लाम्दिक् 36 - लिम्बु1 “कल्ले़चोगुल्ले़ बजलेल, ओहोलिआब नु के़रे़क् कुहुक्वा के़नुॽबा मनाहाॽ खे़न् सेसे साःङ्गाहिम्मिन् चोःक्मारे़ लागि यहवे दाङ्बे़ल्ले़ सिक्कुम् निङ्वाॽसाबा नु सुम्बोधासाबा चोगुसिआङ् वाॽ, खे़ङ्हाॽ के़रे़क्ले़ यहवे दाङ्बे़ल्ले़ इङ्जाङ् चोगुबा कुइसिक् मे़जोगुररो॥” मनाहाॽरे़ हुक्वा मे़दारुॽ 2 खे़ब्याङ् बजलेल, ओहोलिआब नु यहवे दाङ्बाल्ले़ सुम्बोधासाबा हे़क्क्याङ् याःम्बक् चोःक्मारे़ लागि के़धुक्पा निङ्वाॽ पिरुसिबा के़रे़क् मनाहाॽ मोसाःल्ले़ उःत्तुसि, 3 इस्राइलिहाॽरे़ सेसे साःङ्गाहिम् चोःक्मा याःम्बक्ले़ लागि थेधेहाॽ मे़दारुआङ् वये़, खे़न् के़रे़क् हुक्वाहाॽ खे़ङ्हाॽरे़ मोसाःल्ले़ कुहुक्लाम्बा मे़दाःक्तु॥ मनाहाॽरे़ तानाम् थक्मा आबाङे निङ्वाःल्ले़ वेॽ हुक्वाहाॽआङ् मे़दारु॥ 4 सेसेदे़न्नोबा याःम्बक् के़जोःक्पा के़रे़क् कुहुक्चो के़नुॽबा चोबेगु मनाहाॽरे़ खुन्छिॽ आप्फेक् आप्फेक् याःम्बक्हाॽ मे़ले़रुआङ् मोसाओ मे़द्ये़, 5 हे़क्क्याङ् खे़ङ्हाॽरे़ मोसान् मे़मे़त्तु, “यहवे दाङ्बे़ल्ले़ चोःक्मारे़ लागि इङ्जाङ् चोगुबा याःम्बक्किल्ले़ लागि चाहा के़जोःक्पानुःल्ले़ आल्लसाङ् यरिक् चिगक्वाहाॽ मनाहाॽरे़ मे़दारुर मे़बत्॥” 6 खे़ब्याङ् मोसाःल्ले़ मे़त्तुसि, हे़क्क्याङ् खे़ङ्हाॽरे़ साःङ्गाहिम् कुले़ःम् कन् पाःन्निन् उवा चोःक्मा मे़हेःक्तु, “सेसेदे़न्नोबा हुक्वारे़ लागि आल्ल आत्तिन् ये़म्बित्छा इग्र मे़न्छुमाःल्ले़ वेॽ थे़मा पाःन्नाङ् मे़जोगुन्ल॥” कम्भलॽरिक् मनाहाॽ आल्लसाङ् वेॽ यरिक् चिगक्वा ताःप्मा मे़म्भाःक्तुसिन्, 7 थेआङ्भे़ल्ले़ सेसेदे़न् चोःक्मारे़ लागि खे़ङ्हाॽओ चाहा के़जोःक्पानुःल्ले़ यरिक् चिगक्वा वये़रो॥ यहवे दाङ्बे़ल्ले़ सेसे कुसाःङ्गाहिम् चोःक्मा याःम्बक् ( ला २६:१-३७ ) 8 याःम्बक् के़जोःक्पाहाॽ आक्ख्यारिक् कुहुक्वा के़नुॽबा चोबेगु मे़वये़, खे़ङ्हाॽरे़ थिबोङ् फोःन्दा के़बप्पा सेसे साःङ्गाहिम् मे़जोगु॥ खे़न् फोःन्दाहाॽ चुन्जुन् लॽरिक् फमनाबा हे़क्क्याङ् हिःक्यङ्यङ्बा, पारान्ला नु हे़ःत्ताङ्बा खिःल्ले़न्, कुहुक्वा के़नुॽबा चोबेगुहाॽरे़ मे़जोगुबा करुबहाॽ के़बप्पा वये़॥ 