ए़स्तर 3 - लिम्बुहामानरे़ यहुदिहाॽ मे़ङ्मासि कुजे़म्भन् 1 खे़न् एगाङ् अहासुरस हाङ्ङिल्ले़ अगागि हम्मदाताःल्ले़ कुस्सा हामानरे़ कुदाक्फान् फोसु पिरु हे़क्क्याङ् खुने़ॽ के़रे़क् कुन्जुम् कुन्देःङ्बा सुहाङ्युक्पाहाॽनुःल्ले़ यम्बा युक्ना पिरुआङ् साॽरिक् थोधोक्पा ताक्फाओ युक्खु॥ 2 कल्ले़चोगुल्ले़ हाङ्हिम्मोबा लाम्धेःप्पो के़वाॽबा के़रे़क् युक्साबाहाॽरे़ हाङ्ङिल्ले़ कुइङ्जाङ् कुइसिक् थुङ्बोॽहजॽ मे़युङ्सिङ्ल साबन् मे़भन्छिङ्ङाङ् हामाने़न् से़वा मे़मे़त्तुर मे़वये़॥ कर मोर्दकैःल्ले़ कम्भलॽरिक् थुङ्बोॽ हबत् युङ्सिङ्ङाङ् खे़न् से़वा मे़मे़त्तुन्॥ 3 थिक्ले़ङ् हाङ्हिम् लाम्धेःप्पो युक्साबाहाॽरे़ मोर्दकैन् मे़मे़त्तु, “खे़ने़ॽ थेआङ् हाङ्ङिल्ले़ कुइङ्जाङ्ङिन् के़भेःन्दुबाबे?” 4 खे़ङ्हाॽरे़ थिक्याःन्धक् खुने़ॽ हाबा खे़न् पाःन्निन् मे़मे़त्तु, कर खुने़ॽ खे़ङ्हाॽरे़ खुन्छिॽ पाःन्निन् मे़घे़प्सुन्॥ मोर्दकैःल्ले़ यहुदिआ पाःत्तुबा पाःन्निन् हामाने़ल्ले़ नासिथःत्तुबि मे़धःत्तुम्बि फाॽआङ् कुसिङ् निःप्मारे़ लागि खे़ङ्हाॽरे़ कन् पाःन्निन् हामाने़न् मे़जे़क्तु॥ 5 मोर्दकैन् थुङ्बोॽहजॽ युङ्सिङ्ङाङ् खुने़ॽ से़वा मे़मे़त्तुम्बा पाःन्निन् हामाने़ल्ले़ निङ्वाॽ खोसुआङ् खुने़ॽ आत्तातान्ने साॽरिक् कुसिक् पोगे़॥ 6 हामानरे़ मोर्दकैःल्ले़ कुसुवाङ्हाॽ हाःत्छिरे़त्छ के़लॽबा निङ्वाॽ खोसुआङ् खुने़ॽ मोर्दकैःल्लक् से़प्मा निङ्वाॽ मे़जोगुन्, कर अहासुरस हाङ्ङिल्ले़ के़रे़क् कुहाङ्जुम्मोबा काक् यहुदिहाॽ, मोर्दकैःल्ले़ कुमना यहुदिहाॽ मे़ङ्मासि लाम्ओमे़प्मा हेःक्तु॥ 7 अहासुरस हाङ्ङिल्ले़ हाङ्युक् चोगुबा थिबोङ्ङाङ् ये़त्छिगेक्पा तङ्बे थिक्सिगेक्पा ला, इग्र निसान लाओ, चे़म्भन्निन् के़प्मारे़ लागि ये़न् नु ला निःन्धो चोःक्से़ खे़ङ्हाॽरे़ तॽयाःन्सोन् मे़गे़सु॥ खे़न् तॽयाःन्सोन्निन् “पुर” मे़मे़त्तु॥ तॽयाःन्सोन्निन् थिबोङ्ङाङ् ने़त्छिगेक्पा ला, इग्र अदार लाओ थ्ये़॥ 8 खे़ब्याङ् हामाने़ल्ले़ अहासुरस हाङ्ङिन् मे़त्तु, “आदाङ्बारे़ के़हाङ्जुम्मोबा के़रे़क् ते़ङ्गप्हाॽओ मनाहाॽरे़ खुन्छिॽ लुम्मो लत्छा सुवाङ्समा मना मे़से़रे़आङ् मे़युङ्॥ खे़ङ्हाॽरे़ खुन्छिॽ साक्थिम्हाॽ वेॽ के़रे़क् सुवाङ्हाॽनुःल्ले़ मे़न्दङ्मनाबा चोक्॥ खे़ङ्हाॽरे़ आदाङ्बारे़ के़घासे़न् कुभाङ्हाॽ मे़न्इःत्तुन् मे़नाःत्तुन्ॽ, हाङ्ङिल्ले़ खे़ङ्हाॽ नुरिक् के़मे़त्तुसिल्ले़ थेआङ् के़न्योॽने़न्॥ 