लाम्दिक् 35 - लिम्बुनाःम्सिङ्मा ये़न् थिम्बे 1 मोसाःल्ले़ इस्राइलबा के़रे़क् सङ्जुम्भोहाॽ फुक्खुसिआङ् खे़ङ्हाॽ मे़त्तुसि, “यहवे दाङ्बे़ल्ले़ इङ्जाङ् चोगुबा खिनिॽ चोःक्मा के़बोङ्बा पाःन्हाॽ हाबा कन्हाॽएरो— 2 तुक्सि ये़न् थारिक् याःम्बक् चोःक्मा के़घोसुम्ॽ, कर नुसिगेक्पा ये़न्निन् खिनिॽ लागि सेसेबा चोक्लो॥ यहवे दाङ्बे़ल्ले़ कुलागि खे़ङ्ग साब्बाथरो॥ खे़ल्ले़ याःन्दिक् आत्तिल्ले़ याःम्बक् चोगुॽ खे़न् से़प्मा पोङ्ॽ॥ 3 साब्बाथ ये़न्निल्ले़ याःन्दिक् खिनिॽ आत्तिन् हिम्मोआङ् मि मे़दुप्ते़म्मिन्ने़ॽओ॥” सेसे साःङ्गाहिम्मोबा चिगक्वाहाॽ ( ला २५:१-९ ) 4 मोसाःल्ले़ के़रे़क् इस्राइलि सङ्जुम्भोबा मनाहाॽ अक्खे मे़त्तुसि, “यहवे दाङ्बाल्ले़ इङ्जाङ् चोगुबा पाःन्हाॽ हाबा कन्हाॽएरो— 5 खिनिॽ लुम्मोलाम्बा यहवे दाङ्बाल्ले़ कुलागि हुक्वा तारे़म्मे़ॽ॥ आबाङे निङ्वाॽओलाम् पिमा निङ्वाॽ के़जोःक्पाल्ले़ यहवे दाङ्बाल्ले़ कुलागि कन् चिगक्वाहाॽ तारुर—साम्म्याङ्, युप्पा, हे़क्क्याङ् कासा 6 हिःक्कङ्कङ्बा, पारान्ला, हे़ःत्ताङ्बा खि नु लिप्लिङ्गे खिःल्ले़न् नैनासुत् चिरिक्, हे़क्क्याङ् मे़ःन्दा मुरिक्, 7 हे़ःत्ताङ्बा चाःम्मनाबा मे़ल्लुक् होरिक्, साॽरिक् नुबा साहोरिक्, हे़क्क्याङ् बबुल सिङ्, 8 ओःत्तिःल्ले़ लागि निःङ्गेॽ, खे़ब्याङ् माङ्थोःक्ना पिमासि निःङ्गेॽरे़ लागि मारुक् नु कुनाम्गे़नुॽबा सुक्पा हाःम्मारे़ लागि मारुक्, 9 एपोद नु साःङ्बे से़ःप्चाङ्ङो तिःङ्मारे़ लागि अनिक्स नु वेॽ मुधिङ्लुङ्हाॽ॥ 10 “खिनिॽ लुम्मो आक्ख्यारिक् कुहुक्चो के़नुॽबा मे़वाॽ, खे़ङ्हाॽ के़रे़क् मे़दाआङ् यहवे दाङ्बे़ल्ले़ इङ्जाङ् चोगुबा के़रे़क् पाःन्हाॽ मे़जोगुर— 11 सेसे साःङ्गाहिम् नु खे़ल्ले़ कुघाप्मा, साःङ्गाहिम्मोबा काप्पो साङ्साङ् काःङ्भाहाॽ, खे़ःक्चुरिहाॽ, सिङ्भे़ल्ले़क्हाॽ, कुसाक्मा कुधेःक्माहाॽ, सित्लाङ्हाॽ नु कुयुक्नादे़न्हाॽ, 12 निङ्वाॽफुमाङ्ङिल्ले़ कुमाङ्हुप् सन्दोक् नु खे़ल्ले़ कुबङ्मा तक्लाङ्हाॽ, कुदे़प्फेॽ नु कुधेःक्मा फोःन्दाहाॽ, 13 चप्ते़न् हे़क्क्याङ् खे़प्मोबा तक्लाङ्हाॽ नु खे़प्मोबा के़रे़क् सामा सार्दाम्हाॽ खे़ब्याङ् निङ्वाॽफुमाङ्ङो तोःम्मनाबा सेसे खरे़ःङ्, 14 सेमिःन्ले़ लागि सेमियुङ्दे़न् नु