लाम्दिक् 28 - लिम्बुनिङ्वाॽफुसाम्बाहाॽरे़ खुन्छिॽ चाङ् 1 “खे़ने़ॽ इस्राइलिहाॽरे़ खुन्छिॽ लुम्मोलाम् के़म्भुॽ हारुने़न् नु खुने़ॽ कुस्सा नादाब, अबिहु, एलाजार नु इतामारे़न् आङ्गाॽओ उःत्ते़ तारे़से़ॽ, हे़क्क्याङ् खे़ङ्हाॽरे़ आङ्गाॽ आलागि निङ्वाॽफुसाम्बा याःम्बक् मे़जोगुर॥ 2 मिङ्सो थाङ्सो नु खे़म्सिङ्मारे़ लागि खे़ने़ॽ के़म्भुॽ हारुने़ल्ले़ कुलागि सेसे चाङ्हाॽ तये़ॽ॥ 3 कुहुक्वा के़नुॽबा आक्ख्यारिक् मे़वाॽ आङ्गाॽ खे़ङ्हाॽ अक्तङ्बा पाःन्नो सिक्कुम्दिङ् निङ्वाॽरे़ कुधिम् चोगुङ्सिङ्ङाङ् मे़वाॽ, खे़ङ्हाॽरे़ हारुने़न् कन् याःम्बक्को युक्तिङ् चोःक्मारे़ लागि खुने़ॽ कुजाङ्ङिन् यारिप् मे़जोगुर फाॽआङ् खे़ने़ॽ खे़ङ्हाॽ मे़त्ते़से़ॽ, हे़क्क्याङ् खे़ल्ले़ निङ्वाॽफुसाम्बा ताक्फाओ आङ्गाॽ आलागि माङ्से़वा याःम्बक् चोगुर॥ 4 खे़ङ्हाॽरे़ चोःक्मा के़बोङ्बा चाङ्हाॽ हाबा कन्हाॽरो—साःङ्बे से़ःप्चाङ्, एपोद, लगेःप्, थाक्मनाबा तागावा, फे़ता नु फॽइ॥ चोःक्मारे़ लागि चबेगुहाॽ मे़त्ते़से़ॽ॥ खे़ङ्हाॽरे़ खे़ने़ॽ के़म्भुॽ हारुने़न् नु खुने़ॽ कुस्साहाॽरे़ लागि निङ्वाॽफुसाम्बा ताक्फाओ आङ्गाॽ आलागि माङ्से़वा याःम्बक् चोःक्से़ सेसे चाङ्हाॽ तये़ॽ॥ 5 खे़ङ्हाॽरे़ साम्म्याङ्, हे़क्क्याङ् हिःक्कङ्कङ्बा, पारान्ला, हे़ःत्ताङ्बा खि नु चुन्जुम्बा नैनासुत् चिरिक् ओगप् मे़जोगुर॥ एपोद 6 “खे़ङ्हाॽरे़ एपोदे़न् साम्म्याङ्ङिल्ले़न् मे़जोगुर, हे़क्क्याङ् हिःक्यङ्यङ्बा, पारान्ला, हे़ःत्ताङ्बा चाःम्मनाबा खि नु चुन्जुम्बा नैनासुत् चिरिक्किल्ले़ खुन्छिॽ हुक्वानुॽर मे़जोगुर॥ 7 एपोदे़न् इभुप्मारे़ लागि फक्ताङ्ङो ने़प्माङ् कुयाओ कुइभुप्माहाॽ ने़त्छि पत्ल॥ 8 खे़ल्ले़ कुसम्धाङ् के़बप्पा साॽरिक् नुरिक् फमनाबा युम्मा फॽइःन् एपोदे़ल्ले़ हाबा खे़न् कुघे़ल्ले़क्किल्ले़न् नु हाबा हे़क्तङ्बाए याःम्बक् के़बोङ्बा साम्म्याङ्ङिल्ले़न् नु हियःक्यङ्यङ्बा, पारान्ला, हे़ःत्ताङ्बा खि नु चुन्जुम्बा लॽरिक् फमनाबा नैनासुत् चिरिक्किल्ले़न् पोङ्ल॥ 