लाम्दिक् 14 - लिम्बुइस्राइलिहाॽरे़ हे़ःत्ताङ्बा वरःङ्ङिन् मे़गाःक्तु 1 खे़ब्याङ् यहवे दाङ्बे़ल्ले़ मोसान् मे़त्तु, 2 “मिग्दोल नु हे़ःत्ताङ्बा वरःङ्ङिल्ले़ कुलुम्मो के़ने़बा पि-हहिरोत निःत्ताङ् याङ्मे़धोःक्ल हे़क्क्याङ् वरःङ्ङिल्ले़ कुबेसाङ् बाल सेफोन तगाङ्ङे साःङ्गाहिम् मे़जोगुआङ् मे़युङ्ल फाॽआङ् इस्राइलिहाॽ इङ्जाङ् पिरे़से़ॽ॥ 3 हे़क्क्याङ् इस्राइलिहाॽ आम्भा कन् लाजेॽओ ताक्कन्नु मे़वाॽ खे़म्ब्याङ् मुरे़क् खारे़क् थेआङ् के़होःप्पादे़न्निल्ले़ खे़ङ्हाॽ साक्तुसिआङ् मे़वाॽ फाॽआङ् फारोल्ले़ निङ्वाॽ इःत्तुॽ॥ 4 हे़क्क्याङ् आङ्गाॽ खे़ल्ले़ कुनिङ्वान् हादिङ् के़धक्पा चोगुङ् पिरुङ्ॽ खे़ब्याङ् खे़ल्ले़ खे़ङ्हाॽ नाःत्तुसिॽ, कर खे़न् नु खे़ल्ले़ कुधक्सुबाहाॽ आङ्गाॽ नाःन्दुङ्सिङ्ॽ हे़क्क्याङ् मनाहाॽरे़ आङ्गाॽ मिमिदिङ् मे़बिआ॥ खे़ब्याङ् मिस्रिहाॽरे़ यहवे दाङ्बान् आङ्गाॽए फाॽआङ् निङ्वाॽ मे़घोसुॽ॥” हे़क्क्याङ् इस्राइलिहाॽरे़ हे़क्केए मे़जोगु॥ 5 आल्ल इस्राइलिहाॽ मे़घे़त्छिङ् के़लॽबा इङ्घङ्ङिन् मिस्रिहाॽरे़ खुनिॽ हाङ्ङे़ओ के़रे़, खे़ब्याङ् खुने़ॽ नु खुने़ॽ कुसुहाङ्गे़म्बाहाॽरे़ खुन्छिॽ निङ्वाॽ के़जिःप्पा मे़जोगुआङ् अक्खे मे़बाःत्तु, “आनिॽ थे़मानि आजोगुम्बे हौ? इस्राइलिहाॽ आनिॽ पेःक्मा आभाःक्तुम्सिम् हे़क्क्याङ् आनिॽ से़वारोबा से़वारे़माहाॽ आले़रुम् आदेसुम्सिम्!” 6 हे़क्क्याङ् हाङ्ङिल्ले़ कुअन्लाधान् नु कुधक्सुबाहाॽ यारिप् चोगुसि॥ 7 खुने़ॽ के़रे़क्नुःल्ले़ नुबा ६०० अन्लाधाहाॽ नु खे़ङ्हाॽरे़ खुन्छिॽ थक्पेबाहाॽनु सोसोरिक् मिस्रबा वेॽ के़रे़क् अन्लाधाहाॽ याङ्सिङ्ङाङ् खे़ङ्हाॽरे़ खुन्छिॽ एगाङ् थासिङ्॥ 8 यहवे दाङ्बाल्ले़ हाङ्ङिन् कुनिङ्वाॽ हादिङ् के़धक्पा चोगु हे़क्क्याङ् खे़ल्ले़ थङ् के़नाःम्बा हे़क्के के़बेःक्पार के़बप्पा इस्राइलिहाॽ नाःत्तुसि॥ 