लाम्दिक् 33 - लिम्बुमोसाःल्ले़ चोगुबा पेलिगे़न् तुवा 1 खे़ब्याङ् यहवे दाङ्बे़ल्ले़ मोसान् मे़त्तु, “मिस्रलाम्बा फे़प्मनासिबा कन् मनाहाॽनु खे़ने़ॽ खे़न् लाजेॽओ पेगे़ॽ, खे़ल्ले़ कुयाःम्बेओ ‘खे़ने़ॽ के़मुॽइदाङ्साहाॽ पिरुङ्सिङ्ॽ’ फाॽआङ् आङ्गाॽ अब्राहाम, इसहाक हे़क्क्याङ् याकुबे़न्नु माङ्हुप् चोगुङ्ङाङ् वयाङ्॥ 2 आङ्गाॽ खिनिॽ तगि तगि लत्छा माङ्लाइङ्बा पाङ्घुङ्ॽ, हे़क्क्याङ् कनानि, एमोरि, हित्ति, परिज्जि, हिब्बि नु यबुसिहाॽ नाःत्तुङ्देसुङ्सिङ्ॽ॥ 3 पित्नु नु सक्वाघु के़गुङ्बा खे़न् लाजेॽओ पेगे़म्मे़ॽ॥ कर खिनिॽ आधिङ्गानि के़जोःक्पा मनानिङ्, कल्ले़चोगुल्ले़ आङ्गाॽ खिनिॽ लुम्मो मे़बेःक्कान्, मेःन्ने़भग्र लाम्मोसा आङ्गाॽ खिनिॽ मे़ङ्मा सुक्निङ्बिला॥” 4 आल्ल मनाहाॽरे़ कन् फे़न् इङ्घङ्ङिन् मे़घे़प्सु, खे़ब्याङ् खे़ङ्हाॽरे़ खुनिॽ निङ्वाॽ तुक्खे च्ये़, हे़क्क्याङ् आत्तिन्हाॽरे़आङ् वाःत्ति सामाहाॽ मे़न्वारुन्॥ 5 थेआङ्भे़ल्ले़ यहवे दाङ्बे़ल्ले़ मोसान् अक्खे मे़त्तुआङ् वये़, “इस्राइलिहाॽ मे़त्ते़से़ॽ, ‘खिनिॽ आधिङ्गानि मनानिङ्॥ आङ्गाॽ मिक्चिराप्पा थिक्लक् खिनिॽ लुम्मो ताआने़भग्र आङ्गाॽ खिनिॽ खाप्पुथ्यःङ् मे़ङ्निङ्॥ आल्ल खिनिॽ वाःत्ति सामाहाॽ फे़न्दे़म्मे़ॽ, हे़क्क्याङ् खिनिॽनु थे़मा चोःक्मा पोङ्ॽ, खे़न् पाःन्नो आङ्गाॽ निङ्वाॽ इःत्तुङ्॥’” 6 कल्ले़चोगुल्ले़ होरेब कोःक्माओ इस्राइलिहाॽरे़ खुन्छिॽ सामाहाॽ मे़भे़न्दुरो॥ तुम्मादे़न् साःङ्गाहिम् 7 मोसान् तुम्मादे़न् साःङ्गाहिम्लाम् लाःक्कात् नानाक् सेसे साःङ्गाहिम्मिन् चोगुर यागे़॥ खुने़ॽ खे़न् “तुम्मादे़न् साःङ्गाहिम्” मे़त्तु॥ यहवे दाङ्बान्नु तुम्मा निङ्वाॽ के़जोःक्पा के़रे़क् मनाहाॽ साःङ्गाहिम् लाःक्कात् के़ने़बा आम्भा खे़न् साःङ्गाहिम्मो मे़बे॥ 