ए़स्तर 1 - लिम्बुहाङ्मा वस्तिन् कुयुक्नालाम्बा लन् 1 कॽयो पोधक् पोःक्खे़आङ् के़बप्पा पाःन्हाॽ अहासुरस हाङ्ङिल्ले़ कुये़म्मो पोःक्खे़आङ् वये़॥ भारत लाजेॽलाम्माङ् कत्ना कुस लाजेॽ थारिक् १२७ ते़ङ्गप्हाॽओ हाङ्युक् के़जोःक्पा हाबा खे़न् अहासुरसे़न् वये़॥ 2 खे़न् ये़म्मो खुने़ॽ कुहाङ्पाङ् सुसन्नो के़युङ्बा कुहाङ्युक्नाओलाम् युक् चोगुआङ् वये़॥ 3 खुने़ॽ हाङ्युक् चोगुबा सुम्सिगेक्पा तङ्बेओ खुने़ॽ के़रे़क् कुदुम्म्याङ्हाॽ नु कुसुहाङ्युक्पाहाॽ लत्छा यम्बा साभःङ्जा चाःत्तुसि॥ फारसि नु मादि लाजेॽबा थक्सुबाहाॽरे़ खुन्छिॽ लाम्लोबाहाॽ, मिङ्सोदाङ्बाहाॽ हे़क्क्याङ् ते़ङ्गप् ते़ङ्गप्पोबा तुम्म्याङ्हाङ्हाॽ खुने़ॽ कुदगि मे़जुप्से़आङ् मे़वये़॥ 4 खुने़ॽ १८० ये़न् थारिक् खुने़ॽ कुहाङ्जुम्मोबा कुयम्मा कुगेःम्मोबा याङ्साकुन्धे ओसेःन्धाङ् चोगु हे़क्क्याङ् के़रे़क् कुहाङ्वा कुमाङ्वा नु कुमिमिदिङ्ङिन् ओसेःन्धाङ् चोगु॥ 5 खे़न् ये़न्हाॽ मारे़आङ् एगाङ् हाङ्ङिल्ले़ खुने़ॽ कुहाङ्पाङ् सुसनबा यम्बा नु चुक्पा के़रे़क् मनाहाॽ साभःङ्जा चाःत्तुसि॥ खे़न् साभःङ्जान् हाङ्ङिल्ले़ कुहाङ्हिम्मोबा फुङ्इक्को नुसि ये़न् थारिक् मुक्ते़आङ् ने़स्से़॥ 6 खे़न् फुङ्इक्को नैनासुत् चिरिक्किल्ले़न् कुभरा नु हिःक्कोःम्कोःम्बा फोःन्दाहाॽ मे़भोःन्दुआङ् मे़घेःक्खुआङ् पत्छे़, खे़ङ्हाॽ फदाङ्बा नु परान्ला चाःम्बा इदाःक्हाॽरे़ वरे़ङ्ले़ङ्बा लुङ् सित्लाङ्हाॽओ के़बप्पा युप्पा पाःङ्गिहाॽनु इमे़घेःक्खुआङ् पत्छे़॥ खे़प्मो कुभुङ् लक्मनाबा कुहे़ःत्ला, कुभरा, माक्ताङ्बा लुङ् नु वेॽ कुमे़न् के़घिःक्पा लुङ्हाॽरे़ मे़लोःत्तुबा खाम्बाङ् सम्धाङ् साम्म्याङ् नु युप्पा युक्नादे़न्हाॽ मे़युक्खुआङ् युङे़॥ 7 थिक् नु वेॽ मे़न्दङ्मनाबा एःक्समा परिक्पा साम्म्याङ् चल्लाङ्ना खोर्याहाॽओ चे़ल्ले़क्सेॽ सेजःङ्वा मे़हाःत्तुसि॥ हाङ्ङिल्ले़ पिरुसिबा चे़ल्ले़क्सेॽ सेजङ्वान् हाङ्ङिल्ले़ कुनुॽमा कुदामाओलाम् वे़त्ते़सरे़ वये़॥ 8 खे़प्मो हाःत्ताङ् कुसिराॽ मे़न्धाङ्ङे थुङ्बाङ्मा थिम् होःप्ते़॥ के़रे़क् मनाहाॽरे़ खुन्छिॽ सिराॽथाङ्मा नु मे़न्धाङ्मा पाःन्निन् कुसिङ् निःप्मा पोङ् हे़क्क्याङ् मनाहाॽरे़ खुन्छिॽ थुङ्धुङ् पिमासि पोङ् फाॽआङ् हाङ्ङिल्ले़ सेजःङ्वा के़हाबा के़रे़क् से़वारोबाहाॽ इङ्जाङ् पिरुसिआङ् वये़॥ 9 हाबा खे़न् ये़म्मो हाङ्मा वस्तिःल्ले़आङ् अहासुरस हाङ्ङिल्ले़ए कुहाङ्हिम्मो मे़न्छुमाहाॽ लत्छा यम्बा साभःङ्जा पिरुसि॥ 10 नुसिगेक्पा ये़न्नो आल्ल हाङ्ङिल्ले़ चे़ल्ले़क्सेॽ सेजङ्वान् थुङुआङ् कुजाःत्चाःप्पा लःन्दे़आङ् यागे़, खे़ब्याङ् खुने़ॽ कुहिम्मो तङ्मा हिमा याःम्बक् के़जोःक्पा नुसि सिङ्गारु से़वारोबाहाॽ, महुमान, बिज्था, हर्बोना, बिग्ता, अबगथा, जेथेर नु कर्कासे़न्, 11 मनाहाॽ नु सुहाङ्युक्पाहाॽरे़ खुन्छिॽ तगि वस्ति हाङ्मे़ल्ले़ कुघे़म्सिङ्मान् ओसेःन्धाङ् चोःक्मारे़ लागि हाङ् तिचःन् खुःक्ते़म्मे़ॽआङ् तारे़म्मे़ॽ फाॽआङ् मुरा मे़त्तुसि, थेआङ्भे़ल्ले़ खुने़ॽ साॽरिक् नुमा चोगे़॥ 12 कर खे़न् सिङ्गारुहाॽलाम् मे़मे़त्तुबा हाङ्ङिल्ले़ कुइङ्जाङ्ङिन् खे़म्माआङ् तामा हाङ्मा वस्तिन् मे़दे़न्दे़न्॥ कल्ले़चोगुल्ले़ हाङ्ङिन् साॽरिक् कुसिक् पोगे़आङ् कुसाक्के़न्निल्ले़ मि पोःक्खे़॥ 13 हाङ्ङिल्ले़ अक्तङ्बा ये़प्ले़क्किल्ले़ कुयाःम्बेओ हाङ् साक्थिम् कुइसिक् कुभाङ् नु खासे़न् के़ले़बा के़निबा हे़क्क्याङ् सिक्कुम्निबा सुजासाबाहाॽ सुजा नाःक्तुसि॥ आल्ल आक्खे चोःक्मा के़लॽबा पाःन्निन् खे़ङ्हाॽरे़ मे़ले़सुआङ् वये़॥ 14 खे़ङ्हाॽ आल्लोबा याक्नाम् वयाम् कुसिङ् के़निःप्पा फारस नु मादिबा नुसि सुहाङ्युक्पा कर्सेना, सेथार, अद्माथा, तर्सिस, मेरेस, मर्सेना नु ममुकान मे़वये़॥ खे़ङ्हाॽ हाङ्ङिल्ले़ कुनिःत्ताङ्बा मे़वये़॥ खे़ङ्हाॽ हाङ्ङिल्ले़ कुदगि लाःप्मा तामा युक् के़गप्पा मे़वये़॥ खे़ङ्हाॽरे़ हाङ्जुम्मो थोधोक्पा युक्ना मे़घोसुआङ् वये़॥ 15 हाङ्ङिल्ले़ खे़ङ्हाॽ मे़त्तुसि, “सिङ्गारुहाॽलाम् पिमनाबा अहासुरस हाङ्ङिल्ले़ कुइङ्जाङ्ङिन् खे़म्मा मे़दे़न्दे़म्बाल्ले़ चोगुल्ले़ हाङ्मा वस्तिन् आक्खे मे़प्मा पोङ्बे? कुभाङ्ङिल्ले़ थे़मा पाःत्तुबे?” 