लाम्दिक् 19 - लिम्बुइस्राइलिहाॽ सिनै कोःक्माओ मे़गे़त् 1 इस्राइलिहाॽ मिस्रलाम् मे़लःन्दे़बा ला सुम्सिओबा थिक्सिगेक्पा ये़न्नो खे़ङ्हाॽ सिनै कोःक्माओबा मुरे़क् खारे़क् थेआङ् के़होप्पादे़न्नो खे़ङ्हाॽ मे़गे़रे़ मे़भे़रे़॥ 2 आल्ल खे़ङ्हाॽ रपिदिमलाम् लाङ्मे़घेगे़आङ् सिनैबा मुरे़क् खारे़क् थेआङ् के़होप्पादे़न्नो मे़गे़रे़, हे़क्क्याङ् हाबा खे़न् कोःक्माल्ले़ कुबेसाङ् इस्राइलिहाॽरे़ साःङ्गाहिम् मे़जोगु॥ 3 खे़ब्याङ् निङ्वाॽफुमाङ्ङिन्नु तुम्मारे़ लागि मोसाःल्ले़ थे़गुन् थाःङ् लिङुदेॽरु॥ हे़क्क्याङ् यहवे दाङ्बे़ल्ले़ मोसान् थे़गुओ उःत्तुआङ् मे़त्तु, “याकुबरे़ कुमुॽइदाङ्सा इस्राइलिहाॽ अक्खे मे़प्मासि पाङ्घु— 4 ‘आङ्गाॽ यहवे दाङ्बे़ल्ले़ मिस्रिहाॽ आक्खे मे़त्तुङ्सिङ्, आक्खेलॽरिक् आङ्गाॽ खिनिॽ कक्कफिःक्माल्ले़ कुस्साहाॽ कुलाप्पो पक्खुसिबा हे़क्के खिनिॽ पङ्निङ् हे़क्क्याङ् कप्मो आङ्गाॽओ ताःत्निङ्, खे़न् खिनिॽ के़निसुम्माङ् के़वयिॽ॥ 5 आल्ल आङ्गाॽ आबाःन्निन् खिनिॽ से़क्खाए के़घे़प्सुम्ॽ हे़क्क्याङ् आङ्गाॽ चोगुङ्बा माङ्हुप्पिन् के़इःत्तुम् के़नाःत्तुम्ने़भग्र, के़रे़क् मे़न्छाम् सुवाङ्हाॽओ खिनिॽग आङ्गाॽ इमे़ल्लुङ्बा आयाङ्सा कुन्धे के़बोःक्खिॽ॥ काक् इक्सादिङ् खाम्बेःक्मान् आङ्गाॽइन्छाङ् 6 खिनिॽ आङ्गाॽ आलागि निङ्वाॽफुसाम्बा हाङ्जुम् नु सेसे सुवाङ् के़बोःक्खिॽ॥’ इस्राइलिहाॽ खे़ने़ॽ मे़प्मासि के़बोङ्बा पाःन्निन् हाबा कन्लो॥” 7 मोसान् कोःक्माओनु यो थासिङ् ये़ हे़क्क्याङ् इस्राइलि लाम्लोबाहाॽ फुक्खुसिआङ् यहवे दाङ्बे़ल्ले़ खुने़ॽ इङ्जाङ् पिरुबा के़रे़क् पाःन्हाॽ खे़ङ्हाॽ चे़क्तुसि॥ 8 के़रे़क् मनाहाॽरे़ थिक्ले़ङ्ले़ अक्खे मे़बाःत्तु, “यहवे दाङ्बे़ल्ले़ पाःत्तुबा के़रे़क् पाःन्हाॽ आनिगे इःत्तुम् नाःत्तुम्बे़रो॥” खे़ब्याङ् मनाहाॽरे़ मे़बाःत्तुबा नोगप्पिन् मोसाःल्ले़ यहवे दाङ्बे़न् मे़त्तु॥ 