लाम्दिक् 37 - लिम्बुमाङ्हुप् सन्दोक् चोःक्मा याःम्बक् 1 बजले़लरे़ बबुल सिङ्ङिल्ले़न् माङ्हुप् सन्दोक् चोगु॥ खे़ल्ले़ कुलाम्ति हुक्सिक् ने़त्छिआङ् कुभ्रे़ःङ्, कुभे़रे़ हुक्सिक् थिक्काङ् कुभ्रे़ःङ् नु कुलिङ्गे़न्निन् हुक्सिक् थिक्काङ् कुभ्रे़ःङ्बा चोगे़॥ 2 खुने़ॽ खे़न् सिगाङ् नु लाःक्कात् ले़प्माङ् इसेःङ्बा साम्म्याङ्ङिल्ले़ सुःप्तु, हे़क्क्याङ् खे़ल्ले़ कब्रिङ् पिसाङ् साम्म्याङ्ङिल्ले़ कुगःङ्ग्या फत्छु॥ 3 खुने़ॽ खे़ल्ले़ लागि लिसि साम्म्याङ् कुन्दुल्लोहाॽ योःन्दुआङ् थगु, हे़क्क्याङ् खे़ङ्हाॽ खे़ल्ले़ कुलाङ्हाॽओ फत्छु—ने़त्छि कुन्दुल्लोहाॽ थिक्ले़प्माङ् नु ने़त्छि कुन्दुल्लोहाॽ वेॽ ले़प्माङ् फत्छु॥ 4 खे़ब्याङ् खुने़ॽ बबुल सिङ्ङिल्ले़न् तक्लाङ्हाॽ चोगुआङ् खे़ङ्हाॽ साम्म्याङ्ङिल्ले़ सुःप्तु॥ 5 खुने़ॽ खे़न् कुबङ्मा तॽलाङ्हाॽ माङ्हुप् सन्दोक् ने़प्माङ् पिसाङ् के़बप्पा कुन्दुल्लोहाॽओ याक्तु॥ 6 खुने़ॽ इसेःङ्बा साम्म्याङ्ङिल्ले़न् लत्छा कुदे़प्फेॽ चोगु॥ खे़ल्ले़ कुलाम्तिःन् हुक्सिक् ने़त्छिआङ् कुभ्रे़ःङ् नु कुभे़रे़न् हुक्सिक् थिक्काङ् कुभ्रे़ःङ् के़बप्पा चोगे़॥ 7 थवाःल्ले़ थक्मना लःप्मनाबा साम्म्याङ्ङिल्ले़न् ने़त्छि करुबहाॽ खुने़ॽ चोगु॥ खुने़ॽ कुदे़प्फेॽ ने़प्माङ् ले़प्माङ् चोगु— 8 लत्छा करुब थिक् कुयाओनु वेॽ करुबे़न् वेॽ ले़प्माङ्बा कुयाओ युक्खु॥ खे़न् ने़त्छि करुबहाॽ नु कुदे़प्फेन् लत्छा साम्म्याङ् कुआःत्लाम् ने़प्माङ् कुयाओ चोगु॥ 9 खे़न् ने़त्छि करुबहाॽरे़ खुन्छिॽ लाप्हाॽ थाःङ् ले़प्माङ् हप्फे़ फे़सुसिआङ् कुदे़प्फेन् इःप्तेसुआङ् पत्छे़सि॥ खे़ङ्हाॽरे़ खुन्छिॽ नाराहाॽग तक् नु तक् कुदे़प्फेॽ ले़प्माङ् हिसिङ्ङाङ् पत्छे़रो॥ निङ्वाॽफुमाङ्ङो तोःम्मनाबा खरे़ःङ् ने़मा चप्ते़न् ( ला २५:२३-३० ) 10 बजले़लरे़ बबुल सिङ्ङिल्ले़न् चप्ते़न् चोगु॥ खे़ल्ले़ कुलाम्तिःन् हुक्सिक् ने़त्छि, कुभे़रे़न् हुक्सिक्थिक् नु कुलिङ्गे़न्निन् हुक्सिक् थिक्काङ् कुभ्रे़ःङ् पत्छे़॥ 