लाम्दिक् 16 - लिम्बुमन्न नु मुःत्लुङ्गेॽ 1 इस्राइलिहाॽरे़ खुन्छिॽ के़रे़क् सुवाङ्हाॽ एलिमलाम् लाङ्मे़घेगे़॥ खे़ङ्हाॽरे़ मिस्र लाजेन् मे़ले़रुआङ् एगाङ् निसिगेक्पा ला थिबोङ्ङाङ् ङासिगेक्पा ये़न् के़रे़ल्ले़ याःन्दिक् खे़ङ्हाॽ मुरे़क् खारे़क् थेआङ् के़होःप्पादे़न् सिन मे़गे़रे़ मे़भे़रे़॥ सिन मे़प्मनाबा ते़न्निन् एलिम नु सिनैःल्ले़ कुलुम्मो ने़ःॽ॥ 2 खे़ब्याङ् मुरे़क् खारे़क् थेआङ् के़होप्पादे़न्नो के़रे़क् सङ्जुम्भोहाॽ मने़मे़धिक्ते़आङ् मोसान् नु हारुने़न् पान् मे़मे़त्तुसि॥ 3 हे़क्क्याङ् इस्राइलिहाॽरे़ खे़ङ्हाॽ मे़मे़त्तुसि, “मिस्रबा सा थोःक्मा खप्प्याहाॽ कब्रिङ् युङिगे़आङ् आनिगे कुजा नु सा चाम्बे़बा वये़मे़न्॥ हाबा खे़न् ये़म्मो यहवे दाङ्बे़ल्ले़ कुहुक्कोलाम् स्ये़ॽइगे़ल्ले़ नुबा पोःक्खे़मे़न्॥ कर आनिगे कन् के़रे़क् सङ्जुम्भोहाॽ साक्के़ल्ले़ सिमारे़ लागि कन् मुरे़क् खारे़क् थेआङ् के़होप्पादे़न्नो याप्मि के़भे़त्तिआङ् के़वयि॥” 4 यहवे दाङ्बे़ल्ले़ मोसान् मे़त्तु, “आल्ल आङ्गाॽ खिनिॽ के़रे़क्ले़ लागि ताङ्साङ्बोलाम् चामा कुजा थासुङ् पिनिङ्ॽ॥ मनाहाॽ थिक्याःन्धक् मे़बेःक्काङ् खे़न् ये़न्निल्ले़ खुन्छिॽ लागि के़योबा कुजा मे़भुक्खुर पोङ्ॽ॥ अक्खेलॽरिक् खे़ङ्हाॽरे़ आङ्गाॽ पाःत्तुङ्बा पाःन्निन् मे़घे़प्सुबि मेःम्बि खे़न् ओमे़त्तुङ् साॽरुङ्ॽ॥ 5 तुक्सिगेक्पा ये़न्नो खे़ङ्हाॽरे़ आक्ख्यारिक् मे़भुक्खु खे़न् खे़ङ्हाॽरे़ यारिप् मे़जोगु मे़युक्खुर, हे़क्क्याङ् खे़न् वेॽ ये़न्नुःल्ले़ निले़ङ् यारिक् यरिक् पोङ्ङाङ् युङ्ल॥” 6 कल्ले़चोगुल्ले़ मोसा नु हारुने़ल्ले़ के़रे़क् इस्राइलिहाॽ मे़त्ते़सुसि, “यहवे दाङ्बे़ल्ले़ए मिस्रलाम्बा खिनिॽ के़लःत्ति के़भे़त्तिबा फाॽआङ् आक्खो युःन्छिक् निङ्वाॽ के़घोसुम्ॽ॥ 7 यहवे दाङ्बे़न् आनिॽ लुम्मो ये़बा फाॽआङ् कुसिङ् निःप्मारे़ लागि ताःन्दिक् तानाम् यहवे दाङ्बे़ल्ले़ यम्बा कुमुक्साम्मिन् खिनिॽ के़निसुम्ॽ॥ खुने़ॽ कुदक्ले़ङ्वाओ मने़गे़धिक्तिबान् खुने़ॽ खे़प्सुआङ् वाॽ॥ आन्छिगे हाःत्छिगे़आङ् खिनिॽ आन्छिगे तक्ले़ङ्वाओ मने़गे़धिक्तिबाबे॥” 