खाहुन्साबा 4 - लिम्बुमे़न्वाॽमनाबा, याःम्बुदिक्, चुम्देङ् मेःन्ने, 1 याम्मो आङ्गाॽ ओमे़त्तुङ्, हे़क्क्याङ् नाम्मिल्ले़ कुसिगाङ् के़बोङ्बार के़बप्पा के़रे़क् मे़न्वाॽमनाबा पाःन्हाॽ निसुङ्लो— तुक्खे चाःप्मा याःम्बक्हाॽरे़ मिक्वान् निसुङ्लो, हे़क्क्याङ् खे़ङ्हाॽ हाङ्हाङ् के़मे़प्पा हाःत्ताङ् होप्लो॥ के़युक्पाहाॽरे़ खुन्छिॽ ले़प्माङ् मुक्साम् वये़रो, हे़क्क्याङ् मे़युक्तुसिबाहाॽ हाङ्हाङ् के़मे़प्पा हाःत्ताङ् होःप्ते़रो॥ 2 कल्ले़ चोगुल्ले़ए आङ्गाॽ नुरिक्काङ् पाःत्तुङ्लो, खे़न् मे़स्ये़ मे़जुरे़आङ् के़वाॽबा खे़न् कुसिवे़त्हाॽ आल्लोबा कुहिङ्वे़त्हाॽनुःल्ले़ सुक्खेवाओ मे़वाॽरो॥ 3 कर खे़न् ने़प्माङ्नुःल्ले़ग आरसाङ् यरिक् सुक्खेवाःङ्ग आल्लो थारिक् सामे़न्वाःन्छिङ्ङे के़वाॽबाहाॽरो, हे़क्क्याङ् खे़ङ्हाॽरे़ नाम्मिल्ले़ कुसिगाङ् चोःक्मनाबा ताप्फे़ःम्बा याःम्बक्किन् निमाए मे़न्निए मे़वाॽरो॥ 4 हे़क्क्याङ् के़रे़क् याःम्बुदिक् नु थोबो पोङ्मा पाःन्हाॽग मनाःल्ले़ आप्फेक् कुहिम्बेसाङ्बे़न् नाहे़त्तुबाल्ले़ चोगुल्ले़रक् कन् पोङ्बारे़त्छ फाॽआङ् आङ्गाॽ निसुङ्॥ कन्नाङ् हने़ थेनाधे नु साम्मिःत् केजङ्ङिन् नाःप्मनाबा हे़क्तङ्बारक्लो॥ 5 अदङ् मनाःल्ले़ कुहुक्किन् हुप्तुआङ् युङ्लो, हे़क्क्याङ् खुने़ॽ कुमे़क्मे़न् आप्फेक् तारुरो॥ 6 स्याङ्मे़न्दाङ्ङाङ् थक्मनाबा याङ्साकुन्धेन् नु साम्मिःत् केजङ्ङिन् नाःप्मनाआङ् हुक्पुत् ने़त्छि कप्मनाबे़न्नुःल्ले़ चिजि ये़म्ये़म्माङ् हुक्पुत्थिक् कप्मनाबे़न् आल्लसाङ् नुबारो॥ 7 याम्मो आङ्गाॽ नाम्मिल्ले़ कुसिगाङ् कुभा थेनाधेबा निसुङ्लो— 8 लत्छा मनाधिक् एःक्से़त्छा वये़रो, खे़ल्ले़ कुस्सा ये़म्बित्छा कुम्भुॽ कुन्साॽआङ् मे़होःप्ते़रो॥ खे़ल्ले़ स्याङ्मे़न्दाङ्बा कुयाःम्बक्किन् मे़नुबे़न्लो, हम्भसाङ् कुयाङ्साकुन्धेओ कुनिङ्वाॽ मे़द्ये़ने़न्लो॥ खे़ल्ले़ “हाःत्ले़ कुलागि आङ्गाॽ स्याङ्मे़न्दाङ् याःम्बक् चोगुङ्ङाङ् पत्ताबा, हिङ्मन्नोबा नुॽमादामान् थेआङ् ले़रुङ्ल पत्ताबा?” फाॽआङ् आफेक् पान् सेःन्दोसाङ्॥ कन्नाङ् हने़ थेनाधेरो, लत्छा तुक्खेवा पाःन्लो॥ 9 लत्थिक्नुःल्ले़ ने़त्छिन् नुबारो, थेआङ्भे़ल्ले़ खुन्छिॽ चोःक्सुबा स्याङ्मे़न्दाङ्बा याःम्बक्किल्ले़ नुबा कुले़क्वा खोसुरो॥ 10 खे़न् ने़त्छिओ थिक्पा चोःन्ने़भग्र खुने़ॽ कुन्देःङ्बे़ल्ले़ पोःक्मा फाॽरुरो, कर खुने़ॽ चोःन्निल्ले़ हाःत्ताङ् के़भोङ्बा चुम् के़होःप्पे़ङ्ग पप्प्राॽमा पोङ्लो! 11 हे़क्केलॽरिक्के ने़त्छि सोरिक् इम्सिने़भग्र, खुन्छिॽ ने़प्माङ् पगो पगो कोसिरो, कर एःक्से़त्छाग आक्खेलॽरिक् के़गोबा पोङ्बे? 12 कुभारे़ लत्छाइन् नाःम्मा सुक्तुबिलारो, कर ने़प्फुरे़ग कम्ब्राङ् मे़त्छिङ्मा सुक्सुरो, कुदोरा सुम्सिरे़ माःप्मनाबा इदाःक्किन् हारा मे़बुॽने़न्लो॥ यरिक् तगि पोमे़न्नाङ् थेनाधेरक् 13 साम्दिङ् पान् मे़ङ्घे़म्मनाबा काप्पोबा कर अदङ् हाङ्ङिन्नुःल्ले़ याङ्गे़साॽबा कर सिक्कुम्साबा नालिगे़न् थाङ्बे़न्निन् आल्लसाङ् नुबारो॥ 14 खुने़ॽ कुहाङ्जुम्मो थाङ्बे़न्ने़न् याङ्गे़साॽबा पोःक्खे़आङ् सावाःन्छिङ्ङाङ् वये़, इग्र खे़न् पुङ्लाहिम्मोलाम् लःन्दे़बेआङ् हाङ् पोःक्खे़रो॥ 15 आङ्गाॽ थे निसुङ्भे़ल्ले़ नाम्मिल्ले़ कुसिगाङ् के़हिङ्बाहाॽ नु लाङ्गे़घेःक्पाहाॽ के़रे़क् लक्के़घोबाहाॽ हाङ्ङिल्ले़ कुयुक्नाओ के़युङ्बा खे़न् नालिगे़न् थाङ्बे़न्निल्ले़ कुएगाङ् मे़बे॥ 16 खुने़ॽ के़दिम्बा मनाहाॽ निःप्माए सुक्मे़न्दे़त् मे़वये़ॽ, कर खे़ल्ले़ कुएगाङ् के़दाबाहाॽ खे़न्नु खुन्छि निङ्वाॽ मे़द्ये़ने़न्॥ कन्नाङ् हने़ थेनाधे नु साम्मिःत् केजङ्ङिन् नाःप्मनाबा हे़क्केरक्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.