ए़स्तर 8 - लिम्बुहाङ्ङिल्ले़ यहुदिहाॽ ताङ्से़ःप्मासि कुइङ्जाङ् 1 हाबा खे़ल्ले़ याःन्दिक् यहुदिहाॽरे़ खुन्छिॽ निङ्मि हामाने़ल्ले़ कुहिम् कुधाःङ्हाॽ अहासुरस हाङ्ङिल्ले़ हाङ्मा ए़स्तरे़न् पिरु॥ हे़क्क्याङ् मोर्दकैन् खुने़ॽ आप्फेक् आगाॽइ थाप् फाॽआङ् ए़स्तरे़ल्ले़ हाङ्ङिन् मे़त्तुबाल्ले़ चोगुल्ले़ मोर्दकैन् हाङ्ङिल्ले़ कुदगि त्ये़॥ 2 खम्भ्याङ् हाङ्ङिल्ले़ हामाने़न् लाम्बा ताःक्तुबा एःप्साप् कुस्वागेःप्पिन् फे़न्दुआङ् मिक्तोक् कुइसिक् मोर्दकैन् पिरु॥ ए़स्तरे़ल्ले़ हामाने़ल्ले़ कुहिम् कुधाःङ्हाॽ मोर्दकैन् हुक्सुप्तु॥ 3 याम्मो ए़स्तरे़न् हाबे़र हाङ्ङिल्ले़ कुलाङ्जक्पो फन्छिङ्ङाङ् अगागि हामाने़ल्ले़ यहुदिहाॽरे़ खुन्छिॽ तक्ले़ङ्वाओ चोगुबा ताप्फे़ःम्बा चे़म्भन्निन् खे़त्ते़ आबिरे़ॽ फाॽआङ् हाङ्ङिन् पेलि फाक्तु॥ 4 हाङ्ङिल्ले़ ए़स्तरे़न् ले़प्माङ् साम्म्याङ् कुहाङ् तक्काःत्तिन् सन्छु हे़क्क्याङ् खुने़ॽ पोगे़आङ् हाङ्ङिल्ले़ कुदगि ये़म्सिङ्ङाङ् ये़बे़॥ 5 ए़स्तरे़ल्ले़ मे़त्तु, “हाङ्ङिल्ले़ नुबा के़इःत्तुने़भग्र, हे़क्क्याङ् आदाङ्बारे़ आङ्गाॽ लुङ्माॽ के़दुक्काने़भग्र, हाङ्ङिल्ले़ के़वाॽबा के़इःत्तु, हे़क्क्याङ् आदाङ्बा के़दे़न्ने़भग्र अगागि हम्मदाताःल्ले़ कुस्सा हामाने़ल्ले़ हाङ्ङिल्ले़ के़रे़क् के़दे़ःङ्गप्हाॽओबा यहुदिहाॽ मे़ङ्मासिरे़ लागि निङ्सेक् चोगुआङ् साप्तुबा सक्इङ्घङ् साप्पेःत्ताहाॽ कुसुम् मे़न्दम्मनाबा चोःक्मारे़ लागि लत्छा साप्मनाबा हाङ्इङ्जाङ् थिक् हाङे़देसे़ॽओ॥ 6 थेआङ्भे़ल्ले़ आङ्गाॽ आसुवाङ् आम्भुॽ आन्साॽहाॽओ के़दाबा ये़त्तुक्खेन् आक्खेलॽरिक् नासिथःप्मा सुक्तुङ्बे? इग्र आङ्गाॽ आहिम्सयङ्हाॽ मे़मे़क्खुसिबान् आङ्गाॽ आक्खेआङ् थरुङ्बे?” 7 अहासुरस हाङ्ङिल्ले़ हाङ्मा ए़स्तरे़न् नु यहुदि मोर्दकैन् मे़त्तुसि, “हामाने़ल्ले़ यहुदिहाॽ मे़ङ्मा कोःत्तुसिबाल्ले़ चोगुल्ले़ आङ्गाॽ खुने़ॽ कुयाङ्सा कुन्धेहाॽ ए़स्तरे़न् पिरुङ्ङाङ् वाॽ, हे़क्क्याङ् खुने़ॽ मना फोःम्मासे़प्मा सिङ्ङो मे़भोन्दु॥ 8 आल्ल यहुदिहाॽरे़ लागि नुबा च्या के़इःत्छुबा वेॽ हाङ्इङ्जाङ् थिक् आङ्गाॽ आमिङ्ङो साप्ते़से़ॽ॥ खे़प्मो हाङ् एःप्साप् एःप्ते़से़ॽ, थेआङ्भे़ल्ले़ हाङ्ङिल्ले़ कुमिङ्ङो साप्मनाबा हाङ् एःप्साप् एःप्मनाआङ् साप्मनाबा साप्लान् कुसुम् मे़न्दम्मनाबा चोःक्मा सुक्मे़दे़ने़न्॥” 9 खे़न् एगाङ् सुम्सिगेक्पा ला, इग्र सिवान लाओबा निबोङ्ङाङ् सुम्सिगेक्पा ये़न्नो हाङ्ङिल्ले़ कुसुहाङ्मिबाहाॽ मे़उःत्तुसि॥ मोर्दकैःल्ले़ यहुदिहाॽ इङ्जाङ् पिरुसिबा कुइसिक् भारत लाजेॽआङ् कत्ना इथियोपिया लाजेॽ थारिक्पा १२७ ते़ङ्गप्हाॽओबा यम्बा सुहाङ्गे़म्बाहाॽ, चुक्सा हाङ्हाॽ नु तुम्म्याङ्हाङ्हाॽरे़ खुन्छिॽ लागि ते़ङ्गप् थक्माबा आप्फेक् आप्फेक् खुन्छिॽ सक्सक् कुइसिक् नु सुवाङ् थक्माबा खुन्छिॽ आप्फेक् पाःन्दाङ्हाॽओ हे़क्क्याङ् यहुदिहाॽरे़ लागिआङ् खुन्छिॽ आप्फेक् सक्सक् नु पाःन्दाङ्ङो लत्छा साप्मनाबा हाङ्इङ्जाङ् मे़लःत्तु॥ 10 मोर्दकैःल्ले़ खे़न् इङ्जाङ्ङिन् अहासुरस हाङ्ङिल्ले़ कुमिङ्ङो साप्तुआङ् खे़प्मो हाङ् एःप्साप् एःप्तु॥ खे़न् इङ्जाङ्ङिन् हाङ्ङिल्ले़ कुअन् ये़प्नाओबा के़जाप्पा अन्गे़लोङ्बा इङ्साबाहाॽलाम् हाङुदेसु॥ 11 के़रे़क् ये़क्यक्हाॽओ यहुदिहाॽ थिक्हुप् पोङ्माआङ् ताङ्से़ःप्सिङ्मा हाङ्ङिल्ले़ इङ्जाङ् पिरुसि॥ आत्तिन् सुवाङ् इग्र ते़ङ्गप्पोबा फे़जुम्भे़या खजुम्घयारे़ काप्तुसिबाहाॽरे़ यहुदि ये़म्बित्छा, मे़न्छुमाहाॽ नु अङे़ःक्वा साहाॽ मे़भत्तुसिॽ, खे़ङ्हाॽ से़प्मासि, चे़प्मा से़प्मासि, वरे़ङ्ले़ङ् मे़ङ्मासि नु खुन्छिॽ याङ्साकुन्धेहाॽ नाप्मासि मे़भाःक्तुसि॥ 12 हे़क्के चोःक्मा मे़भाःक्तुसिबे़न् के़रे़क् ते़ङ्गप्पो थिक्यान्, इग्र थिबोङ्ङाङ् निसिगेक्पा लाओ किग्र अदार लाओबा थिबोङ्ङाङ् सुम्सिगेक्पा ये़न्नोरक् वये़॥ 13 कन् इङ्जाङ् सक्किन् लिङ्मनाबा लत्छा साप्लाधिक् के़रे़क् ते़ङ्गप्पो कुभाङ् कुइसिक् लःप्मा नु के़रे़क् मनासुम् थक्मा इङ्घङ् से़मा के़बोङ्बा पोःक्खे़॥ यहुदिहाॽ खे़न् ये़न्नो खुन्छिॽ निङ्मिहाॽओ कुले़क्वा नुःक्मारे़ लागि यारिप् मे़बोङ्ल फाॽआङ् कन् इङ्जाङ् सक्किन् मे़लःत्तुआङ् वये़॥ 14 हाङ्ङिल्ले़ कुअन्हाॽ लोङ्मासिआङ् से़माए के़बोङ्बा हाङ्ङिल्ले़ कुइङ्जाङ्ङिन् हारा तेॽमारे़ लागि खे़न् इङ्साबाहाॽ मे़बाङ्घु मे़देसुसि॥ कन् इङ्जाङ्ङिन् हाङ्पाङ् सुसनओआङ् मे़लःत्तु॥ 15 खे़ब्याङ् मोर्दकैन् हिःक्यङ्यङ्बा नु फदाङ्बा हाङ्देत् चाक्सिङ्ङाङ् यम्बा साम्म्याङ् तिच खुःक्सिङ् हे़क्क्याङ् चुन्जुम्बा नैनासुत् चाङ् चाक्सिङ्ङाङ् हाङ्ङिल्ले़ कुदगिलाम् लःन्दे़॥ खम्भ्याङ् के़रे़क् सुसन ये़क्यक्को मे़सःत्ते़आङ् सोसोत्लराङ् मे़जोगे़॥ 16 यहुदिहाॽरे़ खुन्छिॽ लागिग खे़न् ये़न्निन् निङ्वाॽ तामा नु सःप्मा, हाङ्हाङ् लॽमा नु मिङ्सो इङ्धाङ्बा ये़न् पोःक्खे़॥ 17 हाङ्ङिल्ले़ कुइङ्जाङ् के़गे़प्पा, के़रे़क् ते़ङ्गप् नु के़रे़क् ये़क्यक्हाॽओ यहुदिहाॽरे़ खुन्छिॽ लागि निङ्वाॽ तामा नु सिक्सम्मा, साभःङ्जा चामा नु सोसोत्लराङ् चोःक्मा ये़न् पोःक्खे़॥ हे़क्क्याङ् वेॽ सुवाङ्बा यरिक् मनाहाॽ यहुदि मे़बोःक्खे़, थेआङ्भे़ल्ले़ यहुदिहाॽनु खे़ङ्हाॽ मे़गिसे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.