लाम्दिक् 30 - लिम्बुसुक्पा हाःम्मादे़न् 1 “खे़ने़ॽ सुक्पा हाःम्मारे़ लागि बबुल सिङ्ङिल्ले़न् लत्छा ले़त्ति तोःम्मादे़न् चोगे़ॽ॥ 2 खे़ल्ले़ कुलाम्तिःन् हुक्सिक्थिक् नु खे़ल्ले़ कुभे़रे़न् हुक्सिक्थिक् पोङ्ल॥ खे़न् लिसि कुसुक्पा के़बप्पा पोङ्मा पोङ्ॽ, हे़क्क्याङ् कुलिङ्गे़न्निन् हुक्सिक् ने़त्छि के़बप्पा पोङ्मा पोङ्ॽ॥ खे़ल्ले़ कुदाङ्हाॽ हाबा खे़न् लत्छा सिङ्ङिल्ले़ कुआःत्तोबा सिङ्ङिल्ले़न् पोङ्ल॥ 3 खे़ल्ले़ थाःङ् ले़प्माङ्बान् नु लिसि पिसाङ्बा कुयाम्ले़ङ्बाहाॽ हे़क्क्याङ् खे़प्मोबा कुदाङ्हाॽआङ् इसेःङ्बा साम्म्याङ्ङिल्ले़ सुःप्ते़ॽ, खे़ब्याङ् खे़ल्ले़ लागि कब्रिङ् पिसाङ् साम्म्याङ् कुगःङ्ग्या थिक् चोगे़ॽ॥ 4 खे़न् कुगःङ्ग्याःल्ले़ कुसिगाङ् ले़त्ति तोःम्मादे़न्निल्ले़ ने़प्माङ् कुयाम्ले़ङ्बो ने़त्छि साम्म्याङ् कुन्दुल्लो चोगे़ॽ हे़क्क्याङ् खे़न् ने़प्माङ् ले़प्माङ् फत्छे़ॽ, खे़ब्याङ् खे़न् कुन्दुल्लोहाॽ कुबङ्मा तक्लाङ्हाॽरे़ लागि कुलिःङ्मादे़न् पोङ्ल॥ 5 तक्लाङ्हाॽ बबुल सिङ्ङिल्ले़न् चोगे़ॽआङ् साम्म्याङ्ङिल्ले़ सुःप्ते़ॽ॥ 6 कन् ले़त्ति तोःम्मादे़न्निन् माङ्हुप् सन्दोक्किल्ले़ कुदगाङ् ले़प्माङ् के़बप्पा फोःन्दाःल्ले़ कुदगाङ् लाःक्कात् युक्खे़ॽ॥ तोःन्दि पिमा साप्लुङ् के़याक्पा कुदे़प्फेःल्ले़ कुसम्धाङ् युक्खे़ॽ, खे़प्मो आङ्गाॽ खे़ने़ॽ तुम्ने़॥ 7 “ले़त्ति तोःम्मादे़न्नो हारुने़ल्ले़ तानाम् थप्मे सेमिहाॽ तोःक्तुल्ले़ कुनाम्गे़नुॽबा मारुक् सुक्पा हाःन्दुर पोङ्ॽ॥ 8 याम्मो युःन्छिक् हारुनरे़ सेमि हाःन्दुल्ले़ खे़न् सुक्पान् हाःन्दुर॥ कम्भलॽरिक् के़दाबा थाःक्थाःक्को थारिक् यहवे दाङ्बे़ल्ले़ कुदगि खे़न् चक्मे़ल्लॽए के़हाॽबाआङ् के़युङ्बा सुक्पा पोङ्ॽ॥ 9 खे़न् ले़त्ति तोःम्मादे़न्नो खे़ने़ॽ वेॽ परिक्पा सुक्पा, मिधिङ्मनादेमनाबा वयागे़न् सिदुङ्जभा, पोगुगे़न् कुजा सिदुङ्जभा मे़दोःन्दे़न्ने़ॽ, हे़क्क्याङ् सेजःङ्वा सिदुङ्जभाआङ् मे़दोःन्दे़न्ने़ॽ॥ 