11 खुने़ॽ खे़न् इसेःङ्बा साम्म्याङ्ङिल्ले़ सुःप्तु, हे़क्क्याङ् खे़न् कब्रिङ् पिसाङ् साम्म्याङ्ङिल्ले़ कुगःङ्ग्या फत्छु॥ 12 खे़ल्ले़ के़रे़क् पिसाङ् हुक्ताप्पे थिक् कुभे़रे़ के़बप्पा कुया थिक् चोगु, हे़क्क्याङ् कब्रिङ् पिसाङ् साम्म्याङ्ङिल्ले़ कुगःङ्ग्या फत्छु॥ 13 चप्ते़न्ले़ लागि खुने़ॽ योःन्दुआङ् लिसि साम्म्याङ् कुन्दुल्लोहाॽ चोगु, हे़क्क्याङ् खे़न् कुन्दुल्लोहाॽ खे़न् चप्ते़न्निल्ले़ लिसि कुलाङ् के़बप्पा कुसुक्पो फत्छु॥ 14 खे़न् कुन्दुल्लोहाॽ चप्ते़न् पङ्मा तक्लाङ्हाॽरे़ लागि कुलिःङ्मादे़न् पोङ्ल फाॽआङ् कप्मनाबे़ल्ले़ कुयाओए पत्छे़॥ 15 खुने़ॽ खे़न् चप्ते़न्निन् पङ्मारे़ लागि खे़न् तक्लाङ्हाॽ बबुल सिङ्ङिल्ले़न् चोगुआङ् साम्म्याङ्ङिल्ले़ सुःप्तु॥ 16 खुने़ॽ चप्ते़न्नोबा सामाहाॽ, इग्र च्ये़त्थ्याहाॽ, साङ्ते़रे़ःङ्हाॽ, चल्लाङ्ना खोर्याहाॽ नु सेजःङ्वा सिदुङ्जभा हुङ्मा खोर्याहाॽ के़रे़क् इसेःङ्बा साम्म्याङ्ङिल्ले़न् चोगुरो॥ सेमियुङ्दे़न् मे़जोगु ( ला २५:३१-४० ) 17 खुने़ॽ इसेःङ्बा साम्म्याङ्ङिन् थगुआङ् सेमियुङ्दे़न् चोगु॥ खे़ल्ले़ कुयुक्ना, कुलाङ्, फुङ् हे़क्तङ्बा चल्लाङ्ना खोर्या, कुभे़क्मे़त् नु कुभुङ्हाॽ के़रे़क् हाबा खे़न् लत्छा कुआःत्लाम्बा चोगु॥ 18 खे़ल्ले़ तुक्सि कुबोराक्हाॽ लाःक्कात् लःन्दे़आङ् पत्छे़—कुबोराक् सुम्सि सेमियुङ्दे़न् थिक्ले़प्माङ् नु कुबोराक् सुम्सि वेॽ ले़प्माङ् पत्छे़॥ 19 लत्छा कुबोराक्को खजङ्सेॽ फुङ् हे़क्तङ्बा सुम्सि चल्लाङ्ना खोर्या, हे़क्क्याङ् खे़न्नु सोसोरिक् कुभे़क्मे़त् नु कुभुङ्हाॽ पत्छे़॥ वेॽसमा कुबोराक्कोआङ् सुम्सि चल्लाङ्ना खोर्याहाॽ पत्छे़॥ सेमि युङ्दे़न्नोलाम् के़लःम्बा खे़न् तुक्सि कुबोराक्हाॽ लत्छा परिक्पा चोगे़ॽ॥ 20 सेमियुङ्दे़न्नो खजङ्सेॽ फुङ् हे़क्तङ्बा लिसि चल्लाङ्ना खोर्याहाॽ, आप्फेक् आप्फेक् कुभुङ्फे़क्मेत् नु फुङ्हाॽआङ् पत्छे़॥ 