8 खे़न् एगाङ् याम्मो मोसाःल्ले़ पाःत्तु, “यहवे दाङ्बे़ल्ले़ए खिनिॽ युःन्छिक् सा नु तानाम् खिनिॽ चाहा के़जोगिबा यारिक् खरे़ःङ् के़बिरिॽ थेआङ्भे़ल्ले़ खिनिॽ खुने़ॽ कुदक्ले़ङ्वाओ साॽरिक् मने़गे़धिक्ति, खे़न् खुने़ॽ खे़प्सुआङ् वाॽ॥ आन्छिगे तक्ले़ङ्वाओ खिनिॽ मने़गे़धिक्तिल्ले़ से़क्खाःल्ले़ खिनिॽ यहवे दाङ्बे़ल्ले़ कुदक्ले़ङ्वाओ मने़गे़धिक्तिबा पोङ्ॽ॥” 9 खे़ब्याङ् मोसाःल्ले़ हारुने़न् मे़त्तु, “इस्राइलिहाॽरे़ खुन्छिॽ के़रे़क् सङ्जुम्भोहाॽ मे़त्ते़से़ॽ, ‘यहवे दाङ्बे़ल्ले़ कुबेसाङ् त्ये़म्मे़ॽ, थेआङ्भे़ल्ले़ खिनिॽ मने़गे़धिक्तिबान् खुने़ॽ खे़प्सुआङ् वाॽ॥’” 10 हारुने़न् के़रे़क् सङ्जुम्भोहाॽनु पारे़र पत्छे़ल्ले़ खे़ङ्हाॽरे़ खुन्छिॽ नारान् मुरे़क् खारे़क् थेआङ् के़होःप्पादे़न् ले़प्माङ् मे़हिसु हे़क्क्याङ् हक्चघत् यहवे दाङ्बे़ल्ले़ से़दिङ्दिङ् के़ओःप्पा कुमिमिदिङ्ङिन् खाॽमिःत्तो निधाबे़॥ 11 यहवे दाङ्बाल्ले़ मोसान् मे़त्तु, 12 “आङ्गाॽ इस्राइलिहाॽ मने़मे़धिक्ते़बान् खे़प्सुङ्, खे़ङ्हाॽ मे़त्ते़से़ॽ, ‘युःन्छिक् चामारे़ लागि सा के़जाम्ॽ, हे़क्क्याङ् तानाम् खरे़ःङ्ङिल्ले़ के़घासिॽ॥ खे़ब्याङ् आङ्गाॽए यहवे दाङ्बा खिनिॽ निङ्वाॽफुमाङ्आ फाॽआङ् कुसिङ् के़निःत्तुम्ॽ॥’” 13 खे़ब्याङ् युःन्धो मुःत्लुङ्गेॽ पुहाॽ हुरुरु मे़द्ये़आङ् साःङ्गाहिम्हाॽ सधे़क् मे़धिम्सु, हे़क्क्याङ् तानाम् साःङ्गाहिम्हाॽ के़रे़क् पिसाङ् हिःक्वा थासुआङ् ने़स्से़॥ 14 सेःक्वान् हेरे़आङ् एगाङ् खे़प्मो चुजुक्सा कुगाक्मा हे़क्तङ्बा कुजा ने़स्से़बा मे़निसु॥ खे़न् सेःक्वा हे़क्तङ्बा चोगे़॥ 15 इस्राइलिहाॽरे़ खे़न् मे़निसुआङ् कुसिङ् मे़न्निःत्तुन् हे़क्क्याङ् खुन्छिॽ लुम्मो अक्खेलॽरिक् सेःन्मे़दोसिङ्, “कन् थे़मानिबे?” मोसाःल्ले़ खे़ङ्हाॽ मे़त्तुसि, “यहवे दाङ्बे़ल्ले़ खिनिॽ चामा के़बिरिबा कुजान् हाबा कन्छबा॥ 16 यहवे दाङ्बे़ल्ले़ अक्खे पाःत्तुआङ् वाॽ, ‘कॽयोनु के़रे़क् मना थप्मे के़जाम्बा यारिक्लक् फुक्खे़म्मे़ॽ॥ खिनिॽ आबाङे आबाङे साःङ्गाहिम्मो के़याक्पा के़रे़क् मना थक्मा ओमर थिक्थिक् फुक्खे़म्मे़ॽ॥’” 17 इस्राइलिहाॽरे़ हे़क्केए मे़जोगु॥ कुभारे़ यरिक् नु कुभारे़ सुःल्लिक् मे़भुक्खु॥ 18 खे़ङ्हाॽरे़ मे़भुक्खुबान् ओमरओ मे़सिःक्तुल्ले़ यरिक् के़भुङ्बाहाॽरे़न् यरिक् नु सुःल्लिक् के़भुङ्बाहाॽरे़न् सुःल्लिक् मे़बोःक्खे़न्॥ के़रे़क्ले़ खुन्छिॽ चाहा मे़जोगे़बा यारिक्लक् मे़भुक्खु॥ 19 खे़ब्याङ् मोसाःल्ले़ खे़ङ्हाॽ मे़त्तुसि, “आत्तिन्हाॽरे़आङ् खे़न् ताःन्दिक्ले़ लागि तानाम् थारिक् मे़नन्छे़म् मे़युक्खे़म्मिन्ने़ॽ॥” 20 कर खे़ङ्हाॽओ कुभारे़ मोसाःल्ले़ कुबाःन्निन् मे़ङ्घे़प्सुन्, खे़ङ्हाॽरे़ खे़न् कुभा तानाम् थारिक् मे़नन्छु मे़युक्खु॥ कर कुदाःन्दिक्मा तानाम् खे़प्मो फेॽबात् थ्ये़आङ् नाम्सुमा हेःक्ते़आङ् युङे़॥ मोसान् खे़ङ्हाॽनु कुसिक् पोगे़॥ 21 कम्भलॽरिक् तानाम् थप्मे के़रे़क् मनाहाॽरे़ खुन्छिॽ चाहा के़जोःक्पा यारिक् मे़भुक्खु, हे़क्क्याङ् नाम्से़ःक्मा हेःक्ते़आङ् खाम्बाङ्ङो के़ने़बा के़याःक्पाहाॽ के़रे़क् योःन्दे़बे॥ 22 तुक्सिगेक्पा ये़न्नो खे़ङ्हाॽरे़ के़रे़क्ले़ लागि तगिबा ये़न्हाॽओ मे़भुक्खुबानुःल्ले़ निले़ङ् यारिक् यरिक् ओमर ने़त्ने़त्छि मे़भुक्खु, हे़क्क्याङ् सङ्जुम्भोबा के़रे़क् लाम्लोबाहाॽ मे़द्ये़आङ् खे़न् पाःन्निन् मोसान् मे़जे़क्तु॥ 23 खे़ब्याङ् खुने़ॽ खे़ङ्हाॽ मे़त्तुसि, “यहवे दाङ्बे़ल्ले़ इङ्जाङ् चोगुबा पाःन्निन् हाबा कन्लो—‘ताःन्दिक्क नाःम्सिङ्मा ये़न्लो, खे़ङ्ग यहवे दाङ्बाल्ले़ कुलागि सेसे सबाथरो॥ थोःक्मा के़बोङ्बा नु थे़म्मा के़बोङ्बा कुजाहाॽ आइन्छा थोःक्ते़म्मे़ॽ थे़न्दे़म्मे़ॽ॥ के़जाम्माङ् के़नम्बा थोःक्मनाबा कुजान् ताःन्दिक्ले़ लागि से़न्दाम् युक्खे़म्मे़ॽ॥’” 24 मोसाःल्ले़ मे़त्तुसिबा कुइसिक् खे़ङ्हाॽरे़ के़नम्बा कुजान् कुदाःन्दिक्मा थे़म्मा मे़युक्खु॥ खे़न् नाम्मे़सुसे़न् हे़क्क्याङ् खे़प्मो फेॽबात् मे़ध्ये़ने़न्॥ 25 मोसाःल्ले़ मे़त्तुसि, “आइन् खे़न् चे़म्मे़ॽ थेआङ्भे़ल्ले़ आइन्बा ये़न्निङ्ग यहवे दाङ्बाओ तोःम्मनाबा नाःम्सिङ्मा ये़न्लो॥ खिनिॽ के़युङिबादे़न् लाःक्कात् आइन् थे़माआङ् कुजा के़ङ्घोसुम्मिन्ॽ॥ 26 खिनिॽ तुक्सि ये़न् थारिक् चामा कुजा फुक्खे़म्मे़ॽ कर नुसिगेक्पा ये़न् नाःम्सिङ्मा ये़न्नो खिनिॽ थेआङ् के़ङ्घोसुम्मिन्ॽ॥” 