लाम्दिक् 27 - लिम्बुमिधिङ्मनादेमनाबा वयागे़न् सिदुङ्जभा ले़त्ति तोःम्मादे़न् 1 “खे़ने़ॽ बबुल सिङ्ङिल्ले़न् हुक्सिक् ङासि कुलाम्ति नु हुक्सिक् ङासि कुभे़रे़ के़बप्पा कुदङ्बा कुया लिसि के़बप्पा ले़त्ति तोःम्मादे़न् थिक् चोगे़ॽ॥ खे़ल्ले़ कुलिङ्गे़न्निन् हुक्सिक् सुम्सि केःम्बा पोङ्ल॥ 2 खे़ल्ले़ के़रे़क् लिसि कुसुक्पो लत्छा लत्छा कुदाङ् फत्छे़ॽ॥ ले़त्ति तोःम्मादे़न्निन्नु खे़ल्ले़ कुदाङ्हाॽ हाबा खे़न् लत्छा सिङ्भे़ल्ले़क्लाम् चोःक्मनाबा पोङ्ल॥ ले़त्ति तोःम्मादे़न्निन् कासाःल्ले़ सुःप्ते़ॽ॥ 3 खे़प्मोबा खाप्पुन् लःप्मारे़ लागि खप्प्याहाॽ, हे़क्क्याङ् ताबिल्लोहाॽ, साङ्मा छ्ये़ःङ्ग्याहाॽ, सा लक्मालःप्मा खे़ःक्चुरि के़बप्पा उःक्खिहाॽ नु मि ने़मा साङ्ते़रे़ःङ्हाॽ चोगे़ॽ, के़रे़क् सामाहाॽ कासाःल्ले़न् पोङ्मा पोङ्ॽ॥ 4 खे़ल्ले़ लागि कासाबा चिॽलिङ्गेॽ चोगे़ॽ, हे़क्क्याङ् चिॽलिङ्गेल्ले़ कुसम्धाङ् लिसि कुसुक्पो लिसि कासा कुन्दुल्लोहाॽ फत्छे़ॽ॥ 5 खे़ने़ॽ कन्ग ले़त्ति तोःम्मादे़न्निल्ले़ कुसिगाङ् के़रे़क् पिसाङ्बा कुगःङ्ग्याःल्ले़ कुसिगाङ् युक्खे़ॽ, हे़क्केलॽरिक् चिॽलिङ्गे़न् ले़त्ति तोःम्मादे़न्निल्ले़ कुलुम्मो थारिक् के़त्ल॥ 6 ले़त्ति तोःम्मादे़न्निल्ले़ लागि बबुल सिङ्ङिल्ले़न् तक्लाङ्हाॽ चोगे़ॽ॥ हे़क्क्याङ् खे़ङ्हाॽ कासाःल्ले़ सुःप्ते़ॽ॥ 7 खे़प्मोबा तक्लाङ्हाॽ कुन्दुल्लोहाॽओ लिःक्खे़ॽ, हे़क्क्याङ् खे़न् पङ्मे़ल्ले़ खे़न् तक्लाङ्हाॽ ले़त्ति तोःम्मादे़न्नो नाहाङ् कत्नाहाङ् पत्ल॥ 8 खे़ने़ॽ ले़त्ति तोःम्मादे़न्निन् सिङ्भे़ल्ले़क्किल्ले़न् कुहोःन्द्रा के़बप्पा चोगे़ॽ॥ आङ्गाॽ कोःक्माओ ओःन्धाक्ने़बा कुइसिक् खे़न् चोगे़ॽओ॥ तुम्मादे़न् साःङ्गाहिम्मोबा लक्खुम् ( ला ३८:९-२० ) 9 “खे़ने़ॽ सेसे साःङ्गाहिम्मिल्ले़ लागि लक्खुम् थिक् चोगे़ॽ॥ खे़ल्ले़ लाङ्गे़त् ले़प्माङ्बा लक्किल्ले़ कुलाम्तिःन् किप् थिक् हुक्सिक् ने़र पोङ्ॽ, हे़क्क्याङ् खे़ल्ले़ लागि चुन्जुम्बा खिःल्ले़ फमनाबा नैनासुत् चिरिक्किल्ले़न् फोःन्दाहाॽ चोगे़ॽ॥ 10 खे़प्मोबा निबोङ् कासा सित्लाङ्हाॽ नु खे़ल्ले़ कुयुक्नाहाॽआङ् निबोङ्ङे कासाःल्ले़न् पोङ्मा पोङ्ॽ॥ सित्लाङ्ङोबा खे़ःक्चुरिहाॽ नु खे़ल्ले़ कुनाम्हाॽग युप्पाःल्ले़न् पोङ्ल॥ 11 हे़क्केलॽरिक्के थाङ्गे़त् पिसाङ्बा कुलक्किल्ले़ लागिआङ् किप् थिक् हुक्सिक् यारिक् केःम्बा फोःन्दाहाॽ पत्ल, हे़क्क्याङ् खे़प्मोबा सित्लाङ्हाॽ निबोङ् नु खे़ल्ले़ कुयुक्नाहाॽआङ् निबोङ्ङे पत्ल, के़रे़क् कासाःल्ले़न् पोङ्ल॥ कर सित्लाङ्ङोबा खे़ःक्चुरिहाॽ नु कुनाम्हाॽ युप्पाःल्ले़न् पोङ्ल॥ 12 “लक्खुम्मोबा नाम्धा पिसाङ्बा कुभे़रे़ःल्ले़ लागि ङाबोङ् हुक्सिक् के़बप्पा फोःन्दान् पत्ल॥ खे़प्मोबा सित्लाङ्हाॽ थिबोङ् नु कुयुक्नाहाॽआङ् थिबोङ्ङे पोङ्ल॥ 13 लक्खुम्मोबा नाङ्गे़न् इग्र नाम्धा पिसाङ्बा कुनुप्मोबा कुभे़रे़न् ङाबोङ् हुक्सिक् ने़र पोङ्ॽ॥ 14 मा लाम्धेःत्तोबा थिक् ले़प्माङ्ले़ लागि थिबोङ्ङाङ् ङासि हुक्सिक् के़बप्पा फोःन्दाहाॽ पत्ल पोङ्ॽ॥ खे़प्मोबा सित्लाङ्हाॽ सुम्सि नु कुयुक्नाहाॽआङ् सुम्सिए पोङ्ल पोङ्ॽ॥ 15 वेॽ पिसाङ्ले़ लागि थिबोङ्ङाङ् ङासि हुक्सिक् के़बप्पा फोःन्दाहाॽ पत्ल॥ खे़प्मोबा सित्लाङ्हाॽ सुम्सि नु कुयुक्नाहाॽआङ् सुम्सिए पोङ्ल पोङ्ॽ॥ 16 “लक्खुम्मोबा लाम्धेःत्तिल्ले़ लागि हिःक्यङ्यङ्बा, पारान्ला हे़ःत्ताङ्बा खि नु चुन्जुन् लॽरिक् थाक्मनाबा नैनासुत् चिरिक्किल्ले़न् निबोङ् हुक्सिक् के़बप्पा फोःन्दा पत्ल पोङ्ॽ॥ खे़प्मो कुभुङ् लक्मना केःप्मनाबा याःम्बक् पोङ्ल॥ खे़प्मोबा सित्लाङ्हाॽ लिसि नु कुयुक्नाहाॽआङ् लिसिए पोङ्ल॥ 17 लक्खुम्मोबा के़रे़क् पिसाङ्बा के़रे़क् सित्लाङ्हाॽओबा कुनाम्हाॽ नु कुवेॽमा खे़ःक्चुरिहाॽ युप्पाःल्ले़न् पोङ्मा पोङ्ॽ॥ खे़ल्ले़ कुयुक्नाहाॽ कासाःल्ले़न् पोङ्ल॥ 18 लक्खुम्मिल्ले़ कुलाम्तिःन् किप् थिक् हुक्सिक् नु खे़ल्ले़ कुभे़रे़न् ङाबोङ् हुक्सिक् पोङ्ल पोङ्ॽ॥ खे़प्मोबा फोःन्दाहाॽरे़ कुलिङ्गे़न्निन् हुक्सिक् ङासि के़बप्पा पोङ्ल॥ खे़ङ्हाॽ चुन्जुन् लॽरिक् थाक्मनाबा नैनासुत् चिरिक्किल्ले़न् पोङ्मा पोङ्ॽ, हे़क्क्याङ् खे़प्मोबा कुयुक्नाहाॽ कासाःल्ले़न् पोङ्मा पोङ्ॽ॥ 19 सेसे साःङ्गाहिम्मोबा माङ्से़वा चोःक्मा के़रे़क् सामाहाॽ नु साःङ्गाहिम्मिल्ले़ कुउःङ्मा के़रे़क् लक्चुहाॽ हे़क्क्याङ् खे़प्मोबा लक्खुम्मोबा के़रे़क् कुहाक्मा लक्चुहाॽ कासाःल्ले़न् पोङ्मा पोङ्लो॥ सेमि हाःम्मा निःङ्गेॽ ( ले़बि २४:१-४ ) 20 “ओःत्तिःल्ले़ लागि इस्राइलिहाॽरे़ मे़युसुबा चैतुन इसेःङ्बा निःङ्गेःन् मे़दारुर, हे़क्क्याङ् सेमिहाॽ चक्मे़ल्लॽए हाॽरुआङ् युङ्ल फाॽआङ् खे़ने़ॽ खे़ङ्हाॽ इङ्जाङ् पिरे़से़ॽ॥ 21 तुम्मादे़न् साःङ्गाहिम्मो माङ्हुप् सन्दोक्किल्ले़ कुदगि के़बप्पा फोःन्दा लाःक्कात् हारुने़न् नु कुस्साहाॽरे़ खे़न् सेमिहाॽ युःन्छिक्काङ्धो तानाम् थारिक् यहवे दाङ्बे़ल्ले़ कुदगि मे़हाःन्दुआङ् मे़याक्ल॥ इस्राइलिहाॽरे़ खुन्छिॽ लागि थाःक्थाःक्को थारिक् कन् सदादिङ्बा थिम् पोङ्लरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.