लाम्दिक् 26 - लिम्बुयहवे दाङ्बे़ल्ले़ कुसेसे साःङ्गाहिम् ( ला ३६:८-३८ ) 1 “खे़ने़ॽ थिबोङ् फोःन्दा के़बप्पा सेसेदे़न् थिक् चोगे़ॽ॥ खे़न् फोःन्दाहाॽ चुन्जुन् लॽरिक् फमनाबा नैनासुत् चिरिक्किल्ले़न् नु हिःक्कोःम्कोःम्बा, पारान्ला हे़क्क्याङ् हे़ःत्ताङ्बा चाःम्मनाबा से़मुरिक्के़ल्ले़न् पोङ्ल पोङ्ॽ॥ खे़ङ्हाॽओ के़ले़बा चोबेगुबाहाॽरे़ याःम्बक् मे़जोगुबा करुबहाॽआङ् खे़ने़ॽ चोगे़॥ 2 के़रे़क् फोःन्दाहाॽरे़ कुलाम्तिन् निबोङ्ङाङ् ये़त्छि हुक्सिक् नु कुभे़रे़न् हुक्सिक् लिसि के़बप्पा पोङ्ल॥ के़रे़क् फोःन्दाहाॽ लत्छा परिक्ले़ कुसिःक्मा के़बप्पा पोङ्ल॥ 3 ङासि फोःन्दाहाॽ सोरिक् चक्ते़ॽ, हे़क्क्याङ् वेॽ ङासिहाॽआङ् हे़क्केलॽरिक्के चक्ते़ॽ॥ 4 थिक्सिगेक्पा चक्मनाबाल्ले़ कुलक्किल्ले़ थिक्समा फोःन्दाःल्ले़ कुयाओ हिःक्यङ्यङ्बा कुवेॽमा चोगे़ॽ॥ निसिगेक्पा चक्मनाबे़ल्ले़ कुलक्किन् थिक्समा फोःन्दाःल्ले़ कुयाओआङ् हे़क्तङ्बाए चोगे़॥ 5 लत्छा फोःन्दाओ ङाबोङ् इस्रुप्पा फत्छे़ॽ, हे़क्क्याङ् निसिगेक्पा चक्मनाबा कुलक्किल्ले़ नाहाङ् ले़प्माङ्बा फोःन्दाओ ङाबोङ् इस्रुप्पा फत्छे़ॽ॥ खे़न् इस्रुप्पाहाॽ ना नु कत्ना तुम्दुम्बा पत्ल पोङ्ॽ॥ 6 खे़ब्याङ् ङाबोङ् साम्म्याङ् खे़ःक्चुरिहाॽ चोगे़ॽआङ् फोःन्दाहाॽ थिक्नु वेॽइन् खे़ःक्चुरिहाॽरे़ तुम्से़ॽ, हे़क्क्याङ् अक्खेलॽरिक् सेसे साःङ्गाहिम्मिन् लत्छा पोङ्ॽ॥ 7 “सेसेदे़न्निल्ले़ कुसम्धाङ् खाप्मारे़ लागि मे़ःन्दाक् मुरिक्किल्ले़न् फोःन्दाहाॽ चोगे़ॽ॥ खे़ने़ॽ के़रे़क्ले़ थिबोङ्ङाङ् थिक् फोःन्दाहाॽ चोगे़ॽ॥ 8 फोःन्दा थक्मा सुम्बोङ् हुक्सिक् कुलाम्ति नु कुभे़रे़न् हुक्सिक् लिसिबा पोङ्ल पोङ्ॽ॥ थिबोङ्ङाङ् थिक् फोःन्दाहाॽरे़न् लत्छा परिक्पा कुसिःक्मा पत्ल पोङ्ॽ॥ 9 ङासि कुघे़ल्ले़क् फोःन्दाहाॽ सोसोरिक् नु तुक्सि फोःन्दाहाॽ सोसोरिक् तुम्से़ॽ॥ तुक्सिगेक्पा फोःन्दान् साःङ्गाहिम्मिल्ले़ कुदगि निले़ङ् फाक्ते़ॽ॥ 10 थिक्सिगेक्पा चक्मनाबे़ल्ले़ कुलक्किल्ले़ नासमा फोःन्दाःल्ले़ कुयाओ ङाबोङ् कुसःम्मा चोगे़ॽ, हे़क्क्याङ् वेॽ चक्मनाबे़ल्ले़ कुलक्कोबा नासमा फोःन्दाःल्ले़ कुयाओआङ् ङाबोङ् कुसःम्माहाॽ फत्छे़ॽ॥ 11 खे़ब्याङ् साःङ्गाहिम्मिल्ले़ कुघाप्मान् लत्छा चोःक्मारे़ लागि खे़ने़ॽ कासाःल्ले़न् ङाबोङ् खे़ःक्चुरिहाॽ चोगे़ॽ, हे़क्क्याङ् खे़न् खे़ःक्चुरिन् कुसःम्माहाॽओ फत्छे़ॽ॥ 