लाम्दिक् 20 - लिम्बुथिबोङ् इङ्जाङ्हाॽ 1 हे़क्क्याङ् कन् के़रे़क् पाःन्हाॽ निङ्वाॽफुमाङ्ङिल्ले़ पाःत्तु, 2 “आङ्गाॽ खिनिॽ यहवे दाङ्बा निङ्वाॽफुमाङ्आ, आङ्गाॽ खिनिॽ योःग्बा योःग्मा के़बोःक्खिआङ् के़युङिबा मिस्र लाजेॽलाम् खिनिॽ लःत्निङ् फे़त्निङ्॥ 3 “आङ्गाॽनुःल्ले़ वेॽ आत्तिन् माङ् साम्माङ्हाॽआङ् से़वा मे़मे़त्ते़म्सिम्मिन्ने़ॽ॥ 4 “खिनिॽ आबाङे लागि सिङ्हाॽ मे़घोःन्दे़म्मिन्ने़ॽआङ् आत्तिन् परिक्ले़न्नाङ् नावाइत्ला मे़जोगे़म्मिन्ने़ॽ, थाःङ् ताङ्साङ्बोबा इग्र इक्सादिङ् खाम्बेक् नु मु च्वाःतो के़याक्पा आत्तिन् परिक्ले़न्नाङ् नावाइत्ला मे़जोगे़म्मिन्ने़ॽ॥ 5 आत्तिन् नावाइत्लाःन्नाङ् खिनिॽ से़वा मे़मे़त्ते़म्मिन्ने़ॽ हे़क्क्याङ् खिनिॽ खे़न् माङ्से़वाआङ् मे़मे़त्ते़म्मिन्ने़ॽ थेआङ्भे़ल्ले़ आङ्गाॽ यहवे दाङ्बाआ॥ खिनिॽ वेॽ माङ्ङिन् माङ्से़वा के़मे़त्तुम्मिल्ले़ आङ्गाॽ नासि मे़धःत्तान्॥ आङ्गाॽ याप्मि के़जिःप्पाहाॽ खुन्छिॽ मुॽइदाङ्साहाॽरे़ खुन्छिॽ सुम्सिगेक्पा नु लिसिगेक्पा थाःक् थारिक् खुम्दिङ् पिरुङ्सिङ्ॽ॥ 6 कर आत्तिन्हाॽरे़ आङ्गाॽ मिःम्जि मे़मे़त्ताआ हे़क्क्याङ् आङ्गाॽ आइङ्जाङ्हाॽ मे़इःत्तु मे़नाःत्तु, खे़ङ्हाॽरे़ खुन्छिॽ हे़न्छिङ् हे़न्छिङ् थाःक्हाॽ आङ्गाॽ लुङ्माॽ तुक्तुङ्सिङ्ॽ॥ 7 “आत्तिन् ताप्फे़ःम्बा निङ्सेःक्ले़ लागिआङ् आङ्गाॽ आमिङ्ङिन् हने़ मे़बाताम्मिन्ने़ॽ, थेआङ्भे़ल्ले़ आङ्गाॽ यहवे दाङ्बा खिनिॽ निङ्वाॽफुमाङ्आ हे़क्क्याङ् आङ्गाॽ आमिङ् फे़क्के़लाःम्बाहाॽ आङ्गाॽ खुम्दिङ् पिरुङ्सिङ्ॽ॥ 8 “नाःम्सिङ्मा ये़न्निन् ने़त्ते़म्मे़ॽ हे़क्क्याङ् खे़न् ये़न्निन् सेसे कत्ते़म्मे़ॽ॥ 9 खिनिॽ याःम्बक्किन् तुक्सि ये़न् थारिक् चोगे़म्मे़ॽ, 10 कर नुसिगेक्पा ये़न्निन् चाहि यहवे दाङ्बा खिनिॽ निङ्वाॽफुमाङ्ङिल्ले़ कुलागि नाःम्सिङ्मा ये़न्लो॥ खे़ल्ले़ याःन्दिक् खिनिॽ थेआङ् याःम्बक् मे़जोगे़म्मिन्ने़ॽ, खिनिॽ सा ये़म्बित्छाःल्ले़, सा मे़न्छुमाःल्ले़, खिनिॽ योःग्बा योःग्मे़ल्ले़, खिनिॽ पित् थक्साःल्ले़, खिनिॽ लाजेॽओ के़वाॽबा वेॽ लाजेॽबा मनाःल्ले़ थेआङ् याःम्बक् चोःक्मा मे़नुॽने़न्॥ 11 थेआङ्भे़ल्ले़ तुक्सि ये़न्नो यहवे दाङ्बे़ल्ले़ ताङ्साङ्बा, इक्सादिङ् खाम्बेःक्मा, वरःङ् नु खे़प्मो के़याक्पा के़रे़क् पाःन्हाॽ चोगु, कर नुसिगेक्पा ये़न्नो खुने़ॽ नाःम्सिङ्॥ खे़ल्ले़चोगुल्ले़ यहवे दाङ्बे़ल्ले़ नाःम्सिङ्मा ये़न्निन् हाङ्वागे़न् मुॽइसाम् पिरु, हे़क्क्याङ् खे़न् सेसे चोगु॥ 12 “खिनिॽ पानुदिङ् पा नु मानुदिङ् माहाॽ मिङ्सोइङ्धाःङ् पिरे़म्सिम्मे़ॽ, यहवे दाङ्बा खिनिॽ निङ्वाॽफुमाङ्ङिल्ले़ के़बिरिबा लाजेॽओ खिनिॽ इरिक् के़हिङिर॥ 13 “मना मे़से़रे़म्मे़न्ने़ॽ॥ 14 “खिनिॽ याम्बोःप्मा याःम्बक् मे़जोगे़म्मिन्ने़ॽ॥ 15 “खिनिॽ मे़घुःत्ते़म्मिन्ने़ॽ॥ 16 “खिनिॽ हिम्बेसाङ्बे़न् मे़न्वाॽमनाबा आप्तिक् मे़गुते़म्मिन्ने़ॽ॥ 17 “खिनिॽ हिम्बेसाङ्बे़ल्ले़ कुहिम्मिन् खिम्यक् मे़जोगे़म्मिन्ने़ॽ॥ खिनिॽ हिम्बेसाङ्बे़ल्ले़ कुमेःत्तिन् मिक् मे़गेःत्ते़म्मिन्ने़ॽ, खिनिॽ हिम्बेसाङ्बे़ल्ले़ कुयोःग्बा, कुयोःग्मा, कुबित्, कुअदङ् इग्र खे़ल्ले़ कुधे़मा पाःन्निन्नाङ् मिक् मे़गेःत्ते़म्मिन्ने़ॽ॥” मनाहाॽ यङ्मा मे़सिःॽ ( साम्यो इङ् ५:२२-३३ ) 18 आल्ल के़रे़क् मनाहाॽरे़ ताङ्साङ्बो खे़रे़ङ्घुरुङ् के़लॽबा नु थुत्थुरिःप्पा लाइक्ते़बा इक्लान् मे़घे़प्सु हे़क्क्याङ् साःम्भे ले़क्ते़बा नु थे़गुओलाम् के़लःम्बा मिःक्खुन् मे़निसु, खे़ब्याङ् खे़ङ्हाॽ किमे़ल्ले़ मे़यक्खे़ हे़क्क्याङ् लाःत्लाःत् मे़ये़म्सिङ्॥ 19 खे़ङ्हाॽरे़ मोसान् मे़मे़त्तु, “खे़ने़ॽ आनिगे़नु के़बाःत्ने़भग्र आनिगे खे़ने़ॽ के़बाःन्निन् खे़प्सुम्बे़, कर निङ्वाॽफुमाङ्ङिन् आनिगे़नु पाःत्ने़भग्र आनिगे स्ये़ॽइगे़ फाॽआङ् किसिगे़॥” 