21 सेमि युङ्दे़न्नोलाम् के़लःम्बा तुक्सि कुबोराक्हाॽओ थिक्सिगेक्पा कुगाप्पिन् कुबोराक् सिगाङ् लत्छा कुभे़क्मे़त्, निसिगेक्पा कुगाप् कुबोराक् सिगाङ् निसिगेक्पा कुभे़क्मे़त्, हे़क्क्याङ् सुम्सिगेक्पा कुगाप् कुबोराक् सिगाङ् सुम्सिगेक्पा कुभे़क्मे़त् पत्छे़॥ 22 सेमियुङ्दे़न्, खे़ल्ले़ कुभे़क्मे़त् नु कुबोराक्हाॽ थक्मनाबा साम्म्याङ् इसेःङ्बा लत्छा कुआःत्लाम्बा चोगुआङ् वये़॥ 23 खुने़ॽ नुसि सेमि हाःम्मा छक्कङ्हाॽ नु सेमि कुहाःम्माहाॽरे़ कुभिःप्मा लाभिःत्हाॽ नु खे़प्मोबा माक्सुःन्दा ताःक्मे़न् इसेःङ्बा साम्म्याङ्ङिल्ले़न् चोगु॥ 24 खुने़ॽ सेमियुङ्दे़न् नु खे़प्मोबा के़रे़क् सामापुमाहाॽ तोरा थिक् इसेःङ्बा साम्म्याङ्ङिल्ले़न् चोगुरो॥ सुक्पा हाःम्मा ले़त्ति तोःम्मादे़न् ( ला ३०:१-५ ) 25 खुने़ॽ बबुल सिङ्ङिल्ले़न् सुक्पा हाःम्मादे़न् चोगु॥ खे़ल्ले़ कुलाम्ति हुक्सिक्थिक् नु कुभे़रे़ हुक्सिक्थिक् चोगे़॥ खे़न् लिसि कुसुक्पा के़बप्पा चोगे़, हे़क्क्याङ् खे़ल्ले़ कुलिङ्गे़न्निन् हुक्सिक् ने़त्छि के़बप्पा चोगे़॥ खे़ल्ले़ कुदाङ्हाॽ आम्भा खे़न् लत्छा सिङ्ङिल्ले़न् युङे़॥ 26 खुने़ॽ खे़ल्ले़ थाःङ् ले़प्माङ्बान् नु के़रे़क् पिसाङ्बा कुयाम्ले़ङ्बाहाॽ खे़ल्ले़ चम्बे़प्पा कुदाङ्हाॽआङ् इसेःङ्बा साम्म्याङ्ङिल्ले़ सुःप्तु, हे़क्क्याङ् खे़ल्ले़ लागि कब्रिङ् पिसाङ् लत्छा साम्म्याङ्ङिल्ले़ कुगःङ्ग्या चोगु॥ 27 खे़ल्ले़ कुबङ्मा तक्लाङ्हाॽरे़ लागि कुलिःङ्मादे़न् पप्मारे़ लागि ले़त्ति तोःम्मादे़न्नोबा ने़प्माङ् कुयाम्ले़ङ्बो ने़त्छि साम्म्याङ् कुन्दुल्लो चोगुआङ् ने़प्माङ् पिसाङ् खे़प्मो फत्छु॥ 28 तक्लाङ्हाॽ बबुल सिङ्ङिल्ले़न् चोगुआङ् खुने़ॽ खे़ङ्हाॽ साम्म्याङ्ङिल्ले़ सुःप्तुरो॥ माङ्थोःक्नारे़ लागि निःङ्गेॽ नु सुक्पा ( ला ३०:२२-३८ ) 29 खुने़ॽ माङ्थोःक्ना पिमासि सुत्थो निःङ्गेॽ नु फुङ्नाम् के़जोःक्पाल्ले़ कुइसिक् साॽरिक् कुनाम्गे़नुॽबा सुत्थो सुक्पा चोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.