12 साःङ्गाहिम्मिल्ले़ कुघाप्माहाॽओबा के़नम्बा लक् खे़न् कुभ्रे़ःङ् फोःन्दान् सेसेदे़न्निल्ले़ कुएगाङ् ले़प्माङ् फोःन्छिङ्ङाङ् पत्ल॥ 13 साःङ्गाहिम्मिल्ले़ कुघाप्माहाॽओबा के़नम्बान् हुक्सिक्थिक् कत्नाहाङ् ले़प्माङ् नु हुक्सिक् थिक् नाहाङ् ले़प्माङ् साःङ्गाहिम्मिन् ते़प्मारे़ लागि खे़ल्ले़ ने़प्माङ् कुयाओ फोःन्छिङ्ङाङ् पत्ल॥ 14 “कुहे़ःत्ला चाःम्मनाबा मे़ल्लुक् होरिक्पाल्ले़ खाम्बुन् खाप्मारे़ लागि साःङ्गाहिम्मिल्ले़ कुघाप्मा चोगे़ॽ, हे़क्क्याङ् खे़ल्ले़ कुसम्धाङ् ते़प्मारे़ लागि वरःङ् पित्तिल्ले़ कुहोरिक्किल्ले़ वेॽ खाम्बु चोगे़ॽ॥ 15 “सेसे साःङ्गाहिम्मिल्ले़ लागि बबुल सिङ्ङिल्ले़न् सिङ्भे़ल्ले़क्हाॽ तक्पे़त् तक्पे़प्पा चोगे़ॽ॥ 16 सिङ्भे़ल्ले़क् थक्मा थिबोङ् हुक्सिक् कुलाम्ति नु कुभे़रे़न् हुक्सिक् थिक्काङ् कुभ्रे़ःङ्बा पोङ्ल॥ 17 सिङ्भे़ल्ले़क् थक्मा ने़त्छि ने़त्छि चम्बे़त् के़लःम्बा पे़म्बे़न् पत्ल पोङ्ॽ॥ सेसे साःङ्गाहिम्मोबा के़रे़क् सिङ्भे़ल्ले़क्हाॽ खे़ने़ॽ कम्भलॽरिक्के चोगे़ॽ॥ 18 सेसे साःङ्गाहिम् लाङ्गे़त् पिसाङ्बा कुलक्किल्ले़ लागि निबोङ् सिङ्भे़ल्ले़क्हाॽ चोगे़ॽ॥ 19 खे़न् निबोङ्ङे सिङ्भे़ल्ले़क्हाॽरे़ कुसिगाङ् ले़प्माङ् युप्पाःल्ले़न् लिबोङ् कुयुक्नाहाॽ चोगे़ॽ, ने़त्छि कुयुक्नाहाॽ सिङ्भे़ल्ले़क् थिक्ले़ मुहाङ् ले़प्माङ् चम्बे़त् के़लःम्बा चोगे़ॽ॥ 20 सेसे साःङ्गाहिम् थिक्नाहाङ् ले़प्माङ्, इग्र थाङ्गे़त् पिसाङ्ले़ लागि निबोङ् सिङ्भे़ल्ले़क्, 21 हे़क्क्याङ् खे़ल्ले़न् लिबोङ् कुयुक्नादे़न्हाॽ युप्पाःल्ले़न् चोगे़ॽ, लत्छा सिङ्भे़ल्ले़क् मुहाङ् ने़त्छि कुयुक्नादे़न्हाॽ चोगे़ॽ॥ 22 सेसे साःङ्गाहिम्मिल्ले़ कुएगाङ्बा कुलक्, इग्र नाम्धा ले़प्साङ्बा कुलक्किल्ले़ लागि तुक्सि सिङ्भे़ल्ले़क्हाॽ चोगे़ॽ॥ 23 नासमा कुनुप्मा कुसुक्पाहाॽरे़ लागि खे़ने़ॽ ने़त्छि सिङ्भे़ल्ले़क्हाॽ चोॽगे़॥ 24 खे़ङ्हाॽ मुहाङ्नु थाःङ् थारिक् कुबःत् कुबःत् खाप्सिङ्ल पोङ्मा पोङ्ॽ, हे़क्क्याङ् कम्भलॽरिक् खे़ङ्हाॽ लत्छा कुन्दुल्लोओ तुम्ल पोङ्ॽ॥ खे़न् ने़प्माङ् सिङ्भे़ल्ले़क्हाॽ अक्तङ्बाए पोङ्ल॥ 25 खे़प्मो ये़त्छि सिङ्भे़ल्ले़क्हाॽ पत्ल, हे़क्क्याङ् खे़ल्ले़ लागि युप्पाःल्ले़न् थिबोङ्ङाङ् तुक्सि कुयुक्नादे़न्हाॽ पोङ्ल॥ लत्छा सिङ्भे़ल्ले़क् मुहाङ् ने़त्छि कुयुक्नादे़न् युङ्ल पोङ्ॽ॥ 