लाम्दिक् 3 - लिम्बुनिङ्वाॽफुमाङ्ङिल्ले़ मोसान् उःत्तु 1 आल्ल मोसाःल्ले़ खुने़ॽ कुन्नुःप्पा मिद्याःन्बा निङ्वाॽफुसाम्बा यित्रोःल्ले़ कुमे़ल्लुक् कुमे़ःन्दाहाॽ चाराम्सुसिर वये़॥ हे़क्क्याङ् खुने़ॽ मे़ल्लुक् मे़ःन्दाक्हाॽ चाराम्सुसिर मुरे़क् खारे़क् थेआङ् के़होःप्पादे़न्निल्ले़ नाधाःम्बि निङ्वाॽफुमाङ्ङिल्ले़ कुगोःक्मा होरेब थारिक् तेॽरुसि॥ 2 खे़प्मो यहवे दाङ्बे़ल्ले़ कुमाङ्लाइङ्बाधिक् फात्ताप्पिल्ले़ कुलुम्मो के़दिःप्पार के़बप्पा मिराःक् कुइसिक् खुने़ॽ कुदगि निधाःम्सिङ्॥ मोसाःल्ले़ फात्ताप्पिन् मिदिगे़र पत्छे़बा निसु, हे़क्केसाङ् खे़न् खाप्पुथ्यःङ् मे़बोःक्खे़न्॥ 3 खे़ल्ले़चोगुल्ले़ मोसाःल्ले़ कुनिङ्वाॽओ पाःत्तु, “आल्ल आङ्गाॽ निःत्ताङ् पेःक्काआङ् कन् निङ्वाॽ के़माबा पाःन्निन् ओमे़त्तुङ्ॽ॥ खे़न् फात्ताप्पिन् थेआङ् मिमे़दिक्ने़म्बारे़त्छ?” 4 आल्ल ओमे़प्मारे़ लागि मोसान् खे़त्ना ले़प्माङ् पेबान् यहवे दाङ्बे़ल्ले़ निसु, खे़ब्याङ् यहवे दाङ्बे़ल्ले़ फात्ताप्पिल्ले़ कुलुम्मोलाम् अक्खे मे़त्तु, “मोसाए, मोसाए!” मोसाःल्ले़ मे़त्तु, “आदाङ्बे, आङ्गाॽ कप्मो वाॽआरो॥” 5 निङ्वाॽफुमाङ्ङिल्ले़ मे़त्तु, “निःत्ताङ् मे़भे़रे़न्ने़ॽ॥ खे़ने़ॽ के़लाङ्सुःप्पिन् फे़न्दे़ॽ थेआङ्भे़ल्ले़ खे़ने़ॽ सेसेबादे़न्नो के़ये़प्॥” 6 खुने़ॽ आल्लसाङ् मे़त्तु, “आङ्गाॽ खे़ने़ॽ के़म्बा के़न्धे़बा अब्राहाम, इसहाक नु याकुबरे़ खुन्छिॽ निङ्वाॽफुमाङ्आ॥” खे़ब्याङ् मोसाःल्ले़ कुनारान् ते़प्तु, थेआङ्भे़ल्ले़ खुने़ॽ निङ्वाॽफुमाङ्ङिन् ओमे़प्मा किसे़॥ 7 यहवे दाङ्बे़ल्ले़ मे़त्तु, “मिस्र लाजेॽओ आङ्गाॽ आमनाहाॽ साॽरिक् ताप्फे़ःल्लिक् मे़मे़त्तुसिआङ् तुक्खे मे़जाःत्तुसिर मे़याक्, खे़न् आङ्गाॽ निसुङ्ङाङ् वाॽ॥ याःम्बक्को मना के़भम्बा मिस्रिहाॽरे़ खुन्छिॽ हुक्कोलाम् से़म्मारे़ लागि खे़ङ्हाॽरे़ खुन्छिॽ पेलिन् आङ्गाॽ खे़प्सुङ्ङाङ् वाॽ॥ खे़ङ्हाॽरे़ खुनिॽ तुक्खेन् नु के़साक्पा मे़दुमुबान् आङ्गाॽ कुसिङ् निःत्तुङ्ॽ॥ 8 कल्ले़चोगुल्ले़ खे़ङ्हाॽ मिस्रिहाॽरे़ खुन्छिॽ हुक्कोलाम् ताङ्से़ःप्मासिरे़ लागि नु मिस्र लाजेॽलाम् लःप्मासिआङ् लत्छा ताम्दाम्बा लाजेॽओ के़प्मासिरे़ लागि आङ्गाॽ थ्याङ्ङाङ् वाॽआ॥ खे़न् लाजेन् पित्नु नु सक्वाघु के़गुङ्बा चोक्, खे़प्मो आल्लो कनानि, हित्ति, एमोरि, परिज्जि हिब्बि नु यबुसिहाॽ मे़युङ्ॽ॥ 9 आङ्गाॽ से़क्खाए आमनाहाॽरे़ खुन्छिॽ हाःप्मा फिःक्मान् खे़प्सुङ्ङाङ् वाॽ हे़क्क्याङ् मिस्रिहाॽरे़ आक्खेलॽरिक् खे़ङ्हाॽ तुक्खे मे़जाःत्तुसिर मे़वाॽ आङ्गाॽ खे़न् निसुङ्ङाङ् वाॽ॥ 10 आल्ल आङ्गाॽ खे़ने़ॽ मिस्र लाजेॽबा हाङ्ङे़ओ पाङ्ने़र पत्ता हे़क्क्याङ् खे़ने़ॽ आङ्गाॽ आमना इस्राइलिहाॽ खे़ल्ले़ कुलाजेॽलाम्बा के़दिःक्तुसिआङ् के़लःत्तु के़भे़त्तुसिॽ॥” 11 कर मोसाःल्ले़ निङ्वाॽफुमाङ्ङिन् मे़त्तु, “आङ्गाॽ हाःत्ताआङ्बे? आङ्गाॽ आक्खेलॽरिक् फारोओ पेःक्का हे़क्क्याङ् इस्राइलिहाॽ लःत्तुङ्सिङ्ङाङ् फे़प्मा सुक्तुङ्सिङ्बे?” 12 हे़क्क्याङ् निङ्वाॽफुमाङ्ङिल्ले़ मोसान् मे़त्तु, “आङ्गाॽ खे़ने़ॽनु वाॽआ, खे़ब्याङ् आङ्गाॽ खे़ने़ॽ पाङ्ने़बा के़लॽबा पाःन्निल्ले़ मिक्सेःन्निन् खे़ने़ॽओ कन् पोङ्ॽ—खे़ने़ॽ खे़न् मनाहाॽ मिस्रलाम्बा के़लःत्तु के़भे़त्तुसिल्ले़ खे़निॽ कन् कोःक्माओ निङ्वाॽफुमाङ्ङिन् माङ्से़वा के़मे़त्तुम्॥” 13 मोसाःल्ले़ निङ्वाॽफुमाङ्ङिन् मे़त्तु, “ओमे़त्ते़ॽ, आल्ल आङ्गाॽ इस्राइलिहाॽरो पेःक्काआङ् अक्खेग मे़त्तुङ्सिङ्ॽ, ‘खिनिॽ पाधे़बाहाॽरे़ खुनिॽ निङ्वाॽफुमाङ्ङिल्ले़ आङ्गाॽ खिनिॽओ पाङ्घाङ्बा,’ खे़ब्याङ् खे़ङ्हाॽरे़ ‘खुने़ॽ कुमिङ् थे़माबे?’ फाॽआङ् सेःन्मे़दाआल्ले़ आङ्गाॽ खे़ङ्हाॽ थे मे़त्तुङ्सिङ्बाबे?” 14 खे़ब्याङ् निङ्वाॽफुमाङ्ङिल्ले़ मोसान् मे़त्तु, “आङ्गाॽ आङ्गाॽएआ॥ याम्मो खुने़ॽ पाःत्तु, इस्राइलिहाॽ खे़ने़ॽ अक्खे मे़त्ते़से़ॽ, ‘आङ्गाॽ के़लॽबाल्ले़ खिनिॽओ पाङ्घाङ्बारो॥’” 15 निङ्वाॽफुमाङ्ङिल्ले़ मोसान् कन्नाङ् मे़त्तु, “इस्राइलिहाॽ मे़त्ते़से़ॽ, ‘खिनिॽ पा थे़बा अब्राहाम, इसहाक नु याकुबरे़ कुनिङ्वाॽफुमाङ् यहवे दाङ्बे़ल्ले़ आङ्गाॽ खिनिॽओ पाङ्घाङ्बारो॥’ “सदादिङ्ले़ लागि आङ्गाॽ आमिङ्ङिन् ‘आङ्गाॽएआ’ रो, हे़क्क्याङ् के़रे़क् थाःक्कोबा मनाहाॽरे़ आम्भा कन् आमिङ्ङिन् निङ्वाॽ मे़इःत्तुॽ॥ 