8 आल्ल मोसान् लःन्दे़आङ् तुम्मादे़न् साःङ्गाहिम्मो पे, खे़ब्याङ् के़रे़क् मनाहाॽ मे़बोगे़आङ् आबाङे खुन्छिॽ साःङ्गाहिम्मोबा लाम्धेःप्पो मे़ये़म्सिङ्ङाङ् मोसान् साःङ्गाहिम्मो मे़ल्लःत्ते थारिक् आम्भा खुने़ॽ ले़ङ् लॽरिक् ओमे़मे़त्तुआङ् मे़बत्छे़॥ 9 आल्ल मोसान् खे़न् साःङ्गाहिम्मो लासे़ हे़क्केःल्ले़ खाॽमिःप्पा सित्लाङ्ङिन् थासिङ् ये़आङ् साःङ्गाहिम्मोबा लाम्धेःप्पो तक्पे़त् ये़म्सिङ्॥ खे़ब्याङ् यहवे दाङ्बे़न् मोसाःन्नु पारे़॥ 10 आल्ल मनाहाॽरे़ खाॽमिःप्पा सित्लाङ्ङिन् साःङ्गाहिम्मोबा लाम्धेःप्पो तक्पे़त् ये़म्सिङ्बा मे़निसु, खे़भे़ल्ले़ खे़ङ्हाॽ मे़बोगे़आङ् खुन्छिॽ आबाङे आबाङे साःङ्गाहिम्मोबा लाम्धेःप्पो माङ्से़वा मे़जोगे़॥ 11 कम्भलॽरिक् कुभा चुम्देङ्नु ताॽजे़ङ्मना पाःप्मनाबा हे़क्के यहवे दाङ्बान् मोसाःन्नु तुम्दुम्बा ताॽजे़क्खे़॥ खे़ब्याङ् मोसान् नुःक्खे़आङ् साःङ्गाहिम्मो त्ये़, कर खुने़ॽ थाङ्बे़न् कुभाॽबाङ् नुनरे़ कुस्सा यहोसुन् खे़न् साःङ्गाहिम्मोलाम् मे़ल्लःन्ने यागे़कत्ते़रो॥ मोसाःल्ले़ यहवे दाङ्बाल्ले़ कुमिमिदिङ्ङिन् निसु 12 हे़क्क्याङ् मोसाःल्ले़ यहवे दाङ्बे़न् मे़त्तु, “आदाङ्बारे़ आङ्गाॽ ‘कन् मनाहाॽ तेॽरे़से़ॽआङ् पेगे़ॽ’ के़मे़त्ता, कर आङ्गाॽनु सोरिक् हाःत्हाःत्छि के़बाङ्घुसि आदाङ्बारे़ आङ्गाॽ मे़म्मे़त्ते के़गत्ता॥ खे़ने़ॽ अक्खे के़बाःत्तुआङ् वाॽ, ‘खे़ने़ॽग आङ्गाॽ के़मिङ्लाम्बाए कुसेःन् निने़—हे़क्क्याङ् खे़ने़ॽनु आङ्गाॽ आनिङ्वाॽ त्ये़आङ् वाॽ॥’ 13 आदाङ्बारे़ आङ्गाॽनु के़निङ्वाॽ त्ये़आङ् वाॽने़भग्र, आल्ल आदाङ्बारे़ चोःक्मा के़इःत्तुबा पाःन्निन् आङ्गाॽ ओःन्धाक्ताङ्ङे़ॽ, हे़क्क्याङ् आङ्गाॽ कुसिङ् निःप्मा सुक्ने़र हन्नाङ् आदाङ्बारे़ के़मिक्साओ आङ्गाॽनु के़निङ्वाॽ ताआङ् पत्ल॥ कन् सुवाङ्ङिन् आदाङ्बारे़न्ने फाॽआङ् निङ्वाॽ इःत्ते़ॽ॥” 14 हे़क्क्याङ् यहवे दाङ्बे़ल्ले़ पाःत्तु, “आङ्गाॽ खे़ने़ॽनु पेःक्का, खे़ब्याङ् आङ्गाॽ खे़ने़ॽ नाःम्सिङ्मा पिने़॥” 15 खे़ब्याङ् मोसाःल्ले़ मे़त्तु, “आदाङ्बा आङ्गाॽनु के़म्बेःक्ने़न्ने़भग्र आनिगे कप्मोलाम्बा खे़त्ना याप्मि आन्देॽरे़न्ने़ॽ॥ 