लाम्दिक् 34 - लिम्बुनिसिगेक्पा कुगाप् साप्लुङ् 1 यहवे दाङ्बे़ल्ले़ मोसान् मे़त्तु, “तगिबा हे़क्केए लुङ्ङिल्ले़न् साप्लुङ् ने़त्छि खे़रे़आङ् तारे़ॽ॥ खे़ने़ॽ खे़न् तगि के़हे़रु के़देसुबा साप्लुङ्ङो साप्ते़आङ् के़बप्पा आम्भा खे़न् पाःन्निन् आङ्गाॽ खे़न् साप्लुङ्ङो साप्तुङ्ॽ॥ 2 तानाम्सा यारिप् पोःक्खे़आङ् सिनै कोःक्माओ थोःक्सिङ्ङे़ॽ हे़क्क्याङ् कोःक्माल्ले़ कुसम्धाङ् आङ्गाॽ आबेसाङ् थाङे़ॽ॥ 3 आत्तिन् मनाहाॽआङ् खे़ने़ॽनु मे़न्धाङ्ने़न्ल, हे़क्क्याङ् कोःक्माओबा आत्तिन् ते़न्नोआङ् ओःन्मे़न्धाक्सिङ्ङिन्ल॥ आत्तिन् मे़ल्लुक् मे़ःन्दाक् इग्र थक्सा पित्हाॽआङ् कोःक्माल्ले़ कुदगि ले़प्माङ् चामे़ल्लाम्ने़ल्ल॥” 4 खे़ब्याङ् मोसाःल्ले़ तगिबा हे़क्तङ्बा लुङ्ङिल्ले़न् साप्लुङ् ने़त्छि खक्तु हे़क्क्याङ् यहवे दाङ्बाल्ले़ मे़त्तुबा कुइसिक् तानाम्सा पोगे़ॽआङ् सिनै कोःक्माओ थोःक्सिङ्॥ खुने़ॽ कुहुक्को खे़न् ने़त्छि साप्लुङ्हाॽआङ् तेॽरुआङ् पे॥ 5 हे़क्क्याङ् यहवे दाङ्बान् खाॽमिःप्पो थासिङ् ये़, हे़क्क्याङ् खुने़ॽनु खे़प्मो ये़म्सिङ्ङाङ् खुने़ॽ कुमिङ् “यहवे दाङ्बा” के़लॽबा उवा चोगु॥ 6 खे़न् एगाङ् यहवे दाङ्बे़न् खुने़ॽ कुबेसाङ्लाम् पोःक्खे़आङ् अक्खे के़लॽबा उवा चोगु, “यहवे दाङ्बा, यहवे दाङ्बान् मना साॽरिक् लुङ्माॽ के़दुक्पा नु के़नुॽबा निङ्वाॽफुमाङ्, हे़क्क्याङ् हने़ कुसिक् मे़म्बोःक्मनाबा नु साॽरिक् नासि के़धःप्पा चोक्, खे़ब्याङ् थधप् मे़ल्लॽमनाबा मिम् आमे़प्मे़प्पा नु नसाःन्साबा चोक्॥ 7 खुने़ॽ हे़न्छिङ् हे़न्छिङ् मनाहाॽ लुङ्माॽ तुक्तुसि, हे़क्क्याङ् फे़न्याःम्बक्, पिफ्युङ् नु लायोन् ले़प्मि चोगुॽ॥ कर खुने़ॽ आप्तिक्साबान् आक्खे फाॽआङ्साङ् खुम्दिङ् पिरु॥ पाधे़बाहाॽरे़ मे़जोगुबा फे़न्याःम्बक्किल्ले़ कुले़क्वा खे़ङ्हाॽरे़ खुन्छिॽ साहाॽ, मे़न्छाॽहाॽ हे़क्क्याङ् सुम्सिगेक्पा लिसिगेक्पा थाःक् थारिक् खुम्दिङ् पिरुसिॽ॥” 