लाम्दिक् 31 - लिम्बुयहवे दाङ्बे़ल्ले़ कुयुङ्मादे़न् के़जोःक्पाहाॽ 1 हे़क्क्याङ् यहवे दाङ्बे़ल्ले़ मोसान् मे़त्तु, 2 “ओमे़त्ते़ॽ, यहुदाबा थाःक्कोबा हुररे़ कुम्मे़न्छाॽ, उरिःल्ले़ कुस्सा बजलेःल्ले़न् सेगुङ्ङाङ् वाॽ॥ 3 आङ्गाॽ निङ्वाॽफुमाङ्ङिल्ले़ आयाम्साम्मिल्ले़, सिक्कुम् निङ्वाॽ नु खासिङ्निःप्मे़ल्ले़, के़रे़क् परिक्पा चोबेगु सिक्कुम् निङ्वाॽरे़ के़ले़बा चोगुङ्ङाङ् वाॽ॥ 4 खे़ल्ले़ साम्म्याङ्, युप्पा, कासा कुहुक्वा पनुॽनुॽर याःम्बक् चोःक्मा, 5 हे़क्क्याङ् लुङ् खक्मा नु काम्मा, सिङ् लक्मा खे़ब्याङ् के़रे़क् परिक्पा चोबेगु चोःक्मा याःम्बक् चोगुर॥ 6 दानरे़ कुधाःक्कोबा अहिसामाके़ल्ले़ कुस्सा ओहोलिआबे़न् आङ्गाॽ खे़न् फाॽरुर फाॽआङ् युक्तिङ् चोगुङ्ङाङ् वाॽ॥ थे़मा थे़मा पाःन्हाॽओ के़रे़क् वेॽ याःम्बक् के़जोःक्पाहाॽ इङ्जाङ् पिरुङ्सिङ्ङाङ् वाॽ, आङ्गाॽ खे़ङ्हाॽ कन् मु के़बप्पा याःम्बक्हाॽ चोःक्मा के़सुक्पा चोगुङ्सिङ्ङाङ् मे़वाॽ— 7 तुम्मादे़न् साःङ्गाहिम्, नु खे़ल्ले़ कुदे़प्फेॽ, हे़क्क्याङ् साःङ्गाहिम्मोबा के़रे़क् सामापुमाहाॽ— 8 चप्ते़न् नु खे़प्मोबा सामाहाॽ, साम्म्याङ् इसेःङ्बा सेमियुङ्दे़न् हे़क्क्याङ् खे़प्मोबा के़रे़क् सामाहाॽ, खे़ब्याङ् सुक्पा हाःम्मा ले़त्ति तोःम्मादे़न्, 9 मिधिङ्मनादेमनाबा वयागे़न् सिदुङ्जभा तोःम्मादे़न् नु खे़प्मोबा के़रे़क् सामापुमाहाॽ, वहप्सिङ्मा छे़ःङ्ग्या हे़क्क्याङ् खे़ल्ले़ कुलाङ्हाॽ— 10 फमनाबा चाङ्हाॽ, निङ्वाॽफुसाम्बा हारुनरे़ कुलागि सुत्थो चाङ्हाॽ हे़क्क्याङ् खे़ल्ले़ कुस्साहाॽरे़ निङ्वाॽफुसाम्बा ताक्फाओ माङ्से़वा चोःक्मा खुन्छिॽ चाङ्हाॽ, 11 खम्भ्याङ् सेसेदे़न्निल्ले़ लागि माङ्थोःक्ना पिमासि निःङ्गेॽ नु कुनाम्गे़नुॽबा सुक्पान् खे़ङ्हाॽरे़ मे़जोगुर॥ आङ्गाॽ खे़ने़ॽ पिने़बा के़रे़क् इङ्जाङ्हाॽ कुइसिक् खे़ङ्हाॽरे़ मे़जोगुररो॥” नाःम्सिङ्मा ये़न् 12 खे़ब्याङ् यहवे दाङ्बे़ल्ले़ मोसान् मे़त्तु, 13 “खे़ने़ॽ इस्राइलिहाॽ अक्खेआङ् मे़त्ते़से़ॽ, ‘खिनिॽ से़क्खासाङ् आङ्गाॽ आनाःम्सिङ्मा ये़न्हाॽ इःत्ते़म् नाःत्ते़म्मे़ॽ॥ खिनिॽ नु आङ्गाॽ लुम्मो कन् लत्छा सदादिङ्बा मिक्सेन् पोङ्ॽ, आङ्गाॽ यहवे दाङ्बे़ल्ले़ए खिनिॽ सेसे चोःक्निङ्ॽ फाॽआङ् खिनिॽ निङ्वाॽ खोसे़म्मे़ॽ॥ 14 “‘नाःम्सिङ्मा ये़न्निन् खिनिॽ ने़त्ते़म्मे़ॽ, थेआङ्भे़ल्ले़ खिनिॽ लागि कन् सेसे चोक्॥ कन् आसुत्थो के़जोःक्पान् कुमनाहाॽलाम् मे़लःत्तु मे़देसुररो॥ आत्तिन् आत्तिन्हाॽरे़ खे़ल्ले़ याःन्दिक् याःम्बक् मे़जोगुॽ खे़ङ्हाॽ खुन्छिॽ मनाहाॽरे़ मे़नाॽरुसिबा मे़बोङ्ॽ॥ 15 तुक्सि ये़न् थारिक् याःम्बक् हे़न्या मे़जोःक्ल, कर नुसिगेक्पा नाःम्सिङ्मा सबाथ ये़न्निन् यहवे दाङ्बाल्ले़ कुलागि सेसेबा चोक्॥ आत्तिन् आत्तिन्हाॽरे़ नाःम्सिङ्मा सबाथ ये़न्नो याःम्बक् मे़जोक् खे़ङ्हाॽ से़प्मासि पोङ्ॽ॥ 16 इस्राइलिहाॽरे़ नाःम्सिङ्मा ये़न्निन् मे़ने़त्तुर, हे़क्क्याङ् खे़न् ये़न्निन् खे़ङ्हाॽरे़ खुन्छिॽ के़रे़क् थाःक्को चक्मे़ल्लॽमनाबा माङ्हुप् कुइसिक् मे़इःत्तु मे़नाःत्तुर पोङ्ॽ॥ 17 आङ्गाॽ नु इस्राइलिहाॽरे़ खुन्छिॽ लुम्मो खे़न् सदादिङ्ले़ लागि लत्छा मिक्सेन् पोङ्ॽ, थेआङ्भे़ल्ले़ यहवे दाङ्बे़ल्ले़ तुक्सि ये़न्हाॽओ तरःङ्दिङ् ताङ्साङ् नु इक्सादिङ् खाम्बेःक्मान् चोगु, कर नुसिगेक्पा ये़न्नो खुने़ॽ याःम्बक् चोःक्मा ले़रुआङ् नाःम्सिङ्॥’” 18 सिनै कोःक्माओ निङ्वाॽफुमाङ्ङिल्ले़ मोसाःन्नु पाःप्मा सुरुआङ्, आबाङे कुहुक्किल्ले़ साप्तुबा ने़त्छि साप्लुङ्हाॽ खुने़ॽ मोसान् पिरुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.