खाहुन्साबा 5 - लिम्बुमे़ङ्गे़प्मना माङ्हुप् चोःक्मा मेःन् 1 निङ्वाॽफुमाङ्ङिल्ले़ कुहिम्मो के़बेःक्किल्ले़ सिङ्सिङ् ये़क्ये़क्काङ् पेगे़ॽ॥ याःम्बक् मे़भेःन्दुर मे़याक्पे़न् निङ्वाॽ मे़ङ्घोम्नाबा अदङ् मनाहाॽरे़ खुन्छिॽ सिदुङ्जभान् तोःम्मानुःल्ले़ निङ्वाॽफुमाङ्ङिल्ले़ कुबाःन्जाक् खे़म्से़ पेगे़ॽ॥ 2 कुबान् पाःप्मारे़ लागि खे़ने़ॽ मे़जात्ते़न्ने़ॽओ, निङ्वाॽफुमाङ्ङिल्ले़ कुदगि पान् पाःप्मारे़ लागि खे़ने़ॽ के़निङ्वाॽओ हारावरा मे़जोगे़न्ने़ॽओ॥ निङ्वाॽफुमाङ्ङिन् साङ्ग्राम्पेदाङ्ङो वाॽरो हे़क्क्याङ् खे़ने़ॽग इक्सादिङ् खाम्बेःक्मो के़वाॽरो खे़ल्ले़चोगुल्ले़ खे़ने़ॽ के़बाःन्ने़न् सुःन्लरो॥ 3 यरिक् निङ्वाॽ तुक्खे चामारे़ से़प्माङ् पोङ्लो, यरिक् पाःन्हाॽ अदङ्पान् पोङ्लो॥ 4 खे़ने़ॽ निङ्वाॽफुमाङ्ङिन्नु माङ्हे़क् के़जोगुल्ले़ खे़न् के़प्मारे़ लागि मे़सुसे़न्ने़ॽ॥ अदङ् मनाहाॽनु खुने़ॽ कुनिङ्वाॽ मे़दाने़न्॥ खे़ने़ॽ के़माङ्हुप्पिन् के़त्ते़ॽ॥ 5 माङ्हुप् चोःक्माआङ् मे़ङ्गे़प्मानुःल्ले़ग माङ्हे़क् मे़न्जोःक्माए नुबा पोङ्ॽ॥ 6 खे़ने़ॽ आप्फेक् के़बान् सुत्लाःल्ले़ खे़ने़ॽ लायो चोःक्मा के़म्बाङ्ने़न्ल॥ हे़क्क्याङ् माङ्हिम्मोबा यक्याबे़न् “आङ्गाॽ आमाङ्हुप्पिङ्ग पेःन्दे़आङ् वये़,” फाॽआङ् पाःन्मे़अत्ते़न्ने़ॽ॥ खे़ने़ॽ के़बाःत्तुबा पाःन्नो निङ्वाॽफुमाङ्ङिन् कुसिक् पोःक्काङ् खुने़ॽ के़हुक्कोबा याःम्बक्किन् थेआङ् मे़क्खुर चोःक्माबे? 7 निङ्वाॽओ यरिक् इःप्मनाबा यरिक् पाःन्छेःक्वाहाॽ हने़ थेनाधेरक्॥ कल्ले़चोगुल्ले़ निङ्वाॽफुमाङ्ङिन्नु किसे़ॽओ॥ याङ्साकुन्धे थक्मा हने़रक् 8 खे़ने़ॽ लत्छा थुम्मो याङ्गे़साॽबाहाॽ मे़युःत्तुसिबा हे़क्क्याङ् खे़ङ्हाॽ कुदोःप्मा खासे़न् मे़ल्लोःन्दुन् मे़म्बिरुन्छिन्बा नु खुन्छिॽ खोमा लक्किन् मे़नाप्तुसिबा के़निसुने़भग्र के़निङ्वाॽ मे़मये़न्ने़ॽ, थेआङ्भे़ल्ले़ के़रे़क् युक्साबाहाॽ सम्धाङ् आल्लसाङ् यम्बा युक्साबाहाॽ मुरा मे़मे़त्तुसिआङ् मे़वाॽ, हे़क्क्याङ् खुन्छिॽनुःल्ले़आङ् साॽरिक् यम्बा युक्साबाहाॽरे़ खे़ङ्हाॽ ने़प्माङ् ओमे़मे़त्तुसिॽ॥ 9 लाजेॽओ के़धोःक्पा कुजाहाॽ के़रे़क्ले़ मे़मे़त्छिङ्, हाङ्ङिल्ले़ आप्फेक्काङ् इक्ताप्हाॽओ लाम्बाए इन्धा फोसुरो॥ 10 आत्तिल्ले़ याङ्ङो साॽरिक् निङ्वाॽ पिरुॽ, याङ्ङिल्ले़ खे़न् आप्फाल्ले़आङ् मे़योरुन्लो, आत्तिल्ले़ याङ्साकुन्धेओ साॽरिक् निङ्वाॽ पिरुॽ, खुने़ॽ फोसुबा याङ्साकुन्धेओ आभे़ल्ले़आङ् कुनिङ्वाॽ मे़दाने़न्॥ कन्नाङ् थेनाधे हने़रक्लो॥ 11 याङ्साकुन्धेन् पोर पेःक्किल्ले़ के़जाबा मुराहाॽआङ् यरिक् पोरो॥ हे़क्क्याङ् खे़ङ्हाॽ ओमे़प्मासिआङ् युङ्मानुःल्ले़ वेॽ हिम्दाङ्बे़न् याङ्साकुन्धेःल्ले़ थे चक्तुआङ्बे? 12 स्याङ्मे़न्दाङ् याःम्बक् के़जोःक्पा मनाःल्ले़ सुःल्लिक् चसाङ् इग्र यरिक् चसाङ् कुजानुॽर कुमिक् युरो, कर याङ्साकुन्धेसाबा मनान् यरिक् कुयाङ्सा कुन्धेःल्ले़ चोगुल्ले़ खुने़ॽ कुमिक्के मे़युने़न्लो॥ 13 आङ्गाॽ नाम्मिल्ले़ कुसिगाङ् साॽरिक् ताप्फे़ःम्बा पाःन्धिक् निसुङ्ङाङ् वाॽरो— मनान् याङ्साकुन्धेसाबा पोङ्, कर याङ्साकुन्धेःल्ले़ खे़ल्ले़ कुलागि नुबा मे़जोगुन्लो 14 हे़क्क्याङ् कुभा कुदॽयान् फे़न्नाङ् ले़ङ्हङ्ङो हान्ति पोङ्ॽ खे़ब्याङ् कुनुप्मो आबाङे कुस्सा कुएहाॽरे़ लागि थेआङ् ले़प्माधामा मे़सुक्तुन्ॽ॥ 15 आक्खेलॽरिक् मे़न्छाम् याप्मिन् कुम्माःल्ले़ कुसाप्पोःक्लाम् ताःॽ, हे़क्केलॽरिक्के खाम्बेःक्मोलाम् ले़क्चाबे़धिःक् नुःङ् पेःक्लो॥ खुने़ॽ स्याङ्मे़न्दाङ् चोगुबा के़रे़क् याःम्बक्लाम् थेआङ् तेॽमा मे़घोसुन्॥ 16 कन्नाङ् साॽरिक् के़साक्पा तुक्खेरो॥ मनान् आक्खेलॽरिक् त्ये़, हे़क्केलॽरिक्के पेःक्लो॥ खुने़ॽ साॽरिक् याःम्बक् चोक् खे़ब्याङ् साम्मिःत्ते़न् ते़म्मा तम्सिङ् चोगुॽ, निन्धासेःक्ओ खे़ल्ले़ थे इन्धा खोसुबे? थेआङ्भे़ल्ले़ खुने़ॽ कुयाःम्बक्किन् सुरित् केजङ्ङो थेनाधे पोङ्ॽ॥ 17 खुने़ॽ कुहिङ्हिङ् थारिक् खामाक्मो नु सिक्फे़क्मो, निङ्साङ् पुक्मो, सिक्पोःक्मो हे़क्क्याङ् तुक्मालाःक्माओ वाॽमा पोङ्ॽ॥ 18 आङ्गाॽ आम्भा कन् पाःन्निन् कुसिङ् निःत्तुङ्, मनान् आबाङे कुलागि निङ्वाॽफुमाङ्ङिल्ले़ पिरुबा ताङ्सा कुहिङ्मन्नो चामा, थुङ्मा नु आबाङे कुयाःम्बक्को सःप्माए के़रे़क्नुःल्ले़ नुबा॥ हाबा खे़न्ने खे़ल्ले़ कुघोमा लक् पोङ्ॽ॥ 19 निङ्वाॽफुमाङ्ङिल्ले़ कुभा मनाधिक् याङ्साकुन्धे पिरुॽ हे़क्क्याङ् खे़न् पाःन्नो कुनिङ्वाॽ तासु पिरुने़ फग्र खे़न् नोगे़न्साबा पोङ्ङाङ् आबाङे कुयाःम्बक्को सःत्ल॥ खे़ङ्ग निङ्वाॽफुमाङ्ङिल्ले़ पिरुबा पर्धाम्लो॥ 20 खे़ल्ले़ कुहिङ्मन्नोबा ये़न्हाॽ यरिक् मे़इःत्तुन्लो, थेआङ्भे़ल्ले़ निङ्वाॽफुमाङ्ङिल्ले़ खुने़ॽ सुक्खे के़जाबा पोङ्मा पाङ्घुआङ् वाॽ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.