लाम्दिक् 39 - लिम्बुनिङ्वाॽफुसाम्बा चाङ् 1 सेसेदे़न्नोबा माङ्से़वा याःम्बक्ले़ लागि खे़ङ्हाॽरे़ हिःक्कङ्कङ्बा, पारान्ला, हे़ःत्ताङ्बा चाःम्मनाबा खिलाम् थाक्मनाबा चाङ्हाॽ, हे़क्क्याङ् हारुने़ल्ले़ कुलागि यहवे दाङ्बे़ल्ले़ मोसान् इङ्जाङ् पिरुबा कुइसिक् सुत्थो चाङ्हाॽ मे़जोगु॥ 2 एपोदे़ङ्ग खे़ङ्हाॽरे़ साम्म्याङ्, हे़क्क्याङ् हिःक्कङ्कङ्बा, पारान्ला, हे़ःत्ताङ्बा खि नु चुन्जुन् लॽरिक् फमनाबा नैनासुत् चिरिक्किल्ले़न् मे़जोगु॥ 3 खे़ङ्हाॽरे़ साम्म्याङ्ङिन् मे़भे़ःत्छुआङ् पाॽपाःम्बा कुले़प्हाॽ मे़घक्तु हे़क्क्याङ् इदाःक्हाॽ मे़जोगु॥ खे़न् हिःक्कङ्कङ्बा, पारान्ला, हे़ःत्ताङ्बा खि नु चुन्जुम्बा नैनासुत् चिरिक्को तङ्मारे़ लागि कुहुक्वा के़नुॽबा चोबेगुःल्ले़ कुयाःम्बक् वये़॥ 4 एपोदे़न् इभुप्मारे़ लागि खे़ङ्हाॽरे़ खे़न् ने़त्छि कुयाओ मे़जक्तुबा ने़त्छि फक्ताङ्ङो कुइभुप्माहाॽ मे़जोगु॥ 5 यहवे दाङ्बे़ल्ले़ मोसान् इङ्जाङ् पिरुआङ् वये़बा कुइसिक्, खे़ल्ले़ कुसम्धाङ् के़बप्पा साॽरिक् नुरिक् मे़भयुबा के़ङ्ङो युम्मनाबा फॽइःन् एपोदे़न्नु के़दुम्बा लत्छा चिरिक् खे़ल्ले़क् हे़क्के याःम्बक् के़बोङ्बा साम्म्याङ्, नु हियःक्यङ्यङ्बा, पारान्ला, हे़ःत्ताङ्बा खि नु चुन्जुन् लॽरिक् फमनाबा नैनासुत् चिरिक्किल्ले़न् वये़॥ 6 खे़ङ्हाॽरे़ साम्म्याङ्ङोबा कुहङ्हाॽओ अनिक्स मुधिङ्लुङ्हाॽ मे़दिःक्सु हे़क्क्याङ् इस्राइलबा ये़म्बित्छा साहाॽरे़ खुन्छिॽ मिङ्हाॽ एःप्साप्पो पप्पा हे़क्के खे़ॽयो मे़साप्तु॥ 7 यहवे दाङ्बे़ल्ले़ मोसान् मे़त्तुबा हे़क्के खे़ङ्हाॽरे़ एपोदओ के़बप्पा फक्ताङ्ङोबा कुॽइभुप्माहाॽओ इस्राइलबा ये़म्बित्छा साहाॽरे़ खुन्छिॽ लागि निङ्वाॽसोक् मुधिङ्लुङ् पोङ्मारे़ लागि खे़ङ्हाॽ खे़प्मो मे़भत्छुरो॥ साःङ्बे से़ःप्चाङ् मे़जोगु ( ला २८:१५-३० ) 8 खे़ङ्हाॽरे़ एपोदओबा याःम्बक् कुइसिक् कुहुक्वा के़नुॽबा चोबेगुःल्ले़ चोगुबा कुयाःम्बक्किल्ले़न् साःङ्बे से़ःप्चाङ्, साम्म्याङ्, हिःक्कङ्कङ्बा, पारान्ला, हे़ःत्ताङ्बा खि नु चुन्जुन् लॽरिक् फमनाबा चिरिक्किल्ले़न् मे़जोगु॥ 9 खे़न् लिसि कुसुक्पा के़बप्पा नु निले़ङ् मे़भाक्तुबा चोगे़॥ खे़न् सोःक्पित्ता थिक् कुलाम्ति नु सोःक्पित्ता थिक् कुभे़रे़ के़बप्पा चोगे़॥ 