16 खे़ब्याङ् ममुकाने़ल्ले़ हाङ्ङिन् नु सुहाङ्युक्पाहाॽरे़ खुन्छिॽ तगि कन् नुगप्पिन् पिरुसि, “हाङ्मा वस्तिःल्ले़ हाङ्ङिन्लक् मेःन्दुक् कर अहासुरस हाङ्ङिल्ले़ के़रे़क् कुदे़ःङ्गप्पोबा काक् सुहाङ्युक्पाहाॽ नु मनाहाॽ कुनामे़न्छाॽ मे़त्तुसि॥ 17 हाङ्मे़ल्ले़ चोगुबा याःम्बक्किन् के़रे़क् मे़न्छुमाहाॽरे़ निङ्वाॽ मे़घोसुॽ, हे़क्क्याङ् खे़ल्ले़चोगुल्ले़ खे़ङ्हाॽरे़ खुन्छिॽ ये़म्बाहाॽ नामे़न्छाॽरुसिन्॥ खे़ङ्हाॽरे़ मे़बाःत्तुॽ, ‘अहासुरस हाङ्ङिल्ले़ हाङ्मा वस्तिन् कुबेसाङ् ताःप्मा इङ्जाङ् पिरुसिआङ् वये़, कर खुने़ॽ मे़द्ये़ने़न्॥’ 18 हाङ्माल्ले़ कुसुत्नाःल्ले़ कुयाःम्बेओ के़घे़म्मा फारस नु मादिबा यम्बा हिम्सयङ्हाॽओबा मे़न्छुमाहाॽरे़ हाङ्ङिल्ले़ के़रे़क् कुसुहाङ्युक्पाहाॽ आइन्बा ये़न्नो कन् पाःन्निन् मे़मे़त्तुसिॽ, हे़क्क्याङ् कल्ले़चोगुल्ले़ कुनामे़न्छाॽ मे़प्मा नु सिक्पोःक्मे़न् पोरो॥ 19 “हाङ्ङिल्ले़ नुबा के़इःत्तुने़भग्र, ‘वस्तिन् याम्मो आभे़ल्ले़आङ् अहासुरस हाङ्ङिल्ले़ कुदगि ओःन्धाक्सिङ्मा मे़घोने़न्ल’ फाॽआङ् आदाङ्बारे़ लत्छा हाङ्इङ्जाङ् लःत्ते़ॽ हे़क्क्याङ् खे़न् फारसि नु मादिहाॽरे़ खुन्छिॽ कुभाङ्थिम्मो आभे़ल्ले़आङ् मे़ल्ले़ङ्मना पोङ्ल साप्ते़ॽ॥ हे़क्क्याङ् हाङ्ङिल्ले़ वस्तिःल्ले़ कुले़क्वाओ खुने़ॽनुःल्ले़ आल्लसाङ् सुम्बोधासामा मे़न्छुमान् हाङ्मे़ल्ले़ कुयुक्नान् पिरुर॥ 20 कम्भलॽरिक् आल्ल कन् हाङ् इङ्जाङ्ङिन् हाङ्जुम्मोबा के़रे़क् पिसाङ् मे़घे़प्सुॽ, खे़ब्याङ् यम्बा नु चुक्पा के़रे़क् मे़न्छुमाहाॽरे़ खुन्छिॽ ये़म्बाहाॽ इङ्धाङ् मे़बिरुसिॽ॥” 21 ममुकानरे़ कुसुजान् सुहाङ्युक्पा के़रे़क्ले़ नुबा मे़लेःत्तु, हे़क्क्याङ् खुने़ॽ तोःन्दुबा सुजान् हाङ्ङिन् चोःक्मा ते़न्दे़॥ 22 खे़ब्याङ् के़रे़क् ये़म्बित्छाहाॽरे़ खुन्छिॽ के़रे़क् हिम्सयङ्ङो युक् मे़जोगुर फाॽआङ् हाङ्जुम्मोबा काक् पिसाङ्बा ते़ङ्गप् थक्मा खुन्छिॽ आप्फेक् आप्फेक् सक्सक् कुइसिक् नु के़रे़क् मे़न्छाम् सुवाङ्हाॽरे़ खुन्छिॽ आप्फेक् पाःन्दाङ्ङो सक्इङ्घङ् साप्पेःत्ताहाॽ मे़हाक्तुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.