लाम्दिक् 2 - लिम्बुमोसाःल्ले़ कुसावाःन्छिङ्मा 1 हाबा खे़न् ये़म्मो लत्छा ले़बि थाःक्कोबा मनाधिक्ले़ खुने़ॽ आबाङे ले़बि कुधाःक्कोबा मे़न्छुमाधिक् ते़न्धाम् मेःक्खिम् मे़त्तु॥ 2 हे़क्क्याङ् खे़न् मे़न्छुक्मा पोःक्खे़आङ् खे़न् मे़न्छुमाःल्ले़ लत्छा ये़म्बित्छा साधिक् कत्तु॥ अङे़ःक्वान् साॽरिक् लरिक्लिक्पा चोगे़बा निसुआङ् खुने़ॽ ला सुम्सि थारिक् चिक्खु कत्तु॥ 3 अङे़ःक्वान् आल्लसाङ् इरिक् चिङ्मा कप्मा मे़सुक्तुन्नाङ् साराःल्ले़ फमनाबा पक्वाधिक् याङ्सिङ् हे़क्क्याङ् खिप्नाःक् खिप्नाःक् के़लॽबा नु अलकात्त्राःल्ले़ ले़ङुआङ् च्वाःत् मे़ल्लाःप्मनाबा चोगु॥ अङे़ःक्वान् पक्वाओ याक्तुआङ् निल वहःङ्ङिल्ले़ कुयाओ केःम्ब केःम्बा सारा के़युङ्बादे़न्निल्ले़ कुलुम्मो ने़स्सुध॥ 4 अङे़ःक्वाःल्ले़ कुन्ने़ॽइन् मिसाक् माःङ्घा ये़म्सिङ् हे़क्क्याङ् थे़मा लॽइ फाॽआङ् हाबा ओमे़त्तुआङ् ये़बे़॥ 5 आम्भा कन् ये़म्मो हाङ्ङिल्ले़ कुस्सान् निल वहःङ्ङो वारुम्सिङ्से़ ये़॥ खुने़ॽ कुसे़वारोमाहाॽ वहःङ्ङिल्ले़ कुयाओ लाङ्मे़घेगे़आङ् मे़वये़॥ हक्चघत् हाङ्सामाल्ले़ साराःल्ले़ कुलुम्मोबा पक्वान् निसुआङ् लत्छा से़वारोमाधिक् खे़न् कुलासे़ पाङ्घु॥ 6 हाङ्सामाल्ले़ पक्वान् हन्दुल्ले़ अङे़ःक्वान् निसु॥ अङे़ःक्वान् हाबे़र यागे़ हे़क्क्याङ् हाङ्सामाल्ले़ खे़न् अङे़ःक्वान् कुलुङ्माॽ तुगे़॥ खुने़ॽ पाःत्तु, “कङ्ग लत्छा हिब्रु अङे़ःक्वारो॥” 7 खे़ब्याङ् खे़न् अङे़ःक्वाःल्ले़ कुन्ने़ॽरे़ फारोल्ले़ कुस्सा मे़न्छुमान् मे़त्तु, “थे आङ्गाॽ पेःक्काआङ् हिब्रु मे़न्छुमाहाॽओ अङे़ःक्वान् नुधुक्मारे़ लागि कुभा मे़न्छुमाधिक् खे़ने़ॽ के़लागि उःत्तुङ् पिने़बि?” 8 खे़ब्याङ् फारोल्ले़ कुस्सा मे़न्छुमाःल्ले़ खे़न् मे़त्तु, “पोङ्ॽ, पेगे़ॽ॥” हे़क्क्याङ् खे़न् चुक्मे़न् पेआङ् अङे़ःक्वाःल्ले़ कुम्माःन्ने उःत्तु तारु॥ 