खाहुन्साबा 7 - लिम्बुसिक्कुम्दिङ् निङ्वाॽ 1 नुबा मिङ्ङिङ्ग कुनाम्गे़नुॽबा फुङ्नाम्नुःल्ले़आङ् साॽरिक् नुबारो॥ सिमा ये़न्निन् सावाःन्छिङ्मनाबा ये़न्निन्नुःल्ले़आङ् चाॽरिक् पनुनुबारो॥ 2 साभःङ्जा के़से़बा हिम्मो पेःक्मानुःल्ले़ मे़रिङ् के़धक्पा हिम्मो पेःक्मा नुबारो थेआङ्भे़ल्ले़ आनिॽ के़रे़क् सिमे़ल्ले़ आहाङ्ल आवाॽरो कन् पाःन्निन् के़हिङ्बाहाॽरे़ निङ्वाॽओ कप्मा पोङ्लो॥ 3 एःप्मानुःल्ले़ निङ्वा तुक्खे चामा नुबारो— खे़ल्ले़ नाराङ्ग माक्लॽबिला कर खासिङ्गे़निःप्पा आजोःक्लो॥ 4 आभे़ल्ले़साङ् निङ्वाॽ तामा पाःन्लक् के़इःप्पा मनान् अदङ्लो॥ सिक्कुम्निबा मनाःल्ले़ सिमे़न्ले़ कुयाःम्बेओ निङ्वाॽ इःत्तुरो॥ 5 अदङ् मनाहाॽरे़ साम्मे़मे़त्तुबा साम्लोन् चम्मानुःल्ले़ सिक्कुम्निबा मनाःल्ले़ आभे़ःक्पान् खे़म्मा नुबारो॥ 6 अदङ्ङिल्ले़ कुएःप्मान् मिओ तिङ्ङिन् फे़क्पा हे़क्केरो, खे़ल्ले़ थेआङ् कुबे होप्लो॥ 7 कुत्चाॽए साक्के़ल्ले़क् पाःन्ने़ल्ले़ सिक्कुम्निबा मनान् के़नाङ्बा चोगुरो, हे़क्क्याङ् सुरुत् याङ्ङे़ल्ले़ सिक्लुङ्मे़न् फे़त्लाःन्दुरो॥ 8 कुहेःक्सिङ्मानुःल्ले़ कुनुप्मा पाःन्ने़न् नुबारो॥ आङ्दिङ् लॽमानुःल्ले़ नासिथःप्मे़न् नुबारो॥ 9 खिम्मो के़साक्के़न्निन् ओसेःन्धाङ् मे़जोगे़न्ने़ॽओ॥ सिक्कुमा पाःन्निन् खासिङ् मे़न्निःप्मनाबाहाॽरे़ खुनिॽ तेःङ्लो॥ 10 “उन्छेःम्बा ये़न्हाॽ आल्लोबा ये़न्हाॽनुःल्ले़आङ् थेआङ् नुबा वये़?” फाॽआङ् सेःन्मे़दोसे़न्ने़ॽओ थेआङ्भे़ल्ले़ खे़ङ्ग सिक्कुम्निबा सेःन्लाप् मेःन्लो॥ 11 कुहिङ्वे़त् मनान् सिक्कुम्निबा पोङ्मा पोङ्लो॥ सिक्कुम्दिङ् निङ्वान् खोःम्ना युःप्मनाबा याङ्साकुन्धे यारिक्के नुबारो॥ 12 याङ्साकुन्धेःल्ले़ कम्ब्राङ् आमे़त्लो, सिक्कुम्दिङ् निङ्वाःल्ले़ खे़ने़ॽ के़हिङ्मे़न् कम्ब्राङ् मे़त्तुरो, कर सिक्कुम्दिङ् निङ्वान् याङ्साकुन्धेनुःल्ले़ नुबारो॥ 13 निङ्वाॽफुमाङ्ङिल्ले़ कुयाःम्बक्को निङ्वाॽ पिरे़ॽओ॥ खुने़ॽ पे़गे़क् चोगुबा पाःन्निन् आत्तिल्ले़ तोःन्दोम्बा चोःक्मा सुक्तुबे? 14 के़बाःन्हाॽ नुबा पोङ्ङिल्ले़ के़निङ्वाॽ तासे़ॽओ कर के़बाःन्हाॽ ताप्फे़ःम्बा ताबा ये़न्नो निङ्वाॽसुम्मो युक्खे़ॽओ निङ्वाॽफुमाङ्ङिल्ले़ खे़न् ने़प्माङ् ये़न्हाॽ चोगुआङ् वाॽरो॥ याम्मो ताःन्दि थे पोङ्ङि, खे़न् आत्तिल्ले़आङ् मे़निसुन्लो॥ 15 आङ्गाॽ आहिङ्मे़न् हने़ पोःक्खे़आङ् वाॽरो कर कन् हिङ्मन्नोए आङ्गाॽ के़रे़क् पाःन्हाॽ निसुङ्लो॥ साम्योबा मनान् नुबा चोःक्साङ् सिरो, ताक्के़भे़ॽबा चोःक्साङ् ताक्के़भे़ॽबा मनान् हिङ्ङाङ् वाॽरो॥ 16 खे़ल्ले़चोगुल्ले़ खे़ने़ॽ साॽरिक् साम्योबा इग्र सिक्कुम्निबा मे़बोःक्खे़न्ने़ॽओ, खे़ने़ॽ आबाङे थेआङ् के़से़त्छिङ्बाबे? 