लाम्दिक् 5 - लिम्बुमिस्रबा हाङ्ङिल्ले़ कुदगि मोसान् नु हारुने़न् 1 खे़न् एगाङ् मोसान् नु हारुने़न् मिस्रबा हाङ्ङे़ओ पेसे़त्छिआङ् मे़त्ते़सु, “इस्राइलबा निङ्वाॽफुमाङ् यहवे दाङ्बे़ल्ले़ अक्खे पाःत्तुॽ, ‘आङ्गाॽ आमनाहाॽ पेःक्मा फाःक्ते़से़ॽ हे़क्क्याङ् खे़ङ्हाॽरे़ मुरे़क् खारे़क् थेआङ् के़होप्पादे़न्नो आङ्गाॽ माङ्से़वा मे़प्मारे़ लागि लत्छा तङ्नाम्धिक् मे़दोसुर॥’” 2 फारो हाङ्ङिल्ले़ पाःत्तु, “यहवे दाङ्बान् हाःप्पे? आङ्गाॽ खुने़ॽ कुबाःन्निन् खे़प्सुङ्ङाङ् थेआङ् इस्राइलिहाॽ पेक् फाःक्तुङ्सिङ्बाबे? आङ्गाॽ यहवे दाङ्बान् कुसिङ् मे़निःत्तान् हे़क्क्याङ् इस्राइलिहाॽ पेःक्मा मे़भाःक्तुङ्सिङ्ङिन्॥” 3 मोसान् नु हारुने़ल्ले़ नोगप् पिरे़त्छुआङ् मे़त्ते़सु, “हिब्रुहाॽरे़ खुन्छिॽ निङ्वाॽफुमाङ्ङिल्ले़ आनिगे मिक् निमा सुफो पिरिगे़आङ् वाॽ॥ मुरे़क् खारे़क् थेआङ् के़होप्पादे़न्नो सुम्यान् थारिक् लाम्दिक् चोःक्मा आनिगे आभाःक्ते़ॽ हे़क्क्याङ् आनिगे खे़प्मो पेगिगे़आङ् आनिगे यहवे दाङ्बा निङ्वाॽफुमाङ्ङो सिदुङ्जभा तोःन्दुम्बे़॥ आनिगे अक्खे मे़जोगुम्बे़न्ने़भग्र माङ्दुक्मा इग्र थङ्लाम्बा खुने़ॽ खाप्पुथ्यःङ् चोगिगे़॥” 4 खे़ब्याङ् मिस्रबा हाङ्ङिल्ले़ मोसान् नु हारुने़न् मे़त्तुसि, “मनाहाॽ याःम्बक् चोःक्मा मे़म्बाङ्मासिरे़ कुबेन् थेबे? खे़न् योःग्बा योःग्माहाॽ खुन्छिॽ याःम्बक् चोःक्से़ पाङ्घे़देसे़से़ॽ॥” 5 फारोल्ले़ याम्मो मे़त्तुसि, “ओमे़त्ते़से़ॽ, खे़ङ्हाॽ लाजेॽओबा मनाहाॽनुःल्ले़आङ् यरिक् मे़बोःक्खे़आङ् मे़वाॽ, कर खिन्छिॽग खे़ङ्हाॽ याःम्बक् चोःक्मा मे़म्बाङ्मासि निङ्वाॽ के़जोःक्सुर के़वाॽसि!” 6 आम्भा खे़न् ये़न्ले़ याःन्दिक् हाङ्ङिल्ले़ याःम्बक्को मना के़भम्बा मिस्रिहाॽ नु याःम्बक् ओगे़मे़प्पा इस्राइलिहाॽ अक्तङ्बा इङ्जाङ् पिरुसि, 7 “इस्राइलिहाॽ खाम्ले़क् चोःक्मारे़ लागि के़बिरुम्सिम्बा याॽलाङ्ङिन् आल्लआङ्धो मे़बिराम्सिम्मिन्ने़ॽ॥ खे़ङ्हाॽ मे़बेःक्काङ् चाहा मे़जोःक्पा याॽलाङ्ङिन् आबाङे मे़गोःत्तु मे़दारुर॥ 