ए़स्तर 4 - लिम्बुमोर्दकैःल्ले़ ए़स्तरे़न् कुभाॽ नाःक्तु 1 कन् के़रे़क् पाःन्हाॽ खे़प्सुआङ् मोर्दकैःल्ले़ कुजाङ्हाॽ थे़ःक्खुआङ् सागि तेत् चाक्सिङ् हे़क्क्याङ् खाप्पु हुःत्छिङ्ङाङ् यम्बा इक्लाओ मे़रिङ् थक्ते़र ये़क्यक्को पे॥ 2 खुने़ॽ हाङ्हिम्मो लाःप्मा यम्बा लाम्धेःत्तो थारिक्लक् पे, थेआङ्भे़ल्ले़ सागि तेत् के़जाङ्बा आत्तिन् मन्नाःन्नाङ् यम्बा लाम्धेःत्तोलाम् पोङ्माआङ् सिगाङ् लाःप्मा खोमे़न्दे़प्मनाबा वये़॥ 3 हाङ्ङिल्ले़ कुइङ्जाङ् नु कुभाङ् के़गे़प्पा के़रे़क् ते़ङ्गप्हाॽओ यहुदिहाॽरे़ खुन्छिॽ लुम्मो तःक्ने़त् युङ्मा, हाःप्मा चिःङ्मा, निङ्वाॽ तुक्खे चामा नु मे़रिङ् थक्मा पोःक्खे़॥ खे़ङ्हाॽओ यरिक् मनाहाॽरे़ सागि तेत् मे़जाक्खुआङ् खाप्पुओ मे़ने़सिङ्॥ 4 आल्ल ए़स्तर हाङ्मे़ल्ले़ कुसे़वारोमाहाॽ नु सिङ्गारुहाॽ मे़द्ये़आङ् कन् पाःन्निन् खुने़ॽ मे़मे़त्तु, खे़ब्याङ् खुने़ॽ साॽरिक् निङ्वाॽ तुक्खे चामो थ्ये़॥ सागि तेःत्तिन् फे़न्दुआङ् चाङ् चाक्सिङ्ल फाॽआङ् खुने़ॽ मोर्दकैन् चाङ् हाक्तुदेसु॥ कर खुने़ॽ खे़न् ताःक्मा मे़दे़न्दे़न्॥ 5 खे़ब्याङ् खुने़ॽ फाॽमारे़ लागि मुरामे़मे़त्तुबा हाङ्ङिल्ले़ कुसिङ्गारुहाॽओबा लत्छा हताक्के़न् उःप्मा ताःप्मा पाङ्घुसिआङ् मोर्दकैन् थे़मा के़साक्पो थ्ये़ हे़क्क्याङ् खुने़ॽ थेआङ् हे़क्के चोगुबा फाॽआङ् पान् सेःन्दोमारे़ लागि खे़न् मर्दकैओ पेःक्मा इङ्जाङ् पिरुआङ् पाङ्घुदेसु॥ 6 हताक्के़न् हाङ्हिम् तगि के़ने़बा ये़क्यक्कोबा ताम्दाम्बा लक्खुम्मो मोर्दकैन् वये़बादे़न्नो पे॥ 7 मोर्दकैःल्ले़ खुने़ॽ थे़मा तुमुआङ् वाॽ खे़न् के़रे़क् पाःन्हाॽ नु हामाने़ल्ले़ यहुदिहाॽ मे़ङ्मासिरे़ लागि चाहा के़जोःक्पा याङ्ङिन् हाङ् याङ्थाःङ्ङो पिरुसिआङ् वाॽ खे़न्नाङ् हताक्के़न् चे़क्तु॥ 8 हे़क्क्याङ् सुसनओ यहुदिहाॽ मे़ङ्मासिरे़ लागि मे़लःत्तुबा लिङ्मनाबा इङ्जाङ् सक्किन् मोर्दकैःल्ले़ हताक्के़न् पिरुआङ् मे़त्तु, “ए़स्तरे़न् ओःन्धाक्ते़ॽआङ् चे़क्ते़ॽ हे़क्क्याङ् हाङ्ङे़ओ पेगे़ॽआङ् कुभाॽ खोमा नु आप्फेक् सुवाङ्हाॽरे़ लागि ये़क्पेलि फाक्ते़ॽ फाॽआङ् मे़त्ते़ॽ॥” 