27 हे़क्केसाङ् नुसिगेक्पा ये़न्नो कुभा मना कुजा फुङ्से़ लाःक्कात् मे़बे, कर खे़ङ्हाॽरे़ थे़माआङ् मे़ङ्घोसुन्॥ 28 खे़ब्याङ् यहवे दाङ्बे़ल्ले़ मोसान् मे़त्तु, “खिनिॽ आप्फाल्ले़ थारिक् आङ्गाॽ आइङ्जाङ्हाॽ नु आधिम्हाॽ खे़म्मा के़न्दे़न्दिम्बाबे? 29 निङ्वाॽ हे़त्तासिम्मे़ॽ, यहवे दाङ्बे़ल्ले़ सबाथ के़बिरिआङ् वाॽ॥ कल्ले़ चोगुल्ले़ए यहवे दाङ्बे़ल्ले़ खिनिॽ लागि तुक्सिगेक्पा ये़न्नो नियान् के़योबा चामा कुजा के़बिरिॽ॥ नुसिगेक्पा ये़न्नो खिनिॽ आत्ति आत्ति के़वयिॽ हाबा खे़प्मोए युङे़म्मे़ॽ, आत्तिन् मनाःन्नाङ् कुसाःङ्गाहिम्मोलाम् लाःक्कात् मे़लःन्ने़न्ल॥” 30 कल्ले़चोगुल्ले़ मनाहाॽ नुसिगेक्पा ये़न्नो याःम्बक् मे़न्जोगे़न्॥ 31 इस्राइलिहाॽरे़ खे़न् कुजाःल्ले़ कुमिङ् “मन्न” मे़मे़त्तु॥ खे़न् सःप्फाःल्ले़ कुसेॽ हे़क्तङ्बा फदाङ्बा चोगे़ हे़क्क्याङ् सक्वाघुःन्नु सॽमनाबा हे़क्के पाॽबाःम्बा चुक्सा खरे़ःङ् कुसिङ् कुजागे़नुॽबा चोगे़॥ 32 मोसाःल्ले़ पाःत्तु, “यहवे दाङ्बाल्ले़ अक्तङ्बा इङ्जाङ् चोगुआङ् वाॽ—‘मिस्रलाम् आङ्गाॽ खिनिॽ लःत्निङ् फे़त्निङ्ङिल्ले़ मुरे़क् खारे़क् थेआङ् के़होप्पादे़न्नो आक्तङ्बा कुजा चाःत्निङ्ङाङ् वये़, खे़न् कुजान् ताःन्दि के़दाबा मुॽइदाङ्साहाॽरे़ मे़निसुर फाॽआङ् खे़न् मन्नःन् ओमेर थिक् थाःक्थाःक्को थारिक् कत्ते़म्मे़ॽ॥’” 33 मोसाःल्ले़ हारुने़न् मे़त्तु, “लत्छा कुयाङ्मा थिक् तेॽरे़आङ् खे़प्मो ओमर थिक् मन्न थे़क्ते़ॽ, हे़क्क्याङ् खे़न् ताःन्दिबा मुॽइदाङ्साहाॽरे़ लागि यहवे दाङ्बे़ल्ले़ कुदगि युक्खे़ॽ॥” 34 यहवे दाङ्बे़ल्ले़ मोसान् मे़त्तुबा कुइसिक् हारुने़ल्ले़ खे़न् कुयाङ्मान् माङ्हुप् सन्दोक्किल्ले़ कुदगाङ् खे़न् मे़मे़क्ने़ल्ल फाॽआङ् युक्खु॥ 35 मना मे़युङे़बा लाजेॽओ मे़ङ्गे़त्ते थारिक् इस्राइलिहाॽरे़ लिबोङ् तङ्बे थे़म्बा मन्नःन् मे़जोआङ् मे़वये़॥ कनान लाजेॽबा इःन्दोओ मे़ङ्गे़त्ते थारिक् खे़ङ्हाॽरे़ खे़न् मन्नःन् मे़जर मे़वये़॥ 36 (ओमर थिक्के़न् कुलक् थिबोङ् एफारे़ कुलक् थिक्लो॥) |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.