8 कर आल्लो कम्भ थारिक् खे़ङ्हाॽरे़ आक्ख्यारिक् खाम्ले़क् मे़जोगुर मे़वये़ खे़म्म्याक्के खे़ङ्हाॽ चोःक्मा पाङ्घाम्सिम्मे़ॽ॥ आक्ख्यारिक्काङ् मे़सुःन्ने़न्ल चबे़ःत्छिक्लक् चोःक्मा मे़भाःक्ताम्सिम्मिन्ने़ॽ, थेआङ्भे़ल्ले़ खे़ङ्हाॽ के़ले़म्बा मे़बोःक्खे़आङ् मे़वाॽ॥ खे़ल्ले़चोगुल्ले़ए खे़ङ्हाॽ अक्खे मे़लॽआङ् मे़अःक्ल मे़वाॽ, ‘आनिगे निङ्वाॽफुमाङ्ङिल्ले़ कुलागि सिदुङ्जभा तोःन्छे़ पेःक्मा आभाःक्ते़ॽ॥’ 9 खे़ङ्हाॽरे़ खुनिॽ सुक्सुक् याःम्बक् चोःक्मा पाङ्घाम्सिम्मे़ॽ हे़क्क्याङ् नाःम्सिङ्मा मे़भाःक्ताम्सिम्मिन्ने़ॽ॥ हे़क्के पोङ्ङिल्ले़ खे़ङ्हाॽ इङ्ले़क्पा पान् खे़म्मा याःन्दिक् मे़न्दाने़न्॥” 10 खे़ब्याङ् याःम्बक्को मना के़भम्बा मिस्रिहाॽ नु याःम्बक् ओगे़मे़प्पा इस्राइलिहाॽ मे़बेआङ् इस्राइलिहाॽ मे़मे़त्तुसि, “हाङ्ङिल्ले़ पाःत्तुआङ् वाॽ, आल्लआङ्धो आनिगे याॽलाङ् मे़बिआसिगे़न्॥ 11 खिनिॽ आबाङे आत्तिनुसाङ् याॽलाङ् के़गोःत्तुम् के़दारुम्ल पोङ्ॽ॥ कर तगिबा यारिक्के खाम्ले़क् के़जोगुम्ल पोङ्ॽ॥” 12 कल्ले़चोगुल्ले़ इस्राइलिहाॽ मिस्र लाजेॽ खाराक् याॽलाङ् चेःक्वा कोःप्मारे़ लागि मे़से़रे़आङ् मे़वये़॥ 13 खे़न् याःम्बक्को के़भम्बाहाॽरे़ खे़ङ्हाॽ अक्खे मे़मे़त्तुसिर के़साक्पा मे़जाःत्तुसि, “याॽलाङ् पिआसिगे़ल्ले़ थिक्याःन्ले़ आक्ख्यारिक् खाम्ले़क् के़जोगुम् खे़म्म्याःक्के़ के़जोगुम्ल पोङ्ॽ॥” 14 फारोल्ले़ कुयाःम्बक्को मना के़भम्बा मिस्रिहाॽरे़ याःम्बक् ओगे़मे़प्पा इस्राइलिहाॽ मे़हिप्तुसि, हे़क्क्याङ् खे़ङ्हाॽ अक्खे मे़मे़त्तुसिआङ् सेःन्मे़दोसुसि, “तगिबा यारिक्के खाम्ले़क् मे़न्जोःक्के मिःप्मा नु आइन् खिनिॽ मनाहाॽरे़ याःम्बक्किन् थेआङ् चोःक्मा मे़न्छुरुन्?” 15 खे़ब्याङ् मना याःम्बक्को के़भम्बा इस्राइलिहाॽ फारोओ मे़बेआङ् पेलि मे़भाक्तु, “आदाङ्बारे़ के़से़वारोबाहाॽ आदाङ्बारे़ थेआङ् अक्खेलॽरिक् ताप्फे़ःल्लिक् के़मे़त्तुसिबाबे? 