ए़स्तर 2 - लिम्बुए़स्तरे़न् हाङ्मा पोङ्ॽ 1 आल्ल याङ्सि अहासुरस हाङ्ङिल्ले़ कुसिक् पोःक्मे़न् चिःक्तु खे़ब्याङ् खुने़ॽ वस्ति हाङ्मे़न् नु खे़ल्ले़ चोगुबा याःम्बक्किल्ले़ कुदक्ले़ङ्वाओ लःत्तुबा इजाङ्ङिल्ले़ कुयाःम्बेओ कुनिङ्वाॽ सुम्लॽरे़॥ 2 कल्ले़चोगुल्ले़ हाङ्ङिल्ले़ कुनिःत्ताङ्बा कुसे़वारोबाहाॽरे़ मे़मे़त्तु, “आदाङ्बारे़ के़लागि नुमा नुमा सिसागे़न् मे़न्छ्याहाॽ मे़गोःत्तुसिर॥ 3 हाङ्ङिल्ले़ के़हाङ्जुम्मोबा के़रे़क् ते़ङ्गप्हाॽओबा थोधोक्पा सुहाङ्युक्पाहाॽ के़रे़क् सिसागे़न् मे़न्छ्याहाॽ हाङ्पाङ् सुसनबा मे़न्छुमा युङ्मा हिम्मो ताःप्मासिरे़ लागि युक्तिङ् चोगे़से़ॽ॥ खे़ङ्हाॽरे़ आदाङ्बा पयम् हाङ्ङिल्ले़ मे़न्छुमा के़मनाहाॽ ओगे़मे़प्पा सिङ्गारु हेगेन् याःम्बक् चोःक्मा लक्पे़न् मे़बिरुर॥ हुःत्छिङ्मा चोःक्सिङ्मा पाःन्हाॽ खे़ङ्हाॽ मे़बिरुसिर॥ 4 आत्तिन् सिसागे़न् मे़न्छ्यान् पयम् हाङ्ङिल्ले़ साॽरिक् के़सिराॽथाङ्, हाबा खे़न्ने वस्तिःल्ले़ कुले़क्वाओ हाङ्मा चोगे़ॽ॥” कन् सुजान् हाङ्ङिल्ले़ कुसिराॽथाङे़, हे़क्क्याङ् खुने़ॽ खे़न् कुइसिक् चोगु॥ 5 हाङ्पाङ् सुसन्नो लत्छा मोर्दकै मिङ् के़वाःप्पा यहुदिधिक् वये़॥ खुने़ॽ याइररे़ कुस्सा, सिमिरे़ कुम्मे़न्छाॽ नु किसरे़ कुजक्मे़न्छाॽ बेन्यामिन थाःक्कोबा वये़, खे़न् किसे़न् चैं 6 बेबिलोनबा हाङ् नबुकदनेसरे़ल्ले़ यरुसले़मलाम् यहुदाबा हाङ् यहोयाकिने़न्नु सोरिक् ते़म्सुदेॽरुसिबाहाॽओ थिक्पा वये़॥ 7 मोर्दकैःल्ले़ आप्फेक् कुम्भङारे़ कुस्सा मे़न्छुमा हदस्सा, इग्र ए़स्तरे़न् से़सिःङ्मा चोगुआङ् वये़॥ ए़स्तररे़ कुम्बा कुम्मा मे़होःप्ते़॥ खुने़ॽ नुमासुक्मा नु नारुम्भुङ् के़गुमा चोगे़॥ खुने़ॽ कुम्बा कुम्मा माने़सिआङ् एगाङ् मोर्दकैःल्ले़ खुने़ॽ हिङ्घुआङ् वये़॥ 8 आल्ल हाङ्ङिल्ले़ कुइङ्जाङ् नु कुइङ्जाङ्ङिन् इङ्भन् पोःक्खे़, हे़क्क्याङ् हेगेःल्ले़ कुलक्पे़न्नो पिमारे़ लागि यरिक् मे़न्छ्याहाॽ हाङ्पाङ् सुसनओ मे़दारुसि, खे़ब्याङ् ए़स्तररे़न्नाङ् मे़न्छुमाहाॽ कम्ब्राङ् के़मे़प्पा हेगेःल्ले़ कुलक्पे़न्नो पिमारे़ लागि हाङ्हिम्मो मे़देॽरु॥ 