लाम्दिक् 21 - लिम्बु1 “आल्ल आङ्गाॽ हिब्रुहाॽ पिरुङ्सिङ्बा थिम्हाॽ हाबा कन्हाॽएरो॥ हिब्रु योःग्बा योःग्माहाॽ 2 “आल्ल खिनिॽ लत्छा हिब्रु योक् के़इङुम्मिल्ले़ खे़ल्ले़ तङ्बे तुक्सि थारिक् खिनिॽ याःम्बक् चोगु के़बिरिॽ॥ तङ्बे नुसि तोॽरुल्ले़ खे़न् हाबा ले़रे़म्देसे़म्मे़ॽ॥ 3 खे़न् योक् पोःक्खे़आङ् त्ये़बा ये़म्मो मेःक्खिम् मे़न्जोःक्के त्ये़आङ् वये़ने़भग्र खे़न् पेःक्किल्ले़आङ् खे़ल्ले़ कुमेःत्तिन् मे़न्देॽए ए़क्लेःक् पेःक्ल, कर खे़न् मेःक्खिम् चोगे़आङ् त्ये़आङ् वये़ने़भग्र खे़ल्ले़ कुमेःत्तिन् तेॽरुआङ् पेःक्ल॥ 4 कुन्दाङ्बे़ल्ले़ खे़न् मेःत् पिरुआङ् वये़, हे़क्क्याङ् खे़ल्ले़ कुस्साकुए मे़वये़ने़भग्र खे़न् कुमेत् कुस्साहाॽ कुङ्दाङ्बे़ल्ले़न् मे़बोङ्ॽ, हे़क्क्याङ् खे़न्लक् एःक् पेःक्ल॥ 5 “कर खे़न् योःग्बाःल्ले़ खुने़ॽ कुन्दाङ्बान्, कुमेत् कुस्साहाॽ कुलुङ्माॽ मे़दुक्काङ् से़मा मे़दे़न्ने़भग्र, 6 कुन्दाङ्बे़ल्ले़ खे़न् माङ्से़वा चोःक्मादे़न्नो तेॽरुआङ् पेःक्ल हे़क्क्याङ् खे़प्मो लाम्धेःप्पो इग्र लाम्धेत् सित्लाङ्ङो ये़प्सुआङ् खे़ल्ले़ कुने़क्खोन् ताक्क्वाःल्ले़ यत्तु पिरुर॥ खे़न् एगाङ् खुने़ॽ कुहिङ्हिङ् योक् पोङ्ङाङ् वाॽ॥ 7 “आत्तिन् मनाःल्ले़ कुस्सा मे़न्छुमान् योःग्मा चोगुआङ् सङ्घुदेसुने़भग्र खे़न् मे़न्छ्यान् योःग्बाहाॽ हे़क्के चोःक्युम्भो पोङ्माआङ् पेःक्मा मे़घोने़न्॥ 8 आत्तिल्ले़ खे़न् मेःत् चोःक्मारे़ लागि इङुआङ् वये़ हे़क्क्याङ् आल्ल खे़ल्ले़ मेःत् चोःक्माआङ् कप्मा कुसिराॽ मे़धाङ्ने़न्ने़भग्र खे़न् मे़न्छ्यान् हाबा कुम्बारे़ओ याङ्ना सङ्घुदेसुर॥ खे़ल्ले़ कुन्दाङ्बे़ल्ले़ खे़न् वेॽ लाजेॽबा आत्तिल्ले़ कुहुक्कोआङ् सङ्मादेमा मे़घोसुन्ॽ थेआङ्भे़ल्ले़ खे़ल्ले़ खे़न् योःग्मे़न्नु चोगुबा माङ्हुप्पिन् फेःन्दुआङ् वाॽ॥ 9 आत्तिन् मनाःल्ले़ कुस्सा ये़म्बित्छाःल्ले़ लागि योःग्मा इङुआङ् वाॽ, खे़न् कुस्सा मे़न्छुमा हे़क्केए नुरिक् मे़त्तुर॥ 10 कुभा मनाधिक्ले़ वेॽ मेःत् तारुने़भग्र खे़ल्ले़ तगिमा कुमेःत्तिन् चामा थुङ्मा, चाङ् नु तगिबा हे़क्केए मेःत्तिल्ले़ कुघोमा युक्किन् पिरुर॥ 11 खे़न् मनाःल्ले़ चोःक्मा के़बोङ्बा कन् याःम्बक्हाॽ मे़गे़त्तुन्ने़भग्र खे़ल्ले़ याङ्धिक्काङ् मे़न्दाःक्के तगिमा कुमेःत्तिन् चोःक्युम्भो चोगुआङ् ले़रुदेसुररो॥ आगाःन्ने़ल्ले़बा थिम्हाॽ 12 “हाःत्ले़ मनान् सिर हिप्तुस्ये़रुॽ खे़न्नाङ् सिरए हिप्मा से़प्मा पोङ्ॽ॥ 13 कर कुभा मनाःल्ले़ खे़न् निनिबा चोगुबा होःप्ते़ कर निङ्वाॽफुमाङ्ङिल्ले़ हे़क्के चोःक्मा पाङ्घुबाने़भग्र, खे़न् खे़त्छिङ्मा पेःक्मारे़ लागि आङ्गाॽ लत्छा ते़न्धिक् निःन्धो चोगुङ् पिरुङ्ॽ॥ 