26 “खे़ने़ॽ बबुल सिङ्ङिल्ले़न् पे़रे़म् कुसाक्मा सिङ्हाॽ चोगे़ॽ—सेसे साःङ्गाहिम्मोबा थिक्नाहाङ् ले़प्माङ्बा सिङ्भे़ल्ले़क्हाॽरे़ लागि ङासि पे़रे़म् कुसाक्मा सिङ्, 27 हे़क्क्याङ् वेॽ ले़प्माङ्बा सिङ्भे़ल्ले़क्हाॽरे़ लागि ङासि पे़रे़म् कुसाक्मा सिङ्, खे़ब्याङ् नाम्धा पिसाङ् कुएगाङ्बा कुलक्कोबा सिङ्भे़ल्ले़क्हाॽरे़ लागि ङासि कुसाक्मा पे़रे़म्सिङ् पोङ्ॽ॥ 28 सिङ्भे़ल्ले़क्हाॽरे़ कुलुम्मो के़याक्पा पे़रे़म् सिङ्ङिन् थिक् कुयाओलाम् वेॽसमा कुयाओ थारिक् खाराक् याक्ल पोङ्ॽ॥ 29 सिङ्भे़ल्ले़क्हाॽ के़रे़क् साम्म्याङ्ङिल्ले़ सुःप्ते़ॽ॥ पे़रे़म्सिङ् कुसाक्माहाॽ ते़म्मारे़ लागि साम्म्याङ् कुन्दोल्लोहाॽ चोगे़ॽ॥ पे़रे़म्सिङ् कुसाक्माहाॽआङ् साम्म्याङ्ङिल्ले़ सुःप्ते़ॽ॥ 30 “खे़ने़ॽ कोःक्माओ ओःन्धाक्ने़बा कुबि कुइसिक् सेसे साःङ्गाहिम् चोगे़ॽआङ् फोःक्खे़ॽ॥ 31 “हे़क्क्याङ् हिःक्यङ्यङ्बा, पारान्ला, हे़ःत्ताङ्बा खि नु चुन्जुम्बा फःमनाबा नैनासुत् चिरिक्किल्ले़न् लत्छा कुधेःक्मा फोःन्दा चोगे़ॽ, हे़क्क्याङ् खे़प्मो कुहुक्वा के़नुॽबा के़ले़बा चोबेगुःल्ले़ चोगुबा करुबहाॽ के़बप्पा पोङ्ल॥ 32 साम्म्याङ्ङिल्ले़ सुःप्मना बा बबुल सिङ्ङिल्ले़न् लिसि सित्लाङ्हाॽओ साम्म्याङ् खे़ःक्चुरिहाॽरे़ खे़न् खिङ्घे़ॽ॥ खे़न् लिसि सित्लाङ्हाॽ लिसि युप्पा कुयुक्नादे़न् सम्धाङ् पोङ्ल॥ 33 खे़ने़ॽ खे़न् कुधेःक्मा फोःन्दान् खे़ःक्चुरिहाॽलाम् फोःन्दे़ॽ हे़क्क्याङ् खे़ल्ले़ कुएगाङ् माङ्हुप् साप्लुङ् के़याक्पा सन्दोक्किन् युक्खे़ॽ॥ फोःन्दाःल्ले़ खिनिॽ लागि सेसेबादे़न्निन् साॽरिक् सेसेबादे़न्नोलाम् लाःत्लाःत् से़न्दु॥ 34 साॽरिक् सेसेबादे़न्नो माङ्हुप् साप्लुङ् के़याक्पा सन्दोक् सम्धाङ् कुदे़प्फेन् फत्छे़ॽ॥ 35 फोःन्दाःल्ले़ लाःक्कात् ले़प्माङ् सेसे साःङ्गाहिम् थो ले़प्माङ् चप्ते़न्ने़न् युक्खे़ॽ, हे़क्क्याङ् सेसे साःङ्गाहिम् यो ले़प्माङ् चप्ते़न्ने़ल्ले़ कुदगि सेमि युङ्दे़न्निन् युक्खे़ॽ॥ 36 “साःङ्गाहिम् लाम्धेःत्तिल्ले़ लागि खे़ने़ॽ हिःक्यङ्यङ्बा, पारान्ला हे़क्क्याङ् हे़ःत्ताङ्बा खि नु चुन्जुन् लॽरिक् थाक्मनाबा नैनासुत् चिरिक्किल्ले़न्, कुभुङ् लक्मना याःम्बक् के़बोङ्बा फोःन्दा थिक् चोगे़ॽ॥ 37 खे़न् फोःन्दाःल्ले़ लागि बबुल सिङ्ङिल्ले़न् ङासि सित्लाङ्हाॽ चोगे़ॽ, हे़क्क्याङ् खे़ङ्हाॽ साम्म्याङ्ङिल्ले़ सुःप्ते़ॽ॥ खे़प्मोबा खे़ःक्चुरिहाॽ साम्म्याङ्ङिल्ले़न् पोङ्ल, खम्भ्याङ् खे़ल्ले़ लागि ङासि कासाःल्ले़न् युङ्दे़न्हाॽ चोगे़ॽओ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.