9 “खे़ने़ॽ ने़त्छि अनिक्स माङ्लुङ्हाॽ याङ्सिङ्ङे़ॽआङ् खे़प्मो इस्राइलरे़ कुस्सा ये़म्बित्छाहाॽरे़ खुन्छिॽ मिङ्हाॽ लक्ते़ॽ॥ 10 खे़ङ्हाॽ सामे़वाःन्छिङ्बा कुइसिक् खे़ङ्हाॽओबा तुक्सिरे़ खुन्छिॽ मिङ्हाॽ लत्छा माङ्लुङ्ङो हे़क्क्याङ् वेॽ तुक्सिरे़ खुन्छिॽ मिङ्हाॽ वेॽसमा माङ्लुङ्ङो लक्ते़ॽ॥ 11 माङ्लुङ् के़लक्पा चबेगुःल्ले़ आक्खेलॽरिक् लक्तु, हे़क्केलॽरिक्के खे़न् ने़प्माङ् माङ्लुङ्हाॽओ इस्राइलबा ये़म्बित्छा साहाॽरे़ खुन्छिॽ मिङ्हाॽ लक्ते़ॽ॥ खे़ब्याङ् खे़ने़ॽ नुबा साम्म्याङ् कुयुङ्मादे़न्नो खे़न् माङ्लुङ्हाॽ फम्मा पाङ्घे़से़ॽ॥ 12 खे़न् ने़प्माङ् माङ्लुङ्हाॽ एपोदबा फक्ताङ् फक्ताङ्ङो इस्राइलबा ये़म्बित्छा साहाॽरे़ लागि निङ्वाॽसोक् माङ्लुङ् पोङ्मारे़ लागि फत्छे़ॽ, हे़क्क्याङ् हारुने़ल्ले़ खे़ङ्हाॽरे़ खुन्छिॽ मिङ्ङिन् यहवे दाङ्बे़ल्ले़ कुदगि आबाङे फक्ताङ्ङो निङ्वाॽसोक्ले़ लागि पक्खुर पोङ्ॽ॥ 13 हे़क्क्याङ् खे़ने़ॽ नुबा साम्म्याङ् कुयुङ्मादे़न् फत्छे़ॽ॥ 14 इदाक् हे़क्के माःप्मनाबा साम्म्याङ् इसेःङ्बा ने़त्छि साम्म्याङ् सिक्क्रि चोगे़ॽ, हे़क्क्याङ् खे़न् माःप्मनाबा साम्म्याङ् सिक्क्रिःन् खे़न् नुबा साम्म्याङ् कुयुङ्मादे़न्नो वेॽरे़ॽओ॥ साःङ्बे से़ःप्चाङ् ( ला ३९:८-२१ ) 15 “निङ्वाॽ निःन्धो चोःक्मारे़ लागि साःङ्बे से़ःप्चाङ्ङिन् कुहुक्वा के़नुॽबा के़ले़बा चोबेगुलाम् चोगे़ॽ, एपोदे़न् चोःक्मनाबा कुइसिःक्के खे़न्नाङ् साम्म्याङ् नु हिःक्यङ्यङ्बा, परान्ला हे़ःत्ताङ्बा चाःम्मनाबा खि हे़क्क्याङ् चुन्जुन् लॽरिक् फमनाबा नैनासुत् चिरिक्किल्ले़न् पोङ्ल॥ 16 खे़न् कुदङ्बा कुलाम्ति नु कुभे़रे़ के़बप्पा लिसि कुसुक्पा चोगे़ॽआङ् कुलुम्मो फाक्ते़ॽ॥ खे़ल्ले़ कुलाम्तिःन् पित्ता थिक् नु कुभे़रे़ःन्नाङ् पित्ता थिक्पाए पोङ्ल॥ 