ए़स्तर 7 - लिम्बुहामाने़न् मे़भोन्दु 1 खे़ब्याङ् हाङ्ङिन् नु हामाने़न् साभःङ्जा चासे़ हाङ्मा ए़स्तररे़ओ पेसे़त्छि॥ 2 खे़ल्ले़ याःन्दिक्काङ् चे़ल्ले़क्सेॽ सेजःङ्वा थुङ्नु हाङ्ङिल्ले़ हाङ्मे़न् याम्मो सेःन्दोसु, “हाङ्मा ए़स्तररे़, चे़ल्ले़क्सेॽ सेजङ्वान् थुङुर हाङ्ङिल्ले़ ए़स्तरे़न् याम्मो मे़त्तु, ‘खे़ने़ॽ के़बेलिन् थेबे? खे़न् के़घोसुॽ॥ खे़ने़ॽ के़नाःक्तुबा पाःन्निन् थेबे? आङ्गाॽ आहाङ्जुम्मिन् कुभ्रे़ःङ् यारिक्साङ् आङ्गाॽ खे़न् पिने़रो॥’” 3 खे़ब्याङ् हाङ्मा ए़स्तरे़ल्ले़ नुगप् पिरु, “हाङ्ङिल्ले़ आङ्गाॽ के़सिराॽ के़धाङाङ्ङाङ् वाॽ, हे़क्क्याङ् हाङ्ङे, हाङ्ङिल्ले़ नुबा के़इःत्तुने़भग्र आङ्गाॽ आहिङ्मे़न् से़ःप्ते़ॽ फाॽआङ् पेलि फाक्ने़॥ आङ्गाॽ आसुवाङ्बा मनाहाॽरे़ खुन्छिॽ हिङ्मे़न् ताङ्घे़ॽ फाॽआङ् पेलि फाक्ने़॥ 4 थेआङ्भे़ल्ले़ आङ्गाॽ नु आङ्गाॽ आसुवाङ्हाॽ मे़ङ्मारे़ लागि, से़प्मारे़ लागि नु वरे़ङ्ले़ङ् मिङ्ङे मामा पिमारे़ लागि मे़सङ्घिगे़आङ् वयिगे़॥ आनिगे, ये़म्बित्छा नु मे़न्छुमा के़रे़क् योक् पोङ्मारे़ लागिरक् मे़सङ्घिगे़बा पान् वये़ल्ले़ग आङ्गाॽ स्वाःत् मे़म्बाःत्ते वयाङ्बा वये़॥ थेआङ्भे़ल्ले़ खे़म्म्याक्लक् पाःन्निल्ले़ग पयम् हाङ्ङिन् तुक्खे चाःप्मा मे़लाॽरुम्बा वये़॥” 5 अहासुरस हाङ्ङिल्ले़ ए़स्तर हाङ्मान् सेःन्लाप्तु, “अक्तङ्बा याःम्बक् चोःक्मा के़आःन्छिङ्बा मनान् हाःप्पे? खे़न् आत्ति वाॽ?” 6 ए़स्तरे़ल्ले़ मे़त्तु, “आनिगे के़अप्पा नु निङ्मिन् हाबा कन् कुॽइगे़भे़म्बा हामाने़न्लो!” खे़ब्याङ् हाङ्ङिन् नु हाङ्माल्ले़ खुन्छिॽ तगि हामाने़न् कुयङ्मा के़रे़॥ 7 खे़ब्याङ् हाङ्ङिन् कुसाक्के़न्निल्ले़ थेआङ् मे़निसुन्नाङ् पोगे़, हे़क्क्याङ् चे़ल्ले़क्सेॽ सेजङ्वान् थुङ्मा ले़रुआङ् हाङ्हिम्मोबा फुङ्इक्को पे॥ कर हामाने़ल्ले़ खुने़ॽ कुहिङ्मे़न् से़ःप्मा फाॽआङ् हाङ्मे़न् पेलि फाक्मारे़ लागि युङे़बादे़न्नोए हाबा युङ्सिङ्ङाङ् युङे़॥ थेआङ्भे़ल्ले़ हाङ्ङिल्ले़ कुनिङ्वाॽओ खाप्पुथ्यःङ् मे़ङ्मारे़ लागि निःन्धो चोगुसुरुआङ् वाॽ फाॽआङ् हामाने़ल्ले़ कुसिङ्निःत्तु॥ 8 हाङ्ङिन् फुङ्इक्कोलाम् कुजा चामा याक्फाङ्ङो फुरुत् नुःक्खे़द्ये़बा ये़म्मोए हामाने़न्ग ए़स्तरे़न् नाःम्सिङ्ङाङ् युङे़बा युक्नादे़न्निल्ले़ कुबेसाङ् साबन् फन्छिङ्ङाङ् पत्छे़॥ खे़ब्याङ् हाङ्ङिन् अःक्ते़, “थे हाङ्मे़न् कॽयो आङ्गाॽनु वाॽर आहिम्मोए कल्ले़ मेःत् मे़प्मा निङ्वाॽ चोगुबाबि?” हाङ्ङिल्ले़ कुम्ब्राओलाम् कन् पाःन्निन् लःन्दे़नुमे़ःन्ने खे़ङ्हाॽरे़ हामाने़ल्ले़ कनान मे़दे़प्तु॥ 9 खे़ब्याङ् हाङ्ङिल्ले़ कुदगि के़वाॽबा सिङ्गारुहाॽओ थिक्पा हर्बोनाःल्ले़ पाःत्तु, “हाङ्ङिन् ताङ्गे़से़ःप्पा मोर्दकैन् फोःम्मारे़ लागि हामाने़ल्ले़ खुने़ॽ आप्फेक् कुहिम्मो निबोङ्ङाङ् ङासि मितर कुलिङ्गे़न् केःम्बा सिङ्धिक् चोगुआङ् युङ्!” हाङ्ङिल्ले़ मे़त्तुसि, “आम्भा खे़प्मोए हामाने़न् फोःन्दे़म्मे़ॽ!” 10 खे़ब्याङ् मोर्दकैःल्ले़ कुलागि हामाने़ल्ले़ आप्फेक् यारिप् चोगुबा सिङ्ङो खुने़ॽ मे़भोन्दु॥ खे़न् एगाङ् हाङ्ङिल्ले़ कुसाक्के़न्निन् चिःक्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.