लाम्दिक् 10 - लिम्बुनिःङ्घुक्वाहाॽलाम् मिङ्देॽ 1 याम्मो यहवे दाङ्बाल्ले़ मोसान् मे़त्तु, “खे़ने़ॽ पेगे़ॽआङ् फारोन् तुमे़ॽ॥ आङ्गाॽ फारोन् नु खुने़ॽ कुसुहाङ्युक्पाहाॽरे़ खुन्छिॽ निङ्वान् हादिङ् के़धक्पा चोगुङ् पिरुङ्सिङ्ङाङ् वाॽ॥ खे़ङ्हाॽरे़ खुन्छिॽ निङ्वान् हादिङ् के़धक्पा चोःक्पाल्ले़ चोगुल्ले़ खुन्छिॽ लुम्मो आङ्गाॽ कन् निङ्वाॽ के़माबा याःम्बक्हाॽ चोगुङ्ॽ॥ 2 हे़क्केलॽरिक् मिस्रिहाॽ अदङ् चोगुङ्सिङ्ङाङ् खुन्छिॽ निङ्वान् हादिङ् के़धक्पा चोगुङ् पिरुङ्सिङ् हे़क्क्याङ् खे़ङ्हाॽरे़ खुन्छिॽ लुम्मो निङ्वाॽ के़माबा याःम्बक्हाॽ चोगुङ्बान् खिनिॽ सामे़न्छाॽहाॽ मे़प्मा के़सुक्तुम्सिम्ल॥ हे़क्क्याङ् खिनिॽ के़रे़क्ले़ आङ्गाॽ यहवे दाङ्बाआ फाॽआङ् कुसिङ् के़निःत्तुम्ॽ॥” 3 कल्ले़चोगुल्ले़ मोसान् नु हारुने़न् फारोओ पेसे़त्छिआङ् मे़त्ते़सु, “हिब्रुहाॽरे़ खुनिॽ निङ्वाॽफुमाङ् यहवे दाङ्बाल्ले़ पाःत्तुॽ, ‘आप्फाल्ले़ थारिक् खे़ने़ॽ आङ्गाॽ आदगि नःम्सिङ्मा के़न्दे़न्ने़म्बाबे? आङ्गाॽ आमनाहाॽ पेःक्मा फाःक्ते़से़ॽ हे़क्क्याङ् खे़ङ्हाॽ मे़बेःक्काङ् आङ्गाॽ माङ्से़वा मे़मे़त्तार॥ 4 खे़ने़ॽ आङ्गाॽ आमनाहाॽ पेःक्मा के़म्भाःक्तुसिन्ने़भग्र, ओमे़त्ते़ॽ, ताःन्दिक् खे़ने़ॽ के़लाजेॽओ निःङ्घुक्वाहाॽ तारुङ्सिङ्ॽ॥ 5 खे़ङ्हाॽरे़ खाम्बेःन्मान् निमे़न्धाःप्पे थारिक् सिदे़प् मे़दे़प्तुॽ॥ फःन् थ्ये़आङ् ताङे़ याःक्ते़बा के़रे़क् कुजाहाॽ खे़ङ्हाॽरे़ मे़जमे़देसुॽ॥ खिनिॽ इक्ताप्पो के़लिङ्बा के़रे़क् सिङ्बुङ्हाॽआङ् खे़ङ्हाॽरे़ मे़जमे़देसुॽ॥ 6 खे़ने़ॽ के़हिम्मो नु खे़ने़ॽ के़सुहाङ्युक्पाहाॽरे़ खुन्छिॽ हिम्मो हे़क्क्याङ् मिस्र लाजेॽओबा के़रे़क् हिम्हाॽ खे़ङ्हाॽरे़ मे़धिम्सुॽ॥ खे़म्भ्यारिक् यरिक् निःङ्घुक्वा खे़ने़ॽ के़म्बा के़धाःक्थे़बाहाॽरे़ कन् लाजेॽओ मे़द्ये़आङ्धो आइन् थारिक् आभे़ल्ले़आङ् मे़न्निए मे़वये़॥’” खे़ब्याङ् मोसान् हिसिङ्ङाङ् फारोओलाम् लःन्दे़ पे॥ 