खाहुन्साबा 3 - लिम्बुके़रे़क् पाःन्निल्ले़ कुये़म् वाॽ 1 के़रे़क् पाःन्हाॽरे़ लागि ये़म् वाॽरो, हे़क्क्याङ् ताङ्साङ्बे़ल्ले़ कुसिङ्गाङ् के़रे़क् याःम्बक्हाॽरे़ लागि वाहिक्नाम् वाॽरो॥ 2 सावाःन्छिङ्मा लत्छा ये़म् वाॽरो, हे़क्क्याङ् सिमा ये़म् थिक् वाॽरो॥ लेःप्मा हेॽमा लत्छा ये़म् वाॽरो, खे़ब्याङ् लेःप्माबे़न् आःङ्मा ये़म् थिक् वाॽरो॥ 3 से़प्मा लत्छा ये़म् वाॽरो, हे़क्क्याङ् वेःम्मा ये़म् थिक् वाॽरो॥ लुःम्मा लत्छा ये़म् वाॽरो, हे़क्क्याङ् चोःक्मा ये़म् थिक् वाॽरो॥ 4 हाःप्मा लत्छा ये़म् वाॽरो, हे़क्क्याङ् एःप्मा ये़म् थिक् वाॽरो॥ मे़रिङ्धक्मा लत्छा ये़म् वाॽरो, खे़ब्याङ् लाःङ्मा ये़म् थिक् वाॽरो॥ 5 लुङ् लाप्फुमा लत्छा ये़म् वाॽरो, हे़क्क्याङ् लुङ् सुम्मा ये़म् थिक् वाॽरो॥ हे़प्मा लत्छा ये़म् वाॽरो, खे़ब्याङ् मे़न्हे़प्मा ये़म् थिक् वाॽरो॥ 6 कोःप्मा लत्छा ये़म् वाॽरो, हे़क्क्याङ् ले़प्मादेमा ये़म् थिक् वाॽरो॥ कप्मा लत्छा ये़म् वाॽरो, खे़ब्याङ् लाप्फुमा ये़म् थिक् वाॽरो॥ 7 थे़ःङ्मा लत्छा ये़म् वाॽरो, हे़क्क्याङ् ले़म्मा ये़म् थिक् वाॽरो॥ स्वाःत् वाॽमा लत्छा ये़म् वाॽरो, खे़ब्याङ् पाःप्मा ये़म् थिक् वाॽरो॥ 8 नानुॽमा लत्छा ये़म् वाॽरो, हे़क्क्याङ् चिःप्मा ये़म् थिक् वाॽरो॥ थङ् चोःक्मा लत्छा ये़म् वाॽरो, खे़ब्याङ् नादङ् चोःक्मा ये़म् थिक् वाॽरो॥ 9 याःम्बक् के़जोःक्पाहाॽरे़ खुन्छिॽ स्याङ्मे़न्दाङ् मे़जोगुबा याःम्बक्लाम् थे़मा इन्धा मे़घोसुआङ्बे? 10 निङ्वाॽफुमाङ्ङिल्ले़ मे़न्छाम् याप्मिहाॽ सम्धाङ् कुःत्तुसिबा कक्किन् आङ्गाॽ निसुङ्ङाङ् वाॽ॥ 11 खुने़ॽ के़रे़क् पाःन्हाॽ लाॽरुबा ये़म्मो पनुनुबा चोगुआङ् वाॽ॥ खुने़ॽ मे़न्छाम् याप्मिहाॽरे़ खुन्छिॽ सिक्लुङ्मो आभे़ल्ले़आङ् मे़न्नुप्मनाबा पाःन्हाॽ केःत्तु पिरुसिआङ् वाॽ कर खे़ङ्हाॽरे़ निङ्वाॽफुमाङ्ङिल्ले़ उनाहुरिआङ्धो कुनुप्मो थारिक् थे चोगुआङ् वाॽ खे़न् सिबिॽबा पाःन्निन् कुसिङ् निःप्मा मे़न्छुक्तुन्ॽ॥ 12 मनाःल्ले़ कुलागि खुने़ॽ कुहिङ्मन्नो नुॽमादामाआङ् वाॽमा नु नुबा याःम्बक् चोःक्माआङ्धो वेॽ नुबा थेआङ् होप् के़लॽबा आङ्गाॽ निसुङ्ॽ॥ 13 के़रे़क् मनाहाॽरे़ मे़ज मे़धुङुर हे़क्क्याङ् स्याङ्मे़न्दाङ् मे़जोगुबा याःम्बक्को खुन्छिॽ निङ्वाॽ तार हाबा खे़न्ने निङ्वाॽफुमाङ्लाम्बाबा पर्धाम्लो॥ 