14 कर आत्तिल्ले़ कुसिक् पोक् हे़क्क्याङ् से़प्माए निङ्वाॽ चोगुआङ् वेॽ मनान् स्ये़रुॽ, खे़ब्याङ् खुने़ॽ से़ःप्सिङ्मारे़ लागि आङ्गाॽओ ले़त्ति मे़दोन्दुबादे़न्नोए त्ये़आङ् वाॽसाङ् खे़न् ले़प्मा मे़नुॽने़न्, खे़न् से़प्माए पोङ्ॽ॥ 15 “आत्तिल्ले़ आबाङे कुम्बा इग्र कुम्मा हिप्तुॽ, खे़न् से़प्माए पोङ्ॽ॥ 16 “आत्तिल्ले़ कुभा थिक् योक् चोगुआङ् सङ्से़ इग्र युङ्से़ मे़न्दे़न्ने साक्के़ल्ले़क् तेॽरुने़भग्र खे़न् के़देॽबे़न् से़प्माए पोङ्ॽ॥ 17 “आत्तिल्ले़ आबाङे कुम्बा इग्र कुम्मा माङ्दे साङ्ग्रा मे़त्तु, खे़न् से़प्माए पोङ्ॽ॥ 18-19 “मनाहाॽ मे़घे मे़धक्किल्ले़ थिक्ले़ वेॽइन् लुङ्ङिल्ले़ ले़प्तुॽ इग्र हुक्पुत्ते़ल्ले़ हिप्तु कर खे़न् मे़स्ये़रुन् हे़क्क्याङ् ते़ःम्भुक् के़जाबा मनान् ने़त्नाओ ने़सिङ् हे़क्क्याङ् ताःन्दि पोःक्काङ् तक्कात् तक्सिङ्ल वाॽमा के़सुक्पा पोङ्ने़भग्र के़हिप्पा मनान् साम्बान् मे़धाने़न्॥ कर खे़न् ने़त्नाओ ने़सिङ्ङिल्ले़ के़लाःप्पा याङ्ङिन् पिरुर हे़क्क्याङ् खे़न् मे़न्वेःत्ते थारिक् खे़ल्ले़ सिदाॽ पाङ्दा मे़त्तुर॥ 20 “आत्तिन् मनाःल्ले़ आबाङे कुयोःग्बान् इग्र कुयोःग्मान् तक्काःत्तिल्ले़ हिप्तुल्ले़ हिप्तुबादे़न्नोए स्ये़ने़भग्र खे़न् मनान् खुम्दिङ् पिमाए पोङ्ॽ॥ 21 कर खे़न् योःग्बान् इग्र योःग्मान् थिक्यान् इग्र नियान् थारिक् मे़स्ये़ने़न् हे़क्क्याङ् खे़न् एगाङ्लक् स्ये़ने़भग्र खे़न् खुम्दिङ्ङो मे़धाने़न्॥ खे़ल्ले़ के़सिबा कुयोःग्बे़न्ने खुने़ॽ कुलागि खुम्दिङ् पोङ्ॽ॥ 22 “मनाहाॽ मे़घेःल्ले़ कुभा मे़न्छुक्मा के़वाॽमा मे़न्छुमान् काःन् हे़क्क्याङ् खे़ल्ले़ कुस्साले़म् कर मे़न्छुमान् वेॽ थेआङ् मे़लॽने़न्ने़भग्र खे़न् मे़न्छुमाःल्ले़ कुये़म्बाःल्ले़ नाःक्तुबा यारिक् खासे़न्लोःम्बाल्ले़ पाःत्तुबा साम्बाःन्निन् खे़न् के़घाःम्बा मनाःल्ले़ हुङ्मा पोङ्ॽ॥ 23 कर खे़न् मे़न्छुमान् काःन्दे़ने़भग्र सक्माःल्ले़ कुले़क्वा सक्मा, 24 मिक्किल्ले़ कुले़क्वा मिक्, हाबोॽबाल्ले़ कुले़क्वा हाबोॽबा, हुक्किल्ले़ कुले़क्वा हुक्, लाङ्ङिल्ले़ कुले़क्वा लाङ्, 25 मिगे़दिक्पा याङ्घेःक्किल्ले़ कुले़क्वा मिगे़दिक्पा याङ्घेःक्, के़गाःम्बाल्ले़ कुले़क्वा के़गाःम्बा नु याङ्घेःक्किल्ले़ कुले़क्वा याङ्घेःक्के खुम्दिङ् तुमुर पोङ्ॽ॥ 26 “कुभा मनाःल्ले़ खुने़ॽ कुयोःग्बान् इग्र कुयोःग्मान् कुमिक्को हिप्तुआङ् कुमिक्किन् फे़क्ने़भग्र खे़ल्ले़ मिक्किल्ले़ कुले़क्वा खे़न् योःग्बा इग्र योःग्मान् आम्भा ले़रुदेसुर पोङ्ॽ॥ 