लाम्दिक् 11 - लिम्बुमिस्रबा तुम्बा साहाॽ मे़स्ये़ 1 खे़ब्याङ् यहवे दाङ्बे़ल्ले़ मोसान् मे़त्तु, “आल्ल आङ्गाॽ मिस्रबा हाङ्ङिन् नु मनाहाॽरे़ खुनिॽ सम्धाङ् आल्लसाङ् लत्छा यम्बा ये़त्तुक्खे पाङ्घुङ् तासुङ्ॽ॥ खे़न् एगाङ् खे़ल्ले़ खिनिॽ पेःक्मा के़भाःक्तिॽ॥ से़क्खाःल्ले़ खुने़ॽए खिनिॽ के़रे़क् कॽयोलाम्बा के़नाःत्ति के़देसिॽ॥ 2 आल्ल इस्राइलि मे़न्छुमा ये़म्बित्छा के़रे़क्ले़ खुन्छिॽ हिम्बेसाङ्बाहाॽ साम्म्याङ् नु युप्पा वाःत्ति सामाहाॽ मे़नाःक्तुसिर याःन्दे़से़ॽ॥” 3 हे़क्क्याङ् इस्राइलिहाॽ मिङ्सो इङ्धाङ् पिमासि निङ्वाॽ यहवे दाङ्बे़ल्ले़ मिस्रिहाॽ पिरुसि॥ से़क्खाःल्ले़ के़रे़क् सुहाङ्गे़म्बा नु मनाहाॽरे़ मोसान् लत्छा साॽरिक् यम्बा मना मे़लेःत्तुॽ॥ 4 खे़ब्याङ् मोसाःल्ले़ हाङ्ङिन् मे़त्तु, “यहवे दाङ्बे़ल्ले़ अक्खे पाःत्तुॽ, ‘आङ्गाॽ से़न्दिक् से़त्लुम्भक्किल्ले़ मिस्र लाजेॽलाम्बा पोङ्ङाआङ् पेःक्का॥ 5 हे़क्क्याङ् मिस्रओ के़वाॽबा के़रे़क् तुम्बा साहाॽ मे़सिःॽ, लुङ्सुम्मो याॽके़युःप्मा योःग्मे़ल्ले़ कुस्सा तुम्बाआङ्धो हाङ्युक्नाओ युक्साबा के़बोङ्बा फारोल्ले़ कुस्सा तुम्बे़न्नाङ् सिःॽ॥ पित् थक्साहाॽओ के़रे़क्नुःल्ले़ तगि के़धाप्पा पित्सात्हाॽआङ् मे़सिःॽ॥ 6 मिस्र लाजेॽ खाराक् तगि आभे़ल्ले़आङ् मे़ङ्घे़म्मे के़वाॽबा नु ताःन्दि याम्मो आभे़ल्ले़आङ् खे़म्मे़न्दे़प्मनाबा हाःप्मा चिःङ्मा पोङ्ॽ॥ 7 कर इस्राइलिहाॽ नु खे़ङ्हाॽरे़ खुन्छिॽ पित् थक्साहाॽग कोःत्चो थिक्ले़आङ् मे़हॽरुसिन्ॽ॥’ खे़ब्याङ् यहवे दाङ्बे़ल्ले़ इस्राइलिहाॽ नु मिस्रिहाॽरे़ एॽए से़न्दुसिॽ फाॽआङ् खिनिॽ निङ्वाॽ के़घोसुम्ॽ॥ 8 हे़क्क्याङ् खे़ने़ॽ कन् के़रे़क् के़सुहाङ्युक्पाहाॽ आङ्गाॽओ मे़दाआङ् आङ्गाॽ से़वा मे़मे़त्तार मे़बाःत्तुॽ, ‘आदाङ्बारे़ के़एगाङ् के़बप्पा के़रे़क् मनाहाॽनु सोरिक् लःन्दे़आङ् पेगे़ॽ॥’ खे़न् एगाङ् आङ्गाॽ लःन्ना पेःक्का॥” खे़ब्याङ् मोसान् कुसाक्के़न्निल्ले़ कुमिक्किन् खाधाप्तुआङ् थासिङ्॥ 9 यहवे दाङ्बाल्ले़ मोसान् अक्खे मे़त्तुआङ् वये़, “फारोल्ले़ खे़ने़ॽ के़बाःन्निन् खे़म्मा नाॽरुर वाॽबाल्ले़ चोगुल्ले़ आङ्गाॽ आप्फेक् निङ्वाॽ के़माबा याःम्बक्हाॽ मिस्र लाजेॽओ चोगुङ्ल वाॽआ॥” 10 मोसान् नु हारुने़ल्ले़ कन् के़रे़क् निङ्वाॽ के़माबा याःम्बक्हाॽ फारोल्ले़ कुदगि चोगे़त्छु॥ कर यहवे दाङ्बे़ल्ले़ फारोल्ले़ कुनिङ्वान् हादिङ् के़धक्पा चोगु पिरु, हे़क्क्याङ् खुने़ॽ इस्राइलिहाॽ कुलाजेॽओलाम् पेःक्मा मे़भाःक्तुसिन्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.