20 मोसाःल्ले़ मनाहाॽ मे़त्तुसि, “मे़गिसे़म्मिन्ने़ॽ, निङ्वाॽफुमाङ्ङिन् खिनिॽ निङ्वाॽ साॽसे़ ये़आङ् वाॽ थेआङ्भे़ल्ले़ खिनिॽ लायो मे़जोगे़म्मिन्ने़ॽ फाॽआङ् खुने़ॽ किप्मारे़ लागि खिनिॽ हुॽसे़ ये़आङ् वाॽ॥” 21 कर मनाहाॽ माःङ्घाए मे़ये़म्सिङ्ङाङ् मे़ये़बे़ हे़क्क्याङ् मोसाःल्लक् माक्सिदिःङ्ग्याःप्पा खाॽमिःत्तिल्ले़ कुबेसाङ् पे, खे़प्मो निङ्वाॽफुमाङ्ङिन् वये़रो॥ ले़त्ति तोःम्मा थिम्हाॽ 22 खे़ब्याङ् यहवे दाङ्बे़ल्ले़ मोसान् मे़त्तु, “खे़ने़ॽ इस्राइलिहाॽ अक्तङ्बा इङ्जाङ् पिरे़से़ॽ, ‘आङ्गाॽ यहवे दाङ्बान् आक्खेलॽरिक् साङ्ग्राम्पेदाङ्लाम् खिनिॽनु पाराङ् खे़न् खिनिॽ के़निसुम्माङ् के़वयिॽ॥ 23 आङ्गाॽनु सोसोरिक् खिनिॽ वेॽ माङ्हाॽ मे़जोगे़म्सिम्मिन्ने़ॽ॥ युप्पा माङ्हाॽ, साम्म्याङ् माङ्हाॽ आबाङे लागि मे़जोगे़म्सिम्मिन्ने़ॽ॥ 24 “‘आङ्गाॽ आलागि लत्छा खाम्ले़न् ले़त्ति तोःम्माधिक् चोगे़म्मे़ॽ हे़क्क्याङ् खे़प्मो खिनिॽ मे़ल्लुक् नु से़गम्बाहाॽ सिदुङ्जभा चोगे़म्सिम्मे़ॽआङ् मिधिङ्मनादेमनाबा वयागे़न् सिदुङ्जभा नु नादङ् चोःक्मा वयागे़न् सिदुङ्जभाहाॽ तोःन्दे़म्मे़ॽ खे़ब्याङ् खे़न् थक्साहाॽ मिःल्ले़ खाप्पुथ्यःङ् मिधिक्खे़म् तेसे़म्सिम्मे़ॽ॥ आङ्गाॽ एःक् से़न्दुङ्बा आसे़वा मे़प्मा के़रे़क् ते़न्हाॽओ आङ्गाॽ खिनिॽओ ताआ हे़क्क्याङ् आङ्गाॽ खिनिॽ हाङ्वागे़न् मुॽइसाम् पिनिङ्ॽ॥ 25 खिनिॽ आङ्गाॽ आलागि लुङ्ङिल्ले़न् ले़त्ति तोःम्मादे़न् के़जोगुम्ने़भग्र खे़न् लक्मनाबा खक्मनाबा लुङ्हाॽ मे़जोगे़म्मिन्ने़ॽ॥ थेआङ्भे़ल्ले़ खे़प्मो खिनिॽ सामाहाॽ ओगप् के़जोगुम्मिल्ले़ खे़न् आसुत्थो के़जोगुम्ॽ॥ 26 हे़क्क्याङ् मनाहाॽरे़ आङ्गाॽओ ले़त्ति मे़दोन्दुबादे़न्नो नाहाङ्सेक् मे़भत्छे़म्मिन्ने़ॽ हे़क्क्याङ् मे़लिङे़म्मिन्ने़ॽ॥ हे़क्के के़जोगुम्मिल्ले़ खिनिॽ ले़क्चाॽबे़धिक्किन् निधाःप्लो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.