ए़स्तर 9 - लिम्बुयहुदिहाॽरे़ निङ्मिहाॽ मे़मे़क्खुसि 1 थिबोङ्ङाङ् ने़त्छिगेक्पा ला, इग्र अदार लाओबा थिबोङ्ङाङ् सुम्सिगेक्पा ये़न्नो हाङ्ङिल्ले़ कुइङ्जाङ्ङिन् के़प्मा ये़न्निन् के़रे़द्ये़॥ आम्भा खे़न् ये़न्नो यहुदिहाॽ खुन्छिॽ निङ्मिहाॽरे़ हुक्को ताःप्मासि निङ्साङ् मे़जोगुआङ् वये़॥ कर खे़ल्ले़ कुले़क्वाओग यहुदिहाॽरे़नि खुन्छिॽ निङ्मिहाॽ युक्मासि ये़न् पोःक्खे़॥ 2 खे़ल्ले़ याःन्दिक् यहुदिहाॽ मे़ङ्मासि के़गोःप्पाहाॽ फप्मासिरे़ लागि अहासुरस हाङ्ङिल्ले़ के़रे़क् कुदे़ःङ्गप्पोबा ये़क्यक्हाॽओ यहुदिहाॽ थिक्हुप् मे़बोःक्खे़आङ् मे़वये़॥ खे़ङ्हाॽ आत्तिन्हाॽरे़आङ् अप्मा मे़न्छुक्तुसिन्, थेआङ्भे़ल्ले़ वेॽ के़रे़क् मे़न्छाम् सुवाङ्हाॽ खे़ङ्हाॽनु मे़गिसे़आङ् मे़वये़॥ 3 खे़ङ्हाॽ मोर्दकैःन्नु मे़गिसे़बाल्ले़ चोगुल्ले़ ते़ङ्गप् ते़ङ्गप्पोबा के़रे़क् तुम्म्याङ्हाङ्हाॽ, हाङ्जुम्मोबा यम्बा सुहाङ्गे़म्बाहाॽ नु हाङ्युक्पाहाॽरे़ यहुदिहाॽ मे़भाॽरुसि॥ 4 हाङ्हिम्मो मोर्दकैन् लत्छा यम्बा कुधे़गेक् मना पोःक्खे़, हे़क्क्याङ् खुने़ॽ आल्लसाङ् साॽरिक् मुक्साम्साबा पोःक्खे़आङ् खुने़ॽ कुमिङ्सो कुधाङ्सोन् के़रे़क् ते़ङ्गप्हाॽओ से़रे़॥ 5 कम्भलॽरिक् यहुदिहाॽरे़ खुन्छिॽ के़रे़क् निङ्मिहाॽ ताभेःल्ले़ फाःत्ले़ःङ् मे़मे़त्तुसिआङ् मे़से़रुसि हे़क्क्याङ् मे़मे़क्खुसि॥ खुन्छिॽ के़जिःप्पाहाॽ यहुदिहाॽरे़ पाःप्पाःत् मे़मे़त्तुसि॥ 6 हाङ्पाङ् सुसनओ यहुदिहाॽरे़ किप् ङासि ये़म्बित्छाहाॽ मे़स्ये़रुसिआङ् मे़मे़क्खुसि॥ 7 खे़ङ्हाॽरे़ पर्सन्दाता, दल्फोन, अस्पाता, 8 पोराता, अदलिया, अरिदाता, 9 पर्मसता, अरिसै, अरिदै नु बैजाता, 10 हम्मादाताःल्ले़ कुस्सा यहुदिहाॽरे़ खुन्छिॽ निङ्मि हामाने़ल्ले़ कन् के़रे़क् थिबोङ् कुस्साहाॽआङ् मे़स्ये़रुसि॥ कर खे़ङ्हाॽरे़ चिगक्वा नाप्मा याःम्बक्को हुक्मे़ङ्गेःत्तुन्॥ 11 हाबा खे़ल्ले़ याःन्दिक् हाङ्पाङ् सुसनओ मे़स्ये़रुसिबा मनाहाॽरे़ खुन्छिॽ खानिःत्तिन् हाङ्ङिन् मे़जे़क्तु॥ 