9 यहवे दाङ्बे़ल्ले़ मोसान् मे़त्तु, “आङ्गाॽ माक्सिःङ्ग्याःप्पा खाॽमिःत्तोलाम् खे़ने़ॽओ युआ हे़क्क्याङ् मनाहाॽरे़ आङ्गाॽ खे़ने़ॽनु पाःत्ताबान् मे़घे़प्सुॽ खे़ब्याङ् आल्लआङ्धो खे़ने़ॽ नसान् के़म्जोक्॥” मनाहाॽरे़ आक्तङ्बा नोगप् मे़बाःत्तुआङ् मे़वये़, खे़न् पाःन्निन् मोसाःल्ले़ यहवे दाङ्बे़न् मे़त्तु॥ 10 यहवे दाङ्बे़ल्ले़ मोसान् मे़त्तु, “आङ्गाॽ माङ्से़वा मे़प्मारे़ लागि आइन् नु ताःन्दिक् मनाहाॽ आबाङे सुत्थो मे़जोक्सिङ्लो फाॽआङ् खे़ङ्हाॽ मे़त्ते़से़ॽ॥ खे़ङ्हाॽरे़ खुन्छिॽ तेःप्फुङ्हाॽ आबाङे मे़हप्तुर, 11 हे़क्क्याङ् सुम्सिगेक्पा ये़न्निल्ले़ लागि खे़ङ्हाॽ यारिप् मे़बोङ्ल, थेआङ्भे़ल्ले़ सुम्सिगेक्पा ये़न्नो कोःक्माओ के़रे़क् मनाहाॽरे़ मिक्किल्ले़ निसुरए यहवे दाङ्बान् युरो॥ 12 कोःक्माओ के़रे़क् पिसाङ् मनाहाॽ मे़म्बेःक्ने़न्ल फाॽआङ् लत्छा इःन्दोधिक् ने़स्से़ पिरे़से़ॽ, ‘मनाहाॽ कोःक्माओ थाःङ् मे़बेगे़म्मिन्ने़ॽ, खे़ल्ले़ कुयाओआङ् मे़बेगे़म्मिन्ने़ॽ फाॽआङ् इङ्जाङ् पिरे़से़ॽ॥ आत्तिल्ले़ कोःक्मान् सुसु खे़न् सिरो॥ 13 खे़न् हाःत्ले़आङ् मे़न्छुए लुङ्ङिल्ले़ ले़प्ते़म्मे़ॽ इग्र तोःङ्ङिल्ले़ आबाम्मे़ॽ॥ थक्सा इग्र मनासाङ् खे़न् कुहिङ्वे़त् पोङ्मा मे़सुक्ने़न्॥’ सादाङ्ङिन् केःम्बा लाइःक्किल्ले़ मनाहाॽ कोःक्माओ थाःङ् मे़धाङ्ल॥” 14 खे़ब्याङ् मोसान् कोःक्माओनु यो थासिङ् ये़ हे़क्क्याङ् निङ्वाॽफुमाङ्ङिन् माङ्से़वा मे़प्मारे़ लागि मनाहाॽ यारिप् पोःक्खे़म्मे़ॽ फाॽआङ् इङ्जाङ् पिरुसि॥ खे़ङ्हाॽरे़ खुन्छिॽ चाङ्हाॽ वामे़हप्तु॥ 15 खे़न् एगाङ् मोसाःल्ले़ खे़ङ्हाॽ मे़त्तुसि, “आत्छिन्दाःन् थारिक् खे़निॽ यारिप् युङे़म्मे़ॽ हे़क्क्याङ् खे़न्नुःल्ले़ तगि मे़न्छुमाहाॽनु मे़इप्से़म्मिन्ने़ॽ॥” 16 सुम्यान् के़रे़ल्ले़ याःन्दिक् तानाम् साःम्भे ले़क्ते़ हे़क्क्याङ् ताङ्साङ्बे़न् खे़रे़ङ्घुरुङ् लॽरे़, माक्सिःङ्ग्याःप्पा खाॽमिःप्पान् कोःक्माओ थाःङ् फन्छिङ् खे़ब्याङ् थुत्थुरिःप्पान् यम्बा लाइक्ते़बा खे़म्दे़त्ते़॥ साःङ्गाहिम्मोबा के़रे़क् मनाहाॽ किमाल्ले़ थे़गक्कक् मे़यक्खे़॥ 