9 हे़क्क्याङ् फारोल्ले़ कुस्साःल्ले़ खे़न् मे़त्तु, “कन् अङे़ःक्वान् तेरे़ॽआङ् आङ्गाॽ आलागि नुधुक्ते़ॽ हे़क्क्याङ् हिङ्सेॽ कुम्से़ॽ, हे़क्क्याङ् आङ्गाॽ खे़ने़ॽ के़नाम्याक् पिने़॥” खे़ल्ले़चोगुल्ले़ खे़न् मे़न्छुमाःल्ले़ अङे़ःक्वान् तेॽरु, हे़क्क्याङ् खे़न् नुधुक्तु॥ 10 याङ्सि अङे़ःक्वान् यम्बा पोःक्खे़आङ् खे़ल्ले़ फारोल्ले़ कुस्साओ तारु, हे़क्क्याङ् खे़न् खुने़ॽ कुस्सा चोगु॥ खे़ल्ले़ खुने़ॽ मोसा मिङ् वाःत्तु, थेआङ्भे़ल्ले़ खे़ल्ले़ पाःत्तु, “आङ्गाॽ कन् च्वाःत्तोलाम् लःत्तुङ्बारो॥” मोसान् मिद्यान लाजेॽ खे़त्छिङ्ङाङ् पेक् 11 आल्ल मोसान् यम्बा पोःक्खे़ खे़ब्याङ् खे़न् खुने़ॽ कुम्भुॽ कुन्साॽहाॽरो पे, हे़क्केःल्ले़ खे़ङ्हाॽ साॽरिक् साक्ते़र याःम्बक् चोःक्मा मे़बाङ्घुसिबा निसु॥ खुने़ॽ आबाङे कुम्भुॽ कुन्साॽहाॽओ लत्छा हिब्रुधिक् मिस्रिधिक्ले़ हिप्तुर यागे़बा निसु॥ 12 मोसान् के़रे़क् पिसाङ् कब्रिङ् ओमये़, खुने़ॽ हाःत्ले़आङ् निसुबा होःप्ते़॥ खे़न् मिस्रिःन् स्ये़रुआङ् खे़ल्ले़ कुजेन् ये़ःङ्घाओ लुप्तु॥ 13 कुदाःन्दिक्मा खुने़ॽ पेःल्ले़ हिब्रु ने़त्छि आबाङे हिप्ने़त्छिर यागे़सिबा खुने़ॽ निसुसि॥ खे़ल्ले़ कुॽइगे़भे़म्बे़न् मे़त्तु, “खे़ने़ॽ आप्फेक् के़मना हिब्रुन् थेआङ् के़हिप्तुबा?” 14 खे़न् मे़नाःल्ले़ मे़त्तु, “हाःत्ले़ खे़ने़ॽ आनिगे हाङ्युक्पा नु खासे़न्लोःम्बा के़जोगे़? खे़न् मिस्रिःन् हे़क्के आङ्गाॽआङ् के़से़त्ताबाबि?” मोसान् किसे़आङ् निङ्वाॽ इःत्छिङ्, “आङ्गाॽ चोगुङ्बान् मनाहाॽरे़ निङ्वाॽ मे़घोसुरे़त्छ॥” 15 कन् पाःन्निन् फारोल्ले़आङ् निङ्वाॽ खोसु हे़क्क्याङ् खुने़ॽ मोसान् से़प्मा निङ्वाॽ चोगु॥ खे़ब्याङ् मोसान् फारोःन्लाम् खे़त्छिङ् पेआङ् मिद्यान लाजेॽओ युङ्मा हेःक्ते़॥ थिक्यान् मोसान् लत्छा वगे़ङ् थिक्ले़ कुयाओ युङ्सिङ्ङाङ् युङे़॥ 16 मिद्यानबा निङ्वाॽफुसाम्बा यित्रोःल्ले़ नुसि कुस्सा मे़न्छुमाहाॽ खे़प्मो च्वाःत् फाःत्छे़ मे़द्ये़, हे़क्क्याङ् खुन्छिॽ पाःल्ले़ कुमे़ल्लुक् कुमे़ःन्दाहाॽ च्वाःत् थुङ्मासिरे़ लागि वाघोःङ्हाॽ च्वाःत्तिल्ले़ थिम्मा मे़हेःक्तु॥ 