लाम्दिक् 4 - लिम्बुमोसारे़ निङ्वाॽ के़माबा याःम्बक्हाॽ चोगु 1 खे़ब्याङ् मोसाःल्ले़ यहवे दाङ्बान् मे़त्तु, “कर इस्राइलिहाॽरे़ आङ्गाॽ नामे़न्छाॽआन् हे़क्क्याङ् आङ्गाॽ आबाःन्निन् मे़ङ्घे़प्सुन्नाङ् ‘यहवे दाङ्बे़न् खे़ने़ॽओ निधाःम्सिङ्बा मेःन्’ फाॽआङ् खे़ङ्हाॽरे़ मे़बाःत्तुल्ले़ आङ्गाॽ थे़मा चोगुङ्बाबे?” 2 यहवे दाङ्बे़ल्ले़ सेःन्दोसु, “खे़ने़ॽ के़हुक्को थे़माःन् के़गत्तुॽ?” खे़ल्ले़ पाःत्तुॽ, “तक्कात्॥” 3 यहवे दाङ्बे़ल्ले़ मे़त्तु, “खे़न् खाम्बाङ्ङो लाप्फुसे़ॽ॥” मोसाःल्ले़ तक्काःत्तिन् खाम्बाङ्ङो लाप्फुसु हे़क्क्याङ् खे़न् असेःक् पोःक्खे़ खे़ब्याङ् मोसान् किसे़आङ् खे़त्छिङ्॥ 4 खे़ब्याङ् यहवे दाङ्बे़ल्ले़ मोसान् मे़त्तु, “के़हुक्किन् सन्छे़ॽआङ् खे़ल्ले़ कुमिओ ते़म्से़ॽ॥” हे़क्क्याङ् मोसाःल्ले़ कुहुक्किन् सन्छुआङ् ते़म्सु, खे़ब्याङ् खे़न् खुने़ॽ कुहुक्को याम्मो तक्काःत्ते पोःक्खे़बे॥ 5 यहवे दाङ्बे़ल्ले़ मे़त्तु, “खे़ङ्हाॽरे़ खुन्छिॽ पाधे़बा थाःक्थे़बा अब्राहाम, इसहाक नु याकुबरे़ कुनिङ्वाॽफुमाङ्ङिन् खे़ने़ॽओ ओःन्धाक्सिङ्बारे़त्छ फाॽआङ् खे़ङ्हाॽरे़ आम्भा कन् याःम्बक्कोलाम्बा नामे़साॽरुर॥” 6 खे़ब्याङ् यहवे दाङ्बाल्ले़ मोसान् आल्लसाङ् अक्खे मे़त्तु, “खे़ने़ॽ के़हुक्किन् के़हे़प्सुबा सुङ्घेःक्वाओ केःते़ॽ॥” खुने़ॽ कुहुक्किन् हे़प्सुबा सुङ्घेःक्वाओ केःत्तु, हे़क्क्याङ् कुहुक्किन् लाःक्कात् लःत्तुल्ले़ खे़न् से़ॽमा तुक्मे़ल्ले़ तरुआङ् कुहुक्किन् नाःङ् हे़क्के फसुःक्क्याःप्पा पोःक्खे़बे॥ 7 खे़ब्याङ् यहवे दाङ्बे़ल्ले़ मे़त्तु, “खे़ने़ॽ के़हुक्किन् याम्मो सुङ्घेःक्वाओ याक्ते़ॽ॥” मोसाःल्ले़ हे़क्केए चोगु हे़क्क्याङ् याम्मो कुहुक्किन् लाःक्कात् लःत्तुल्ले़ खे़न् खुने़ॽ कुधक्कोबा ने़क्सा हे़क्तङ्बाए नुबा पोःक्खे़॥ 