लाम्दिक् 32 - लिम्बुसाम्म्याङ् पित्सात् 1 आल्ल मनाहाॽरे़ मोसान् कोःक्माओलाम्बा थासिङ्मा युमा सुसे़बा मे़निसु, खे़ब्याङ् खे़ङ्हाॽ हारुन वये़बादे़न्नो मे़जुप्से़आङ् खुने़ॽ अक्खे मे़प्मा मे़हेःक्तु, “पोगे़ॽ, हे़क्क्याङ् आनिगे तगि तगि पेःक्मारे़ लागि माङ्हाॽ चोगे़से़ॽ, थेआङ्भे़ल्ले़ मिस्रलाम् आनिगे याप्मि के़लःप्पा के़भे़प्पा मना मोसान् थे़मा पोःक्खे़इ आनिगे थेआङ् मे़निसुम्बे़न्॥” 2 हारुने़ल्ले़ खे़ङ्हाॽ मे़त्तुसि, “खिनिॽ मेःत्हाॽ नु साहाॽरे़ खुन्छिॽ ने़क्खोॽओ मे़वारुबा कुन्दुल्लोहाॽ फे़न्दे़म्मे़ॽआङ् कप्मो तारे़म्मे़ॽ॥” 3 खे़ब्याङ् खे़न् के़रे़क् मनाहाॽरे़ खुन्छिॽ ने़क्खोॽओ के़बप्पा कुन्दुल्लोहाॽ मे़भे़न्दुआङ् हारुने़न् मे़बिरु॥ 4 खुने़ॽ खे़ङ्हाॽरे़ खुन्छिॽ हुक्कोलाम् ताःक्तुआङ् योःन्दु हे़क्क्याङ् सार्दाम्मिल्ले़ यत्तुआङ् लत्छा पित्सात् हे़क्तङ्बा नावाइत्ला चोगु॥ खे़ब्याङ् खे़ङ्हाॽरे़ मे़बाःत्तु, “इस्राइलिसे, मिस्रलाम्बा खिनिॽ के़लःप्पा के़भे़प्पा खिनिॽ माङ्ङिन् कन्नेरो॥” 5 कन् निसुआङ् हारुने़ल्ले़ पित्सात्तिल्ले़ कुदगाङ् लत्छा ले़त्ति तोःम्मादे़न् चोगु, हे़क्क्याङ् खुने़ॽ अक्खे पाःत्तुआङ् इङ्भन् चोगु, “ताःन्दिक् यहवे दाङ्बे़ल्ले़ कुलागि लत्छा तङ्नाम् पोङ्ॽ॥” 6 कुदाःन्दिक्मा मनाहाॽ तानाम्सा मे़बोगे़आङ् थक्साहाॽ मिधिङ्मनादेमनाबा वयागे़न् सिदुङ्जभा नु तङ्जुम् वयागे़न् सिदुङ्जभाहाॽ मे़दोन्दुसि, खे़ङ्हाॽ कुजा चामारे़ लागि मे़युङ्सिङ्, हे़क्क्याङ् खे़न् एगाङ् सोसोत्लराङ् चोःक्मा मे़हेःक्ते़॥ 7 खे़ब्याङ् यहवे दाङ्बे़ल्ले़ मोसान् मे़त्तु, “यो थासिङ्ङे़ॽ, थेआङ्भे़ल्ले़ खे़ने़ॽ मिस्रलाम् के़लःत्तु के़भे़त्तुसिबा खे़ने़ॽ के़मनाहाॽ खुन्छिॽ आबाङे लायो चोःक्मा मे़हेःक्तुआङ् साॽरिक् फे़त्मे़लाॽरे़ मे़स्ये़आङ् मे़याक्॥ 8 आङ्गाॽ खे़ङ्हाॽ आत्तिन् लाम्मो लाङ्घेःक्मा इङ्जाङ् पिरुङ्सिङ्ङाङ् वये़, खे़ङ्हाॽरे़ खे़न् लाम्मिन् साॽरिक् हारा मे़ले़रुआङ् थिक्नाहाङ् मे़बेआङ् मे़वाॽ॥ खे़ङ्हाॽरे़ खुनिॽ लागि साम्म्याङ्ङिन् मे़योन्दुआङ् पित्सात्तिल्ले़ कुजइःत्तो नावाइत्ला मे़धगु हे़क्क्याङ् खे़न् माङ्से़वा मे़मे़त्तुआङ् मे़वा, खे़ब्याङ् खे़ल्ले़ए कुलागि सिदुङ्जभा मे़दोन्दुआङ् अक्खे मे़बाःत्तुआङ् मे़वाॽ, ‘इस्राइलिसे, मिस्रलाम् खिनिॽ के़लःप्पा के़भे़प्पा खिनिॽ माङ्ङिन् आम्भा कन्लो॥’” 