12 हाङ्ङिल्ले़ हाङ्मा ए़स्तरे़न् मे़त्तु, “हाङ्पाङ् सुसनओ यहुदिहाॽरे़ किप् ङासि मनाहाॽ नु हामाने़ल्ले़ के़रे़क् थिबोङ् कुस्साहाॽआङ् मे़से़रुसिआङ् मे़मे़क्खुसिआङ् वाॽ॥ हाङ्ङिल्ले़ वेॽ कुदे़ःङ्गप्हाॽओ खे़ङ्हाॽरे़ थेधे मे़जोगुबिला? आल्लसाङ् पाःत्ते़ॽ, चे़ल्ले़क्सेॽ सेजङ्वान् थुङुर हाङ्ङिल्ले़ ए़स्तरे़न् याम्मो मे़त्तु, ‘खे़ने़ॽ के़बेलिन् थेबे? खे़न् के़घोसुॽ॥ खे़ने़ॽ के़नाःक्तुबा पाःन्निन् थेबे? आङ्गाॽ आहाङ्जुम्मिन् कुभ्रे़ःङ् यारिक्साङ् आङ्गाॽ खे़न् पिने़रो॥’” 13 ए़स्तरे़ल्ले़ खुने़ॽ नुगप् पिरु, “हाङ्ङिल्ले़ नुबा निङ्वाॽ के़इःत्तुने़भग्र आइन्बा इङ्जाङ् कुइसिक् ताःन्दिक्काङ् आम्भा कम्भलॽरिक् सुसनओ यहुदिहाॽरे़ चोःक्मा मे़घोसुर फाॽआङ् खे़ङ्हाॽ चोःक्मा फाःक्ते़से़ॽओ॥ हे़क्क्याङ् हामाने़ल्ले़ खे़न् थिबोङ् कुस्साहाॽरे़ खुन्छिॽ चेहाॽ मना फोःम्मासे़प्मा सिङ्ङो मे़भोन्दुसिररो॥” 14 खे़ब्याङ् हे़क्के चोःक्मा हाङ्ङिल्ले़ इङ्जाङ् पिरुसि॥ सुसनओ इङ्जाङ् मे़लःत्तु, हे़क्क्याङ् हामाने़ल्ले़ थिबोङ्ङे कुस्साहाॽरे़ खुन्छिॽ चेहाॽ मना फोःम्मासे़प्मा सिङ्ङो मे़भोःन्दुसि॥ 15 अदार लाओबा थिबोङ्ङाङ् लिसिगेक्पा ये़न्नो यहुदिहाॽ याम्मो थिक्हुप् मे़बोःक्खे़आङ् सुसनओ किप् सुम्सि मनाहाॽ मे़स्ये़रुसि॥ कर खे़ङ्हाॽरे़ नाप्मासि याःम्बक्को हुक्मे़ङ्गेःत्तुन्॥ 16 आम्भा कन् ये़म्मो हाङ्ङिल्ले़ कुदे़ःङ्गप्हाॽओ के़वाॽबा के़याःक्पा यहुदिहाॽ आबाङे से़ःप्सिङ्मारे़ लागि नु खुन्छिॽ निङ्मिहाॽलाम् ताङ्मारे़ लागि थिक्हुप् मे़बोःक्खे़आङ् मे़वये़॥ खे़ङ्हाॽरे़ खुन्छिॽ के़जिःप्पा नुबोङ्ङाङ् ङासि हे़न्छिङ् मनाहाॽ मे़स्ये़रुसि, कर खे़ङ्हाॽरे़ नाप्मासि याःम्बक्को हुक्मे़ङ्गेःत्तुन्॥ 17 कन् अदार लाओबा थिबोङ्ङाङ् सुम्सिगेक्पा ये़न्नो मे़जोगु॥ थिबोङ्ङाङ् लिसिगेक्पा ये़न्नो खे़ङ्हाॽ मे़नाःम्सिङ्॥ खे़ल्ले़ याःन्दिक् लत्छा तङ्नाम् नु सोसोत्लराङ् ये़न् मे़दोसु॥ 