8 यहवे दाङ्बे़ल्ले़ खुने़ॽ मे़त्तु, “खे़ङ्हाॽरे़ खे़ने़ॽ के़बाःन्निन् नामे़न्छाॽरुन् हे़क्क्याङ् खे़न् तगिबा मिक्सेःन्निन् नसान् मे़न्जोगुन्ने़भग्र कन् मिक्सेःन्निल्ले़ चोगुल्ले़ खे़ङ्हाॽरे़ नसान् मे़जोगुॽ॥ 9 कर खे़ङ्हाॽरे़ कन् ने़प्माङ् मिक्सेःन्हाॽआङ् नामे़न्छाॽरुन् हे़क्क्याङ् खे़ने़ॽ के़बाःन्ने़न्नाङ् मे़ङ्घे़प्सुन्ने़भग्र निल वहःङ्ङोबा कुभा च्वाःत्चि फे़त्ते़ॽआङ् कुसे़ङ्ग्रा खाम्बाङ्ङो हुक्खे़ॽ॥ खे़ने़ॽ निल वहःङ्ङोलाम् के़भे़त्तुबा खे़न् च्वाःत्तिन् खाम्बाङ्ङो माक्खिॽ पोङ्ॽ॥” 10 कर मोसाःल्ले़ मे़त्तु, “यहवे दाङ्बाए आङ्गाॽ मे़बाङ्घाङ्ङिन्ने़ॽओ॥ आङ्गाॽ नुरिक्काङ् पाःप्मा मे़सुक्कान्॥ आदाङ्बारे़ के़बाःन्जाःक्किन् खे़प्सुङ्ङाङ्साङ् आङ्गाॽ नुरिक् पाःप्मा के़सुक्पा मे़म्बोङ्ङे वाॽआ, थेआङ्भे़ल्ले़ आङ्गाॽ मसुआङ् आम्ब्रा खॽरुररक् पाःप्मा सुक्का॥” 11 यहवे दाङ्बे़ल्ले़ खुने़ॽ मे़त्तु, “मनान् पाःप्मारे़ लागि हाःत्ले़ मुरा पिरुबे? हाःत्ले़ खुने़ॽ कुबान् मे़ल्लःम्मनाबा इग्र कुनागे़धाक्पा चोगुबे? हाःत्ले़ खुने़ॽ मिक् पिरु इग्र मिक्फःम्बा चोगुबे? कन् के़रे़क् पाःन्हाॽ के़जोःक्पा आङ्गाॽ यहवे दाङ्बे़न्ने मेःम्बि? 12 आल्ल खे़ने़ॽ पेगे़ॽ, आङ्गाॽ पाःप्मारे़ लागि फाॽने़॥ थे़मा पाःप्मा पोङ्ॽ, आङ्गाॽ खे़ने़ॽ हुॽने़॥” 13 कर मोसाःल्ले़ नोगप् पिरु, “मेःन्, यहवे दाङ्बाए, कुभा वेॽ थिक् पाङ्घे़ॽओ॥” 14 कन् पाःन्नो यहवे दाङ्बे़न् मोसाःन्नु कुयाःक्ले़ॽरे़ हे़क्क्याङ् खुने़ॽ मे़त्तु, “के़म्भुॽ ले़बि हारुनले़ कुयाःम्बेओ खे़ने़ॽ थे के़बाःत्तुॽ? खुने़ॽ नुरिक्काङ् पाःप्मा के़ले़बा चोक् फाॽआङ् आङ्गाॽ निसुङ्ॽ॥ से़क्खाःल्ले़ खुने़ॽ आल्लो खे़ने़ॽ के़दुम्से़ फे़ल्ल पत् हे़क्क्याङ् खे़ने़ॽ के़निआङ् कुनिङ्वाॽ ताःॽ॥ 15 खुने़ॽनु पारे़ॽ हे़क्क्याङ् थे पाःप्मा पोङ्ॽ, खे़न् मे़त्ते़ॽ॥ हे़क्क्याङ् थे चोःक्मा पोङ्ॽ, खे़न्छिॽ ने़प्माङ् आङ्गाॽ पाःप्मा हुॽने़सिङ्ॽ॥ 16 खे़ने़ॽ के़लागि खुने़ॽ पान् के़बाःप्पा पोङ्ङाङ् मनाहाॽनु ताॽजे़ङ्ॽ॥ खे़ने़ॽग निङ्वाॽफुमाङ् हे़क्तङ्बा पोःक्खे़आङ् खे़ल्ले़ थे़मा पाःप्मा पोङ्ॽ, खे़न् पाःन्निन् खुने़ॽ मे़त्ते़ॽ॥ 17 कर कन् तक्काःत्तिन् खे़ने़ॽ के़हुक्कोए तेॽरे़आङ् पेगे़ॽ॥ खे़ने़ॽ कन् तक्काःत्तोलाम् निङ्वाॽ के़माबा मिक्सेःन्हाॽ के़जोगुरो॥” मोसान् मिस्र लाजेॽओ नुःङ्ॽ 18 खे़न् एगाङ् मोसान् नुःक्खे़आङ् खुने़ॽ कुन्नुःप्पा यित्रोओ त्ये़आङ् मे़त्तु, “आल्ल आङ्गाॽ पेलि फाक्ने़, आम्भुॽ आन्साॽसिरे़ खुन्छिॽ तुम्से़ मिस्र लाजेॽओ पेःक्मा फाःक्ताङ्ङे़ॽओ, खे़ङ्हाॽ कुहिङ्वे़त्ते मे़वाॽबि इ थे मे़जोःक्ल मे़याक्पि खुन्छिॽ तुम्से़ पेःक्मा पोःक्खे़॥” यित्रोःल्ले़ मे़त्तु, “पोङ्ॽ, नुरिक्काङ् पेगे़ॽओ॥” 19 मोसान् मिद्यान लाजेॽलाम् थासिङ्मानुःल्ले़ तगि यहवे दाङ्बे़ल्ले़ खुने़ॽ मे़त्तु, “खे़ने़ॽ मिस्र नुःक्खे़ पेगे़ॽ॥ खे़ने़ॽ से़प्मा के़गोःप्पाहाॽ के़रे़क् मे़स्ये़ मे़घे़रे़॥” 20 कल्ले़चोगुल्ले़ मोसाःल्ले़ खुने़ॽ कुमेत् नु कुस्साहाॽ लत्छा अदङ्ङो युक्खुसि हे़क्क्याङ् निङ्वाॽफुमाङ्ङिल्ले़ कुदक्काःत्तिन् कुहुक्को याङ्सिङ्ङाङ् खुने़ॽ मिस्र ले़प्माङ् थासिङ्॥ 21 यहवे दाङ्बे़ल्ले़ मोसान् मे़त्तु, “आल्ल खे़ने़ॽ मिस्र लाजेॽओ के़नुःङ्ङाङ् के़बेःक्ल के़बत्॥ आङ्गाॽ खे़ने़ॽ निङ्वाॽ के़माबा याःम्बक्हाॽ चोःक्मारे़ लागि मुक्साम् पिने़आङ् वाॽ, खे़ङ्हाॽ के़रे़क् हाङ्ङिल्ले़ कुदगि चोःक्मारे़ लागि निङ्वाॽ इःत्ते़ॽ॥ कर आङ्गाॽ हाङ्ङिन् हादिङ् के़धक्पा चोगुङ्ॽ हे़क्क्याङ् खुने़ॽ इस्राइलिहाॽ पेःक्मा मे़भाःक्तुसिन्ॽ॥ 22 खे़ब्याङ् खे़ने़ॽ हाङ्ङिन् अक्खे मे़त्ते़ॽ, ‘यहवे दाङ्बाल्ले़ अक्खे पाःत्तुॽ, इस्राइले़न् आङ्गाॽ आस्सा तुम्बारो॥ 23 हे़क्क्याङ् आङ्गाॽ खे़ने़ॽ मे़त्ने़, “आङ्गाॽ आस्सान् पेःक्मा फाःक्ते़ॽ हे़क्क्याङ् खे़ल्ले़ आङ्गाॽ माङ्से़वा मे़त्तार॥ खे़ने़ॽ खे़न् पेःक्मा के़म्भाःक्तुन्ने़भग्र, ओमे़त्ते़ॽ, आङ्गाॽ खे़ने़ॽ के़स्सा तुम्बे़न् स्ये़रुङ्ॽ॥”’” 