खाहुन्साबा 8 - लिम्बु1 सिक्कुम्साबा मनाःल्ले़रक् पाःन्ने़ल्ले़ कुबेन् कुसिङ् निःत्तुरो॥ सिक्कुम्दिङ् निङ्वाःल्ले़ खुने़ॽ कुनारान् से़दिङ्दिङ् ओःत्ल चोगुरो हे़क्क्याङ् खे़ल्ले़ खागे़माक्पा कुनारान् खे़त्तुरो॥ हाङ्ङिल्ले़ कुइङ्जाङ्ङिन् खे़प्से़ॽ 2 आङ्गाॽ पाःत्तुङ्ॽ, हाङ्ङिल्ले़ कुइङ्जाङ्ङिन् चोगे़ॽ, खे़न् चोगे़ॽ, थेआङ्भे़ल्ले़ खे़ने़ॽ निङ्वाॽफुमाङ्ङिल्ले़ कुदगि माङ्हे़क् के़जोगुआङ् के़वाॽ॥ 3 खे़ने़ॽ के़साक्पो थामानुःल्ले़ तगि हाङ्ङिल्ले़ कुदगिलाम्बा पेगे़ॽ थेआङ्भे़ल्ले़ खुने़ॽ थेःन् कुसिराॽथाङ्, हाबा खे़न्ने चोगुॽ॥ 4 हाङ्ङिल्ले़ याःम्बक्किन् युक्नु चोगुॽबाल्ले़ चोगुल्ले़, “खे़ने़ॽ थे के़जोगुर के़वाॽ?” फाॽआङ् हाःत्ले़ खुने़ॽ से़न्लाप्मा सुक्तुबे॥ 5 खुने़ॽ कुइङ्जाङ्ङिन् आभे़ल्ले़ थारिक् के़घे़प्सुॽ खे़म्बा थारिक् खे़ने़ॽ ताप्फे़ःम्बा पान् के़न्दुमुन्लो हे़क्क्याङ् सिक्कुम्निबा मनाःल्ले़ याःम्बक् चोःक्मा नुबा ये़म् नु याःम्बक् चोःक्मा लाम् कुसिङ् निःत्तुरो॥ 6 मनाःल्ले़ कुदुक्खेःन् खुने़ॽ कुसम्धाङ् के़लिःप्पा पोङ्लो हे़क्केसाङ् के़रे़क् याःम्बक् चोःक्मा नुबा ये़म् नु याःम्बक् चोःक्मा के़दङ्बा लाम् वाॽरो॥ 7 के़दाबा ये़म्मो थे पोङ्ॽ, आनिॽ आत्तिल्ले़आङ् आन्निसुम्मिन्लो हे़क्क्याङ् आत्तिल्ले़आङ् आनिॽ खे़न् मे़प्मा आन्छुक्ऩेल्लो॥ 8 सिमे़न्लाम्बा आत्तिन्नाङ् आबाङे ताङ्से़ःप्सिङ्मा मे़सुक्ने़न्लो इग्र कुसिमा ये़न्निन् एगाङ् चप्मा मे़सुक्तुन्लो॥ थङ् पोङ्बा ये़म्मो मनाहाॽ हिम्मो पाङ्मा मे़ङ्घोसुन्छिन्बा हे़क्के ताप्फे़ःम्बा के़जोःक्पाहाॽ कुॽइभे़म्मे़ल्ले़ मे़ले़रुन्छिन्लो॥ 9 कन् इक्सादिङ् खाम्बेःक्मो के़बोङ्बार के़बप्पा याःम्बक्हाॽ निङ्वाॽ इःत्तुङ्ङिल्ले़ आङ्गाॽ कन्हाॽ के़रे़क् निसुङ्॥ कुभा मनाहाॽरे़ खुनिॽ हुक्को युक् वाॽ हे़क्क्याङ् खुनिॽ हुक्को वेॽ मनाहाॽरे़ ये़त्तुक्खे मे़दुमु॥ 10 हे़क्क्याङ् कुॽइगे़भे़म्बा मनाहाॽ मे़लुप्तुसिबा आङ्गाॽ निसुङ्सिङ्आङ् वाॽ॥ खे़ङ्हाॽ सेसेदे़न्नो मे़द्ये़ मे़बेर मे़वये़ हे़क्क्याङ् खुन्छिॽ मे़वये़बा ये़क्यक्को खे़ङ्हाॽरे़ ताप्फे़ःम्बा याःम्बक् मे़जोगु, हाबा खे़न् ये़क्यक्को खे़ङ्हाॽरे़ खुनिॽ नाराफोमा याःम्बक् पोःक्खे़आङ् वये़॥ कन्नाङ् हने़ थेनाधेरे़त्छ॥ 11 लायोल्ले़ खुम्दिङ् खिमो मे़बोङ्ने़निल्ले़ मनाहाॽरे़ फे़न्याःम्बक् चोःक्मा पान् मे़इःत्तुॽ॥ 12 यरिक् फे़न्याःम्बक् के़जोःक्पाआङ् लायो के़जोःक्पा मनान् काप्पोबा तुम्ल थारिक् हिङ्ॽ॥ हे़क्केसाङ् आङ्गाॽ निसुङ् कि निङ्वाॽफुमाङ्ङिन् किप्म़ेल्ले़, के़रे़क् पाःन्हाॽ नुबा पोङ्ॽ, 13 कर ताक्के़भे़ॽबाहाॽरे़ङ्ग नुबा मे़बोङ्ने़न्॥ हे़क्क्याङ् खे़ङ्हाॽ मे़जुःक्लए मे़सि मे़घे़त्॥ खे़ङ्हाॽरे़ खुनिॽ हिङ्मे़न् साम्म्रिःप्पा कुइसिक् चोक्॥ थेआङ्भे़ल्ले़ खे़ङ्हाॽरे़ निङ्वाॽफुमाङ्ङिन् मे़ङ्गिरुन्॥ 14 इक्सादिङ् खाम्बेःक्मो थे पोङ्ल पत्, खे़न् ओमे़त्ते़म्मे़ॽ, कुभा ये़म्मो ताक्के़भे़ॽबाल्ले़ खोमा के़बोङ्बा खुम्दिङ्ङिन् साम्योबाल्ले़ खोसुॽ हे़क्क्याङ् साम्योबाल्ले़ कुयाःम्बक्किल्ले़ हाङ्से़म्मिन् ताक्के़भे़ॽबाल्ले़ खोसुॽ॥ कन्नाङ् थेनाधे हने़रक् फाॽआङ् आङ्गाॽ पाःत्तुङ्ॽ॥ 15 खे़ल्ले़चोगुल्ले़ मनाःल्ले़ सुक्खेवा चोःक्मा पोङ्ॽ फाॽआङ् आङ्गाॽ से़क्खाए नसान् चोगुङ्ङाङ् वाॽ थेआङ्भे़ल्ले़ हिङ्मन्नो चामा, थुङ्मा नु निङ्वाॽ तामाआङ् वाॽमा पेःक्मानुःल्ले़ वेॽ नुबा पान् थेआङ् होप्॥ निङ्वाॽफुमाङ्ङिल्ले़ मे़न्छाम् याप्मिहाॽ कन् इक्सा खाम्बेःक्मो पिरुसिबा हिङ्मन्नो सःप्मे़न् खे़ङ्हाॽरे़ खुन्छि याःम्बुदिक् मे़जोगुबे़न्नु पेःक्लो॥ 16 आप्फाल्ले़साङ् सिक्कुम्दिङ् निङ्वान् कुसिङ् निःप्मारे़ लागि निङ्वाॽ पिरुङ् हे़क्क्याङ् इक्सा खाम्बेःक्मो थेधे पोङ्ल पत् खे़न् निसु, से़न्दिक् ले़न्दिक् मे़न्इम्मे आवाॽसाङ् 17 निङ्वाॽफुमाङ्ङिल्ले़ चोगुबा याःम्बक्किन् आङ्गाॽ इःत्तुङ्ङिल्ले़, निङ्वाॽफुमाङ्ङिल्ले़ कुयाःम्बक्किन् नाम्मिल्ले़ कुसिगाङ् आनिॽ आप्फाल्ले़आङ् कुसिङ् निःप्मा आन्छुक्तुम्मिन्॥ मनान् के़ले़बा पोङ्मा तम्सिङ् चोःक्साङ् खे़न् के़ले़बा पोङ्मा मे़सुक्ने़न्॥ सिक्कुम्निबाहाॽरे़ “आनिगे ले़सुम्बे़” मे़बाःत्तुबिला कर खे़ङ्हाॽरे़ मे़ल्ले़सुन्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.