8 खे़ब्याङ् मोसान् हारावराॽ खाम्बाङ्ङो अःक्खुम् फन्छिङ्ङाङ् निङ्वाॽफुमाङ्ङिन् माङ्से़वा मे़त्तु॥ 9 खुने़ॽ मे़त्तु, “आङ्गाॽ आदाङ्बारे़ के़निमो के़निङ्वाॽ के़दाबा पोःक्खाङ्ङाङ् वाॽआने़भग्र, यहवे दाङ्बाए, आङ्गाॽ पेलि फाक्ने़, यहवे दाङ्बान्ने आनिगे़नु सोरिक् लाङ्घेगे़ॽ॥ कन्हाॽ आधिङ्गानि मना मे़बोःक्खे़साङ् आनिगे फे़न्याःम्बक् नु लायोलाम् ले़प्मि आबिरे़ॽआङ् लक्खोबा कुइसिक् आबाङे के़माना हे़क्के आदाःक्ते़ॽओ॥” कुसङ् माङ्हुप् ( ला २३:१४-१९ ; साम्यो इङ् ७:१-५ , १६:१-१७ ) 10 खे़ब्याङ् यहवे दाङ्बे़ल्ले़ मे़त्तु, “ओमे़त्ते़ॽ, खे़ने़ॽनु आङ्गाॽ लत्छा माङ्हुप् थिक् चोगुङ्ॽ॥ खे़ने़ॽ के़रे़क् के़मनाहाॽरे़ खुन्छिॽ तगि आङ्गाॽ साॽरिक् निङ्वाॽ के़माबा याःम्बक्हाॽ चोगुङ्ॽ, खे़न् निङ्वाॽ के़माबा याःम्बक्किन् इक्सादिङ् खाम्बेःक्मो आत्तिन्नाङ् मे़न्छाम् सुवाङ्हाॽओ आभे़ल्ले़आङ् मे़न्जोःक्के वाॽ॥ खे़ने़ॽ कन् मनाहाॽरे़ खुन्छिॽ लुम्मो के़युङ्ॽ, खे़ने़ॽ के़लागि आङ्गाॽ यहवे दाङ्बे़ल्ले़ लत्छा निङ्वाॽ के़माबा याःम्बक् चोगुङ्ॽ फाॽआङ् खे़ङ्हाॽरे़ मे़निसुॽ॥ 11 आइन् आङ्गाॽ खे़ने़ॽ पिने़र पत्ताबा इङ्जाङ्ङिन् खे़ने़ॽ इःत्ते़ॽ नाःत्ते़ॽ, आङ्गाॽ खे़ने़ॽ के़दगिलाम्बा एमोरि, कनानि, हित्ति, परिज्जि, हिब्बि नु यबुसिहाॽ नाःत्तुङ्देसुङ्सिङ्ॽ॥ 12 सिङ्सिङ् ये़क्ये़क्काङ् वये़ॽ! खे़ने़ॽ के़बेःक्ल के़बप्पा लाजेॽओबा मनाहाॽनु खे़ने़ॽ तङ्मे मे़जोगे़न्ने़ॽ, मेःन्ने़भग्र खे़ङ्हाॽ खिनिॽ लागि चे़न् मे़बोङ्ॽ॥ 13 खे़ङ्हाॽरे़ खुन्छिॽ ले़त्ति तोःम्मादे़न्हाॽ यन्छे़ पिरे़से़ॽ॥ खे़ङ्हाॽरे़ खुन्छिॽ सुत्थो फाॽआङ् मे़इःत्तुबा लुङ्हाॽ फयःप्फयःप् यःप्से़ पिरे़से़ॽ, हे़क्क्याङ् खे़ङ्हाॽरे़ खुन्छिॽ असेरा माङ्सित्लाङ्हाॽ च्ये़प्ते़आङ् सोःन्दे़ पिरे़से़ॽ॥ 