लाम्दिक् 22 - लिम्बुसाम्बान् हुङ्मा थिम् 1 “आत्तिल्ले़ पित्मा इग्र मे़ल्लुक् खुःत्तुआङ् खे़न् से़रु इग्र सङ्घुदेसुने़भग्र खे़ल्ले़ लत्छा पित्माःल्ले़ कुले़क्वा पित्मा ङासि नु मे़ल्लुक् थिक्ले़ कुले़क्वा मे़ल्लुक् लिसि हुङुर पोङ्ॽ॥ 2 खुःन्द्रिक्पे़ल्ले़ हिम्मिन् से़सुर याक्पा मे़दुमु हे़क्क्याङ् मे़हिप्तुल्ले़ खे़न् सिने़भग्र, खे़न् के़से़प्पा मनान् मनासे़प्मा आप्तिक्को मे़धाने़न्॥ 3 कर नाम् लिङ् चुःत्ताङ्ने़भग्र, खे़न् खुःन्द्रिक्पा के़से़प्पान् आप्तिक्को थाःॽ॥ के़घुःप्पाल्ले़ के़रे़क् पाःन्हाॽ साम्बान् हुङुर पोङ्ॽ॥ हुङ्मारे़ लागि खे़ल्ले़ थेआङ् मे़गत्तुन्ने़भग्र, खुःत्तुबान् कुहुङ्से़ खे़न् के़घुःप्पान् योक् पोङ्मारे़ लागि मे़सङ्घु मे़देसुर पोङ्ॽ॥ 4 खुने़ॽ खुःत्तुसिबा थक्साहाॽ कुहिङ्वे़त् कत्तुसिबा खोमे़दे़त्ने़भग्र, खे़न् कुम्बाबा पित् इग्र अदङ् इग्र मे़ल्लुक् च्यासाङ् खे़न् खुःत्तुबाल्ले़ निले़ङ् कुले़क्वा हुङुर पोङ्ॽ॥ 5 “आत्तिन् मनाःल्ले़ कुधक्सान् प्याङ्सिओ इग्र चे़ल्ले़क्सेॽ इक्ताप्पो चाराम्से़ ले़रु हे़क्क्याङ् थक्सान् पेःक्काङ् याप्मिःल्ले़ कुब्याङ्सिओबा कुजान् चदेसु पिरुने़भग्र खे़न् मनाःल्ले़ याप्मिःल्ले़ हान्ति के़बोङ्बान् खुने़ॽ कुब्याङ्सि इग्र कुजे़ल्ले़क्सेॽ इक्ताप्पोबा के़रे़क्नुःल्ले़ नुबा कुजान् पिरुआङ् साम्बान् हुङुर पोङ्ॽ॥ 6 “आत्तिन् मनाःल्ले़ कुब्याङ्सिओ मि तुप्तु हे़क्क्याङ् मिन् हाॽरुर पेःक्काङ् याप्मिःल्ले़ कुजे़ल्ले़क्सेॽ इक्ताप् नु खे़प्मो के़लिङ्बा इग्र कुजा मे़हे़गुआङ् इमे़घेःक्खु मे़युक्खुबा चाधःङ्मान् थ्यःङ् मिदिक् पेःक्ने़भग्र मि के़हाःम्बा मनाःल्ले़ साम्बान् हुङुरए पोङ्ॽ॥ 7 “कुभा मनाधिक्ले़ कुहिम्बेसाङ्बान् याङ् इग्र सामा युङ्मा पिरु, हे़क्क्याङ् खे़न् मनाःल्ले़ कुहिम्मोलाम् खे़न् मे़घुःत्तुआङ् खे़न् के़घुःप्पान् मे़दे़म्सुने़भग्र, खे़न् के़घुःप्पाल्ले़ निले़ङ् यारिक् यरिक् हुङुर पोङ्ॽ॥ 8 कर खे़न् खुःन्द्रिक्पान् मे़न्याङ्घुन्ने़भग्र, खे़न् हिम्दाङ्बे़ल्ले़ कुहिम्बेसाङ्बे़ल्ले़ कुसामाओ हुक्थे़क्तुआङ् वाॽबि मेःम्बि खे़न् निङ्वाॽ खोमारे़ लागि खुने़ॽ खासे़न्लोःम्बाहाॽरो पेःक्ल पोङ्ॽ॥ 9 के़रे़क् परिक्पा याङ्साकुन्धेःल्ले़ कुयाःम्बेओ पाःन्धङ्ङो, पित् इग्र अदङ्, इग्र मे़ल्लुक्, चाङ्देःत्, इग्र कुभा के़माबा चिगक्वान् ओसेःन्धाङ् पोङ्ङाङ् कुभारे़ खे़न् ‘आङ्गाॽइन्’ पाःत्तुने़भग्र, खासे़न्लोःम्बाहाॽरे़ खुन्छिॽ तगि खे़ङ्हाॽ मे़दारुसिर पोङ्ॽ॥ खासे़न्लोःम्बाहाॽरे़ आत्तिन् आप्तिक्साबा मे़लेःत्तु, खुने़ॽ कुहिम्बेसाङ्बान् निले़ङ् यारिक् यरिक् खे़ल्ले़ पिरुर पोङ्ॽ॥ 10 “कुभा मनाःल्ले़ कुहिम्बेसाङ्बे़न् अदङ् इग्र पित् इग्र मे़ल्लुक् इग्र वेॽ थक्सा कप्मा पिरु, हे़क्क्याङ् खे़न् हाःत्ले़आङ् मे़न्निए सिःॽ इग्र खे़न् काःन् इग्र खे़न् मे़नाःत्तु मे़देसुने़भग्र, 11 खे़न् ने़प्माङ्ले़ खुन्छिॽलुम्मोबा खे़माॽइन् आप्फेक् हिम्बेसाङ्बे़ल्ले़ कुयाङ्साकुन्धेओ हुक्केःत्ते़सुबा मेःन् फाॽआङ् यहवे दाङ्बे़ल्ले़ कुदगि माङ्हे़क्ने़त्सिआङ् पान् तङ्सुर पोङ्ॽ॥ खे़ब्याङ् खे़न् थक्साःल्ले़ कुन्दाङ्बे़न् खे़न् पाःन्नो ते़न्ल पोङ्ॽ, हे़क्क्याङ् खुने़ॽ साम्बान् हुङ्मा मे़बोङ्ने़न्॥ 12 कर थक्सान् मे़घुःत्तु मे़देॽरुबाने़भग्र खे़न् थक्सा ओगे़मे़प्पाल्ले़ कुन्दाङ्बान् हान्ति पोःक्खे़बाल्ले़ कुले़क्वा पिमा पोङ्ॽ॥ 13 थक्सान् ताम्भुङ् थक्साःल्ले़ स्ये़रुने़भग्र खे़न् थक्सा ओगे़मे़प्पे़ल्ले़ खे़न् कुसिवे़त् थक्सान् तारुआङ् ओसेःन्धाङ् चोगुर पोङ्ॽ॥ ताम्भुङ् थक्साःल्ले़ स्ये़रुबाने़भग्र खे़ल्ले़ कुले़क्वा हुङ्मा मे़बोङ्ने़न्॥ 14 “कुभारे़ हिम्बेसाङ्बालाम् कुभा थक्सा थे़त्लङ् तारु हे़क्क्याङ् खे़ल्ले़ कुन्दाङ्बान् होःप्ते़ल्ले़ खे़न् थक्सान् काःन्दे़ इग्र स्ये़नेगभ्र खे़न् थे़त्लङ् के़नाःक्पा मनाःल्ले़ खे़ल्ले़ कुले़क्वाओ कुमे़न् पिरुर पोङ्ॽ॥ 15 कर कुन्दाङ्बे़ल्ले़ निसुरए खे़न् थक्सान् स्ये़ इग्र काःन्दे़ने़भग्र खे़न् मनाःल्ले़ कुमे़न् हुङ्मा मे़बोङ्ने़न्॥ खे़न् थक्सान् नाम्याक्को तारुआङ् वये़बाने़भग्र खे़न् हान्ति के़बोङ्बान् खे़न् थक्साःल्ले़ कुनाम्याक्को खक्मा पोङ्लो॥ खासिङ्निःप्मा नु साम्यो साक्थिम्हाॽ 16 “पाःन्मे़म्भुॽए के़ये़प्मा सिसागे़न् मे़न्छ्यान् कुभा मनाःल्ले़ ले़मु सुःन्दुआङ् खे़न् इप्तुने़भग्र, खे़न् मनाःल्ले़ मेःक्खिम्सामा मे़न्छ्याःल्ले़ कुलागि याङ् हुङुआङ् खे़न् मेःत् चोगुर पोङ्ॽ॥ 17 कर खे़न् मे़न्छ्याःल्ले़ कुम्बान् मेःक्खिम् चोःक्मा पिमा मे़दे़न्ने़न्ने़भग्र, खुने़ॽ सिसागे़न् मे़न्छ्या साक्थिम् कुइसिक् मेःक्खिम्सामाल्ले़ कुमे़ल्लुङ् हुङ्मा पोङ्ॽ॥ 18 “साम्माङ्च्याङ् के़याङ्मा कित्चाक् के़जोःक्मा मे़न्छुमान् कुहिङ्वे़त् ले़प्मा मे़नुॽने़न्॥ 