9 यहवे दाङ्बे़ल्ले़ मोसान् मे़त्तु, “आङ्गाॽ कन् मनाहाॽ निसुङ्सिङ्॥ कन्हाॽग आधिङ्गानि मनासिरे़त्छ॥ 10 आल्ल आङ्गाॽ मे़धेःक्ताङ्ङिन्ने़ॽ, आङ्गाॽ आसाक्के़न्निन् कन्हाॽरे़ खुन्छिॽ सम्धाङ् चुक्ल॥ आङ्गाॽ कन्हाॽ खाप्पुथ्यःङ् तेसुङ्सिङ्ॽ॥ खम्भ्याङ् खे़ने़ॽ लाम्बाए लत्छा यम्बा मे़न्छाम् सुवाङ् चोगुङ्सिङ्ॽ॥” 11 कर मोसाःल्ले़ यहवे दाङ्बा खुने़ॽ कुनिङ्वाॽफुमाङ्ङिन् पेलि फाक्तुआङ् मे़त्तु, “यहवे दाङ्बाए, खे़ने़ॽ यम्बा के़मुक्साम् नु मुक्साम्साबा के़हुक्किल्ले़ मिस्रलाम् के़लःत्तु के़भे़त्तुसिबा के़मनाहाॽनु खे़ने़ॽ थेआङ् कम्म्याक् साॽरिक् के़साक्के़न्निल्ले़ मि के़बोङ्बाबे? 12 मिस्रबा मनाहाॽरे़ थेआङ् अक्खे पाःप्मा लाम् मे़घोसुर पोङ्बाबे? ‘ताप्फे़ःम्बा निङ्वाॽ इःत्तुआङ् कोःक्माहाॽओ खे़ङ्हाॽ से़त्छे़, हे़क्क्याङ् खे़ङ्हाॽ इक्सादिङ् खाम्बेःक्मोलाम् मे़ङ्से़ खुने़ॽ खे़ङ्हाॽ तेॽरुसि॥’ आदाङ्बारे़ साॽरिक् के़सिक् पोःक्मान् चिःक्तुर चोगे़ॽ, खे़ब्याङ् आबाङे के़मनाहाॽ हान्ति चोःक्मासिलाम् खे़ने़ॽ के़निङ्वान् नुःक्ते़ॽ॥ 13 अब्राहाम, इसहाक नु याकुब आदाङ्बारे़ के़से़वारोबाहाॽ निङ्वाॽ इःत्ते़से़ॽओ, खे़ङ्हाॽनु आदाङ्बारे़ आबाङे के़मिङ्ङो माङ्हुप् के़जोगु हे़क्क्याङ् आदाङ्बारे़ अक्खे के़बाःत्तुआङ् वये़, ‘आङ्गाॽ खिनिॽ मुॽइदाङ्साहाॽ ताङ्साङ्बोबा खेःम्सिक्पाहाॽ कुइसिक् यरिक् चोगुङ्सिङ्ॽ॥ आङ्गाॽ माङ्हुप् चोगुङ्बा कन् के़रे़क् लाजेन् खिनिॽ थिन्दाङ् सायोबोराहाॽ पिरुङ्सिङ्ॽ, हे़क्क्याङ् खे़ङ्हाॽ आभे़ल्ले़ आभे़ल्ले़ थारिक्साङ् खे़न् लाजेःल्ले़ लागि लक्के़घोबा मे़बोङ्ॽ॥’” 14 खे़ब्याङ् खुने़ॽ आबाङे कुमनाहाॽ खुने़ॽ पाःत्तुबा हे़क्के हान्ति चोःक्मासिलाम् यहवे दाङ्बे़ल्ले़ कुनिङ्वाॽ नुःक्तु॥ 15 हे़क्क्याङ् मोसान् नुःक्खे़आङ् इङ्जाङ्हाॽ साप्ते़आङ् के़बप्पा ने़प्माङ् साप्लुङ्हाॽ खुने़ॽ कुहुक्को याङ्सिङ्ङाङ् कोःक्माओलाम् थासिङ् ये़॥ खे़न् साप्लुङ्हाॽओ तगाङ् नु एगाङ् ने़प्माङ् ले़प्माङ् साप्मनाबा पत्छे़॥ 16 खे़न् साप्लुङ्हाॽ निङ्वाॽफुमाङ्ङिल्ले़ कुयाःम्बक् वये़॥ खे़न् साप्लुङ्ङो के़बप्पान् निङ्वाॽफुमाङ्ङिल्ले़ लक्तुआङ् साप्तुआङ् पत्छे़॥ 17 यहोसुःल्ले़ मनाहाॽ मे़भिःक्ते़बा खे़प्सुआङ् मोसान् मे़त्तु, “साःङ्गाहिम्मोग ते़ङ्धङ्ङोबा हयङ् किल्लिङ् हे़क्तङ्बा इक्लानि खे़म्दे़त्ल पत्॥” 