9 के़रे़क् फोःन्दाहाॽरे़ कुलाम्ति निबोङ्ङाङ् ये़त्छि हुक्सिक् नु कुभे़रे़न् हुक्सिक् लिसि के़बप्पा चोगे़॥ के़रे़क् फोःन्दाहाॽरे़ कुसिःक्मान् लत्छा परिक्पा चोगे़॥ 10 खे़ङ्हाॽरे़ ङासि फोःन्दाहाॽ थिक्नु वेॽइन् मे़जक्तु, वेॽ ङासि फोःन्दाहाॽआङ् थिक्नु वेॽइन् मे़जक्तु॥ 11 थिक्सिगेःक्पो मे़जक्तुबा कुलक्किल्ले़ नासमा फोःन्दाःल्ले़ कुयाओ खे़ङ्हाॽरे़ हिःक्कङ्कङ्बा कुसःम्मा मे़जोगु॥ निसिगेक्पा मे़जक्तुबा कुलक्किल्ले़ नासमा फोःन्दाःल्ले़ कुयाओआङ् हे़क्केए मे़जोगु॥ 12 लत्छा फोःन्दाओ खे़ङ्हाॽरे़ ङाबोङ् कुसःम्माहाॽ मे़जोगु, हे़क्क्याङ् के़जक्सिङ्बा कुलक्किल्ले़ नासमा फोःन्दाःल्ले़ कुयाओआङ् खे़ङ्हाॽरे़ ङाबोङ् कुन्दोल्लोहाॽ मे़जोगु॥ खे़न् कुसःम्माहाॽ थिक्नु वेॽइन् तुम्दुम्बा पत्छे़॥ 13 खे़ङ्हाॽरे़ ङाबोङ् साम्म्याङ् कुन्दुल्लोहाॽ मे़जोगुआङ् फोःन्दाःल्ले़ कुदुम्बेहाॽ खे़ःक्चुरिहाॽरे़ थिक्नु वेॽइन् मे़दुम्सु॥ कम्भलॽरिक् सेसे साःङ्गाहिम्मिन् लत्छा पोःक्खे़॥ 14 सेसे साःङ्गाहिम् थाःङ्बा साःङ्गाःन् ते़प्मारे़ लागि खे़ङ्हाॽरे़ मे़ःन्दा मुरिक्पा थिबोङ्ङाङ् थिक् कुघाप्माहाॽ मे़जोगु॥ 15 के़रे़क् फोःन्दाहाॽरे़ कुलाम्तिन् सुम्बोङ् हुक्सिक् कुलाम्ति नु हुक्सिक् लिसि कुभे़रे़ के़बप्पा चोगे़॥ खे़न् थिबोङ्ङाङ् थिक् फोःन्दाहाॽ लत्छा परिक्ले़ कुसिःक्मा के़बप्पा चोगे़॥ 16 खे़ङ्हाॽरे़ ङासि फोःन्दाहाॽ थिक्मे़त् सोरिक् नु तुक्सि फोःन्दाहाॽ थिक्मे़त् सोरिक् मे़जक्तु॥ 17 थिक्सिगेक्पा मे़जक्तुबा लक्किल्ले़ नासमा फोःन्दाःल्ले़ कुयाओ खे़ङ्हाॽरे़ ङाबोङ् कुसःम्माहाॽ मे़जोगु॥ वेॽ मे़जक्तुबा लक्किल्ले़ नासमा फोःन्दाःल्ले़ कुयाओआङ् खे़ङ्हाॽरे़ ङाबोङ् कुसःम्माहाॽ मे़जोगु॥ 18 याम्मो खे़ङ्हाॽरे़ खे़न् साःङ्गाहिम्मिल्ले़ कुघाप्मे़न् तुम्माआङ् लत्छा चोःक्मारे़ लागि ङाबोङ् कासा खे़ःक्चुरिहाॽ मे़जोगु॥ 