16 आनिगे याॽलाङ् मे़घोसुम्बे़न् हे़क्केसाङ् आनिगे खाम्ले़क् चोःक्मा याप्मि इङ्जाङ् मे़बिरिगे़॥ कम्भ्रक् मेःन् आल्ल आनिगे हिप्माआङ् मे़हेःक्तिगे़आङ् वाॽ॥ कर आदाङ्बारे़ के़मनाहाॽरे़ए याःम्बक्क मे़भेःन्दुआङ् वाॽ॥” 17 फारोल्ले़ मे़त्तुसि, “खिनिॽ पले़म् के़ले़मि हे़क्क्याङ् याःम्बक् चोःक्मा निङ्वाॽ के़न्जोगुम्मिन्॥ कल्ले़चोगुल्ले़ खिनिॽ के़बाःत्तुम्ॽ, ‘यहवे दाङ्बाओ सिदुङ्जभा तोःम्मारे़ लागि आनिगे पेःक्मा आभाःक्ते़॥’ 18 याःम्बक्को नुःक्खे़म् पेगे़म्मे़ॽ॥ खिनिॽ याॽलाङ् के़ङ्घोसुम्मिन् कर तगिबा यारिक्के खाम्ले़क् के़जोगुम्ल पोङ्ॽ॥” 19 तगिबा यारिक्के थिक्याःन्धक् खाम्ले़क् चोःक्मा पोङ्ॽ के़लॽबा पान् मे़घे़प्सुआङ् खे़न् याःम्बक्को के़भम्बा लाम्लोहाॽरे़ आल्ल आनिॽ के़साक्पो आध्ये़रे़त्छ फाॽआङ् निङ्वाॽ मे़घोसु॥ 20 खे़न् याःम्बक्को के़भम्बा लाम्लोबाहाॽ मे़नुःक्खे़ मे़भे़रे़ल्ले़ लाम्मो मोसान् नु हारुने़ल्ले़ खे़ङ्हाॽ हाङ्घे़सुसिर युङे़सिबा खे़ङ्हाॽरे़ मे़दुमुसि॥ 21 खे़ङ्हाॽरे़ मोसान् नु हारुने़न् मे़मे़त्तुसि, “खिन्छिॽ थे़मा के़जोगुसिआङ् के़वाॽसि, यहवे दाङ्बे़ल्ले़ निसुआङ् वाॽ॥ खिन्छिॽ के़जोगुसिल्ले़ हाङ्ङिन् नु कुसुहाङ्युक्पाहाॽ आनिगे़नु खुन्छिॽ याःक्ले़ॽरे़आङ् वाॽ॥ खे़ल्ले़ लागि निङ्वाॽफुमाङ्ङिल्ले़ खिन्छिॽ खुम्दिङ् के़बिसिॽ॥ खे़न्छिॽ के़जोगुसिबाल्ले़ चोगुल्ले़ खे़ङ्हाॽरे़ आनिगे से़प्मारे़ लागि खे़माॽ चोःक्मा लाम् मे़घोसुआङ् वाॽ॥” मोसाःल्ले़ यहवे दाङ्बाओ कुलुङ्हान् पाःन्हाॽ युक्खु 22 खे़ब्याङ् मोसान् याम्मो यहवे दाङ्बान् ले़प्माङ् हिसिङ्ङाङ् पाःत्तु, “यहवे दाङ्बाए, थेआङ् खे़ने़ॽ के़मनाहाॽ के़साक्पो के़धासुसिबाबे? खे़ने़ॽ थेआङ् आङ्गाॽ कॽयो के़बाङ्घाङ्बाबे? 23 खे़ने़ॽ के़मिङ्ङो आङ्गाॽ पेगाङ्ङाङ् हाङ्ङिन्नु पाराङ्बा ये़म्माङ्धो खे़ल्ले़ कन्हाॽ आल्लसाङ् साॽरिक् ताप्फे़ःल्लिक् मे़त्तुसिआङ् वाॽ॥ कन्हाॽ से़म्मासिरे़ लागि खे़ने़ॽ थे़माआङ् मे़न्जोःक्के के़वाॽरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.