17 खे़ब्याङ् खे़ने़ॽ खे़ॽयो कुदिःक्ला लिसि इमे़ल्लुङ्बा मुधिङ्हाॽ तिःक्खे़ॽ, थिक्सिगेक्पा कुदिःक्लाःन् हे़ःत्यङ्यङ्बा मुधिङ्लुङ्, हिःक्यङ्यङ्बा मुधिङ्लुङ् नु अम्दाङ्बा मुधिङ्लुङ् पोङ्ल॥ 18 निसिगेक्पा कुदिःक्लाओ हिःक्कोःम्कोःम्बा मुधिङ्लुङ्, कुभिङ्ला मुधिङ्लुङ् नु लेःत्ताङ्बा मुधिङ्लुङ्ले़न्, 19 सुम्सिगेक्पा कुदिःक्लाओ माक्कुम् के़लॽबा कुहे़ःत्ला मुधिङ्लुङ्, वरे़ङ्ले़ङ्बा कुहिःक्ला कुहे़ःत्ला मुधिङ्लुङ् नु पारान्ला चाःम्बा मुधिङ्लुङ्ले़न्, 20 लिसिगेक्पा कुदिःक्लाओ, नुधि चाःम्बा मुधिङ्लुङ्, अनिक्स मुधिङ्लुङ् नु अम्अम् के़लॽबा मुधिङ्लुङ्ले़न् पोङ्ल॥ कन्हाॽ के़रे़क् साम्म्याङ् कुजक्मो मे़जक्तुर याःन्दे़से़ॽ॥ 21 खे़न् मुधिङ्लुङ्हाॽ इस्राइलबा ये़म्बित्छा साहाॽरे़ खुन्छिॽ मिङ्हाॽ कुइसिक् थिबोङ्ङाङ् ने़त्छि पोङ्ल॥ के़रे़क् लक्मनाआङ् के़बप्पा कुइसिक् थिबोङ्ङाङ् ने़त्छि थाःक्हाॽरे़ खुन्छिॽ मिङ् लत्छा लुङ्ङो थाःक्थक्माबा लत्छा मिङ् पत्ल पोङ्ॽ॥ 22 “साःङ्बे से़ःप्चाङ्ले़ लागि इदाक् हे़क्के माःप्मनाबा इसेःङ्बा साम्म्याङ् सिक्रिहाॽ चोगे़ॽ॥ 23 खे़ने़ॽ खे़ल्ले़ लागि साम्म्याङ् कुन्दुल्लो ने़त्छि चोगे़ॽआङ् साःङ्बे सेःप्चाङ्ङिल्ले़ थाःङ् ले़प्माङ्बा ने़प्माङ् कुसुक्पो फत्छे़ॽ॥ 24 खे़न् साम्म्याङ् सिक्क्रिहाॽ साःङ्बे सेःप्चाङ्ङिल्ले़ कुयाओ के़बप्पा खे़न् कुन्दुल्लोहाॽओ फत्छे़ॽ॥ 25 ने़प्माङ् सिक्क्रिःल्ले़ वेॽ ने़त्छि कुयाहाॽ खे़न् ने़प्माङ् कुयुङ्मादे़न्नो चक्ते़ॽआङ् एपोदबा फक्ताङ्ङोनु यो पे़र्हेःक् के़धाबा फॽइःन्नु खे़न् तगाङ् ले़प्माङ् तुम्से़ॽ॥ 26 याम्मो साम्म्याङ् कुन्दुल्लो ने़त्छि चोगे़ॽआङ् साःङ्बे से़ःप्चाङ्ङो योसमा वेॽ ने़प्माङ् कुसुक्पो एपोद ले़प्माङ् सिगाङ् पिसाङ् कुबेओ तुम्से़ॽ॥ 27 साम्म्याङ्ङिल्ले़न् आल्लसाङ् कुन्दुल्लो ने़त्छि चोगे़ॽआङ् एपोदे़ल्ले़ तगि ले़प्माङ् ने़प्माङ् फक्ताङ्ङोबा पे़र्हेःक् के़धाबा फॽइःल्ले़ कुसिगाङ्लाम् नु एपोदबा युम्मनाबा फॽइःन्नु तुम्से़ॽ॥ 