14 “खिनिॽ वेॽ आत्तिन् माङ्ङिन्नाङ् से़वा मे़मे़त्ते़म्मिन्ने़ॽ, थेआङ्भे़ल्ले़ यहवे दाङ्बा, खुने़ॽ कुमिङ्ग ‘कुना के़हे़म्बारो’ कुना के़हे़म्बाङ्ग निङ्वाॽफुमाङ्ङिन्नेरो॥ 15 “सिङ्सिङ् ये़क्ये़क् लॽरे़म्मे़ॽ, खे़न् लाजेॽओबा मनाहाॽनु खिनिॽ तङ्मे मे़जोगे़म्मिन्ने़ॽ, मेःन्ने़भग्र खे़ङ्हाॽ खुन्छिॽ आबाङे माङ्हाॽ मे़दिम्दु मे़नाःत्तुसिआङ् निङ्वाॽओ याम्बोःप्मा याःम्बक् हे़क्तङ्बा मे़जोगुल्ले़ हे़क्क्याङ् खुन्छिॽ माङ्हाॽरे़ लागि वयागे़न् सिदुङ्सभा मे़जोगुल्ले़, खे़ङ्हाॽरे़ खिनिॽ के़म्उःत्तिॽ खे़ब्याङ् खिनिॽ खे़ङ्हाॽरे़ खुन्छिॽ सिदुङ्जभाहाॽ के़जाम्ॽ॥ 16 आल्ल खे़ङ्हाॽरे़ खुन्छिॽ मे़न्छुमा साहाॽओबा कुभा खिनिॽ ये़म्बित्छा साहाॽरे़ लागि के़दारुम्सिम्बिला, हे़क्क्याङ् खे़न् मे़न्छुमासाहाॽरे़ खुन्छिॽ माङ्हाॽ मे़दिम्दु मे़नाःत्तुसिआङ् नावाइत्लाहाॽ से़वा मे़मे़त्तुसिबिला हे़क्क्याङ् याःम्बोःप्मा याःम्बक् हे़क्तङ्बा मे़जोगुआङ् खे़ङ्हाॽरे़ खिनिॽ ये़म्बित्छा साहाॽआङ् हाबा खे़न् चोःक्मा मे़बाङ्घुसिॽ॥ 17 “खिनिॽ आबाङे लागि नावाइत्लाहाॽ मे़जोगे़म्सिम्मिन्ने़ॽ॥ 18 “के़भङ्बा सिदाॽ मे़न्याक्केबा खरे़ःङ् चामा तङ्नाम् तोसे़म्मे़ॽ॥ आङ्गाॽ इङ्जाङ् पिनिङ्बा कुइसिक् अबिब लाओ तोमा के़बोङ्बा ये़म्मो नुसि ये़न् थारिक् के़भङ्बा सिदाॽ मे़न्याक्केबा खरे़ःङ् चे़म्मे़ॽर वये़म्मे़ॽ॥ थेआङ्भे़ल्ले़ अबिब लाओ मिस्र लाजेॽलाम्बा खिनिॽ के़लःन्दि के़भे़रिआङ् वये़॥ 19 “साप्पोःक्कोलाम् तगि के़लःम्बा के़रे़क् आङ्गाॽइन् मे़बोङ्ॽ॥ खिनिॽ थक्साहाॽरे़ मे़धाप्तुसिबा कुम्बाबा, पित्थक्साहाॽ नु मे़ल्लुक् मे़ःन्दाक्हाॽरे़ तगि मे़धाप्तुसिबाहाॽ खक्पे़त् आङ्गाॽइन् मे़बोङ्ॽ॥ 20 अदङ्माःल्ले़ तगि थाप्तुबा अदङ्साःत्तिन् मे़ल्लुक्साःत्तिल्ले़ ले़क्ते़म्मे़ॽआङ् से़न्दे़म्मे़ॽ॥ खे़न् के़ल्ले़क्तुम्मिन्ने़भग्र खे़ल्ले़ कुसित्लाःन् ए़क्खे़म् पिरे़म्मे़ॽ॥ खिनिॽ तुम्बा साहाॽ के़रे़क् थे़माइ पिरे़म्सिम्मे़ॽआङ् से़न्दे़म्सिम्मे़ॽ॥ “आङ्गाॽ आदगि आत्तिन्हाॽआङ् थे़माआङ् मेःन्ने ओःन्मे़न्धाक्सिङ्ङिन्ल॥ 21 “तुक्सि ये़न् थारिक् आबाङे याःम्बक् चोगे़म्मे़ॽर वये़म्मे़ॽ, कर नुसिगेक्पा ये़न्नो नाःम्मासिम्मे़ॽ॥ के़क्चु थोःङ्मा नु चासुम्मा ये़म्मोआङ् नाःम्मासिम्मे़ॽ॥ 22 “ये़त्नाम्हाॽओबा तङ्नाम्हाॽ तगि के़दुम्बा मासिःन्नु खिनिॽ तोसे़म्मे़ॽ, हे़क्क्याङ् तङ्बेओबा कुनुप्मो कुजा चिङ्मा तङ्नाम्माङ् तोसे़म्मे़ॽ॥ 23 “कन् सुम्सि तङ्नाम्हाॽओ तङ्बेरे़ सुम्सिले़ङ् खिनिॽ के़रे़क् ये़म्बित्छाहाॽ इस्राइलबा निङ्वाॽफुमाङ् यहवे दाङ्बे़ल्ले़ कुदगि ओसेःन्मे़धाक्सिङ्ल॥ 24 आङ्गाॽ मे़न्छाम् सुवाङ्हाॽ खिनिॽ तगिलाम्बा लःत्तुङ्देसुङ्सिङ्ॽ, हे़क्क्याङ् खिनिॽ इःन्दोन् फोसुङ् पिनिङ्ॽ॥ यहवे दाङ्बा खिनिॽ निङ्वाॽफुमाङ्ङिल्ले़ कुदगि तङ्बेरे़ सुम्ले़ङ् ओसेःन्गे़धाक्कासिल्ले़ आत्तिन्हाॽरे़आङ् खिनिॽ लाजेॽ सिङ्बुङ्हाॽओ मिक् मे़ङ्गेःत्तुन्ॽ॥ 25 “आङ्गाॽओ के़दोःन्दुम्बा वयागे़न् सिदुङ्जभाःल्ले़ कुमाक्खिन् के़भङ्बा सिदाॽ याक्मनाबा खरे़ःङ्ङिन्नु मे़दोःन्दे़म्मिन्ने़ॽ, हे़क्क्याङ् के़भङ्बा सिदाॽ मे़न्याक्केबा खरे़ःङ् चामा तङ्नाम्मो सिदुङ्जभा तोःम्मनाबा थक्साःल्ले़ कुभा थेआङ् तानाम् थारिक् मे़गत्ते़म्मिन्ने़ॽ॥ 26 “खिनिॽ लाजेॽ सिङ्बुङ्ङोबा तगि के़दुम्बा कुजाहाॽओबा के़रे़क्नुःल्ले़ नुबा कुजाॽइ कुजान् यहवे दाङ्बा खिनिॽ निङ्वाॽफुमाङ्ङिल्ले़ कुहिम्मो तारे़म्मे़ॽ॥ “मे़ःन्दज्याःक् सान् खे़ल्ले़ कुम्मारे़ कुनुओ मे़धोःक्ते़म्मिन्ने़ॽओ॥” 27 खे़ब्याङ् यहवे दाङ्बे़ल्ले़ मोसान् मे़त्तु, “कन् पाःन्हाॽ साप्ते़ॽ, थेआङ्भे़ल्ले़ कन् पाःन्हाॽ कुइसिक् खे़ने़ॽ हे़क्क्याङ् इस्राइलिहाॽनु माङ्हुप् चोगुङ्ङाङ् वाॽ॥” 28 मोसान् खे़प्मो लिबोङ् ये़न् थारिक् नु लिबोङ् से़न्दिक् थे़म्बा वये़॥ खुने़ॽ खरे़ःङ्ङाङ् मे़जने़न् हे़क्क्याङ् च्वाःत्ताङ् मे़धुङुन्॥ खुने़ॽ खे़न् साप्लुङ्हाॽओ खे़न् माङ्हुप्पोबा पाःन्जाःक्किन् खे़न् थिबोङ् इङ्जाङ्हाॽ साप्तुरो॥ मोसान् सिनै कोःक्माओलाम् थासिङ् युःॽ 29 आल्ल मोसान् तोःन्दिले़न् खे़न् ने़त्छि साप्लुङ्हाॽ कुहुक्को याङ्सिङ् हे़क्क्याङ् सिनै कोःक्माओलाम् थासिङ् ये़, खे़ब्याङ् खुने़ॽ निङ्वाॽफुमाङ्ङिन्नु पारे़बाल्ले़ चोगुल्ले़ खुने़ॽ कुनारान् से़दिङ्दिङ् ओःत्ल पत् के़लॽबा पाःन्निन् मोसाःल्ले़ निङ्वाॽ मे़घोसुन्॥ 30 आल्ल हारुने़न् नु के़रे़क् इस्राइलिहाॽरे़ मोसान् मे़निसु, हे़क्केःल्ले़ खे़ङ्हाॽरे़ खुने़ॽ कुनारान् से़दिङ्दिङ् ओःत्ते़बा मे़निसु, हे़क्क्याङ् खुने़ॽ कुबेसाङ् तामा खे़ङ्हाॽ मे़गिसे़॥ 31 कर मोसाःल्ले़ खे़ङ्हाॽ उःत्तुसि, हे़क्क्याङ् सङ्जुम्भोबा के़रे़क् लाम्लोबाहाॽनु सोसोरिक् हारुने़न् मोसान् ले़प्माङ् मे़नुःक्खे़ मे़द्ये़, खे़ब्याङ् मोसान् खे़ङ्हाॽनु पारे़॥ 32 खे़न् एगाङ् के़रे़क् इस्राइलिहाॽआङ् निःत्ताङ् मे़द्ये़, हे़क्क्याङ् यहवे दाङ्बे़ल्ले़ खुने़ॽ सिनै कोःक्माओ मे़त्तुबा के़रे़क् इङ्जाङ् पाःन्हाॽ खुने़ॽ खे़ङ्हाॽ चे़क्तुसि॥ 33 आल्ल मोसान् खे़ङ्हाॽनु पारे़ चुरे़, खे़ब्याङ् खे़ल्ले़ खुने़ॽ कुनारान् पःत्थाङ् थिक्ले़ ते़प्तु॥ 34 कर आल्ल मोसान् यहवे दाङ्बे़ल्ले़ कुदगि खुने़ॽनु पाःत्छे़ पेःल्ले़ लाःक्कात् मे़ल्लःन्ने थारिक् खुने़ॽ खे़न् पःत्थाङ्ङिन् हन्दुदेसु॥ खुने़ॽ खे़प्सुबा इङ्जाङ्ङिन् खुने़ॽ लाःक्कात् लःन्दे़आङ् इस्राइलिहाॽ चे़क्तुसि॥ 35 इस्राइलिहाॽरे़ मोसाःल्ले़ कुनारान् ओःत्ते़बा मे़निसु॥ खे़ब्याङ् मोसान् यहवे दाङ्बे़न्नु पाःप्मारे़ लागि सिगाङ् मे़ल्लःत्ते थारिक् खे़न् पःत्थाङ्ङिन् खुने़ॽ कुनाराओ याम्मो ते़प्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.