17 कर कुभा मे़ल्लुक्कम्बाहाॽरे़ यित्रोःल्ले़ कुस्सा मे़न्छुमाहाॽ मे़नाःत्तुमे़देसुसि॥ खे़ब्याङ् मोसाःल्ले़ खे़न् मे़न्छ्या चुक्माहाॽ नाङुसि हे़क्क्याङ् खे़ङ्हाॽरे़ खुन्छिॽ मे़ल्लुक् मे़ःन्दाहाॽ च्वाःत् थुङ्घुसि॥ 18 खे़ङ्हाॽ हिम्मो मे़नुःक्खे़ मे़द्ये़ःल्ले़ खुनिॽ पाःल्ले़ सेःन्दोसुसि, “आइन् खिनिॽ कम्भ्यारिक् हारा आक्खेआङ् के़द्ये़ॽइ?” 19 खे़न् मे़न्छ्या चुक्माहाॽरे़ मे़बाःत्तु, “लत्छा मिस्रबा मनाधिक्ले़ मे़ल्लुक्कम्बाहाॽलाम् आनिगे से़ःप्तिगे़॥ खे़न्नुःल्ले़ वेॽ खे़ल्ले़ आनिगे लागि च्वाःत् फाःत्तुआङ् मे़ल्लुक् मे़ःन्दाहाॽआङ् च्वाःत् थुङ्घुसि॥” 20 खुन्छिॽ पाःल्ले़ खे़ङ्हाॽ सेःन्दोसुसि, “खुने़ॽ आत्ति वाॽ? खिनिॽ थेआङ् खे़न् मनान् खे़प्मोए के़ले़रुम्माङ् खिनिॽरक् के़द्ये़ॽइबा? पेगे़म्मे़ॽ, खुने़ॽ आनिॽनु कुजा चासे़ उःत्ताम् तारे़म्मे़ॽ॥” 21 खे़ब्याङ् मोसान् खे़न् मनाहाॽनु युङ्मारे़ लागि ते़न्दे़॥ यित्रोःल्ले़ खुने़ॽ कुस्सा सिपोराःन् मोसाःन्नु ते़न्धाम् मेःक्खिम् मे़त्तु॥ 22 सिप्पोराःल्ले़ ये़म्बित्छा साधिक् कत्तु, हे़क्क्याङ् मोसाःल्ले़ खे़न् गेर्सोम मिङ् वाःत्तु, थेआङ्भे़ल्ले़ खुने़ॽ पाःत्तु, “आङ्गाॽ वेॽ लाजेॽओ वे़प्मिबा पोःक्खाङ्ङाङ् युङ्ङा॥” 23 यरिक् तङ्बे याङ्सि मिस्रबा हाङ्ङिन् स्ये़ कर इस्राइलिहाॽ योक् याःम्बक्को मे़युःत्तुसिआङ् आल्लसाङ् खुन्छिॽ सक्मा पुॽरे़आङ् मे़यागे़ हे़क्क्याङ् कुभाॽरे़ लागि पेलि फाक्मा मे़हेःक्ते़॥ खे़ङ्हाॽरे़ खुन्छिॽ पेलिन् निङ्वाॽफुमाङ्ङो के़रे़॥ 24 निङ्वाॽफुमाङ्ङिल्ले़ खे़ङ्हाॽ मे़यारे़बान् खे़प्सु हे़क्क्याङ् खुने़ॽ अब्राहाम, इसहाक हे़क्क्याङ् याकुबे़न्नु चोगुबा माङ्हुप्पिन् निङ्वाॽ इःत्तु॥ 25 कल्ले़चोगुल्ले़ निङ्वाॽफुमाङ्ङिल्ले़ इस्राइलिहाॽ ओमे़त्तुसि खे़ब्याङ् खे़ङ्हाॽरे़ खुन्छिॽ लागि निङ्वाॽ इःत्तुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.