7 फारोल्ले़ कुसुहाङ्गे़म्बाहाॽरे़ खुने़ॽ मे़मे़त्तु, “कन् मनाःल्ले़ आप्फाल्ले़ थारिक् आनिॽ तुक्खे आजाःत्ताङ् पप्पाबे? इस्राइलिहाॽ ले़रे़देसे़से़ॽ हे़क्क्याङ् खे़ङ्हाॽ मे़बेःक्काङ् यहवे दाङ्बा खुन्छिॽ निङ्वाॽफुमाङ्ङिन् माङ्से़वा मे़मे़त्तुर॥ मिस्र लाजेःन्ने खाप्पुथ्यःङ् पोङ्मा चोक्, थे आदाङ्बारे़ के़न्निसुम्बि?” 8 खे़ब्याङ् मोसान् नु हारुने़न् फारोओ मे़दारुसि हे़क्क्याङ् हाङ्ङिल्ले़ खुन्छिॽ मे़त्तुसि, “खिनिॽ पेगे़म्मे़ॽ, हे़क्क्याङ् खिनिॽ यहवे दाङ्बा निङ्वाॽफुमाङ्ङिन् माङ्से़वा मे़त्ते़म्मे़ॽ॥ कर खिनिॽओ आत्तिन् आत्तिन्हाॽ के़बेगिबा?” 9 मोसाःल्ले़ मे़त्तु, “आनिगे के़रे़क्, हिन्जाॽबित्छाॽहाॽ नु काप्पो काप्मु खक्पे़त्ते पेगिगे़॥ आनिगे साएहाॽ, मे़ल्लुक् मे़ःन्दाहाॽ नु थक्साहाॽ के़रे़क् तेॽरुम्सिम्बे़ थेआङ्भे़ल्ले़ यहवे दाङ्बे़न् आनिगे मिङ्सो इङ्धाङ् पिरुम्बे़आङ् लत्छा तङ्नाम् तोसुम्बे़॥” 10 फारोल्ले़ मे़त्तु, “यहवे दाङ्बे़ल्ले़ थे खिनिॽ के़से़ःप्तिबिॽ? आङ्गाॽ मे़न्छुमाहाॽ, हिन्जाॽबित्छाॽहाॽ खिनिॽ तेॽमासिआङ् पेःक्मा मे़भाःक्निङ्ङिन्॥ खिनिॽ ताप्फे़ःम्बा चोःक्मा के़इःत्तुम्बा पाःन्निन् नुरिक्काङ् निदे़त्॥ 11 मेःन्दुक्, खिनिॽ ये़म्बित्छाहाॽरक् यहवे दाङ्बे़न् माङ्से़वा मे़त्छे़ पेगे़म्मे़ॽ, थेआङ्भे़ल्ले़ खिनिॽ हाबाहे़क्के चोःक्मा के़नाःक्तुम्माङ् वाॽ॥” हे़क्के मे़त्तुसिआङ् मोसान् नु हारुने़न् फारोल्ले़ कुदगिलाम्बा मे़लःत्तु मे़देसुसि॥ 12 खे़ब्याङ् यहवे दाङ्बे़ल्ले़ मोसान् मे़त्तु, “कुबन्ज्याङ् कुबन्ज्याङ् निःङ्घुक्वाहाॽ मिस्रओ मे़गे़त्ल फाॽआङ् खे़ने़ॽ के़हुक्किन् सन्छे़ॽ॥ प्याङ्सि इक्ताप्पो के़बोःक्पा के़रे़क् नुधिसाक्चिॽ नु फःन्लाम्बा के़दाङ्बा के़याःक्पा के़रे़क् कुजाहाॽ खे़ङ्हाॽ मे़दाआङ् मे़जमे़देसुॽ॥” 13 मोसाःल्ले़ कुदक्काःत्तिन् मिस्रओ फोःक्खु हे़क्क्याङ् यहवे दाङ्बे़ल्ले़ खे़ल्ले़ याःन्दिक् नाम्धाधा नु से़न्दिक् नाम्दाःत्तात् मिस्र लाजेॽओ नाङ्गे़न् ले़प्माङ्लाम् सुरित् केजङ् हुरे़र याःन्दु॥ कुदाःक्दिक्मा तानाम् खे़न् सुरित् केजङ्ङिल्ले़ निःङ्घुक्वाहाॽ तारुसि॥ 14 हे़क्क्याङ् खे़न् निःङ्घुक्वाहाॽ कुबन्ज्याङ् कुबन्ज्याङ्मा मे़द्ये़ खे़ब्याङ् मिस्र लाजेन् के़रे़क् सिदे़प् मे़दे़प्तु॥ खे़म्भ्यारिक् यरिक् निःङ्घुक्वा तगि आभे़ल्ले़आङ् मे़ङ्गे़त्ते मे़वये़ हे़क्क्याङ् ताःन्दि याम्मो आप्फाल्ले़आङ् मे़ङ्गे़त्ने़न्ॽ॥ 15 खे़ङ्हाॽरे़ खाम्बेःक्मान् माक्ताङ्बा पोःक्खे़र यारिक् सिदे़प् मे़दे़प्तु॥ फःन्लाम्बा के़दाङ्बा के़याःक्पा के़रे़क् कुजाहाॽ नु सिङ्सेॽहाॽ खे़ङ्हाॽरे़ मे़जमे़देसु॥ मिस्र लाजेॽओ के़युङ्बा लेःत्ताङ्बा हिःक्ताङ्बा नु नुधिसाक्चि थेआङ् मे़नरे़न्॥ 16 खे़ब्याङ् हाङ्ङिल्ले़ हाराहारा मोसान् नु हारुने़न् उःत्तुसिआङ् मे़त्तुसि, “आङ्गाॽ खिनिॽ यहवे दाङ्बान् नु खिनिॽ तक्ले़ङ्वाओ लायो चोगुङ्॥ 17 कल्ले़चोगुल्ले़ कन्छलाम्बारे़ लागि आङ्गाॽ आलायोन् ले़प्मि चोगे़ आबिरे़ॽ हे़क्क्याङ् खे़न् सिमालिङ्धो यारिक्पा खुम्दिङ्ङिन् खे़प्मारे़ लागि खिनिॽ यहवे दाङ्बा निङ्वाॽफुमाङ्ङिन् पेलि फाक्ताम् आबिरे़म्मे़ॽ॥” 18 खे़ब्याङ् मोसान् फारोओनु लःन्दे़आङ् पे, हे़क्क्याङ् यहवे दाङ्बान् पेलि फाक्तु॥ 19 यहवे दाङ्बे़ल्ले़ नाङ्गे़न् पिसाङ्लाम् के़भे़म्बा सुरित् केजङ्ङिन् खइक् खइक् के़इक्सिङ्बा नाम्धा पिसाङ्लाम् के़हुबा सुरित् चोगु हे़क्क्याङ् खे़न् सुरित् केजङ्ङिल्ले़ निःङ्घुक्वाहाॽ फे़सुसिआङ् हे़ःत्ताङ्बा वरःङ्ङो केःत्तुसि॥ मिस्र लाजेॽओ लत्छाआङ् निःङ्घुक्वा मे़न्याःक्ते़न्॥ 20 कर यहवे दाङ्बे़ल्ले़ फारोल्ले़ कुनिङ्वान् हादिङ् के़धक्पा चोगु पिरु हे़क्क्याङ् खे़ल्ले़ इस्राइलिहाॽ पेःक्मा मे़भाःक्तुसिन्॥ माक्सिःङ्ग्याःप्पा खामाक्चुम्बा 21 खे़ब्याङ् यहवे दाङ्बे़ल्ले़ मोसान् मे़त्तु, “खे़ने़ॽ के़हुक्किन् ताङ्साङ्बो ले़प्माङ् फोःक्खे़ॽ हे़क्क्याङ् मिस्र लाजेॽओ खामाक्चुम्बा माक्सिःङ्ग्याःप्पा पोङ्ॽ॥ सम्मे़ल्ले़ याङ्के़दे़प्पा हे़क्के खामाक्चुम्बा माक्सिःङ्ग्याःप्पा पोङ्ल॥” 