9 हाङ्ङिल्ले़ नुबा के़इःत्तुने़भग्र खे़ङ्हाॽ मे़ङ्मासिरे़ लागि लत्छा साप्मनाबा इङ्जाङ् लःत्ते़ॽ॥ आङ्गाॽ थिबोङ् हे़न्छिङ् सुक्वा युप्पा के़सुहाङ्युक्पाहाॽ पिरुङ्सिङ्ॽ हे़क्क्याङ् खे़ङ्हाॽरे़ खे़न् युप्पान् हाङ्थाःङ्ङो मे़युक्खुॽ॥” 10 खे़ब्याङ् हाङ्ङिल्ले़ खुने़ॽ कुस्वागेःप् एःप्साप्पिन् कुहुक्चोःक्कोलाम् फे़न्दुआङ् यहुदिहाॽरे़ खुन्छिॽ निङ्मि आगागि हम्मादाताःल्ले़ कुस्सा हामाने़न् पिरु॥ 11 हाङ्ङिल्ले़ हामाने़न् मे़त्तु, “खे़न् युप्पान् नु खे़न् मनाहाॽ खे़ने़ॽइन्ने मे़बोङ्ॽ, खे़ने़ॽ के़निङ्वाॽ पाःत्पाःत् खे़ङ्हाॽ मे़त्ते़से़ॽ॥” 12 खे़ब्याङ् थिक्सिगेक्पा ला थिबोङ्ङाङ् सुम्सिगेक्पा ये़न्नो हामाने़ल्ले़ हाङ्ङिल्ले़ कुसाप्ला के़साप्पाहाॽ उःत्तुसि॥ हे़क्क्याङ् हामाने़ल्ले़ कुइङ्जाङ् कुइसिक् ते़ङ्गप् थक्मा आम्भा खे़प्मोबा सक्सक् नु सुवाङ् थक्मा खुन्छिॽ आबाङे पाःन्दाङ्ङो मे़साप्तुआङ् हाङ्ङिल्ले़ कुहाङ्जुम्मोबा यम्बा सुहाङ्गे़म्बाहाॽ, वेॽ वेॽ तेःङ्गप्पोबा चुक्सा हाङ्हाॽ नु वेॽ वेॽ सुवाङ्बा तुम्म्याङ्हाङ्हाॽ इङ्जाङ् मे़हाक्तुसि—अहासुरस हाङ्ङिल्ले़ कुमिङ्ङो खे़न् मे़साप्तु, हे़क्क्याङ् मे़भाक्तुआङ् हाङ्ङिल्ले़ कुएःप्साप्पिन् खे़प्मो मे़युक्तुआङ् पत्छे़॥ 13 कम्भलॽरिक् अदार मे़प्मनाबा थिबोङ्ङाङ् ने़त्छिगेक्पा ला थिबोङ्ङाङ् सुम्सिगेक्पा ये़न्नो के़रे़क् यहुदिहाॽ, थाङ्बे़न्, काप्पोबा, मे़न्छुमा नु हिन्जाॽबित्छाॽहाॽ खक्पे़त् थिक्याःन्ले़ से़प्मासि हे़क्क्याङ् वरे़ङ्ले़ङ् खुन्छिॽ मिङ्ङे मामा पिमासि नु खे़ङ्हाॽरे़ खुन्छिॽ याङ्साकुन्धेहाॽ नाप्मासि इङ्जाङ् हाङ्जुम्मोबा के़रे़क् ते़ङ्गप्हाॽओ हाङ् इङ्साबाहाॽ मे़बाङ्घु मे़देसुसि॥ 14 खे़न् ये़न्निल्ले़ लागि यारिप् पोःक्खे़म्मे़ॽ फाॽआङ् खे़न् साप्मनाबा इङ्जाङ्ङिन् लत्छा लिङ्मनाबा इङ्जाङ् इसिःक् के़रे़क् ते़ङ्गप्पो उवा चोःक्माआङ् काक् मना सुवाङ्हाॽ इङ्घङ् पिमासि के़बोङ्बा वये़॥ 15 हाङ्ङिल्ले़ कुइजाःङ्ङो खे़न् हाङ् इङ्साबाहाॽ साॽरिक् हाराए आल्लोरे़ आल्लो मे़बे॥ खे़न् इङ्जाङ्ङिन् हाङ्पाङ् सुसनओआङ् इङ्मे़भोसु॥ हाङ्ङिन् नु हामाने़न् चे़ल्ले़क्सेॽ सेजःङ्वा थुङ्से़ युङ्ने़सि, कर सुसन ये़क्यक्को हयङ् किल्लिङ् पोःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.