24 हे़क्क्याङ् लाम्मो याङ्धोःक्मादे़न्नो यहवे दाङ्बे़ल्ले़ मोसान् तुमु खे़ब्याङ् खुने़ॽ से़प्मा कोःत्तु॥ 25 कर सिप्पोराःल्ले़ लत्छा हागे़सुक्पा कुहे़क्मा लुङ्से़रुङ्बे़न् याङ्सिङ् हे़क्क्याङ् कुस्साःल्ले़ कुजुत्चुॽबाल्ले़ कुसम्मिन् हे़गुआङ् मोसाःल्ले़ कुलाङ्ङिन् सुसु पिरु, कम्भलॽरिक् हर्दो हे़गुआङ् खुने़ॽ मे़त्तु, “खे़ने़ॽ आङ्गाॽ आलागि माक्खिॽलाम्बाबा आहिम्साबाने़रो॥” 26 (“खे़ने़ॽग माक्खिॽलाम्बाबा आङ्गाॽ आहिम्साबाने़रो” लॽरे़बान् सिप्पोराःल्ले़ हर्दो हे़क्मान् पाःत्तुबारो॥) कल्ले़चोगुल्ले़ यहवे दाङ्बे़ल्ले़ मोसान् मे़से़रुन्॥ 27 आम्भा कन् ये़म्मो यहवे दाङ्बे़ल्ले़ हारुने़न् मे़त्तु, “मुरे़क् खारे़क् थेआङ् के़होप्पादे़न्नो पेगे़ॽआङ् मोसान् तुमे़ॽ॥” कम्भलॽरिक् हारुने़न् मोसाःल्ले़ कुदुम्से़ सेसे कोःक्माओ पे हे़क्क्याङ् खुने़ॽ तुमुआङ् हे़प्प्रे़क् हे़प्तु॥ 28 खे़ब्याङ् यहवे दाङ्बे़ल्ले़ खुने़ॽ मिस्र लाजेॽ पेःक्मा इङ्जाङ् पिरुल्ले़ मे़त्तुबा के़रे़क् पाःन्हाॽ मोसाःल्ले़ हारुने़न् चे़क्तु॥ आत्तिन् आत्तिन् निङ्वाॽ के़माबा याःम्बक्हाॽ खुने़ॽ चोःक्मा पाङ्घुआङ् वये़, खे़न्नाङ् मोसाःल्ले़ हारुने़न् चे़क्तु॥ 29 हे़क्क्याङ् मोसान् नु हारुने़न् मिस्र पेसे़त्छि खे़ब्याङ् के़रे़क् इस्राइलि लाम्लोबाहाॽ सोरिक् फुक्खे़सुसि॥ 30 यहवे दाङ्बे़ल्ले़ मोसान् मे़त्तुबा के़रे़क् पाःन्हाॽ हारुने़ल्ले़ खे़ङ्हाॽ चे़क्तुसि॥ मोसाःल्ले़ के़रे़क् इस्राइलिहाॽरे़ खुन्छिॽ तगि निङ्वाॽ के़माबा याःम्बक्हाॽ चोगुआङ् ओःन्धाक्तुसि॥ 31 हे़क्क्याङ् इस्राइलिहाॽरे़ नसान् मे़जोगु, खे़ब्याङ् यहवे दाङ्बे़ल्ले़ इस्राइलिहाॽ ओमे़त्तुसिबा नु खे़ङ्हाॽरे़ खुन्छिॽ तुक्खे़ःन् निसुबा पाःन्निन् मे़घे़प्सु हे़क्क्याङ् खे़ङ्हाॽ अःक्खुम् मे़भन्छिङ्ङाङ् यहवे दाङ्बान् से़वा नु माङ्से़वा मे़मे़त्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.