18 मोसाःल्ले़ मे़त्तु, “कन् इक्लान् के़नाःम्बाहाॽरे़न्नाङ् मेःन्लो, हारि के़दाबाहाॽरे़न्नाङ् मेःन्लो, कर आङ्गाॽग साम्गे़लोबाहाॽरे़ खुन्छिॽ इक्लान् खे़प्सुङ्ल पत्तारो॥” 19 साःङ्गाहिम्मो के़रे़ त्ये़आङ् पत्छे़र मोसाःल्ले़ पित्साःत्तिन् नु मनाहाॽ मे़लाःक्खे़र मे़यागे़बा निसुसि॥ मोसान् साॽरिक् कुसिक् पोगे़, हे़क्क्याङ् खुने़ॽ खे़न् साप्लुङ्हाॽ खुने़ॽ आबाङे कुहुक्किल्ले़ कोःक्माल्ले़ कुबुङ्मो लाप्फेसुआङ् फयःप् यःप्सुदेसु॥ 20 खे़ब्याङ् खे़ङ्हाॽरे़ मे़जोगुबा खे़न् पित्सात्तिन् तेॽरुआङ् खुने़ॽ मिओ मिधिक्खुदेसु, हे़क्क्याङ् खे़न् यःप्सुआङ् कुम्जिक्मा चोगुआङ् च्वाःत्तो से़सुकेःत्तु॥ हे़क्क्याङ् खुने़ॽ इस्राइलिहाॽ खे़न् थुङ्मा पाङ्घुसि॥ 21 खे़न् एगाङ् मोसाःल्ले़ हारुने़न् मे़त्तु, “कन् मनाहाॽरे़ आदाङ्बा थे़मा के़म्मे़त्ते़आङ् आदाङ्बारे़ कन्हाॽ कम्म्याक् यम्बा लायोओ के़धासुसिबे?” 22 हारुने़ल्ले़ मे़त्तु, “आङ्गाॽनु आदाङ्बारे़ के़याःक् मे़ले़ॽरे़न्ने़ॽ॥ आदाङ्बारे़ग कन् मनाहाॽ कुसिङ् के़निःत्तुसिआङ्ङे के़वाॽ॥ कन्हाॽ साॽरिक् ताप्फे़ःम्बा पान् ले़प्माङ् मे़लासे़आङ् मे़वाॽ॥ 23 खे़ङ्हाॽरे़ आङ्गाॽ अक्खे मे़मे़त्ताङ्, ‘आनिगे लागि आनिगे तगितगि के़बेःक्पा माङ्हाॽ चोगे़से़ॽ, थेआङ्भे़ल्ले़ मिस्रलाम् आनिगे याप्मि के़लःप्पा के़भे़प्पा मना मोसान् थे़मा पोःक्खे़इ आनिगे मे़निसुम्बे़न्॥’ 24 खे़ब्याङ् आङ्गाॽ खे़ङ्हाॽ मे़त्तुङ्सिङ्, ‘आत्तिन् आत्तिन्हाॽरे़ साम्म्याङ् वाःत्तिहाॽ के़गत्तुम्, खे़न् वाःत्तिहाॽ फे़न्दे़म्मे़ॽआङ् आङ्गाॽओ तारे़म्मे़ॽ॥’ हे़क्क्याङ् खे़ङ्हाॽरे़ आङ्गाॽ साम्म्याङ् मे़बिराङ्॥ आङ्गाॽ मिओ केःत्तुङ्, हे़क्क्याङ् खे़न् पित्सात्तिन् लःन्दे़!” 25 मोसाःल्ले़ मनाहाॽ खुन्छिॽ निङ्वाॽ पाःत्पाःत् के़जोःक्पा मे़बोःक्खे़ मे़जुरे़बा निसुसि, थेआङ्भे़ल्ले़ हारुने़ल्ले़ खे़ङ्हाॽ खुन्छिॽ निङ्वाॽ पाःत्पाःत् के़जोःक्पा मे़बोःक्खे़र याःन्दुसिआङ् वये़, खे़ङ्हाॽ खुनिॽ आबाङे निङ्मिहाॽरे़ खुन्छिॽ तगिए एःत्लाबा मे़बोःक्खे़आङ् मे़वये़॥ 26 खे़ब्याङ् मोसान् साःङ्गाहिम्मोबा लाम्धेःप्पो ये़म्सिङ्ङाङ् पाःत्तु, “आत्तिन् आत्तिन्हाॽ यहवे दाङ्बाओ मे़वाॽ, खे़ङ्हाॽ आङ्गाॽओ कत्ना मे़भे़न्ल!” हे़क्क्याङ् ले़बिःल्ले़ के़रे़क् कुमुॽइदाङ्साहाॽ खुने़ॽओ मे़भे़रे़आङ् मे़जुप्से़॥ 