18 कर सुसनबा यहुदिहाॽग खे़न् लाओबा थिबोङ्ङाङ् सुम्सिगेक्पा नु थिबोङ्ङाङ् लिसिगेक्पा ये़न्नो थिक्हुप् मे़बोःक्खे़ हे़क्क्याङ् थिबोङ्ङाङ् ङासिगेक्पा ये़न्नो मे़नाःम्सिङ्, खे़ब्याङ् खे़न् ये़न्निन् तङ्नाम् तोमा नु सोसोत्लराङ् चोःक्मा ये़न् निःन्धो मे़जोगु॥ 19 कल्ले़चोगुल्ले़ माःङ्घा माःङ्घाबा पाङ्भेॽहाॽओ के़युङ्बा पाङ्भेॽसाबा यहुदिहाॽ अदार लाओबा थिबोङ्ङाङ् लिसिगेक्पा ये़न्नो सोसोत्लराङ् नु तङ्नाम् ये़न् मे़दोसु, हे़क्क्याङ् खे़न् ये़न्नो खे़ङ्हाॽ खुन्छिॽ लुम्मो हुक्वाहाॽ मे़हाक्सिङ्लो॥ पुरिम तङ्नाम् 20 मोर्दकैःल्ले़ कन् पाःन्हाॽ साप्तुने़स्सु, हे़क्क्याङ् अहासुरस हाङ्ङिल्ले़ के़रे़क् कुदे़ःङ्गप्हाॽओबा माःङ्घा नु निःत्ताङ्बा के़रे़क् यहुदिहाॽ खुने़ॽ सक्इङ्घङ् साप्पे़ःप्ताहाॽ साप्तुआङ् हाक्तुसि॥ 21 के़रे़क् फारस हाङ्जुम्मो खुने़ॽ अदार लाओबा थिबोङ्ङाङ् लिसिगेक्पा नु ङासिगेक्पा ये़न्नो तङ्बे थक्मा सोसोत्लराङ् चोःक्मारे़ लागि सक्इङ्घङ् हाक्तुसि॥ 22 थेआङ्भे़ल्ले़ खे़न् ये़न्नो यहुदिहाॽरे़ खुन्छिॽ निङ्मिहाॽलाम् नाःम्सिङ्मा मे़घोसुबा नु खुन्छिॽ लागि निङ्वाॽ तुक्खे चामालाम् सोसोत्लराङ्ङो हे़क्क्याङ् मे़रिङ् थक्मालाम् ससाङ्स्रोत् चोःक्मा लाओ ले़क्खे़आङ् वये़॥ खे़ङ्हाॽरे़ खे़न् ये़न्हाॽ तङ्नाम् नु सोसोत्लराङ् चोःक्मा, हे़क्क्याङ् खुन्छिॽ लुम्मो चामा कुजाहाॽ हुक्वा हाक्सिङ्मा नु याङ्गे़साॽबाहाॽ हुक्वा पिमासि ये़न् हे़क्के तोमा पोङ्ॽ फाॽआङ् खुने़ॽ साप्तु॥ 23 कल्ले़चोगुल्ले़ मोर्दकैःल्ले़ साप्तुबा कुइसिक् कुहेःक्सिङ्मा चोगुबा साक्थिम्मिन् इःप्मा नाःप्मारे़ लागि यहुदिहाॽ मे़दे़न्दे़॥ 24 थेआङ्भे़ल्ले़ के़रे़क् यहुदिहाॽरे़ खुन्छिॽ निङ्मि अगागि हम्मदाताःल्ले़ कुस्सा हामाने़ल्ले़ यहुदिहाॽ मे़ङ्मासिरे़ लागि चे़म्भन् चोगुआङ् कुभा ये़न्निन् से़म्मारे़ लागि तॽयाःन्सोन् के़सुआङ् वये़॥ खे़न् पुर (तॽयाःन्सोन् के़मा) मे़मे़त्तुआङ् वये़॥ 25 कर ए़स्तरे़न् हाङ्ङिल्ले़ कुदगि के़रे़ल्ले़ यहुदिहाॽरे़ खुन्छिॽ तक्ले़ङ्वाओ हामाने़ल्ले़ चोःक्मा कोःत्तुबा खे़न् ताप्फे़ःम्बा चे़म्भन्निन् आप्फेक् कुधे़गेःक्पो थामारे़ लागि खुने़ॽ नु कुस्साहाॽ सिङ्ङो फोःन्छे़ हाङ्ङिल्ले़ साप्मनाबा इङ्जाङ् लःत्तु॥ 