17 कर साॽरिक् ताक्के़भे़ॽबा इग्र खासिङ् मे़न्निःप्मना मे़बोःक्खे़न्ने़ॽओ थेआङ् के़ये़म् मे़न्दाए खे़ने़ॽ के़सिबाबे? 18 थिक्के़न् ते़म्से़ युक्खे़ॽ हे़क्क्याङ् वेॽइन् मे़ल्ले़त्ते़ॽओ ने़प्माङ् पाःन्हाॽ नुबा चोक्लो॥ निङ्वाॽफुमाङ्ङिन्नु के़गिबा मनान् के़रे़क् मुइङ्बा पाःन्हाॽनु लाःत्लात् वाॽरो॥ 19 सिक्कुम्दिङ् निङ्वाःल्ले़ सिक्कुम्साबा मनान् ये़क्यक्कोबा थिबोङ् सुहाङ्युक्पाहाॽनुःल्ले़ मुक्साम्बा चोगुरो॥ 20 के़रे़क् याःम्बक्हाॽ नुबा के़जोःक्पा हे़क्क्याङ् आप्फाल्ले़आङ् पान् मे़न्जोःक्मनाबा, इक्सादिङ् खाम्बेःक्मो अक्तङ्बा साम्योबा मना आत्तिन्नाङ् होप्लो॥ 21 मनाःल्ले़ पाःत्तुबा के़रे़क् पाःन्नो निङ्वाॽ मे़बिरे़न्ने़ॽओ, मेःन्ने़फग्र आबाङे के़से़वारोबाल्ले़ खे़ने़ॽ के़जाःत्थि तेसुबा के़घे़प्सुरो॥ 22 कुच्चाॽइल्ले़ यरिक्ले़ङ् खे़ने़ॽ वेॽहाॽरे़ खुनिॽ चाःत्थि के़देसुआङ् वाॽरो खे़न् खे़ने़ॽआङ् के़निङ्वाॽ याक्लो॥ 23 आङ्गाॽ सिक्कुम्दिङ् आनिङ्वाःल्ले़ कन् के़रे़क् पाःन्हाॽ साॽरुङ्लो, आङ्गाॽ सिक्कुम्निबा पोङ्मा कुजे़क् निःन्धो चोगुङ् कर खे़न् आलागि चाॽरिक् साक्ते़रो॥ 24 खे़न् साॽरिक् कुबे के़याक्पा नु कुसिङ् निःप्मा साॽरिक् के़साक्पा चोक्लो॥ सिक्कुम्निङ्वान् थे़माबे, खे़न् आत्तिल्ले़ कुसिङ् निःप्मा सुक्तुबे? 25 कर आङ्गाॽ ने़हिनिङ्वाॽ नु सिक्कुम्निङ्वाॽओ निङ्वाॽ पिरुङ्लो॥ आङ्गाॽ सिक्कुम् निङ्वाॽ नु के़रे़क् आसेःन्दोहाॽरे़ कुनोगप् खोमा निङ्वाॽ चोगुङ्लो हे़क्क्याङ् इङ्ले़क्किन् कुसिङ् निःप्मा आक्खे़न् साॽरिक् ताक्के़भे़ॽबा नु अदङ्ङिन् के़नाङ्बारे़छ फाॽआङ् निःन्धो चोगुङ्लो॥ 26 सिमे़न्नुःल्ले़ आरसाङ् के़आःप्पा पाःन्निन्नाङ् आङ्गाॽ कोःम्भो चोगुङ्लो— मिःम्जिओ आधाधामा मे़न्छुमान्ग इजो हे़क्तङ्मारो, खे़ल्ले़ कुमिःम्जिल्ले़ खे़ने़ॽ इओ के़धाबा हे़क्के के़धारो हे़क्क्याङ् खे़ल्ले़ कुहुक्किल्ले़ फे़न्थक्क्रङ्ङिल्ले़ इगे़घेःङ्बा हे़क्के के़घेःङ्लो॥ निङ्वाॽफुमाङ्ङिन् कुनिङ्वाॽ के़दाबा मनान् खे़न् इघेःङ्ङोलाम्बा ताङ्लो कर लायो के़जोःक्पान् खे़ल्ले़ कुहुक्को थारो॥ 27 खाहुन्साबाल्ले़ अक्खे पाःत्तुरो— ओवा, आङ्गाॽ के़रे़क् पाःन्हाॽरे़न् नोगप् कोःत्तुङ्लो हे़क्क्याङ् मिमिसाक्काङ् खे़न् कुसिङ् निःत्तुङ्लो॥ 28 आल्लसाङ् आङ्गाॽ नोगप्पिन् कोःत्तुङ्लो कर थेआङ् मे़ङ्घोबान्लो॥ आङ्गाॽ हे़न्छिङ् ये़म्बित्छाहाॽओ इङ्धाङ् पिमा के़लाॽबा लत्छारक् खोसुङ्लो कर मे़न्छुमाहाॽओग थिक्काङ् मे़ङ्घोबान्लो॥ 29 आङ्गाॽ कन् पाःन्निन्लक् हुॽसिङ्ङारो निङ्वाॽफुमाङ्ङिल्ले़ आनिॽ कुदोःप्मा नावागे़न् चइःत् आजोगे़रो कर आनिॽ आबाङे के़साक्पा आजोःक्सिङ्ङाङ् आवाॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.