ए़स्तर 5 - लिम्बुए़स्तरे़ल्ले़ हाङ्ङिन् उःत्तु 1 सुम्सिगेक्पा ये़न्नो ए़स्तरे़ल्ले़ खुने़ॽ कुहाङ्मा चाङ्हाॽ चाक्सिङ् हे़क्क्याङ् पेआङ् हाङ्हिम् सिगाङ्बा लक्खुम्मो हाङ् याक्फाङ् तगि ये़म्सिङ्ङाङ् ये़बे़गरे़॥ हाङ्ङिन् हाङ्युक्नाओ युङे़आङ् यम्बा लाम्धेत् ले़प्माङ् हिसिङ्ङाङ् युङे़॥ 2 आल्ल हाङ्ङिल्ले़ ए़स्तर हाङ्मान् लक्खुम्मो ये़बे़गरे़बा निसु, हे़क्क्याङ् हाङ्ङिल्ले़ खुने़ॽ कुलुङ्माॽ स्याःत् लॽरे़ॽआङ् खुने़ॽ कुहुक्को कत्तुबा स्याम्माङ् हाङ्तक्काःत्तिन् ए़स्तरे़न् ले़प्माङ् सन्छु॥ खम्भ्याङ् खुने़ॽ तगि फे़रे़आङ् हाङ् तक्काःत्तिल्ले़ कुसम्मिन् सुसु॥ 3 हाङ्ङिल्ले़ खुने़ॽ मे़त्तु, “हाङ्मा ए़स्तरे़, खे़ने़ॽ थे़मा चाहा के़जोःक्पे? खे़ने़ॽ थेसाङ् नाःक्ते़ॽ, आङ्गाॽ आहाङ्जुम्मिन् कुभ्रे़ःङ्साङ् खे़ने़ॽ पिने़॥” 4 ए़स्तरे़ल्ले़ मे़त्तु, “हाङ्ङे, नुबा के़इःत्तुने़भग्र हाङ्ङिल्ले़ के़लागि आङ्गाॽ यारिप् चोगुङ्बा साभःङ्जाओ आइन् हामाने़न्नु सोरिक् त्ये़त्छे़ॽओ॥” 5 ए़स्तरे़ल्ले़ कुबेलिन् के़प्मा पिमारे़ लागि हाङ्ङिल्ले़ हामाने़न् हारा उःप्मा ताःप्मा इङ्जाङ् पिरुसि॥ खे़ब्याङ् ए़स्तरे़ल्ले़ यारिप् चोगुबा कुसाभःङ्जाओ हाङ्ङिन् नु हामाने़न् पेसे़त्छि॥ 6 चे़ल्ले़क्सेॽ सेजङ्वान् थुङुर हाङ्ङिल्ले़ ए़स्तरे़न् याम्मो मे़त्तु, “खे़ने़ॽ के़बेलिन् थेबे? खे़न् के़घोसुॽ॥ खे़ने़ॽ के़नाःक्तुबा पाःन्निन् थेबे? आङ्गाॽ आहाङ्जुम्मिन् कुभ्रे़ःङ् यारिक्साङ् आङ्गाॽ खे़न् पिने़रो॥” 7 नुगप्पो ए़स्तरे़ल्ले़ मे़त्तु, “आङ्गाॽ आये़क्पेलि नु आबेलि हाबा कन् वाॽरो— 8 हाङ्ङिल्ले़ आङ्गाॽ के़सिराॽ के़धाङ्ङाआङ् आङ्गाॽ नाःक्तुङ्बा पाःन्निन् के़बिआ हे़क्क्याङ् आङ्गाॽ तोःन्दुङ्बा आबेलिन् के़प्मा पिमा हाङ्ङिल्ले़ नुबा के़इःत्तुने़भग्र ने़प्माङ्ले़ लागि यारिप् चोगुङ्बा साभःङ्जाओ हाङ्ङिन् नु हामाने़न् ताःन्दिक्काङ् त्ये़से़ॽ॥ ताःन्दिक् हाङ्ङिन् आङ्गाॽ आबाःन्निन् मे़त्ने़रो॥” हामाने़ल्ले़ मोर्दकैन् से़प्मा चे़म्भन् चोगुॽ 9 खे़ल्ले़ याःन्दिक् हामाने़न् सःत्ते़र कुनिङ्वाॽओ कुसिक्समे़र पे॥ कर आल्ल खुने़ॽ मोर्दकैन् हाङ्हिम्मोबा यम्बा लाम्धेःत्तो युङे़बा हे़क्क्याङ् खुने़ॽ कुदगि मे़ये़बे़म्बा नु मे़गिसे़म्बा निसुआङ् खुने़ॽ आत्तातान्ने साॽरिक् कुसाक्के़न् पोगे़॥ 10 कर खुने़ॽ आप्फेक् स्वाःत् हिम्मो पे॥ खे़न् एगाङ् खुने़ॽ कुजुम् कुदेङ्हाॽ नु कुमेत् जेरेसे़न् उःप्मा ताःप्मा पाङ्घुसि, हे़क्क्याङ् खुने़ॽ कुयाङ्साकुन्धे नु यरिक् कुस्सा ये़म्बित्छा के़वाॽबा 11 हे़क्क्याङ् हाङ्ङिल्ले़ खुने़ॽ यम्बा ताक्फा पिरुबा नु वेॽ सुहाङ्युक्पाहाॽ हे़क्क्याङ् युक्साबाहाॽओ खुने़ॽ यम्बा मिङ्सो इङ्धाङ् पिरुबा पाःन्निन् खे़ङ्हाॽ चे़क्तुसि॥ 12 हामाने़ल्ले़ योॽरुर पाःत्तु, “हे़क्क्याङ् खे़म्म्याक्लक् मेःन्, कर ए़स्तर हाङ्मे़ल्ले़ यारिप् चोगुबा साभःङ्जाओ हाङ्ङिन्नु सोरिक् तामारे़ लागि हाङ्मे़ल्ले़ आङ्गाॽरक् उःत्ताङ्॥ खम्भ्याङ् हाङ्ङिन्नु सोरिक् तामारे़ लागि ताःन्दिक्काङ् आङ्गाॽ उःत्ताङ्ङाङ् वाॽ॥ 13 हे़क्केसाङ् खे़न् यहुदि मोर्दकैन् हाङ्हिम्मोबा यम्बा लाम्धेःप्पो युङ्बा निसुङ्ङिल्ले़ कन् के़रे़क् पाःन्हाॽरे़ आङ्गाॽ आनिङ्वाॽए मे़दाने़न्॥” 14 खे़ब्याङ् खुने़ॽ कुमेत् जेरेसे़न् नु के़रे़क् कुन्जुम् कुन्देङ्बाहाॽरे़ खुने़ॽ मे़मे़त्तु, “निबोङ्ङाङ् ङासि मितर केःम्बा सिङ्धिक् हाक्ते़ॽ, खे़प्मो मोर्दकैन् फोःम्मा से़प्मारे़ लागि ताःन्दिक् तानाम् हाङ्ङिन् पेलि फाक्ते़ॽ॥ खे़न् एगाङ् खे़ने़ॽ सःत्ते़ॽर हाङ्ङिन्नु सोरिक् साभःङ्जाओ पेगे़ॽ॥” हामाने़ल्ले़ कन् पाःन्निन् साॽरिक् कुसिराॽथाङे़, हे़क्क्याङ् खुने़ॽ खे़न् सिङ्ङिन् यारिप् चोःक्मा पाङ्घुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.