19 साःङ्गाहिम्मिन् खाप्मारे़ लागि खे़ङ्हाॽरे़ हे़ःत्ताङ्बा चाःम्मनाबा मे़ल्लुक् होरिक्पाहाॽलाम् लत्छा कुदे़प्मा मे़जोगु, हे़क्क्याङ् खे़ल्ले़ कुसम्धाङ् साॽरिक् नुबा साहोरिक्हाॽरे़न् लत्छा वेॽ कुदे़प्मा मे़जोगु॥ 20 खे़ङ्हाॽरे़ सेसे साःङ्गाहिम्मल्ले़ लागि बबुल सिङ्भे़ल्ले़क्हाॽ तक्पे़त् तक्पे़त् के़ये़प्पा मे़जोगु॥ 21 के़रे़क् सिङ्भे़ल्ले़क्हाॽरे़ कुलिङ्गे़न् हुक्सिक् थिबोङ् केःम्बा नु कुभे़रे़न् हुक्सिक् थिक्काङ् कुभ्रे़ःङ् के़बप्पा चोगे़॥ 22 के़रे़क् सिङ्भे़ल्ले़हाॽओ चम्बे़प्पा ने़त्छि ने़त्छि थिक्नु वेॽइन् तुम्दुम्बा मे़ये़प्सुआङ् ये़बे़॥ आम्भा कन् परिक्ले़ खे़ङ्हाॽरे़ सेसे साःङ्गाहिम्मोबा के़रे़क् सिङ्भे़ल्ले़क्हाॽ मे़जोगु॥ 23 खे़ङ्हाॽरे़ सेसे साःङ्गाहिम् यो ले़प्माङ्बा लक्किल्ले़ लागि निबोङ् सिङ्भे़ल्ले़क्हाॽ, 24 हे़क्क्याङ् निबोङ्ङे सिङ्भे़ल्ले़क्हाॽरे़ कुसिगाङ् लिबोङ् युप्पा कुयुक्नादे़न्हाॽ मे़जोगु—लत्छा सिङ्भे़ल्ले़क् सिगाङ् ने़त्छि कुयुक्ना, हे़क्क्याङ् लत्छा हासम्सम्बा थक्मा लत्छा कुयुक्ना ने़स्से़॥ 25 थिक्नाहाङ् ले़प्माङ्, इग्र सेसे साःङ्गाहिम् थो ले़प्माङ् खे़ङ्हाॽरे़ निबोङ् सिङ्भे़ल्ले़क्हाॽ, 26 हे़क्क्याङ् खे़ल्ले़ लागि लिबोङ् कुयुक्नादे़न्हाॽ युप्पाःल्ले़न् मे़जोगु—के़रे़क् सिङ्भे़ल्ले़क् थक्मा सिङ्भे़ल्लेक्किल्ले़ कुसिगाङ् ने़त्छि कुयुक्ना मे़जोगु॥ 27 सेसे साःङ्गाहिम् नाम्धा ले़प्माङ् नासमा कुलक्किल्ले़ लागि खे़ङ्हाॽरे़ तुक्सि सिङ्भे़ल्ले़क्हाॽ मे़जोगु॥ 28 सेसे साःङ्गाहिम्मोबा नासमा कुसुक्पाहाॽरे़ लागि ने़त्छि सिङ्भे़ल्ले़क्हाॽ मे़जोगु॥ 29 खे़न् ने़त्छि कुसुक्पोबा सिङ्भे़ल्ले़क्हाॽ मुआङ्धो थाःङ् थारिक् निले़ङ् कुघाप् कुघाप् फाक्सिङ्ङाङ् पत्छे़॥ कम्भलॽरिक् खे़ङ्हाॽ लत्छा कुन्दुल्लोओ चक्सिङ्ङाङ् पत्छे़॥ कम्भलॽरिक्के खे़ङ्हाॽरे़ खे़न् ने़त्छि लत्छा परिक्पा मे़जोगु॥ 30 के़रे़क्ले़ ये़त्छि सिङ्भे़ल्ले़क् मे़बोःक्खे़, हे़क्क्याङ् खे़ल्ले़ लागि युप्पाःल्ले़न् थिबोङ्ङाङ् तुक्सि कुयुक्नादे़न्हाॽ मे़जोगु॥ लत्छा लत्छा सिङ्भे़ल्ले़क् सिगाङ् ने़त्छि ने़त्छि कुयुक्ना ने़स्से़॥ 31 खे़ङ्हाॽरे़ बबुल सिङ्ङिल्ले़न् पे़रे़म् कुसाक्मा सिङ्हाॽ मे़जोगु—सेसे साःङ्गाहिम् थिक्ले़प्माङ्बा सिङ्भे़ल्ले़क्हाॽरे़ लागि ङासि पे़रे़म् कुसाक्मा सिङ्, 32 हे़क्क्याङ् वेॽ ले़प्माङ्बा सिङ्भे़ल्ले़क्हाॽरे़ लागि कुसाक्मा ङासि पे़रे़म्सिङ्, नु नाम्धा ले़प्माङ् नासमा कुलक्कोबा सिङ्भे़ल्ले़क्हाॽरे़ लागि ङासि कुसाक्मा पे़रे़म्सिङ् मे़याक्तु॥ 33 खे़ङ्हाॽरे़ सिङ्भे़ल्ले़क्हाॽरे़ कुलुम्मो के़बप्पा कुसाक्माङ्ग सेसे साःङ्गाहिम्मे़ल्ले़ लत्छा कुयाओनु वेॽ कुयाओ थारिक् खाराक् के़गे़प्पा मे़जोगु॥ 34 खे़ङ्हाॽरे़ खे़न् सिङ्भे़ल्ले़क्हाॽ साम्म्याङ्ङिल्ले़ मे़सुःप्तु, हे़क्क्याङ् कुसाक्माहाॽ ते़म्मारे़ लागि साम्म्याङ् कुन्दोल्लोहाॽ मे़जोगु॥ खे़ङ्हाॽरे़ खे़न् पे़रे़म्बा कुसाक्माहाॽआङ् साम्म्याङ्ङिल्ले़ मे़सुःप्तु॥ 35 खे़ङ्हाॽरे़ हिःक्कङ्कङ्बा, पारान्ला, हे़क्क्याङ् हे़ःत्ताङ्बा चाःम्मनाबा से़मुरिक्किल्ले़ मे़भयुआङ् मे़जक्तुबा चुन्जुम्बा नैनासुत् चिरिक्किल्ले़न् लत्छा फोःन्दा मे़जोगु खे़ब्याङ् खे़प्मो कुलाप् के़बप्पा करुबे़ल्ले़ कुजइःत् मे़जोगुआङ् कुभुङ् मे़लक्तु॥ 36 खे़ङ्हाॽरे़ खे़ल्ले़ लागि बबुल सिङ्ङिल्ले़न् लिसि सित्लाङ्हाॽ मे़जोगुआङ् साम्म्याङ्ङिल्ले़ मे़सुःप्तु॥ खे़प्मोबा साम्म्याङ् कुवेॽमा खे़ःक्चुरिहाॽ पत्छे़॥ खे़ङ्हाॽरे़ फोःन्दाहाॽ फोःम्मारे़ लागि लिसि युप्पा कुयुक्नाहाॽ मे़जोगु॥ 37 खे़ङ्हाॽरे़ साःङ्गाहिम्मोबा लाम्धेःत्तिल्ले़ लागि हिःक्कङ्कङ्बा, पारान्ला, हे़ःत्ताङ्बा खि नु चुन्जुन् लॽरिक् मे़भयुबा नैनासुत् चिरिक्किल्ले़न्, फुङ् के़लक्पे़ल्ले़ याःम्बक् चोगुबा लत्छा फोःन्दा मे़जोगु॥ 38 खे़ङ्हाॽरे़ खे़ल्ले़ लागि ङासि सित्लाङ् नु कुवेॽमा खे़ःक्चुरिहाॽआङ् मे़जोगु॥ खे़ङ्हाॽरे़ सित्लाङ्ङिल्ले़ कुसम्मे़न् नु खे़ल्ले़ कुवेॽमा कुनाम्मिन् साम्म्याङ्ङिल्ले़ मे़सुःप्तु, खम्भ्याङ् खे़ल्ले़ ङासि कासा कुयुक्नाहाॽ मे़जोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.