिॽ के़लःत्ति के़भे़त्ति के़लॽबा पाःन्निन् खिनिॽ कुसिङ् के़निःत्तुम्ॽ॥ 8 आत्तिन् लाजेन् आङ्गाॽ अब्राहाम, इसहाक नु याकुबे़न् पिनिङ् मे़त्तुङ्सिङ्ङाङ् माङ्हुप् चोगुङ्ङाङ् वये़, खे़न् लाजेॽओ आङ्गाॽ खिनिॽ के़त्निङ्ॽ हे़क्क्याङ् खे़न् लाजेन् आङ्गाॽ खिनिॽ युक्को पिनिङ्ॽ॥ आङ्गाॽए यहवे दाङ्बाआरो॥’” 9 मोसाःल्ले़ खे़न् पाःन्हाॽ इस्राइलिहाॽ मे़त्तुसि, कर खे़न् पाःन्निन् खे़म्मा खे़ङ्हाॽ मे़न्दे़न्दे़न् थेआङ्भे़ल्ले़ साॽरिक् ताप्फे़ःल्लिक् मे़मे़त्तुसिआङ् योक् मे़जोगुसिबाल्ले़ खे़ङ्हाॽरे़ खुनिॽ निङ्साङ् पुगे़आङ् मे़वये़॥ 10 खे़ब्याङ् यहवे दाङ्बे़ल्ले़ मोसान् मे़त्तु, 11 “पेगे़ॽ, खे़ने़ॽ इस्राइलिहाॽ खे़न् लाजेॽओलाम्बा पेःक्मा के़भाःक्तुसिरए पोङ्ॽ फाॽआङ् खे़न् मिस्रबा हाङ्ङिन् मे़त्ते़ॽ॥” 12 कर मोसाःल्ले़ यहवे दाङ्बान् मे़त्तु, “आङ्गाॽ पाःप्माए मे़ल्ले़मनाबे़ल्ले़ आबाःन्निन् इस्राइलिहाॽरे़ मे़ङ्घे़प्सुन्ॽ, हाङ्ङिल्ले़ग आत्तान् खे़प्सुआङ्बे?” 13 मोसान् नु हारुने़न् यहवे दाङ्बे़ल्ले़ अक्तङ्बा इङ्जाङ् पिरुसि, “मिस्र लाजेॽलाम् इस्राइलिहाॽ लःप्मातेॽमासिरे़ लागि आङ्गाॽ खे़न्छिॽ मे़त्ने़सिङ्ङाङ् वाॽ फाॽआङ् खे़न् मिस्रिहाॽ नु हाॽङ्ङिन् मे़त्ते़से़ॽओ॥” मोसा नु हारुने़ल्ले़ खुन्छिॽ मिङ्स्रा 14 खे़ङ्हाॽरे़ खुन्छिॽ हिम्सयङ्हाॽरे़ लाम्लोबा मनाहाॽ कन्हाॽ मे़वये़— इस्राइलरे़ कुस्सा तुम्बा रुबेन वये़, खुने़ॽ कुस्साहाॽ हनोक, पल्लु, हेस्रोन नु कर्मि मे़वये़॥ रुबे़ने़ल्ले़ कुधाःक्हाॽ हाबा कन्हाॽ मे़वये़॥ 15 सिमियोनरे़ तुक्सि कुस्सा ये़म्बत्छा मे़वये़— यमुएल, यामिन, ओहद, याकिन, सोहर नु कनानि मे़न्छुमा ले़प्माङ्बा सौल॥ खुन्छिॽ आबाङे आबाङे मिङ् कुइसिःक्पा हिम्सयङ्हाॽरे़ खुनिॽ थाःक्थे़बा मे़बोःक्खे़॥ 16 ले़बिरे़ कुस्सा ये़म्बित्छा सुम्सि मे़वये़— गेर्सोन, कहात नु मरारि॥ खे़ङ्हाॽ आबाङे आबाङे खुन्छिॽ मिङ् कुइसिःक्पा हिम्सयङ्हाॽरे़ खुनिॽ थाःक्थे़बा मे़बोःक्खे़॥ ले़बिन् १३७ तङ्बे थारिक् हिङे़॥ 17 गेर्सोनरे़ कुस्सा ये़म्बित्छा ने़त्छि वये़सि— लिब्नि नु सिमि॥ खे़ङ्हाॽरे़ खुन्छिॽ यरिक् मुॽइदाङ्सा मे़वये़॥ 