10 तङ्बेरे़ थिक्ले़ङ् हारुने़ल्ले़ लायोलाम् ले़प्मि नाःक्मा वयागे़न् सिदुङ्जभाःल्ले़ कुमाक्खिन् खे़प्मोबा कुदाङ्हाॽओ हुःत्तुॽ हे़क्क्याङ् ले़त्ति तोःम्मादे़न्निन् सुत्थो चोःक्मा थिम् चोगुआङ् सेसे सासाङ् चोगुर॥ के़दाबा ये़म्मो सदादिङ्ले़ लागि तङ्बे थक्मा अक्खे चोःक्मा पोङ्ॽ॥ कन् ले़त्ति तोःम्मादे़न्निन् के़रे़क् सेसेसाङ्साङ् पोङ्मा पोङ्ॽ हे़क्क्याङ् यहवे दाङ्बाओ तोःम्मा पोङ्लो॥” लायोलाम् ले़प्मि नाःक्मा याङ् 11 खे़ब्याङ् यहवे दाङ्बे़ल्ले़ मोसान् मे़त्तु, 12 “खे़ने़ॽ इस्राइलिहाॽ याम्नाःत्निःत् के़जोगुसिल्ले़ खे़ङ्हाॽओबा के़रे़क् थिक्थिक्ले़ आबाङे खुन्छिॽ याम्साम्मिन् से़ःप्मारे़ लागि कम्भलॽरिक् कुमे़ल्लुङ् मे़हुङुर पोङ्ॽ, हे़क्क्याङ् खानिःत् मे़जोगुसिल्ले़ खे़ङ्हाॽरे़ खुन्छिॽ सम्धाङ् थे़माआङ् माङ्दुक्मा मे़दाने़न्॥ 13 आक्ख्यारिक् खानिःत् मे़जोगुसि खे़ङ्हाॽरे़ सेसेदे़न्निल्ले़ लागि हुङ्मा के़बोङ्बा सेकेलरे़ कुभ्रे़ःङ् सेकेल हुङ्मा पोङ्ॽ॥ लत्छा सेकेलले़न् निबोङ् गेरा योरो॥ कम्भलॽरिक् यहवे दाङ्बाओ तोःम्मा के़बोङ्बा सिदुङ्जभान् कुभ्रे़ःङ् सेकेलबा पोङ्ल॥ 14 खानिःत् मे़जोगुसिल्ले़ तङ्बे निबोङ् के़गे़प्पा नु खे़न्नुःल्ले़ यरिक् तङ्बे के़गे़प्पाहाॽरे़ यहवे दाङ्बाओ हुक्वा मे़लःत्तुर पोङ्ॽ॥ 15 आल्ल खिनिॽ हिङ्मे़न् आप्तिक्लाम् सुत्थो चोःक्मा याःम्बक् चोःक्मारे़ लागि नु यहवे दाङ्बाओ कुदोःप्मा पोङ्मारे़ लागि खुने़ॽओ सिदुङ्जभा के़दोःन्दुम्मिल्ले़ याङ्साकुन्धेसाबे़ल्ले़ हुङ्मा के़बोङ्बानुःल्ले़ यरिक् मे़दोन्दुन्ल हे़क्क्याङ् याङ्गे़साॽबे़ल्ले़ खे़न्नुःल्ले़ सुःल्लिक् मे़दोन्दुन्ल॥ 16 इस्राइलिहाॽलाम् नादङ् चोःक्मा याङ्ङिन् ताःक्ते़ॽआङ् तुम्मादे़न् साःङ्गाहिम्मोबा माङ्से़वा याःम्बक्ले़ लागि ओगाप् चोगे़ॽ, हे़क्क्याङ् खे़न् हिङ्मे़ल्ले़ लागि आप्तिक्लाम् सुत्थो चोःक्मा याःम्बक् चोःक्मारे़ लागि यहवे दाङ्बे़ल्ले़ कुदगि इस्राइलिहाॽरे़ खुनिॽ लागि निङ्वाॽसोक् पोङ्लरो॥” वाहप्सिङ्मा छे़ःङ्ग्या 17 खे़ब्याङ् यहवे दाङ्बे़ल्ले़ मोसान् मे़त्तु, 18 “वाहप्सिङ्मारे़ लागि लत्छा कासा छे़ङ्ग्या थगे़ॽ॥ खे़ल्ले़ कुलाङ्हाॽआङ् कासाःल्ले़न् चोगे़ॽ॥ तुम्मादे़न् साःङ्गाहिम्मिन् नु ले़त्ति तोःम्मादे़न्निल्ले़ कुलुम्मो खे़न् युक्खे़ॽ हे़क्क्याङ् खे़प्मो च्वाःत् केःत्ते़ॽ॥ 19 खे़न् च्वाःत्तिल्ले़ हारुने़न् नु खुने़ॽ कुस्साहाॽरे़ खुन्छिॽ लाङ् हुक्हाॽ वामे़हप्तुर॥ 20 आल्ल खे़ङ्हाॽ तुम्मादे़न् साःङ्गाहिम्मो मे़लाःत्तिल्ले़ ले़त्ति तोःम्मादे़न्नो माङ्से़वा चोःक्से़ यहवे दाङ्बे़ल्ले़ कुलागि मिलाम्बा तोःम्मा के़बोङ्बा वयागे़न् सिदुङ्जभा मिधिङ्से़ मे़दारो, 21 खे़ब्याङ् खे़ङ्हाॽरे़ हाबा कन् च्वाःत्तिल्ले़ खुन्छिॽ लाङ्हुक् वामे़हप्तुर हे़क्क्याङ् खे़ङ्हाॽ मे़न्छिने़न्ल॥ कन् हारुने़न् नु खुने़ॽ कुमुॽइदाङ्साहाॽरे़ लागि थाःक्थाःक्को थारिक् सदादिङ्बा थिम् पोङ्लरो॥” माङ्थोःक्ना पिमा निःङ्गेॽ 22 याम्मो यहवे दाङ्बे़ल्ले़ मोसान् मे़त्तु, 23 “खे़ने़ॽ नुःब्नुबा मारुक्, इग्र ५०० सेकेल कुवा मुर्र नु खे़ल्ले़ कुभ्रे़ःङ्, इग्र २५० सेकेल सिन्काउलिःल्ले़ कुभे़क्वा, हे़क्क्याङ् २५० सेकेल कुनाम्गे़नुॽबा लुप्लाःक्, 24 खम्भ्याङ् ५०० सेकेल नाम्सिङ्—कन् के़रे़क्ले़ कुधाङ्मान् सेसेदे़न्नोबा कुधाङ्मा कुइसिक् पोङ्ल—हे़क्क्याङ् हिन् थिक् चैतुन निःङ्गेॽ तेॽरे़ॽ॥ 25 हे़क्क्याङ् माङ्थोःक्ना पिमासि सेसे निःङ्गेॽ चोगे़ॽ, कुनाम्गे़नुॽबा मारुक् के़जोःक्पाल्ले़ कुइसिक् चोगे़ॽ॥ माङ्थोःक्ना पिमासिरे़ लागि खे़न् सेसे निःङ्गेॽ पोङ्ल॥ 26 तुम्मादे़न् साःङ्गाहिम्मिन् नु माङ्हुप् साप्लुङ् के़याक्पा सन्दोक्किन्, 27 हे़क्क्याङ् चप्ते़न्, खे़प्मोबा के़रे़क् सामाहाॽनु सोरिक्, खे़ब्याङ् सेमियुङ्दे़न्, खे़प्मोबा के़रे़क् सामाहाॽनु सोरिक्, हे़क्क्याङ् सुक्पा हाःम्मा ले़त्ति तोःम्मादे़न्, 28 मिधिङ्मनादेमनाबा ले़त्ति तोःम्मादे़न्, खे़प्मोबा के़रे़क् सामाहाॽ, हे़क्क्याङ् वाहप्सिङ्मा छे़ःङ्ग्या, खे़ल्ले़ कुलाङ्हाॽनु सोरिक्, आम्भा खे़ल्ले़ माङ्थोःक्ना पिरे़से़ॽ॥ 29 कम्भलॽरिक् कन्हाॽ सुत्थो चोगे़से़ॽ, हे़क्क्याङ् खे़ङ्हाॽ साॽरिक् सेसेबा पोङ्ल॥ आत्तिन् चिगक्वाःल्ले़ खे़ङ्हाॽ सुसुसि खे़न् सेसे पोङ्ॽ॥ 30 “हारुने़न् नु खुने़ॽ कुस्साहाॽ माङ्थोःक्ना पिरे़से़ॽआङ् खे़ङ्हाॽ सेसेसाङ्साङ् चोगे़से़ॽ, हे़क्क्याङ् खे़ङ्हाॽरे़ निङ्वाॽफुसाम्बा ताक्फाओ आङ्गाॽ आलागि माङ्से़वा याःम्बक् मे़जोगुर॥ 31 इस्राइलिहाॽ अक्खे मे़त्ते़से़ॽ, ‘खे़न् खिनिॽ थाःक्थाःक्को थारिक् माङ्थोःक्ना चोःक्मा निःङ्गेन् आङ्गाॽ आलागि माङ्से़वा याःम्बक् चोःक्मारे़ लागि पोङ्ल॥’ 32 आत्तिन् मनाःल्ले़ कुधक्कोआङ् खे़न् मे़न्हुक्खुन्ल, हे़क्क्याङ् आम्भा खे़न् कुवाहाॽ मे़भःन्दे़न्ने़ॽआङ् हाबा हे़क्तङ्बा कुवा मे़जोगे़न्ने़ॽ॥ खे़न् सुत्थो चोक्, हे़क्क्याङ् खिनिॽ खे़न् सुत्थो लेःत्ते़म्मे़ॽ॥ 33 आत्तिल्ले़ फःन्दुआङ् खे़न् हे़क्तङ्बा फुङ्नाम् चोगुॽ, हे़क्क्याङ् खे़न्लाम्बा निङ्वाॽफुसाम्बाहाॽनुःल्ले़ वेॽ मनाःल्ले़ कुधक्को हुक्खुॽ, खे़न् आबाङे कुमनाहाॽलाम् मे़लःत्तु मे़देसुररो॥” कुनाम्गे़नुॽबा सुक्पा 34 याम्मो यहवे दाङ्बे़ल्ले़ मोसान् मे़त्तु, “कुनाम्गे़नुॽबा मारुक्—आःङ्घिक्वा, सेखलेत नु नाङ् हे़क्तङ्बा कुदुःक्वा—कुभरा इसेःङ्बा सुक्पा कुधाङ्मो कुदङ्बा याङ्सिङ्ङे़ॽ, 35 हे़क्क्याङ् खे़ल्ले़ कुनाम्गे़नुॽबा, फःम्मनाबा सुक्पा फुङ्नाम् के़जोःक्पाल्ले़ हे़क्केए चोगे़ॽ॥ खे़न् युम् फुप्मना इसेःङ्बा नु सुत्थो पोङ्मा पोङ्ॽ॥ 36 खे़ॽयोलाम् कुभा थगे़ॽआङ् चुन्जुम्बा फेॽरुम् चोगे़ॽ, हे़क्क्याङ् आजे़ःत्छिक् आङ्गाॽ खे़ने़ॽनु तुम्मा के़बोङ्बा साःङ्गाहिम्मो निङ्वाॽफुमाङ्ङिल्ले़ कुसन्दोक् तगाङ् साक्खे़ॽ॥ खे़न् खिनिॽ लागि साॽरिक् सेसेबा पोङ्ल॥ 37 खे़न् फुप्मनाबा कुइसिक् खे़न् सुक्पान् खिनिॽ आबाङे लागि मे़जोगे़म्मिन्ने़ॽ॥ खे़न् खे़ने़ॽ के़मिक्साओ यहवे दाङ्बे़ल्ले़ कुलागि सेसे पोङ्ल॥ 38 आत्तिल्ले़ खे़न् कुनाम्गे़नुॽबा खे़प्सुआङ् खे़न् हे़क्तङ्बाए कुभा सुक्पा चोगुने़भग्र खे़न् खुने़ॽ कुमनाहाॽलाम् मे़लःत्तु मे़देसुररो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.