19 “आत्तिन् मनाःल्ले़ थक्साःन्नु इम्मा याःम्बक् चोगुॽ, खे़न् मनान् से़प्मा पोङ्ॽ॥ 20 “आत्तिल्ले़ यहवे दाङ्बान्नुःल्ले़ वेॽ कुभा माङ्ङो सिदुङ्जभा तोःन्दुॽ, खे़न् मनान् मे़ङ्मा पोङ्ॽ॥ 21 “वेॽ लाजेॽबा मनान् तुक्खे मे़जाःत्ते़म्मिन्ने़ॽ, ताप्फे़ःल्लिक् मे़मे़त्ते़म्मिन्ने़ॽ, थेआङ्भे़ल्ले़ खिनिॽआङ् मिस्र लाजेॽओ वेॽ लाजेॽबा के़बोःक्खिआङ् के़वयि॥ 22 मेमेदुमाहाॽ इग्र ये़त्छाबा ये़त्छामाहाॽ तुक्खे मे़जाःत्ते़म्सिम्मे़न्ने़ॽ॥ 23 खिनिॽ हे़क्के के़जोगुम्ने़भग्र खे़ङ्हाॽरे़ आङ्गाॽ कुभाॽरे़ लागि पेलि मे़भाक्काल्ले़ आङ्गाॽ यहवे दाङ्बाल्ले़ खे़ङ्हाॽ नोगप् पिरुङ्सिङ्ॽ॥ 24 हे़क्क्याङ् आङ्गाॽ आयाःक्ले़ॽआङ् खिनिॽ मे़ङ्निङ्ॽ॥ खिनिॽ मेःत्हाॽआङ् मेमेदुमा मे़बोङ्ॽ, खे़ब्याङ् खिनिॽ साएहाॽआङ् ये़त्छाबा ये़त्छामा मे़बोङ्ॽ॥ 25 “आङ्गाॽ आमनाहाॽओ कुभा याङ्गे़साॽबा मनान् खिनिॽ सिङ्नात् याङ् के़बिरुम्मिल्ले़ खिनिॽ सिङ्नात्दाङ्बा कुइसिक् मे़बोःक्खे़म्मिन्ने़ॽ हे़क्क्याङ् याङ्ङिल्ले़ कुस्सा मे़दाःक्ताम्मिन्ने़ॽ॥ 26 खिनिॽ हिम्बेसाङ्बाल्ले़ कुसुङ्घेक्वान् याङ्ङो के़युक्खुम्माङ् वाॽने़भग्र, नाम्धामानुःल्ले़ तगिए खे़न् खुने़ॽ नुःक्ते़म् पिरे़म्मे़ॽ, 27 थेआङ्भे़ल्ले़ खे़ल्ले़ खे़न्लक् लत्छा खाम्मा कत्तु॥ खे़न् होःप्पिल्ले़ खुने़ॽ थे़माओ इम्? खे़ल्ले़ आङ्गाॽ पेलि फाक्काने़भग्र खे़ल्ले़ कुबेलिन् आङ्गाॽ खे़प्सुङ्ॽ, थेआङ्भे़ल्ले़ आङ्गाॽ के़नुॽबा चोःक्का॥ 28 “निङ्वाॽफुमाङ्ङिन् चे़ॽया मे़मे़त्ते़म्मिन्ने़ॽ हे़क्क्याङ् आप्फेक् सुवाङ्बा लाम्लोबान् माङ्दे साङ्ग्रा मे़मे़त्ते़म्मिन्ने़ॽ॥ 29 “खिनिॽ आङ्गाॽओ तोःम्मा के़बोङ्बा पोगुगे़न् कुजा नु चे़ल्ले़क्सेॽ सेजङ्वान् वे़त्ते़सरे़ कुवाॽमालाम् लाॽरुर ये़म् वाॽरए आबिरे़म्मे़ॽ॥ “खिनिॽ तुम्बा साहाॽ आङ्गाॽओ तोःन्दे़म्सिम्मे़ॽ॥ 30 हे़क्केलॽरिक् खिनिॽ पित्थक्साहाॽ नु मे़ल्लुक्हाॽलाम्बाआङ् तोःन्दे़म्मे़ॽ॥ तगि के़धाप्पा पित्सात्तिन् इग्र मे़ल्लुक्साःत्तिन् नुसि ये़न् थारिक् कुम्माःन्नु वाॽर हे़क्क्याङ् ये़त्छि ये़न् के़त्तिल्ले़ खे़न् आङ्गाॽओ तोःन्दे़म्मे़ॽओ॥ 31 “खिनिॽ आङ्गाॽ आलागि सेसे मना पोङ्मा पोङ्ॽ॥ कल्ले़चोगुल्ले़ ताम्भुङ्ङोबा थक्साहाॽरे़ मे़भुयुसिबा थक्सा सान् खिनिॽ मे़जे़म्मिन्ने़ॽ॥ खे़न् सान् कोःत्चोहाॽ लाप्फुसे़म् पिरे़म्सिम्मे़ॽओ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.