खे़प्मोबा सामा सार्दाम् छक्कङ्हाॽ, हे़क्क्याङ् सेमिःल्ले़ लागि निःङ्गेॽ, 15 सुक्पा हाःम्मा ले़त्ति तोःम्मादे़न् नु खे़प्मोबा तक्लाङ्हाॽ, माङ्थोःक्ना पिमासि निःङ्गेॽ, कुनाम्गे़नुॽबा सुक्पा, सेसे साःङ्गाहिम्मोबा फोःन्दा, 16 मिधिङ्मनादेमनाबा वयागे़न् सिदुङ्जभा तोःम्मादे़न् नु खे़ल्ले़ लागि कासा चिॽलिङ्गेॽ, खे़ल्ले़ कुदक्लाङ्हाॽ हे़क्क्याङ् के़रे़क् सामा सार्दाम्हाॽ, वाहप्सिङ्मा कासा छे़ःङ्ग्या, खे़ल्ले़ कुयुक्नाहाॽनु सोसोरिक्, 17 लक्खुम्मोबा फोःन्दाहाॽ नु सित्लाङ्हाॽ हे़क्क्याङ् खे़ल्ले़ कुयुक्नादे़न्हाॽ, लक्खुम्मोबा यम्बा लाम्धेःत्तिल्ले़ लागि फोःन्दा, 18 सेसे साःङ्गाहिम् नु लक्खुम्मो कुहाप्मा लक्चुहाॽ नु इदाःक्हाॽ, 19 सेसे साःङ्गाहिम्मो माङ्से़वा चोःक्मारे़ लागि फमनाबा चाङ्हाॽ—हारुन निङ्वाॽफुसाम्बाल्ले़ कुलागि सुत्थोबा चाङ्हाॽ नु निङ्वाॽफुसाम्बा याःम्बक्को माङ्से़वा चोःक्मारे़ लागि खुने़ॽ कुस्साहाॽरे़ खुन्छिॽ चाङ्हाॽ॥” मनाहाॽरे़ खुन्छिॽ हुक्वायाङ् 20 खे़ब्याङ् इस्राइलबा के़रे़क् सङ्जुम्भोहाॽ मोसाःल्ले़ कुदगिलाम् से़म्मुॽइ मे़बोःक्खे़॥ 21 आत्तिन् आत्तिन्हाॽ खुन्छिॽ सिक्लुङ्माॽ नु निङ्वाःल्ले़ मुरा मे़त्तुसि, खे़ङ्हाॽरे़ तुम्मादे़न् साःङ्गाहिम्मोबा याःम्बक्, खे़ल्ले़ लागि के़रे़क् माङ्से़वा चोःक्मा याःम्बक् नु सुत्थो चाङ्ले़ लागि यहवे दाङ्बे़ल्ले़ कुलागि हुक्वायाङ् मे़दारु॥ 22 आबाङे निङ्वाःल्ले़ मुरा मे़त्तुसिबा ये़म्बित्छा नु मे़न्छुमा खक्पे़त्ले़ के़रे़क् परिक्पा सामाहाॽ—के़भिःप्मा, कुन्दुल्लो, स्वागेप् नु चोःक्सिङ्मा साम्म्याङ् वाःत्ति सामाहाॽ मे़दारु॥ खे़ङ्हाॽरे़ खुन्छिॽ साम्म्याङ्ङिन् यहवे दाङ्बाओ थाःङ् पङ्मनाबा हुक्वा कुइसिक् मे़दोन्दु॥ 23 आत्तिन्हाॽरे़ हिःक्कङ्कङ्बा, परान्ला, हे़ःत्ताङ्बा खि, चुन्जुम्बा खिःल्ले़न् नैनासुत् चिरिक्, मे़ःन्दा मुरिक्, हे़ःत्ताङ्बा चाःम्बमना मे़ल्लुक् होरिक्हाॽ, नु साॽरिक् नुबा साहोरिक्पाहाॽ मे़गत्तु, खे़ङ्हाॽ मे़दारु॥ 24 युप्पा नु कासाःल्ले़ हुक्वा के़दोम्बा के़रे़क्ले़ यहवे दाङ्बे़ल्ले़ कुलागि हुक्वा कुसिङ्बा मे़दारु॥ आत्तिन् आत्तिन्हाॽओ कुभा माङ्से़वा याःम्बक्ले़ लागि बबुल सिङ् ने़स्से़, खे़न् खे़ङ्हाॽरे़ मे़दारु॥ 