9 खे़ब्याङ् मिस्रिहाॽरे़, फारोल्ले़ के़रे़क् कुअन्, कुअन्लाधा खुने़ॽ कुअन् के़लोङ्बाहाॽ नु कुधक्सुबाहाॽरे़ इस्राइलिहाॽ मे़नाःत्तुसि, हे़क्क्याङ् खे़ङ्हाॽरे़ खुन्छिॽ पि-हहिरोतरे़ कुबेसाङ् बाल सेफोन तगि ले़प्माङ् वरःङ्ङिल्ले़ कुयाओ साःङ्गाहिम् मे़लेःत्तुआङ् याङ्मे़धोःक्ते़बादे़न्नो मे़सिॽरुसि॥ 10 मिस्रबा हाङ्ङिन् नु थक्सुबाहाॽ खुन्छिॽ ले़प्माङ् मे़भे़रे़बा मे़निसुसिल्ले़ इस्राइलिहाॽ साॽरिक् मे़गिसे़ हे़क्क्याङ् आभाॽरे़ॽ फाॽआङ् यहवे दाङ्बे़न् पेलि मे़भाक्तु॥ 11 खे़ङ्हाॽरे़ मोसान् मे़मे़त्तु, “थे मिस्र लाजेॽओ इपुङ् मे़ने़स्से़न्बि? थे खे़ने़ॽ आनिगे कन् मुरे़क् खारे़क् थेआङ् के़होप्पादे़न्नो सिसे़ याप्मि के़भे़त्ते़बाबि? मिस्रलाम्बा आनिगे याप्मि के़लःत्ते़ के़भे़त्ते़आङ् आल्ल आनिगे याप्मि थे के़मे़त्ते़बाबे? 12 अक्खेए पोङ्ॽ फाॽआङ् आनिगे थे मिस्रओ वयिगे़ल्ले़सा तगिए पाःत्तुम्बे़बा होःप्ते़बि? आनिगे आले़रे़ॽ हे़क्क्याङ् मिस्रिहाॽरे़ खुन्छिॽ योःग्बा योःग्माए पोःक्खिगे़आङ् वयिगे़र फाॽआङ् आनिगे खे़ने़ॽ तगिए मे़त्तासिगे़आङ् वयिगे़॥ कन् मुरे़क् खारे़क् थेआङ् के़होप्पादे़न्नो सिमानुःल्ले़ग खे़न् मिस्र लाजेॽओ योःग्बा योःग्मा पोङ्माआङ् वाॽमाए नुबा पोःक्खे़बा वये़॥” 13 मोसाःल्ले़ इस्राइलिहाॽ मे़त्तुसि, “खिनिॽ मे़गिसे़म्मिन्ने़ॽ, हाङ्हाङ् लॽरे़म्मे़ॽ, हे़क्क्याङ् आइन् यहवे दाङ्बे़ल्ले़ खिनिॽ ताङ्गे़से़ःप्तिबान् ओमे़त्ते़म्मे़ॽ॥ खिनिॽ आइन् के़निसुम्सिम्बा कन् मिस्रिहाॽ याम्मो आभे़ल्ले़आङ् के़न्निसुम्सिम्मिन्ॽ॥ 14 यहवे दाङ्बान् खिनिॽ लागि ते़न्धङ् चोक्, खिनिॽ स्वाःत् युङे़म्मे़ॽ॥” 15 यहवे दाङ्बे़ल्ले़ मोसान् मे़त्तु, “आभाॽरे़ फाॽआङ् खिनिॽ आङ्गाॽ थेआङ् याप्मि पेलि के़भाक्तिबाबे? मनाहाॽ तगि पेगे़म्मे़ॽ मे़त्ते़से़ॽ॥ 16 खे़ने़ॽ के़दक्काःत्तिन् फोःक्खे़ॽआङ् वरःङ्ङिल्ले़ कुसम्धाङ् सन्छे़ॽ॥ च्वाःत्तिन् कुलक् ने़त्छि पोङ्ङाङ् एॽए से़न् हे़क्क्याङ् इस्राइलिहाॽ से़ङ्से़ङ्बा खाम्बाङ्ङो वरःङ्ङिल्ले़ कुलुम्मो पोङ्माआङ् पेःक्मा मे़सुक्॥ 