18 कहातरे़ कुस्सा ये़म्बित्छा लिसि मे़वये़— अम्राम, यिसहार, हेब्रोन नु उज्जिएल वये़॥ कहाते़न् १३३ तङ्बे थारिक् हिङे़॥ 19 मरारिरे़ कुस्सा ये़म्बित्छा ने़त्छि वये़सि॥ महलि नु मुसि॥ ले़बिरे़ कुधाःक्हाॽरे़ खुन्छिॽ हिम्सयङ्हाॽ खे़ङ्हाॽरे़ खुन्छिॽ थाःक्हाॽ कन्हाॽएरो॥ 20 अम्रामे़ल्ले़ आबाङे कुन्न्या योकेबेदे़न् मेःक्खिम् मे़त्तु, खे़ल्ले़ हारुने़न् नु मोसान् सावाःन्दुसि॥ अम्रामे़न् १३७ तङ्बे हिङे़॥ 21 यिसहाररे़ कुस्सा ये़म्बित्छा सुम्सि मे़वये़— कोरह, नेपेग नु जिक्रि॥ 22 उज्जिएलरे़आङ् कुस्सा ये़म्बित्छा सुम्सि मे़वये़— मिसाएल, एलसाफान नु सिथ्रि॥ 23 हारुने़ल्ले़ अम्मिनादाबरे़ कुस्सा मे़न्छुमा नहसोनरे़ कुन्साॽ एलिसिबाःन् मेःक्खिम् मे़त्तु, खे़ल्ले़ नादाब, अबिहु, एलाजार नु इतामरे़न् सावाःन्दुसि॥ 24 कोरहरे़ कुस्साहाॽ— अस्सिर, एल्काना नु अबिआसाप मे़वये़॥ कोरहरे़ कुहिम्सयङ्हाॽ हाबा कन्हाॽएरो॥ 25 हारुने़ल्ले़ कुस्सा एलाजारे़ल्ले़ पतिएलरे़ कुस्सा मे़न्छुमाहाॽओ लत्छा मेःक्खिम् मे़त्तु, खे़ल्ले़ पिनहासे़न् सा कत्तु॥ ले़बिहाॽरे़ खुनिॽ हिम्सयङ्हाॽओबा मुलि मनाहाॽ खे़ङ्हाॽरे़ खुनिॽ थाःक्थाःक् कुइसिक् कन्हाॽए मे़वये़॥ 26 इस्राइलिहाॽ खुन्छिॽ मनासुम् कुइसिक् मिस्रलाम्बा लःत्ते़ फे़त्ते़से़ॽ फाॽआङ् यहवे दाङ्बे़ल्ले़ हाबा खे़न् मोसान् नु हारुने़न्ने मे़त्तुसिआङ् वये़॥ 27 मिस्रलाम्बा इस्राइलिहाॽ लःप्मा फे़प्मासिरे़ लागि मिस्रबा हाङ्ङिन्नु पान् के़बाःप्पा मोसान् नु हारुने़न्ने वये़सि॥ यहवे दाङ्बे़ल्ले़ मोसाःन्नु हारुने़न् इङ्जाङ् पिरुसि 28 आत्तिन् ये़न्नो यहवे दाङ्बान् मोसाःन्नु पारे़आङ् वये़, 29 आम्भा खे़ल्ले़ याःन्दिक् खुने़ॽ अक्खे पाःत्तु, “आङ्गाॽ यहवे दाङ्बाआ॥ आङ्गाॽ खे़ने़ॽ थेधे पाःन्हाॽ मे़त्ने़आङ् वाॽ, खे़ङ्हाॽ के़रे़क् मिस्रबा हाङ्ङिन् मे़त्ते़ॽ॥” 30 कर मोसाःल्ले़ मे़त्तु, “आङ्गाॽ पाःप्मा के़ले़बा मे़जोक्कान् के़लॽबा आदाङ्बारे़ के़निसुॽ॥ आङ्गाॽ आबाःन्निन् हाङ्ङिल्ले़ आक्खेआङ् खे़प्सुबे?” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.