9 हताक्के़न् पेआङ् मोर्दकैःल्ले़ पाःत्तुबा पाःन्निन् ए़स्तरे़न् चे़क्तु॥ 10 हे़क्क्याङ् ए़स्तरे़ल्ले़ याम्मो कन् इङ्घङ्ङिन् मे़त्तुआङ् हताक्के़न् पाङ्घुदेसु, 11 “हाङ्ङिल्ले़ के़रे़क् कुयुक्साबाहाॽ नु ते़ङ्गप्पोबा के़रे़क् मनाहाॽरे़ कन् पाःन्निन् कुसिङ् मे़निःत्तुआङ्ङे वाॽ, कुभा ये़म्बित्छा इग्र मे़न्छुमान् हाङ्ङिल्ले़ मे़न्उःत्तेए हाङ्ङिल्ले़ कुदगि हाङ्हिम् सिगाङ्बा लक्खुम्मो लासे़ने़भग्र खे़न् मे़से़रुॽ॥ खे़ल्ले़ लागि लत्छारक् कुभाङ् वाॽ, हाङ्ङिल्ले़ कुसाम्म्याङ् हाङ्तक्काःत्तिन् सन्छुने़भग्ररक् खे़न् हिङ्ॽ॥ आङ्गाॽ आप्फेक्काङ् पेःक्मारे़ लागि हाङ्ङिल्ले़ मे़न्उःत्ते वाॽआबा सुम्बोङ् ये़न् के़रे़मारे़॥” 12 कल्ले़चोगुल्ले़ आल्ल ए़स्तरे़ल्ले़ पाःत्तुबा पाःन्निन् हाताक्के़ल्ले़ मोर्दकैन् चे़क्तु॥ 13 खे़ब्याङ् खुने़ॽ हाबा कन् नुगप्पिन् ए़स्तरे़न् हाक्तुदेसु—“खे़ने़ॽ हाङ्हिम्मो के़वाॽबाल्ले़ चोगुल्ले़ के़रे़क् यहुदिहाॽओ खे़ने़ॽरक् के़हिङ् फाॽआङ् खे़ने़ॽ मे़इःत्ते़न्ने़ॽ॥ 14 कन् ये़म्मो खे़ने़ॽ स्वाःत् मे़म्बाःत्ते के़युङ्ने़भग्र यहुदिहाॽरे़ लागि कुभाॽ नु चोःक्युम्भो वेॽदे़न्नो लाम्बा तारो॥ कर खे़ने़ॽ नु के़म्बारे़ कुहिम्सयङ्हाॽ के़मे़गिॽ॥ पोङ्मा सुक् आम्भा कन् ये़म्मिल्ले़ लागिए खे़ने़ॽ हाङ्मा के़बोःक्खे़बाबि हाग!” 15 खे़ब्याङ् ए़स्तरे़ल्ले़ मोर्दकैन् अक्तङ्बा इङ्घङ् हाक्तुदेसु— 16 “पेगे़ॽआङ् सुसन्नो के़वाॽबा के़रे़क् यहुदिहाॽ फुक्खे़से़ॽ हे़क्क्याङ् खे़ङ्हाॽ आङ्गाॽ आलागि तःक्ने़त् मे़युङ्ल॥ सुम्यान् नु सुम्से़न् थारिक् मे़जे़म्मिन्ने़ॽ मे़धुङे़म्मिन्ने़ॽ हे़क्क्याङ् च्वाःत्ताङ् मे़धुङे़म्मिन्ने़ॽ॥ आङ्गाॽ नु आङ्गाॽ आसे़वारोमाहाॽआङ् खिनिॽ हे़क्केए तःक्ने़त् युङिगे़॥ खे़न् एगाङ् कुभाङ्ले़ कुदक्ले़ङ्वा पोङ्साङ् आङ्गाॽ हाङ्ङे़ॽओ पेःक्का॥ आङ्गाॽ सिमाए पोङ्साङ् आङ्गाॽ सिआर॥” 17 खे़ब्याङ् मोर्दकैन् पेघे़रे़, हे़क्क्याङ् ए़स्तरे़ल्ले़ मे़त्तुबा कुइसिःक्के चोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.