17 आङ्गाॽ मिस्रिहाॽरे़ खुन्छिॽ निङ्वान् के़जिःप्पा चोगुङ् पिरुङ्सिङ्ङाङ् इस्राइलिहाॽरे़ खुन्छिॽ तगि तगि मे़धाङ् हे़क्क्याङ् आङ्गाॽ याम्मो हाङ्ङिन् नु खे़ल्ले़ कुधक्सुबाहाॽ, अन्लाहाॽ नु अन् के़लोङ्बाहाॽ नाःन्दुङ्सिङ्ङाङ् आङ्गाॽ आमिमिदिङ्ङिन् फोसुङ्ॽ॥ 18 आल्ल आङ्गाॽ मिस्रिहाॽ नाःन्दुङ्सिङ्ॽ, खे़ब्याङ् खे़ङ्हाॽरे़ आङ्गाॽए यहवे दाङ्बाआ फाॽआङ् निङ्वाॽ मे़घोसुॽ॥” 19 खे़ब्याङ् इस्राइलबा थक्सुबाहाॽरे़ खुन्छिॽ तगाङ् तगाङ् लाङ्गे़घेःक्पा यहवे दाङ्बे़ल्ले़ कुमाङ्लाइङ्बान् चत्छिङ्ङाङ् खुन्छिॽ एगाङ् ले़प्माङ् पे, हे़क्क्याङ् खाॽमित् सित्लाङ्ङिन् तगिलाम्बा चत्छिङ्ङाङ् खुन्छिॽ एगाङ् ले़प्माङ् ये़म्सिङ्॥ 20 खे़न् मिस्रबा थक्सुबाहाॽ नु इस्राइलबा थक्सुबाहाॽरे़ खुन्छिॽ लुम्मो ये़म्सिङ्॥ से़न्दिक् नाम्दाःत्तात् खाॽमिःत्तिल्ले़ मिस्रिहाॽ ले़प्माङ् खाधामे़र चोगु कर इस्राइलिहाॽ ले़प्माङ् खाओःत्ते़र चोगु॥ कम्भलॽरिक् मिस्रिहाॽ से़न्दिक् नाम्दाःत्तात् निःत्ताङ् तामा फे़म्मा मे़न्छुक्ते़न्॥ 21 खे़ब्याङ् मोसाःल्ले़ कुहुक्किन् हे़ःत्ताङ्बा वरःङ्ङिल्ले़ कुसम्धाङ् सन्छु हे़क्क्याङ् यहवे दाङ्बे़ल्ले़ नाङ्गे़न् पिसाङ्लाम् साॽरिक् यम्बा सुरित् केजङ् हुसे़र याःन्दु, हे़क्क्याङ् वरःङ्ङिन् एगाङ् नुःक्खे़बेर चोगुआङ् च्वाःत्ते़न् कुलुम्मो से़न्छिङ् हे़क्क्याङ् वरःङ्ङिन् से़ङ्से़ङ्बा खाम्बाङ् पोःक्खे़॥ 22 इस्राइलिहाॽ वरःङ्ङिल्ले़ कुलुम्मोलाम्बा से़ङ्से़ङ्बा खाम्बाङ्ङो लाङ्मे़घेगे़आङ् मे़बे, हे़क्क्याङ् चुक्वा नु फे़ङ्वा ले़प्माङ् खे़ङ्हाॽरे़ खुन्छिॽ लागि च्वाःत्तिन् लुङ्धाक् पोःक्खे़आङ् ये़बे़॥ 23 मिस्रिहाॽ, फारोल्ले़ कुअन्हाॽ, खुने़ॽ कुअन्लाधाहाॽ नु अन्गे़लोङ्बाहाॽरे़ इस्राइलिहाॽ मे़नाःत्तुसिआङ् वरःङ्ङो मे़लासे़॥ 24 तानाम् खाओःप्मानुःल्ले़ तगि मि नु खाॽमित् सित्लाङ्लाम्बा यहवे दाङ्बे़ल्ले़ मिस्रि थक्सुबाहाॽ ओमे़त्तुसि हे़क्क्याङ् खे़ङ्हाॽ साॽरिक् मे़गिसे़आङ् मे़यक्खे़॥ 