28 साःङ्बे से़ःप्जाङ्ङिङ्ग खे़प्मोबा कुन्दोल्लोहाॽलाम् एपोदओबा कुन्दोल्लोहाॽओ हिःक्कोःम्कोःम्बा कुनाम्मिल्ले़ के़ङ्ङो युम्मनाबा फॽइओ खेःक्खे़ॽ, हे़क्केलॽरिक् एपोदओलाम् खे़न् वाःङ्सःक्सःक्पा मे़बोङ्ने़न्॥ 29 “आल्ल हारुने़न् सेसेबादे़न्नो लाःत्तिल्ले़ खुने़ॽ कुलुङ्माॽ सम्धाङ् निङ्वाॽ निःन्धो चोःक्मारे़ लागि साःङ्बे से़ःप्चाङ्ङो यहवे दाङ्बे़ल्ले़ कुदगि चक्मे़ल्लॽमनाबा निङ्वाॽसोक्ले़ लागि इस्राइलरे़ कुस्साहाॽरे़ खुन्छिॽ मिङ्हाॽ पक्खुर॥ 30 खे़ने़ॽ निङ्वाॽ निःन्धो चोःक्मारे़ लागि साःङ्बे से़ःप्चाङ्ङो उरिम नु तुम्मिम फत्छे़ॽ, हे़क्केलॽरिक् हारुने़न् यहवे दाङ्बे़ल्ले़ कुदगि पेःक्थक्मा खे़ङ्हाॽ खुने़ॽ कुलुङ्माॽओ खे़न् वाॽर॥ कम्भलॽरिक् हारुने़ल्ले़ इस्राइलिहाॽरे़ खुन्छिॽ लागि खासे़न् चोःक्मा चिगक्वाहाॽ खुने़ॽ कुनिङ्वाॽओ यहवे दाङ्बे़ल्ले़ कुदगि चक्मे़ल्लॽए पक्खु कत्तुररो॥ निङ्वाॽफुसाम्बाहाॽरे़ खुन्छिॽ वेॽ चाङ्हाॽ ( ला ३९:२२-३१ ) 31 “खे़ने़ॽ एपोदरे़ कुसिङ्गाङ्बा के़रे़क् लगेःप्पिन् हिःक्यङ्यङ्बा चिरिक्किल्ले़न् चोगे़ॽ॥ 32 खे़ल्ले़ कुलुम्मो थे़गेक् लिःङ्मारे़ लागि कुहङ्धिक् फत्छे़ॽ, हे़क्क्याङ् मे़दे़ःङ्ने़ल्ल फाॽआङ् कुहङ्ङिल्ले़ कुम्ब्राःन् के़धुम्बा चोःक्मारे़ लागि के़रे़क् फमनाबा कुया चोगे़ॽ॥ 33 खे़ल्ले़ कुसिगाङ्बा कुयाओ हिःक्यङ्यङ्बा, पारान्ला नु हे़ःत्ताङ्बा खिःल्ले़ फुॽले़सेॽ कुभुङ्हाॽ लक्ते़आङ् फत्छे़ॽ हे़क्क्याङ् कुलुम्मो कुलुम्मो साम्म्याङ् पःङ्गेॽहाॽ फोःन्दे़ॽ॥ 34 लत्छा साम्म्याङ् पःङ्गेॽ नु याम्मो लत्छा फुॽले़सेॽ चुक्ल लगेःत्तिल्ले़ कब्रिङ् पिसाङ् पत्ल॥ 35 हारुने़ल्ले़ माङ्से़वा याःम्बक् चोगुल्ले़ खे़न् चाक्खुर॥ सेसेबादे़न्नो यहवे दाङ्बे़ल्ले़ कुदगि हारुने़न् सिगाङ् लाःत् हे़क्क्याङ् लाःक्कात् लःन्निल्ले़ खुने़ॽ कुइक्लान् खे़म्दे़त्ल हे़क्क्याङ् खुने़ॽ मे़सिने़न्ल॥ 