खाहुन्साबा 9 - लिम्बु1 कन् काक् पाःन्नो आङ्गाॽ नुरिक् नु साॽरिक् निङ्वाॽ इःत्तुङ् हे़क्क्याङ् निङ्वाॽफुमाङ्ङिल्ले़ सिक्कुम्निबा नु साम्योबा मनाहाॽरे़ खुनिॽ चोःक्मा याःम्बक्किन्, खे़ङ्हाॽरे़ खुनिॽ मिःम्जिन् नु चिःप्मे़न्नाङ् खुने़ॽ युक्को कत्तु फाॽआङ् निसुङ्॥ आबाङे ताये़म्मो थे वाॽ, खे़न् आत्तिल्ले़आङ् मे़निसुन्॥ 2 खे़ल्ले़ थेआङ् एॽए मे़से़न्दुन्॥ साम्योबा नु लायोबा, नुबा नु ताप्फे़ःम्बा, सुत्थो नु आसुत्थो सिदुङ्जभा के़दोम्बा मना नु मे़न्दोःम्मनाबा के़रे़क् तॽयाःन्निन् लत्छा परिक्पा चोक्लो, लायोबान्नुःल्ले़ नुबा मनाःल्ले़ कुलागि थेआङ् इन्धा होप्लो, माङ्हे़क् मे़न्जोःक्मनाबान्नुःल्ले़ के़जोःक्पाल्ले़ कुलागि कुजक् थेआङ् होप्लो॥ 3 के़रे़क्ले़ तॽयाःन्निन् लत्छा परिक्पा चोक् हे़क्क्याङ् कन्नाङ् इक्सादिङ् खाम्बेःक्मो के़बोङ्बार के़बप्पा याःम्बक्हाॽ हे़क्केए ताप्फे़ःम्बा चोक्॥ खाम्बेःक्मो मनान् वाॽर थारिक् खे़ल्ले़ कुनिङ्वान् कुॽइभे़म्मा नु नाङ्नाङ् थाप्थाप् के़लॽबा चोक् खे़ब्याङ् खे़न् हक्चघत् सिघे़त्लो॥ 4 कर कुहिङ्वे़त्हाॽरे़ खुनिॽ इक्सा खाम्बेःक्मो के़हिङ्बाआङ् के़वाॽबा मनाःल्ले़ कुलागिग कुभा निङ्साङ् चोःक्मा लाम् वाॽ॥ लत्छा कुहिङ्वे़त् ख्याबान् के़सिबा केबान्नुःल्ले़ नुबारो॥ 5 थेआङ्भे़ल्ले़ के़हिङ्बाहाॽरे़ आनिॽ आसि के़लॽबान् मे़निसुरो, कर चेःल्ले़ थेआङ् मे़निसुन्लो॥ खे़ङ्हाॽरे़ खोमा के़बोङ्बा थुम्घो थेआङ् होप्लो, खे़ङ्हाॽरे़ खुन्छि निङ्वाॽ सुम्मिन्नाङ् निङ्वाॽ मे़भेःत्छुसिरो॥ 6 खे़ङ्हाॽरे़ खुनिॽ मना लुङ्माॽ तुक्मा, चिःप्मा नु इःत्छिङ्मान् खुन्छिॽनुए सिआङ् पेःक्लो॥ खे़ङ्हाॽरे़ याम्मो आप्फाल्ले़आङ् इक्सादिङ् खाम्बेःक्मो के़बोङ्बार के़बप्पा याःम्बक्को लक् मे़ङ्घोसुन्लो॥ 7 आबाङे लाम्मो तगि पेगे़म्मे़ॽ, कुजा चे़म्मे़ॽआङ् सःत्ते़म्मे़ॽ, सेजःङ्वा थुङे़म्मे़ॽआङ् निङ्वाॽ तासाम्मे़ॽ॥ निङ्वाॽफुमाङ्ङिन् खे़ने़ॽ के़याःम्बक्को ते़न्दे़ चुरे़आङ् वाॽ॥ 8 सदादिङ् कुभरा चाङ् चाक्खे़ हे़क्क्याङ् के़धेगेःक्को निःङ्गेॽ हुःत्ते़ॽ॥ 9 आफाल्ले़ थारिक् निङ्वाॽफुमाङ्ङिल्ले़ खे़ने़ॽ कन् इक्सादिङ् खाम्बेःक्मो कन् थेनाधेबा हिङ्मे़न् के़बिॽ, खे़न् थारिक् आबाङे मिःम् के़मे़त्तुमा मे़लिङ्गे़न् के़मेःत्तिन्नु निङ्वाॽ तामा हिङ्मन्नो वये़ॽ॥ थेआङ्भे़ल्ले़ खे़ने़ॽ के़रे़क् स्याङ्मे़न्दाङ्बा के़याःबक्के़ल्ले़ कुले़क्वाओ खे़ने़ॽ के़घोमा पान् खे़म्म्याक्लक्लो॥ 