27 मोसाःल्ले़ खे़ङ्हाॽ मे़त्तुसि, “यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुॽ, ‘खिनिॽ के़रे़क्ले़ आबाङे ताभेहाॽ हेॽआसिम्मे़ॽ हे़क्क्याङ् साःङ्गाहिम्मोबा कत्नासमा कुयाओनु नासमा कुयाओबा लाम्धेःत्तो पेगे़म्मे़ॽआङ् के़रे़क्ले़ आबाङे फुॽनुसाॽ हे़क्क्याङ् चुम्देङ् नु आबाङे हिम्बेसाङ्बाहाॽ से़रे़म्सिम्मे़ॽ॥’” 28 खे़ब्याङ् ले़बिःल्ले़ कुमुॽइदाङ्साहाॽरे़ मोसाःल्ले़ मे़त्तुसिबा कुइसिक् मे़जोगु॥ खे़ल्ले़ याःन्दिक् मनाहाॽरे़ खुन्छिॽ लुम्मो ३,००० यारिक् ये़म्बित्छाहाॽ मे़से़रुसि॥ 29 खे़ब्याङ् मोसाःल्ले़ मे़त्तुसि, “आइन् खिनिॽ आबाङे साहाॽ नु फुॽनुसाहाॽ मे़ङ्मनासि हे़क्क्याङ् यहवे दाङ्बाल्ले़ कुलागि खिनिॽ लाःत्लाःत् से़म्मनानिङ्ङाङ् के़वयि॥ आइन् खुने़ॽ खिनिॽ हाङ्वागे़न् मुॽइसाम् के़बिरिआङ् वाॽ॥” 30 कुदाःन्दिक्मा मोसाःल्ले़ मनाहाॽ मे़त्तुसि, “खिनिॽ यम्बा लायो के़जोगुम्माङ् के़वयि॥ कर आल्ल आङ्गाॽ यहवे दाङ्बाओ थोःक्सिङ्ङाआङ् पेःक्का॥ निङ्वाॽफुमाङ्ङिन्नु नादङ् चोःक्से़ खिनिॽ लायोल्ले़ लागि ले़प्मि नाःक्मा पिमा सुक्तुङ्बि हाग॥” 31 हे़क्क्याङ् मोसान् यहवे दाङ्बाओ नुःक्खे़ पेआङ् अक्खे मे़त्तु, “चिःत्ते़स्ये़रो! कन् मनाहाॽरे़ आक्तङ्बा यम्बा लायोनि मे़जोगुआङ् मे़वाॽबे! खे़ङ्हाॽरे़ खुन्छिॽ लागि साम्म्याङ्लाम् माङ् मे़जोगुआङ् वाॽ॥ 32 हे़क्केसाङ् खे़ङ्हाॽ लायोलाम् ले़प्मि पिरे़से़ॽओ—मेःन्ने़भग्र, खे़ने़ॽ के़साप्तुबा साप्पन्नोलाम्बा आङ्गाॽ आमिङ् आयोःक्के मासाङ् पिराङ्ङे़ॽओ॥” 33 खे़ब्याङ् यहवे दाङ्बे़ल्ले़ मोसान् मे़त्तु, “आत्तिल्ले़ आङ्गाॽ आदक्ले़ङ्वाओ लायो चोगुआङ् वाॽ, खे़न्ने आङ्गाॽ आसाप्पन्नो कुमिङ् मासुङ् पिरुङ्ॽ॥ 34 आल्ल खे़ने़ॽ पेगे़ॽ, आङ्गाॽ खे़ने़ॽ मे़त्ने़बा ते़न्नो मनाहाॽ लाम्लोसे़ तेॽरे़से़ॽ, हे़क्क्याङ् आङ्गाॽ आइङ्घङ्साबे़न् खे़ने़ॽ के़दगि के़दगि पेक्, हे़क्केसाङ् खे़ङ्हाॽ खुम्दिङ् पिमासि ये़म् ताआङ् आङ्गाॽ खे़ङ्हाॽरे़ खुन्छिॽ लायोल्ले़ कुले़क्वा खुम्दिङ् पिरुङ्सिङ्ॽ॥” 35 हे़क्क्याङ् हारुने़ल्ले़ चोगुबा पित्सात्तिन् खे़ङ्हाॽरे़ से़वा मे़मे़त्तुबे़ल्ले़ चोगुल्ले़ यहवे दाङ्बे़ल्ले़ मनाहाॽ माङ्दुक्माल्ले़ स्ये़रुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.