22 हे़क्क्याङ् मोसाःल्ले़ कुहुक्किन् ताङ्साङ्बो ले़प्माङ् सन्छु हे़क्क्याङ् मिस्र लाजेॽ के़रे़क् सुम्यान् थारिक् माक्सिःङ्ग्याःप्पा खामाक्चुम्बा पोःक्खे़॥ 23 मिस्रिहाॽ खुन्छिॽ निमा मे़न्छुक्सिङ्ङिन् हे़क्क्याङ् सुम्यान् थारिक् आत्तिन्हाॽरे़आङ् खुन्छिॽ हिम्हाॽ ले़प्मा मे़ल्ले़रुन्॥ कर इस्राइलिहाॽ मे़युङे़बादे़न्नोग खाओःत्तेआङ्ङे पत्छे़॥ 24 खे़ब्याङ् फारो हाङ्ङिल्ले़ मोसान् उःत्तुआङ् मे़त्तु, “खिनिॽ पेगे़म्मे़ॽआङ् खिनिॽ यहवे दाङ्बे़न् माङ्से़वा मे़त्ताम्मे़ॽ, खिनिॽ मे़न्छुमाहाॽ, हिन्जाॽबित्छाॽहाॽआङ् मे़बेःक्ल॥ कर खिनिॽ मे़ल्लुक् मे़ःन्दाहाॽ पित् नु कुम्बाबा पित्हाॽ आम्भा कप्मो मे़याःक्ल॥” 25 मोसाःल्ले़ नोगप् पिरु, “हे़क्केने़भग्र आनिगे निङ्वाॽफुमाङ् यहवे दाङ्बाओ सिदुङ्जभा तोःम्मारे़ लागि, वयागे़न् सिदुङ्जभा तोःम्मारे़ लागि थक्साहाॽ तेॽमा खे़ने़ॽ याप्मि के़भाःक्लए पोङ्ॽ॥ 26 आनिगे थक्साहाॽआङ् आनिगे़नु सोरिक् मे़बेःक्, हे़क्क्याङ् खुन्छिॽ लत्छा लाङ् तोॽभेत् थिक्काङ् याःक्मा मे़नुॽने़न्॥ आनिगे यहवे दाङ्बा निङ्वाॽफुमाङ्ङिन् माङ्से़वा मे़प्मारे़ लागि खे़ङ्हाॽलाम्बाए कुभा तोःम्मासि के़बोङ्बा वाॽ॥ आनिगे खे़प्मो मे़ङ्गे़त्ते थारिक् थेधेहाॽ तोःम्मासिआङ् यहवे दाङ्बे़न् माङ्से़वा मे़प्मा पोङ्ॽ खे़न् आनिगे मे़निसुम्बे़न्॥” 27 कर यहवे दाङ्बे़ल्ले़ हाङ्ङिल्ले़ कुनिङ्वान् हादिङ् के़धक्पा चोगु पिरु, हे़क्क्याङ् खे़ल्ले़ इस्राइलिहाॽ पेःक्मा मे़भाःक्तुसिन्॥ 28 खुने़ॽ मोसान् मे़त्तु, “आङ्गाॽ आदगाङ्लाम्बा लःन्दे़ पेगे़ॽ! खे़ने़ॽ के़नारान् आङ्गाॽ याम्मो ओःन्मे़धाक्ताङ्ङिन्ने़ॽ! आत्तिन् ये़न्नो खे़ने़ॽ आङ्गाॽ आदगि ओःन्गेधाक्सिङ्ॽ हाबा खे़ल्ले़ याःन्दिक् खे़ने़ॽ के़सिःॽ!” 29 मोसाःल्ले़ मे़त्तु, “खे़ने़ॽ कुदोःप्माए के़बाःत्तु, खे़ने़ॽ याम्मो आभे़ल्ले़आङ् आङ्गाॽ के़न्निआन्॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.