16 “पेगे़ॽआङ् इस्राइलबा लाम्लोबाहाॽ थिक्मे़त् फुक्खे़से़ॽ हे़क्क्याङ् यहवे दाङ्बा खिनिॽ ताक्थे़बा अब्राहाम, इसहाक नु याकुबरे़ कुनिङ्वाॽफुमाङ्ङिल्ले़ खे़ने़ॽ सुफो पिने़बा फाॽआङ् खे़ङ्हाॽ मे़त्ते़से़ॽ, खुने़ॽ खे़ङ्हाॽरे़ खुनिॽ लुम्मो ये़आङ् वाॽ हे़क्क्याङ् मिस्रिहाॽरे़ खे़ङ्हाॽ थे मे़मे़त्तुसिर मे़वाॽ खे़न् के़रे़क् आङ्गाॽ निसुङ्ङाङ् वाॽ॥ 17 मिस्र लाजेॽबा तुक्खे लाक्खेलाम् खुने़ॽ खिनिॽ के़लःत्तिआङ् लत्छा पित्नु नु सक्वाघु के़गुङ्बा लाजेॽ के़ने़बा लाजेॽओ के़गे़त्ति फाॽआङ् खुने़ॽ कुत्चाॽ निःन्धो चोगुआङ् वाॽ॥ खे़न् लाजेःङ्ग कनानि, हित्ति, एमोरि, परिज्जि हिब्बि नु यबुसिहाॽरे़ खुन्छिॽ लाजेॽरो॥ 18 “इस्राइलबा लाम्लोबाहाॽरे़ खे़ने़ॽ के़बाःन्निन् मे़घे़प्सुॽ॥ खे़ब्याङ् खे़ने़ॽ नु इस्राइलबा खे़न् लाम्लोबाहाॽ मिस्रबा हाङ्ङे़ओ के़बेगिॽ, हे़क्क्याङ् खिनिॽ खे़न् अक्खे के़मे़त्तुम्ॽ, ‘यहवे दाङ्बा हिब्रुहाॽरे़ खुनिॽ निङ्वाॽफुमाङ्ङिन् आनिगे तुम्से़ ये़आङ् वाॽ, खे़ब्याङ् यहवे दाङ्बा आनिगे निङ्वाॽफुमाङ्ङिल्ले़ कुलागि वयागे़न् सिदुङ्जभा तोःन्छे़ मुरे़क् खारे़क्पा थेआङ् के़होप्पादे़न्नो सुम्यान्बा लाम्दिःक्को पेःक्मा आभाःक्ते़ॽ॥’ 19 कर मुक्साम्बा हुक्किल्ले़ मिस्रबा हाङ्ङिन् के़साक्पा तुमुर मे़न्याःन्ने थारिक् खुने़ॽ खिनिॽ पेःक्मा के़म्भाःक्तिन् फाॽआङ् आङ्गाॽ निसुङ्ॽ॥ 20 कल्ले़चोगुल्ले़ आङ्गाॽ आहुक्किल्ले़ मिस्रिहाॽ साःप्सुङ्सिङ्ङाङ् खे़ङ्हाॽरे़ खुनिॽ लुम्मो आङ्गाॽ के़रे़क् निङ्वाॽ के़माबा आयाःम्बक्लाम् खुम्दिङ् पिरुङ्सिङ्ॽ, हे़क्क्याङ् खे़न् एगाङ् खे़ल्ले़ खिनिॽ पेःक्मा के़भाःक्ति॥ 21 “आङ्गाॽ मिस्रिहाॽरे़ खिनिॽ नुरिक् के़म्मे़त्तिर चोगुङ्ॽ हे़क्क्याङ् आङ्गाॽ आमनाहाॽ खे़प्मोलाम् से़म्मुॽइ मे़बोङ्ङिल्ले़ हुक्को थे़माआङ् मेःन्ने मे़ल्लःन्ने़न् मे़म्बेःक्ने़न्॥ 22 के़रे़क् इस्राइलि मे़न्छुमाहाॽ खुन्छिॽ हिम्बेसाङ्बा मिस्रि मे़न्छुमाहाॽओ मे़बेःक्काङ् खे़न् हिम्मो के़वाॽमा मे़न्छुमाहाॽ चाङ्वान् नु साम्म्याङ् युप्पा वाःत्तिहाॽ मे़नाःक्तुसिॽ॥ इस्राइलिहाॽरे़ खे़न् चाङ्हाॽ नु वाःत्तिहाॽ खुन्छिॽ ये़म्बित्छा मे़न्छुमा साहाॽ मे़जाक्तुसिॽ मे़वाःत्तुसिॽ हे़क्क्याङ् कम्भलॽरिक् मिस्रबा याङ्साकुन्धेहाॽ खे़ङ्हाॽरे़ मे़देॽरुआङ् मे़बेःक्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.