17 मोसाःल्ले़ खे़ङ्हाॽ निङ्वाॽफुमाङ्ङिन्नु तुम्से़ लाःक्कात् लःत्तुसि हे़क्क्याङ् खे़ङ्हाॽ कोःक्मा फाङ्जङ्ङिल्ले़ कुबुङ्ङो मे़ये़म्सिङ्॥ 18 सिनै कोःक्मान् के़रे़क् मिःक्खोॽइल्ले़ थिम्सुआङ् पत्छे़ थेआङ्भे़ल्ले़ यहवे दाङ्बे़न् मिःल्ले़ कुसम्धाङ् खे़प्मो थासिङ् ये़आङ् वये़॥ मिःक्खुन् मिधुङ् मिराःक्कोबा मिःक्खुॽ कुइसिक् लःन्दे़आङ् पत्छे़॥ हे़क्क्याङ् के़रे़क् कोःक्मा फाङ्जङ्ङिन् थुरुप्लुप्ना यक्खे़॥ 19 हे़क्क्याङ् थुत्थुरिःप्पान् आल्लसाङ् चाॽरिक् लाइःक्मा हेःक्ते़॥ मोसान् पारे़ खे़ब्याङ् निङ्वाॽफुमाङ्ङिल्ले़ खे़रे़ङ्घुरुङ् के़ले़क्पा इक्लाओ खुने़ॽ पाःन्छाःत्तु॥ 20 हे़क्क्याङ् यहवे दाङ्बान् सिनै कोःक्माल्ले़ कुसम्धाङ् थासिङ् ये़, खे़म्ब्याङ् यहवे दाङ्बे़ल्ले़ मोसान् कोःक्माल्ले़ कुसम्धाङ् थो उःत्तु, हे़क्क्याङ् मोसान् थोःक्सिङ् पे॥ 21 हे़क्क्याङ् यहवे दाङ्बे़ल्ले़ मोसान् मे़त्तु, “खे़ङ्हाॽरे़ इःन्दोन् मे़गाःक्तुआङ् मे़म्बेःक्ने़ल्ल हे़क्क्याङ् ओमे़म्मे़त्तान्ल फाॽआङ् खे़ने़ॽ यो थासिङ् पेगे़ॽआङ् खे़ङ्हाॽ मे़त्ते़से़ॽ॥ मेःन्ने़भग्र खे़ङ्हाॽ यरिक्तङ्बा मे़सिरो॥ 22 आङ्गाॽ आबेसाङ् के़दाबा निङ्वाॽफुसाम्बाहाॽआङ् आबाङे सुत्थो मे़जोक्सिङ्ल, मेःन्ने़भग्र आङ्गाॽ खे़ङ्हाॽ खिमो मे़क्खुङ्सिङ्ॽ॥” 23 मोसाःल्ले़ यहवे दाङ्बान् मे़त्तु, “मनाहाॽ सिनै कोःक्माओ थाःङ् थोःक्सिङ्मा थाङ्मा मे़न्छुक्ने़न्, थेआङ्भे़ल्ले़ आदाङ्बारे़ आङ्गाॽ ‘कोःक्मान् कब्रिङ् कुधेःक्मा फत्छे़ॽआङ् सेसेबा चोक् लॽरिक् लाःत्लाःत् चोगे़ॽ’ फाॽआङ् इङ्जाङ् के़बिराङ्ङाङ् वये़॥” 24 हे़क्क्याङ् यहवे दाङ्बे़ल्ले़ खुने़ॽ मे़त्तु, “पेगे़ॽ, खे़ने़ॽ आबाङे यो पेगे़ॽ, हे़क्क्याङ् हारुने़न्नु सोरिक् थाःङ् थोःक्सिङ् थाङे़ॽ॥ कर मनाहाॽ नु निङ्वाॽफुसाम्बाहाॽग आङ्गाॽओ इःन्दोन् मे़गाःक्तुआङ् मे़न्धाङ्ने़न्ल, मेःन्ने़भग्र आङ्गाॽ खे़ङ्हाॽ खिमो मे़क्खुङ्सिङ्ॽ॥” 25 खे़ब्याङ् मोसान् यो मनाहाॽरो थासिङ् ये़ हे़क्क्याङ् यहवे दाङ्बे़ल्ले़ पाःत्तुबा पाःन्निन् खे़ङ्हाॽ चे़क्तुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.