27 खे़ल्ले़ योःग्बा इग्र योःग्माल्ले़ कुहाबोॽबान् लुःक्खु पिरुने़भग्र हाबोॽबाल्ले़ कुले़क्वा खे़न् हाबा ले़रुदेसुररो॥ कुन्दाङ्बाहाॽरे़ चोःक्मा के़बोङ्बा लक्पे़न् 28 “आधोःङ्धोःङ्बा पित्ते़ल्ले़ कुभा ये़म्बित्छा इग्र मे़न्छुमान् कुदाङ्ङिल्ले़ थोःक्खु स्ये़रुने़भग्र, खे़न् आधोःङ्धोःङ्बा पित्ते़न् लुङ्ङिल्ले़ ले़प्ते़म् से़रे़म्मे़ॽ, हे़क्क्याङ् खे़न् मे़जे़म्मिन्ने़ॽ, कर पित्ते़ल्ले़ कुन्दाङ्बे़न् साम्बान् मे़धाने़न्॥ 29 कर से़गम्बे़ल्ले़ तगि मना थोःक्खुसि हे़क्क्याङ् खे़ल्ले़ कुन्दाङ्बे़न् खे़न् पाःन्निन् मे़मे़त्तुसाङ् से़गम्बान् मे़घेःक्खुन् मे़ये़प्सुन् खे़ब्याङ् खे़न् से़गम्बाल्ले़ कुदाङ्ङिल्ले़ थोःक्खु स्ये़रुने़भग्र लुङ्ङिल्ले़ खे़न् ले़प्ते़म् स्ये़रे़म्मे़ॽ हे़क्क्याङ् खे़ल्ले़ कुन्दाङ्बे़न्नाङ् स्ये़रे़म्मे़ॽ॥ 30 कर खे़न् कुन्दाङ्बे़ल्ले़ हिङ्मारे़ लागि साम्बान् कुःप्मनाबा याङ्ङिन् हुङुने़भग्र खे़न् नाःक्मनाबा यारिक् के़त्ल हुङुर पोङ्ॽ॥ 31 कुम्बाबा पित्ते़ल्ले़ कुभारे़ खुन्छिॽ सा ये़म्बित्छा इग्र सा मे़न्छुमा थोःक्खु स्ये़रुसिल्ले़ हाबा कन् थिम्मिन् कुइसिक् साम्बान् कुःत्ते़म्सिम्मे़ॽ॥ 32 कुम्बाबा पित्ते़ल्ले़ कुभा योःग्बा इग्र योःग्मान् स्ये़रुआङ् वाॽने़भग्र, पित्ते़ल्ले़ कुन्दाङ्बे़ल्ले़ खे़न् के़सिबाल्ले़ कुन्दाङ्बान् सुम्बोङ् युप्पा याङ्इत्छेॽ पिरुर, हे़क्क्याङ् खे़न् कुम्बाबा पित्ते़न् चाहि लुङ्ङिल्ले़ ले़प्ते़म् स्ये़रे़म्मे़ॽ॥ 33 “कुभा मनारे़ लुम्बाःत्तिल्ले़ कुदे़प्मान् हन्दुदेसु इग्र लुम्बात् तयुआङ् मे़दे़प्तुन् हे़क्क्याङ् से़गम्बा इग्र अदङ्ङिन् लुम्बाःत्तो मक्थ्ये़ लासे़ने़भग्र 34 खे़न् मनाःल्ले़ खे़न् से़गम्बा इग्र अदङ्ङिल्ले़ कुमे़न् हुङुर पोङ्ॽ॥ थक्साःल्ले़ कुन्दाङ्बान् कुमे़न् पिरुआङ् के़सिबा थक्सान् लुम्बात् के़दबाल्ले़ लारुर॥ 35 “लत्छा थक्सादाङ्बाल्ले़ कुसे़गम्बाल्ले़ वेॽइल्ले़ कुसे़गम्बान् स्ये़रुने़भग्र खे़न् ने़प्मजाङ् थक्सादाङ्बाहाॽ तङ्ने़छिआङ् खे़न् कुहिङ्वे़त् से़गम्बान् सङ्सुर हे़क्क्याङ् खोसुबा कुमे़न्निन् खुन्छिॽ फःङ्सुर॥ के़सिबा थक्सा साःन्नाङ् खुन्छिॽ लुम्मो फःङ्सुर॥ 36 कर से़गम्बान् आधोःङ्धोःङ्बा वये़ फाॽआङ् कुन्दाङ्बे़ल्ले़ निङ्वाॽ कत्तु हे़क्केसाङ् खे़ल्ले़ मे़घेःक्सुन् मे़ये़प्सुन्ने़भग्र खे़न् थक्सादाङ्बे़ल्ले़ के़सिबा थक्साःल्ले़ कुन्दाङ्बान् कुहिङ्वे़त् से़गम्बाधिक् पिरुर पोङ्ॽ हे़क्क्याङ् के़सिबा से़गम्बान् खे़ल्ले़ तेॽमा सुक्तुरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.