9 खुने़ॽ निसुआङ् खे़न् सिङ्गारुन् साॽरिक् कुनिङ्वाॽ त्ये़, हे़क्क्याङ् ए़स्तरे़ल्ले़ खुने़ॽलाम् लुङ्माॽ तुक्मान् खोसु॥ खे़ल्ले़ खिमो ए़स्तरे़न् हुःत्छिङ्मा चोःक्सिङ्मा पाःन्हाॽ नु नुबा परिक्पा चामा कुजा लक्हाॽ तारु पिरु॥ हाङ्ङिल्ले़ कुहिम्मोलाम् मे़सेगुसिमा नुसि मे़न्छुमा से़वारोमाहाॽआङ् खे़ल्ले़ मुरा मे़त्तुसि॥ मे़न्छुमाहाॽ युङ्मा हिम्मो ए़स्तरे़न् नु खुने़ॽ के़भाॽमा से़वारोमाहाॽ नुबादे़न्नो मे़जत्तुसि॥ 10 ए़स्तरे़ल्ले़ खुने़ॽ कुहिम्सयङ् नु कुसुवाङ्ले़ याःम्बेओ हाःत्ताङ् मे़त्तुसिबा होःप्ते़, थेआङ्भे़ल्ले़ मोर्दकैःल्ले़ खुने़ॽ माॽसिङ्मा पाङ्घुआङ् वये़॥ 11 ए़स्तररे़ कुलागि थे पोङ्ल वाॽ फाॽआङ् कुसिङ् निःप्मारे़ लागि थिक्याःन्धक् मोर्दकैन् मे़न्छुमा युङ्मा हिम् लक्खुम्मोलाम् पोःक्खे़र लाङ्घेगे़आङ् वये़॥ 12 ला तुक्सि मारुक् निःङ्गेॽ हुःप्मासि नु ला तुक्सि फुङ्नाम् हुःप्मासि हे़क्क्याङ् चोःक्सिङ्मा पाःप्त्छिङ्मा वाःत्ति सामाहाॽरे़ चोःक्मासिआङ् मे़न्छुमाहाॽ यारिप् पोङ्मारे़ लागि निःन्धो के़बोङ्बा ये़म्मिन् थिबोङ्ङाङ् ने़त्छि ला वये़॥ ये़म् के़त्ताङ् एगाङ् के़रे़क् सिसागे़न् मे़न्छ्याहाॽ अहासुरस हाङ्ङे़ओ पाःल्लोबा पेःक्मा ये़म् मे़घोसुबा वये़॥ 13 थिक्थिक् लॽरिक् सिसागे़न् मे़न्छ्यान् हिम्मोलाम् हाङ्हिम्मो पेःक्किल्ले़ नाःक्तुबा थेसाङ् खुने़ॽ तेॽमा मे़भाःक्तुआङ् वये़॥ 14 खुने़ॽ युःन्छिक् हाङ्ङिल्ले़ कुहिम्मो पेःक्मा के़बोङ्बा वये़ हे़क्क्याङ् चक्मेःत्हाॽ कम्ब्राङ् के़मे़प्पा हाङ्ङिल्ले़ कुसिङ्गारु सास्गजरे़ कुयुक्को वाॽमारे़ लागि मे़न्छुमा युङ्मा हिम्मोबा वेॽ लक्को नुःङ्मा पेःक्मा के़बोङ्बा वये़॥ हाङ्ङिन् कुनिङ्वाॽ ताआङ् खे़न् कुमिङ्ङोलाम् मे़न्उःत्ते थारिक् खुने़ॽ याम्मो हाङ्ङे़ओ पेःक्मा मे़ङ्घोःम्ना वये़॥ 15 आल्ल मोर्दकैःल्ले़ सा चोगुमा, खुने़ॽ कुम्भङा अबिहेलरे़ कुस्सा ए़स्तरे़न् हाङ्ङे़ओ पेःक्मा कुये़म् त्ये़, खे़ब्याङ् मे़न्छुमाहाॽ कम्ब्राङ् के़मे़प्पा लक्पे़न्साबा हाङ्ङिल्ले़ कुसिङ्गारु हेगेःल्ले़ मे़त्तुबा पाःन्हाॽनुःल्ले़ वेॽ ए़स्तररे़ थेआङ् मे़नाःक्तुन्॥ ए़स्तरे़न् के़निबा के़रे़क्ले़ खुने़ॽ खुन्छिॽ सिराॽथाङे़॥ 16 अहासुरस हाङ्ङिल्ले़ हाङ्युक् चोगुबा नुसिगेक्पा तङ्बे थिबोङ्गेक्पा ला, इग्र तेबेत लाओ ए़स्तरे़न् हाङ्हिम्मो अहासुरस हाङ्ङे़ॽओ मे़देॽरुआङ् मे़बे॥ 17 हाङ्ङिल्ले़ वेॽ के़रे़क् मे़न्छुमाहाॽनुःल्ले़ ए़स्तरे़न् नानुॽरु॥ हे़क्क्याङ् वेॽ सिसागे़न् मे़न्छ्याहाॽनुःल्ले़ खुने़ॽ हाङ्ङोलाम् लुङ्माॽ तुक्मा नु लुङ्गुम् खोसु॥ हाङ्ङिल्ले़ खुने़ॽ कुधे़गेःक्को हाङ्मा तिच खुःक्तु, हे़क्क्याङ् वस्तिःल्ले़ कुले़क्वाओ खुने़ॽ कुलागि हाङ्मा चोगु॥ 18 खे़न् एगाङ् हाङ्ङिल्ले़ के़रे़क् कुसुहाङ्युक्पाहाॽ नु कुयुक्साबाहाॽ ए़स्तररे़ कुमिङ्सोओ लत्छा यम्बा साभःङ्जा चाःत्तुसि॥ खुने़ॽ ते़ङ्गप् ते़ङ्गप्हाॽओ नाःम्सिङ्मा ये़न् उवा चोगुआङ् हाङ्ङिल्ले़ पिमासि के़बोङ्बा हाङ्से़म् मिक्तोःक्हाॽ पिरुसि॥ 19 निसिगेक्पाले़ङ् सिसागे़न् मे़न्छ्याहाॽ मे़भुक्खुसिल्ले़ मोर्दकैन् हाङ्ङिल्ले़ कुहिम्मोबा यम्बा लाम्धेःत्तो ये़बे़॥ 20 मोर्दकैःल्ले़ कुइङ्जाङ् कुइसिक् ए़स्तररे़ कुहिम्सयङ् नु कुसुवाङ्बा पाःन्निन् माॽरुआङ् वये़॥ मोर्दकैओ वये़ल्ले़ खे़ल्ले़ इङ्जाङ् पिरुबा हे़क्केए ए़स्तररे़ चोगुरो॥ मोर्दकैःल्ले़ हाङ्ङिन् से़ःप्तु 21 थिक्यान् मोर्दकैन् हाङ्हिम्मोबा यम्बा लाम्धेःत्तो वये़बा ये़म्मो हाङ्ङिल्ले़ कुलाम्धेःत्तो के़ले़क्सिङ्बार के़ये़प्पा सुहाङ्युक्पा ने़त्छि, बिग्नाथा नु तेरेसे़न् खुन्छिॽ याःक्ले़ॽरे़आङ् अहासुरस हाङ्ङिन् से़प्मा चे़म्भन् चोगे़सु॥ 22 कन् पाःन्निन् मोर्दकैःल्ले़ निङ्वाॽ खोसुआङ् हाङ्मा ए़स्तरे़न् चे़क्तु॥ ए़स्तररे़ मोर्दकैःल्ले़ कुमिङ्ङिन् पाःत्तुआङ् खे़न् पाःन्निन् हाङ्ङिन् चे़क्तु॥ 23 कन् पाःन्निन् साॽमा नु कुसिङ् निःप्मा याःम्बक् पोःक्खे़आङ् से़क्खा पोःक्खे़बा निःन्धो पोःक्खे़, हे़क्क्याङ् हाङ्ङिल्ले़ खे़न् ने़प्फु मनाहाॽ सिङ्ङो मे़भोन्दु मे़से़रुसिर याःन्दुसि॥ कन् पाःन्हाॽ हाङ्ङिल्ले़ कुदगि साप्मुःन्धुम्मो मे़साप्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.