36 “खे़ने़ॽ साम्म्याङ् इसेःङ्बा फे़मनाबा ले़प्पे़प्पा थिक् चोगे़ॽआङ् खे़प्मो स्वागेःप्पिल्ले़ कुयोक् लक्मनाबा हे़क्के कन् पाःन्निन् ‘यहवे दाङ्बाल्ले़ कुलागि सेसे तोःम्मनाबा’ फाॽआङ् लक्ते़ॽ॥ 37 हिःक्यङ्यङ्बा कुनाम्मिल्ले़ फे़ताओ खे़न् इघेःक्खे़ॽ, हे़क्क्याङ् खे़न् फे़तान् तगाङ् पत्ल॥ 38 हारुने़ल्ले़ कुद्वाबो खे़न् पत्ल, हे़क्क्याङ् इस्राइलिहाॽरे़ सेसे हुक्वायाङ् च्या मे़दोन्दुॽ, खे़न् सेसे चिगक्वाहाॽरे़ आप्तिक्किन् हारुने़ल्ले़ ताःक्तुर॥ खे़न् चक्मे़ल्लॽए खे़ल्ले़ कुद्वाबोए पत्कन्॥ कम्भलॽरिक् खे़न् हुक्वा याङ्हाॽ यहवे दाङ्बे़ल्ले़ ताःक्मा सुम्बोधाबा पोङ्ल॥ 39 “लगेःप्पिन् चुन्जुम्बा नैनासुत् चिरिक्किल्ले़न् चोगे़ॽ हे़क्क्याङ् फे़ताःन्नाङ् चुन्जुम्बा नैनासुत् चिरिक्किल्ले़न् चोगे़ॽ॥ कुभुङ् लक्मनाबा फॽइआङ् चोगे़ॽ॥ 40 “खे़ने़ॽ हारुने़ल्ले़ कुस्साहाॽरे़ खुन्छिॽ लागि लगेःप्, फॽइ नु पागरिहाॽ खे़ङ्हाॽरे़ खुन्छिॽ मिङ्सो इङ्धाङ् नु खे़म्सिङ्मारे़ लागि चोगे़ॽ॥ 41 खे़न् चाङ्वाःन्हाॽ खे़ने़ॽ के़म्भुॽ नु कुस्साहाॽ चाक्ते़से़ॽ हे़क्क्याङ् खे़ङ्हाॽ माङ्थोःक्ना पिरे़से़ॽआङ् युक्तिङ् चोगे़से़ॽ॥ खे़ङ्हाॽ सेसे चोगे़से़ॽ, खम्भ्याङ् खे़ङ्हाॽरे़ निङ्वाॽफुसाम्बा ताक्फाओ आङ्गाॽ आलागि माङ्से़वा याःम्बक् मे़जोगुर॥ 42 “खे़ने़ॽ खे़ङ्हाॽरे़ खुन्छिॽ याम्धक्किन् ते़प्मारे़ लागि नैनासुत् चिरिक्किल्ले़न् सिगाङ् चाङ्मा तॽरे़से़ॽ॥ खे़न् चाङ्हाॽ साप्पोःक्कोनु यो लाङ्से़बङ्बो थे़म्बा के़त्ल॥ 43 तुम्मादे़न् साःङ्गाहिम्मो हारुने़न् नु खुने़ॽ कुस्साहाॽ मे़लाःत्तिल्ले़ इग्र सेसेदे़न्नो माङ्से़वा चोःक्मारे़ लागि ले़त्ति तोःम्मादे़न्निल्ले़ कुबेसाङ् मे़दाःल्ले़ खे़न् चाङ्हाॽ मे़जाक्खुर, हे़क्केलॽरिक् खे़ङ्हाॽ आप्तिक्साबा मे़म्बोङ्ने़न्नाङ् मे़न्छिने़न्ल॥ “हारुने़न् नु खुने़ॽ कुमुॽइदाङ्साहाॽरे़न् फाॽआङ् कन् आप्फाल्ले़साङ् सदादिङ्ले़ लागि लत्छा साम्योसाक्थिम् पोङ्लरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.