25 आबाङे हुक्किल्ले़ मे़लःन्दुबा हिःक्कङ्कङ्बा, पारान्ला, हे़ःत्ताङ्बा खि नु चुन्जुम्बा नैनासुत् चिरिक् के़गप्मा कुहुक्वा के़नुॽमा मे़न्छुमाहाॽरे़ खे़न् मे़दारु॥ 26 आबाङे निङ्वाॽलाम् चोःक्मा निङ्वाॽ के़गप्मा नु सुम्बोधामा मे़न्छुमाहाॽरे़ मे़ःन्दा मुरिक्किन् मे़लःन्दु॥ 27 लाम्लोबाहाॽरे़ एपोद नु साःङ्बे से़ःप्चाङ्ङो तिःङ्मारे़ लागि अनिक्स मुधिङ्लुङ् हे़क्क्याङ् वेॽ कुमे़न् के़घिःक्पा मुधिङ्हाॽ मे़दारु॥ 28 सेमिरे़ लागि निःङ्गेॽ, माङ्थोःक्ना पिमासि निःङ्गेॽरे़ लागि मारुक् नु कुनाम्गे़नुॽबा सुक्पा हाःम्मारे़ लागि मारुक् मे़दारु॥ 29 यहवे दाङ्बाल्ले़ मोसालाम् इङ्जाङ् पिरुबा के़रे़क् याःम्बक्हाॽरे़ लागि निङ्वाॽओ चोःक्मा निङ्वाॽ के़गप्पा इस्राइलबा के़रे़क् मे़न्छुमाहाॽ नु ये़म्बित्छाहाॽरे़ आबाङे खुन्छिॽ निङ्वाःल्ले़ मुरा मे़त्तुसिबा कुइसिक् हुक्वा मे़दारुरो॥ सेसे साःङ्गाहिम् के़जोःक्पा चोबेगुहाॽ ( ला ३१:१-११ ) 30 खे़ब्याङ् मोसाःल्ले़ इस्राइलिहाॽ मे़त्तुसि, “ओमे़त्ते़म्मे़ॽ, यहुदा थाःक्कोबा हुररे़ कुम्मे़न्छाॽ, उरिःल्ले़ कुस्सा बजलेःल्ले़न् यहवे दाङ्बे़ल्ले़ उःत्तुआङ् वाॽ॥ 31 निङ्वाॽफुमाङ्ङिल्ले़ कुयाम्साम्मिल्ले़, के़रे़क् परिक्पा चोबेगु याःम्बक् चोःक्मा ने़हिनिङ्वाॽ नु सिक्कुम् निङ्वाॽरे़ खुने़ॽ कुधिम् चोगुआङ् वाॽ॥ 32 खे़ल्ले़ साम्म्याङ्, युप्पा, कासाओ कुभुङ् लक्मा सिक्कुम् निङ्वाॽ, 33 हे़क्क्याङ् लुङ् खक्मा नु काम्मा, सिङ् लक्मा खे़ब्याङ् के़रे़क् परिक्पा चोबेगुरे़ चोःक्मा के़बोङ्बा याःम्बक् चोःक्मारे़ लागि खुने़ॽ सिक्कुम् निङ्वाॽ खोसुआङ् वाॽ॥ 34 खुने़ॽ नु दानरे़ कुधाःक्कोबा अहिसामाकरे़ कुस्सा अहिहोआबे़ल्ले़ वेॽहाॽ हुॽसुसिर फाॽआङ् यहवे दाङ्बे़ल्ले़ खे़ङ्हाॽ हे़क्के चोःक्मा निङ्वाॽ पिरुसिआङ् वाॽ॥ 35 खे़ङ्हाॽरे़ के़रे़क् परिक्पा चोबेगुरे़ याःम्बक्, कुसाप् लक्मा, हिःक्यङ्यङ्बा, पारान्ला, हे़ःत्ताङ्बा खि नु चुन्जुम्बा नैनासुत् चिरिक्को फुङ् लक्मा नु फमा याःम्बक्को, के़रे़क् परिक्ले़न् चोबेगु नु चोबेगुरे़ चोःक्मनाबा हुक्वानुॽमा याःम्बक् मे़जोगुर फाॽआङ् यहवे दाङ्बे़ल्ले़ खे़ङ्हाॽ सुम्बोधासाबा चोगुसिआङ् वाॽरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.