10 खे़प्मो मुधिङ्लुङ्हाॽरे़ लिसि कुदिःक्ला मे़दिःक्सु मे़भत्छु॥ थिक्सिगेक्पा कुदिःक्लाःन् हे़ःत्यङ्यङ्बा मुधिङ्लुङ्, हिःक्यङ्यङ्बा मुधिङ्लुङ्, अम्दाङ्बा मुधिङ् पत्छे़॥ 11 निसिगेक्पा कुदिःक्लाओ हिःक्कोःम्कोःम्बा मुधिङ्लुङ्, कुभिङ्ला मुधिङ्लुङ् नु लेःत्ताङ्बा मुधिङ्लुङ् पत्छे़॥ 12 सुम्सिगेक्पा कुदिःक्लाओ माक्कुम् के़लॽबा कुहे़ःत्ला मुधिङ्लुङ्, वरे़ङ्ले़ङ्बा कुहिःक्ला कुहे़ःत्ला मुधिङ्लुङ् नु पारान्ला चाःम्बा मुधिङ्लुङ् पत्छे़॥ 13 हे़क्क्याङ् लिसिगेक्पा कुदिःक्लाओ, नुधि चाःम्बा मुधिङ्लुङ्, अनिक्स मुधिङ्लुङ् नु अम्अम् के़लॽबा मुधिङ्लुङ् पत्छे़॥ 14 खे़न् मुधिङ्लुङ्हाॽ इस्राइलबा ये़म्बित्छा साहाॽरे़ खुन्छिॽ मिङ्हाॽ कुइसिक् थिबोङ्ङाङ् ने़त्छि वये़॥ के़रे़क्को एःप्साप्पो लक्मनाबा कुइसिक् थिबोङ्ङाङ् ने़त्छि थाःक्हाॽओबा लत्छा मुधिङ्लुङ् थक्मा लत्छा लत्छा मिङ् पत्छे़॥ 15 खे़ङ्हाॽरे़ साःङ्बे से़ःप्चाङ्ले़ लागि इदाक् हे़क्के माःप्मनाबा इसेःङ्बा साम्म्याङ् सिक्रिहाॽ मे़जोगु, 16 साम्म्याङ्ङिल्ले़न् ने़त्छि मुधिङ्लुङ्हाॽ फम्मा कुहङ्हाॽ नु साम्म्याङ् कुन्दुल्लो ने़त्छि मे़जोगु हे़क्क्याङ् ने़प्माङ् कुन्दुल्लोहाॽ साःङ्बे सेःप्चाङ्ङोबा थाःङ् ले़प्माङ् नाहाङ् कत्नाहाङ् कुयाओ मे़भत्छु॥ 17 साःङ्बे सेःप्चाङ्ङिल्ले़ कुया कुयाओ के़बप्पा खे़न् कुन्दुल्लोओ ने़त्छि साम्म्याङ् सिक्क्रिहाॽ मे़याक्तु॥ 18 ने़प्माङ् सिक्क्रिहाॽरे़ वेॽ ने़त्छि कुयाहाॽ खे़न् ने़प्माङ् मुधिङ्युङ्मा कुहङ्ङो मे़दुम्सुआङ् एपोदओबा फक्ताङ्ङोबा कुइभुप्मो तगाङ् ले़प्माङ् मे़भत्छु॥ 19 खे़ङ्हाॽरे़ ने़त्छि साम्म्याङ् कुन्दुल्लो मे़जोगुआङ् साःङ्बे से़ःप्जाङ्ङोबा एपोद सिगाङ् ले़प्माङ् वेॽ ने़प्माङ् कुसुक्पोबा कुगःङ्ग्याओ मे़भत्छु॥ 20 खे़ङ्हाॽरे़ आल्लसाङ् ने़त्छि साम्म्याङ् कुन्दुल्लोहाॽ मे़जोगुआङ् एपोदे़ल्ले़ कुदगाङ् ले़प्माङ् फक्ताङ्ङो इघेःङ्मनाबा कुसिगाङ्लाम् नु एपोदबा फोॽओ युम्मनाबा फॽइःल्ले़ कुसम्धाङ्बा कुदमादे़न्नो मे़भत्छु॥ 21 साःङ्बे से़ःप्जाङ्ङिङ्ग खे़प्मो के़बप्पा कुन्दोल्लोहाॽलाम् एपोदओबा कुन्दोल्लोहाॽओ हिःक्कोःम्कोःम्बा कुनाम्मिल्ले़ फॽइओ इमे़घेःक्खु, हे़क्केलॽरिक् खे़न् एपोदे़न् ना नु कत्ना सःम्मा मे़घोने़न्॥ हे़क्तङ्बाए चोःक्मा यहवे दाङ्बे़ल्ले़ मोसान् इङ्जाङ् पिरुआङ् वये़रो॥ निङ्वाॽफुसाम्बाहाॽरे़ वेॽ खुन्छिॽ चाङ्हाॽ ( ला २८:३१-४३ ) 22 हे़क्क्याङ् खे़ङ्हाॽरे़ एपोदबा के़रे़क् लगेःप्पे़न् हिःक्कङ्कङ्बा चाःम्मनाबाल्ले़ थाक्मनाबा चिरिक्किल्ले़न् मे़जोगु॥ 23 खे़ल्ले़ कुलुम्मो काल्दारे़ल्ले़ कुहङ् हे़क्तङ्बा लगेःप्पिल्ले़ कुहङ् मे़भत्छु, हे़क्क्याङ् मे़न्दे़ःङ्मारे़ लागि कुहङ् कब्रिङ् वरुःक् तर्घे़वा मे़दयुआङ् कुबे मे़से़रुॽ॥ 24 खे़ल्ले़ यो कुभे़राओ हिःक्कङ्कङ्बा, पारान्ला, हे़ःत्ताङ्बा खि नु चुन्जुन् लॽरिक् फमनाबा नैनासुत् चिरिक्किल्ले़न् फुॽले़सेॽहाॽ मे़जोगु॥ 25 साम्म्याङ् इसेःङ्बा पःङ्गेॽहाॽ मे़जोगुआङ् खे़न् यो के़बप्पा तेःप्फे़राओ कब्रिङ् फुॽले़सेॽहाॽरे़ कुलुम्मो कुलुम्मो खे़ङ्हाॽरे़ मे़भत्छु॥ 26 माङ्से़वा याःम्बक् चोःक्मे़ल्ले़ चाङ्मनाबा लगेःत्तिल्ले़ यो कुभे़राओ लत्छा पःङ्गेॽ नु याम्मो लत्छा फुॽले़सेॽ चुक्ते़र कब्रिङ् मे़भत्छु, हे़क्तङ्बा चोःक्माए यहवे दाङ्बे़ल्ले़ मोसान् इङ्जाङ् पिरुआङ् वये़॥ 27 हारुने़न् नु खुने़ॽ कुस्साहाॽरे़ लागि फमनाबा चुन्जुम्बा नैनासुत् चिरिक्किल्ले़न् हक्सुःप्पा चाङ्हाॽ, 28 हे़क्क्याङ् चुन्जुम्बा नैनासुत् फे़ता नु नैनासुत् चिरिक्किल्ले़न् वेॽ फे़ताहाॽ नु चुन्जुम्बा नैनासुत् चिरिक्किल्ले़न् सिगाङ् चाङ्मा चाङ्हाॽ खे़ङ्हाॽरे़ मे़जोगु॥ 29 खम्भ्याङ् खे़ङ्हाॽरे़ चुन्जुन् लॽरिक् फमनाबा नैनासुत् चिरिक्किल्ले़न्, हे़क्क्याङ् हिःक्कङ्कङ्बा, पारान्ला, हे़ःत्ताङ्बा खिःल्ले़न् फुङ् के़लक्पे़ल्ले़ कुयाःम्बक् चोगुबा फॽइ मे़जोगु, हे़क्तङ्बाए यहवे दाङ्बे़ल्ले़ मोसान् इङ्जाङ् पिरुआङ् वये़॥ 30 खे़ङ्हाॽरे़ ले़प्पे़प्पा, सुत्थो तिचःन् इसेःङ्बा साम्म्याङ्ङिल्ले़न् मे़जोगु, हे़क्क्याङ् खे़प्मो एःप्साप्पो लक्मनाबा हे़क्के कन् पाःन्हाॽ “यहवे दाङ्बे़ल्ले़ कुलागि सेसेबा” लॽरिक् मे़लक्तु॥ 31 खे़ङ्हाॽरे़ सुत्थो तिचःन् फे़ताओ फम्मारे़ लागि खे़न् हिःक्कङ्कङ्बा कुनाम्मिल्ले़ इमे़घेःक्खु, हे़क्तङ्बाए यहवे दाङ्बे़ल्ले़ मोसान् इङ्जाङ् पिरुआङ् वये़रो॥ सेसे साःङ्गाहिम्मिन् चोःक्मा मे़सुरु ( ला ३५:१०-१९ ) 32 कम्भलॽरिक् तुम्मादे़न् सेसे साःङ्गाहिम्मोबा के़रे़क् याःम्बक्किन् चोःक्मा चुरे़॥ यहवे दाङ्बे़ल्ले़ मोसान् इङ्जाङ् पिरुबा हे़क्केए इस्राइलिहाॽरे़ मे़जोगु॥ 33 खे़ब्याङ् खे़ङ्हाॽरे़ सेसे साःङ्गाहिम्मिन् मोसाओ मे़दारु, खे़न् तुम्मादे़न् साःङ्गाहिम्मिन् नु खे़प्मोबा के़रे़क् सामाहाॽ—कुउःङ्मा लक्चुहाॽ, सिङ्भे़ल्ले़क्हाॽ, कुसाक्मा सिङ्हाॽ, सित्लाङ्हाॽ, कुयुक्नाहाॽ, 34 हे़ःत्ताङ्बा मे़जाःन्दुबा मे़ल्लुक् होरिक्पा कुधेःक्माहाॽ, साॽरिक् नुबा साहोरिक् कुधेःक्माहाॽ, कुधेःक्मा फोःन्दा, 35 माङ्हुप् साप्लुङ् के़याक्पा सन्दोक्किन् नु खे़ल्ले़ कुबङ्मा तक्लाङ्हाॽ हे़क्क्याङ् कुदे़प्फेॽ, 36 चप्ते़न् नु खे़ल्ले़ के़रे़क् कुसामाहाॽ हे़क्क्याङ् निङ्वाॽफुमाङ्ङो तोःम्मनाबा खरे़ःङ्, 37 साम्म्याङ् इसेःङ्बा सेमियुङ्दे़न् खे़ब्याङ् खे़प्मोबा सेमि हाःम्माहाॽ हे़क्क्याङ् खे़ल्ले़ के़रे़क् कुसामाहाॽ नु ओःत्तिःल्ले़ लागि निःङ्गेॽ, 38 साम्म्याङ् ले़त्ति तोःम्मादे़न्, माङ्थोःक्ना पिमासि निःङ्गेॽ, कुनाम्गे़नुॽबा सुक्पा, साःङ्गाहिम्मोबा लाम्धेःत्तिल्ले़ लागि फोःन्दा, 39 कासाःल्ले़न् ले़त्ति तोःम्मादे़न्, खे़प्मोबा कासा चिॽलिङ्गेॽ, खे़प्मोबा तक्लाङ्हाॽ नु खे़ल्ले़ के़रे़क् कुसामाहाॽ, च्वाःत् याङ्मा छे़ःङ्ग्या नु खे़ल्ले़ कुलाङ्हाॽ 40 लक्खुम्मोबा फोःन्दाहाॽ, खे़प्मोबा सित्लाङ्हाॽ नु कुयुक्नाहाॽ, लक्खुम्मोबा लाम्धेःत्तोबा फोःन्दा, खे़प्मोबा इदाःक्हाॽ नु कुउःङ्मा लक्चुहाॽ हे़क्क्याङ् तुम्मादे़न् साःङ्गाहिम्, सेसे साःङ्गाहिम्मिल्ले़ लागि माङ्से़वा चोःक्मा के़रे़क् सामाहाॽ 41 सेसे साःङ्गाहिम्मो माङ्से़वा चोःक्मा याःम्बक्ले़ लागि फमनाबा चाङ्हाॽ, निङ्वाॽफुसाम्बा हारुने़ल्ले़ सुत्थो कुजाङ्हाॽ नु निङ्वाॽफुसाम्बा ताक्फाओ माङ्से़वा चोःक्मारे़ लागि खुने़ॽ कुस्साहाॽरे़ खुन्छिॽ चाङ्हाॽ॥ 42 यहवे दाङ्बे़ल्ले़ मोसान् पिरुबा इङ्जाङ् कुइसिक् के़रे़क् याःम्बक्हाॽ इस्राइलिहाॽरे़ मे़जोगु॥ 43 खे़ब्याङ् मोसाःल्ले़ खे़न् याःम्बक्हाॽ ओमे़त्तु, हे़क्क्याङ् यहवे दाङ्बे़ल्ले़ आक्खेलॽरिक् इङ्जाङ् पिरुआङ् वये़ खे़ङ्हाॽरे़ हे़क्तङ्बाए मे़जोगुआङ् वये़॥ हे़क्क्याङ् मोसाःल्ले़ खे़ङ्हाॽ के़रे़क् हाङ्वागे़न् मुॽइसाम् पिरुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.