25 खुने़ॽ खे़ङ्हाॽरे़ खुन्छिॽ अन्लाधा काप्लोःक्हाॽ ले़क्वाओ हुम्सु पिरुसि हे़क्क्याङ् खे़न् काप्लोःक्हाॽ हाप्तु॥ साॽरिक् साक्ते़र अन्लाधाहाॽ मुम्मा हेःक्ते़ हे़क्क्याङ् मिस्रिहाॽ अक्खे लॽमा मे़हेःक्ते़, “इस्राइलिहाॽरे़ खुन्छिॽ लागि यहवे दाङ्बान् आनिॽनु थङ् चोःक्ल पत्॥ आनिॽ कप्मोलाम् लःन्दि!” 26 खे़ब्याङ् यहवे दाङ्बे़ल्ले़ मोसान् मे़त्तु, “खे़ने़ॽ के़हुक्किन् वरःङ्ङिल्ले़ कुसम्धाङ् सन्छे़ॽ हे़क्क्याङ् मिस्रिहाॽ हे़क्क्याङ् खे़ङ्हाॽरे़ खुन्छिॽ अन्लाधा नु अन्गे़लोङ्बाहाॽ सम्धाङ् खे़न् च्वाःत्तिन् याम्मो कुङ् युर॥” 27 मोसाःल्ले़ कुहुक्किन् वरःङ्ङिल्ले़ कुसम्धाङ् सन्छु हे़क्क्याङ् तानाम् खाओःत्ते़ल्ले़ च्वाःत्तिन् तगिबा कुलाङ्घेःक्मादे़न्नो याम्मो नुःक्खे़ ये़॥ मिस्रिहाॽ च्वाःत्तोलाम्बा खे़त्छिङ्मा मे़गोःत्ते़ कर यहवे दाङ्बे़ल्ले़ खे़ङ्हाॽ च्वाःत्तोए लाप्फुसु केःत्तुसि॥ 28 च्वाःत्तिन् नुःक्खे़आङ् ये़, अन्लाधाहाॽ, अन्गे़लोङ्बाहाॽ नु इस्राइलिहाॽ के़नाःप्पार वरःङ्ङो के़लाःप्पा के़रे़क् मिस्रि थक्सुबाहाॽ मे़हुमे़ मे़लासे़ लत्छाआङ् मे़न्हिङे़न्॥ 29 कर इस्राइलिहाॽग वरःङ्ङिल्ले़ कुलुम्मोलाम् से़ङ्से़ङ्बा खाम्बाङ्ङो लाङ्मे़घेगे़आङ् मे़बे॥ च्वाःत्तिन् खुन्छिॽ चुक्वा नु फे़ङ्वा ले़प्माङ् लुङ्धाक् पोःक्खे़॥ 30 खे़न् ये़न्नो यहवे दाङ्बे़ल्ले़ इस्राइलिहाॽ मिस्रिहाॽरे़ खुन्छिॽ हुक्कोलाम् ताङ्से़ःप्तुसि॥ हे़ःत्ताङ्बा वरःङ्ङिल्ले़ कुया कुले़ःम् मिस्रिहाॽरे़ खुन्छिॽ चेहाॽ ने़स्से़बा इस्राइलिहाॽरे़ मे़निसु॥ 31 यहवे दाङ्बे़ल्ले़ खुने़ॽ पयम् यम्बा कुमुक्साम्मिल्ले़ मिस्रिहाॽ नाःन्दुसिबा मे़निसुआङ् इस्राइलिहाॽ यहवे दाङ्बान्नु मे़गिसे़॥ हे़क्क्याङ् खे़ङ्हाॽरे़ यहवे दाङ्बे़न् नु खुने़ॽ कुसे़वारोबा मोसान् नामे़साॽरुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.