10 खे़ने़ॽ थे याःम्बक् के़जोगुॽ, खे़न् पाःन्नो चाॽरिक् स्याङ्मे़न्दाङ् चोगे़ॽ थेआङ्भे़ल्ले़ के़सिबा लाजेॽओ कुभा याःम्बक्, निङ्वाॽ इःप्मा, ने़हिनिङ्वाॽ इग्र सिक्कुम् निङ्वाॽ थेआङ् होप् हे़क्क्याङ् खे़ने़ॽ खे़प्मोए के़बेःक्ल के़बत्॥ 11 नाम्मिल्ले़ कुसिगाङ् आङ्गाॽ वेॽ पाःन्धिक्काङ् निसुङ्ङाङ् वाॽरो॥ लोःक्चाःत्तो हारा के़जाप्पार के़लोःक्पाहाॽरे़ लोःक्चाःत्तिन् मे़न्नाःन्दुन्लो हे़क्क्याङ् मुक्के़गुबाहाॽरे़आङ् ए़त्ले़ङ् थङ्ङिन् मे़न्नाःन्दुन्लो॥ सिक्कुम्निबा मनाहाॽरे़ सदादिङ् साप्पोक् हिङ्मा हिम्ब्राम् चोःक्मा मे़न्छुक्तुन्लो, चाःप्पा मनाहाॽरे़ सदादिङ् याङ्साकुन्धे थक्मा मे़न्छुक्तुन्लो हे़क्क्याङ् सुम्बोधाबा मनाहाॽ सदादिङ् यम्बा ताक्फेओ मे़ङ्गे़त्ने़न्लो॥ ये़म्मिन् नु सुये़म्मिन् के़रे़क् सम्धाङ् तामा सुक्लो॥ 12 खे़न् के़साक्पा ये़म्मिन् आफाल्ले़ ताःॽ, खे़ने़ॽ के़न्निसुन्लो मे़न्इःत्तेबा ये़म्मो पुःन् इजोओ थाबा हे़क्के इग्र ङाःन् योःङ्ङो थाबा हे़क्के हक्चघत् मनाहाॽ सम्धाङ् मे़क्मान् तारो॥ अदङ्नुःल्ले़ सिक्कुम्निङ्वान् यम्बा 13 आङ्गाॽ लत्छा वेॽ पाःन्धिक्काङ् निसुङ्ङाङ् वाॽ, कन् इक्सा खाम्बेःक्मो सिक्कुम्दिङ् निङ्वान् आक्खेलॽरिक् मे़इःत्तुॽ, खे़ल्ले़न् लत्छा नुबा कुबि निसुङ्ङाङ् वाॽ॥ 14 लत्थिक् चुक्सा ये़क्यक् ने़स्से़, खे़न् ये़क्यक्को सुःल्लिक् मना मे़वये़॥ लत्थिक् के़धुम्बा हाङ्ङिल्ले़ ये़क्यक्किन् थङ्ङो फत्तु॥ ये़क्यक्किन् कब्रिङ् कबु हे़क्क्याङ् लुङ्धाक्किन् लुःन्दुआङ् खे़न् सिगाङ् लाःप्मा यारिप् पोःक्खे़॥ 15 खे़न् ये़क्यक्को लत्थिक् याङ्गे़साॽबा मना वये़ कर खे़न् साॽरिक् चाःप्पा चोगे़ खे़ल्ले़ कुसिक्कुम् निङ्वाःल्ले़ ये़क्यक्किन्ने ताङ्से़ःप्तु॥ कर खे़न् याङ्गे़साॽबा मनान् आत्तिल्ले़आङ् खे़न् निङ्वाॽ मे़इःत्तुन्॥ 16 थुम्मानुःल्ले़ सिक्कुम्निङ्वान् यम्बा फाॽआङ् आङ्गाॽ सदादिङ् पाःत्तुङ्ॽ कर याङ्गे़साॽबे़न्नाङ् सिक्कुम्निबा पोङ्मा सुक् फाॽआङ् आत्तिल्ले़आङ् मे़इःत्तुन् इग्र खे़ल्ले़ कुबाःन्नो आत्तिल्ले़आङ् निङ्वाॽ मे़बिरुन्॥ 17 करसाङ्, अदङ्हाॽरे़ खुनिॽ लुम्मो के़अःक्पार के़बाःप्पा हाङ्युक्पाल्ले़ कुबाःन्निन् खे़म्मानुःल्ले़ग स्वाःत्ताङ् सिक्कुम्निबा मनाःल्ले़ कुबाःन्निन् खे़म्मा नुबारो॥ 18 फे़जाभे़जुम्नुःल्ले़ यरिक् सिक्कुम्दिङ् निङ्वाःल्ले़ नुबा याःम्बक् चोगुरो कर लत्छा लायोबाल्ले़ यरिक् नुबा पाःन्हाॽ मे़ङ्मा सुक्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.