26 (खे़ल्ले़चोगुल्ले़ खे़ङ्हाॽरे़ कन् ये़न्हाॽ पुरिम मे़मे़त्तु, खे़न् पुर पाःन्सुत्लालाम् त्ये़बारो॥) खे़न् सक्इङ्घङ्ङो साप्ते़बा कुइसिक् नु खे़ल्ले़ कुयाःम्बेओ खे़ङ्हाॽरे़ मे़निसुबा हे़क्क्याङ् निङ्वाॽ मे़घोसुबा पाःन्निल्ले़ चोगुल्ले़, 27 यहुदिहाॽ आबाङे नु खुन्छिॽ मुॽइङ्दाङ्साहाॽ हे़क्क्याङ् खुन्छिॽनु के़भुङ्सिङ्बा के़रे़क्ले़ लागि कन् नियाःन्बा ये़न्निन् तङ्बे थक्मा तोक् के़बोङ्बा थिम् कुइसिक् नु निःन्धो के़बोङ्बा ये़न्नो तोमाए पोङ्ॽ, 28 हे़क्क्याङ् थाःक्थाःक् थारिक् के़रे़क् हिम्सयङ्हाॽरे़ ते़ङ्गप् थक्मा नु के़रे़क् ये़क्यक्हाॽओ पुरिम्बा ये़न्हाॽ इःप्मा नाःप्माए पोङ्ॽ हे़क्क्याङ् खे़ल्ले़ निङ्वाॽसोक्किन् खे़ङ्हाॽरे़ खुन्छिॽ थिन्दाङ् सायोबोरा मुॽइदाङ्साहाॽओ आभे़ल्ले़आङ् चक्मे़लॽने़ल्ल के़लॽबा खे़ङ्हारे़ निःन्धो मे़जोगु॥ 29 खे़ब्याङ् अबिहेलरे़ कुस्सा हाङ्मा ए़स्तरे़न् नु यहुदि मोर्दकैःल्ले़ के़रे़क् युक्नु निसिगेक्पा सक्इङ्घङ् साप्ते़सुआङ् पुरिम तङ्नाम्मिन् तोमाए के़बोङ्बा कुबुङ् युक्खे़सु॥ 30 मोर्दकैःल्ले़ इङ्जाङ् पिरुसिबा कुइसिक् पुरिम्बा कन् ये़न्हाॽ निःन्धो के़बोङ्बा ये़म्मो तोमा याःन्दुसिर अहासुरस हाङ्ङिल्ले़ १२७ कुदे़ःङ्गप्हाॽओ सनारुङ् नु ताप्थेक् याम्धेक्पा नुइत्छो ओसेःन्धाङ् चोःक्नु के़रे़क् यहुदिहाॽ सक्इङ्घङ् हाक्तुसि॥ 31 आक्खेलॽरिक् यहुदिहाॽरे़ खुन्छिॽ लागि तःक्ने़त् युङ्मा नु मे़रिङ् थक्मा थिम्हाॽ मे़नाःत्तुर मे़वये़ हाबा हे़क्केलॽरिक्के खे़ङ्हाॽ नु खुन्छिॽ मुॽइदाङ्साहाॽरे़ पुरिम्बा ये़न्हाॽ मे़दोसुर पोङ्ॽ फाॽआङ् मोर्दकैन् नु ए़स्तर हाङ्मे़ल्ले़ इङ्जाङ् पिरे़सुसिआङ् वये़॥ 32 पुरिम्मिल्ले़ लागि कन् थिम्हाॽ ए़स्तरे़ल्ले़ इजाङ्ङिल्ले़ से़क्खाबा निःन्धो चोगु, हे़क्क्याङ् खे़न् थिम्हाॽ मे़साप्तुआङ् मे़ने़स्सुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.