16 आदाङ्बा आनिगे़नु के़म्बेःक्ने़ल्ल थारिक् आङ्गाॽ नु आदाङ्बारे़ कन् के़मनाहाॽओ के़निङ्वाॽ त्ये़आङ् वाॽ फाॽआङ् आक्खेलॽरिक् कुसिङ्निःप्माबे? वेॽ थे़मा पाःन्निल्ले़ आङ्गाॽ नु आदाङ्बारे़ के़मनाहाॽ इक्सादिङ् खाम्बेःक्मोबा के़रे़क् मे़न्छाम् याप्मिहाॽलाम् वेॽ पोःक्खिगे़बे?” 17 खे़ब्याङ् यहवे दाङ्बे़ल्ले़ मोसान् मे़त्तु, “खे़ने़ॽ के़बाःत्तुबा पाःन्निन्ने आङ्गाॽ चोगुङ्ॽ, थेआङ्भे़ल्ले़ आङ्गाॽ आमिक्साओ खे़ने़ॽनु आनिङ्वाॽ त्ये़आङ् वाॽ, हे़क्क्याङ् आङ्गाॽ खे़ने़ॽ के़मिङ्लाम्बाए कुसिङ् निःत्ने़आङ् वाॽ॥” 18 मोसाःल्ले़ मे़त्तु, “आल्ल आङ्गाॽ आदाङ्बारे़ के़मिमिदिङ्ङिन् ओसेःन्धाक्ताङ्ङे़ॽ॥” 19 खुने़ॽ पाःत्तु, “आङ्गाॽ खे़ने़ॽ के़बेसाङ्ङे आङ्गाॽ आगे़रे़क् नुबा पाःन्हाॽ ओःन्धाक्ने़, हे़क्क्याङ् खे़ने़ॽ के़बेसाङ्ङे ‘यहवे दाङ्बा’ मिङ्ङिन् उवा चोगुङ्ॽ॥ आत्तिन् आङ्गाॽ लुङ्माॽ तुक्मा निङ्वाॽ चोगुङ्ॽ आङ्गाॽ खे़न् लुङ्माॽ तुक्तुङ्ॽ॥ आत्तिन् आङ्गाॽ नुरिक् मे़प्मा निङ्वाॽ चोगुङ्ॽ, आङ्गाॽ खे़न् नुरिक् मे़त्तुङ्ॽ॥” 20 हे़क्क्याङ् खुने़ॽ मे़त्तु, “कर आङ्गाॽ आनारान् ओमे़प्मा के़न्छुक्तुन्, थेआङ्भे़ल्ले़ आनारान् ओमे़मे़त्तुआङ् मनाहाॽ हिङ्मा मे़न्छुक्ने़न्॥” 21 खे़ब्याङ् यहवे दाङ्बे़ल्ले़ मे़त्तु, “आङ्गाॽ आबेसाङ् लत्छा ते़न् ने़ःॽ, आम्भा कन् याक्पेॽओ खे़ने़ॽ ये़बे़ॽ॥ 22 आङ्गाॽ आमिमिदिङ्ङिन् खे़प्मोलाम्बा पोङ्ङाङ् पेःक्किल्ले़ आङ्गाॽ खे़ने़ॽ खे़न् याक्पेॽओबा हङ्ग्रिङ्बो ये़म्ने़, हे़क्क्याङ् आङ्गाॽ खे़प्मोलाम् पोङ्ङाआङ् मे़न्नुःङ् मे़म्भे़ःम्ने थारिक् खे़ने़ॽ आङ्गाॽ आहुक्किल्ले़ए ते़प्ने़भन्ने़॥ 23 खे़न् एगाङ् आङ्गाॽ आहुक्किन् खे़त्तुङ्ॽ, हे़क्क्याङ् खे़ने़ॽ आङ्गाॽ आएःक्के़न् के़निसुॽ, कर आङ्गाॽ आनाराःङ्ग के़न्निसुन्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.