14 निङ्वाॽफुमाङ्ङिल्ले़ थे़मा चोगुॽ, खे़न् सदादिङ् आभे़ल्ले़साङ् वाॽ फाॽआङ् आङ्गाॽ निसुङ्ॽ॥ खे़न् पाःन्नो थेआङ् योॽमा इग्र युम्मा सुक्मे़दे़त्ने़न्॥ मनाहाॽरे़ निङ्वाॽफुमाङ्ङिन् मे़गिरुर फाॽआङ् खुने़ॽ अक्खे चोगुरो॥ 15 थेःन् आल्लो वाॽ खे़न् उन्छेःन्नाङ् वये़रो, थेःन् पोङ्मा वाॽ खे़न् तगिआङ्धोए वये़रो, निङ्वाॽफुमाङ्ङिल्ले़ के़बेःक्पा ये़म्मो के़बोङ्बा पाःन्हाॽए ए़त्ले़ङ् ए़त्ले़ङ् पोङ्ल चोगुरो॥ 16 हे़क्क्याङ् नाम्मिल्ले़ कुसिगाङ् वेॽ पाःन्नाङ् निसुङ्लो— साम्योनिमाल्ले़ कुले़क्वा चोःक्मा के़बोङ्बा ते़न्नो फे़न्पान् पोङ्लछ, कुदोःप्मा खासे़न् चोःक्मा के़बोङ्बो मे़न्वाॽमनाबा खासे़न् पोङ्लछ॥ 17 आङ्गाॽ आनिङ्वाॽओ अक्खे इःत्तुङ्लो, “के़रे़क् याःम्बक्हाॽरे़न् ये़म् वाॽरो, हे़क्क्याङ् काक् चोःक्मनाबा पाःहाॽरे़न् ये़म् वाॽरो, निङ्वाॽफुमाङ्ङिल्ले़ साम्योबा नु लायोबाहाॽ ने़प्माङ् खासे़न्नो तारुसिरो॥” 18 आङ्गाॽ कन्नाङ् निङ्वाॽ इःत्तुङ्, “मे़न्छाम् याप्मिहाॽग थक्साहाॽनु कुदङ्बासिॽ के़लॽबा निङ्वाॽ मे़घोसुर फाॽआङ् निङ्वाॽफुमाङ्ङिल्ले़ खे़ङ्हाॽरे़ खुन्छिॽ निङ्वाॽ साॽरुॽ॥ 19 मे़न्छाम् याप्मि तॽयाःन्निन् थक्साःल्ले़न् हे़क्तङ्बाए चोक्॥ थिक्के़न् आक्खेलॽरिक् सिमा पोङ्ॽ, वेॽइन्नाङ् हे़क्केलॽरिक्के सिरो॥ के़रे़क्ले़न् लत्छा परिक्पा सक्मा वाॽ॥ मे़न्छाम् याप्मिःल्ले़ कुदॽयाःन्निन् थक्सानुःल्ले़ नुबा मे़जोक्ने़न्॥ के़रे़क् पाःन्हाॽ थेनाधेरक्॥ 20 मे़न्छाम् याप्मिन् नु थक्सान् लत्थिक् ते़न्नो पित्छिरो, ने़प्माङ् खाम्भुत्छ्रुम्बालाम् त्ये़छिबा हे़क्क्याङ् ने़प्माङ् खाम्भेत्छ्रःम्बो नुःङ्सि पित्छिरो॥ 21 मे़न्छाम् याप्मिःल्ले़ कुयाम्साम्मिन् थाःङ् ले़प्माङ् पेक् हे़क्क्याङ् थक्साःल्ले़ कुस्साम्मिन् यो खाम्बेःक्को पेक् फाॽआङ् हाःत्ले़ निसुआङ्बे? 22 “खे़ल्ले़चोगुल्ले़ मनाःल्ले़ कुलागिग आप्फेक् याःम्बक्को निङ्वाॽ तामानुःल्ले़ वेॽ नुबा याःम्बक् थेआङ् होप् फाॽआङ् आङ्गाॽ निसुङ्, थेआङ्भे़ल्ले़ हाबा खे़न्ने खे़ल्ले़ कुघोमा लक् पोङ्ॽ॥ थेआङ्भे़ल्ले़ आत्तिल्ले़ खुऩेॽनुःल्ले़ याङ्सि पोङ्मा के़बोङ्बा पाःन्हाॽ ताःप्माआङ् ओःन्धाक्मा सुक्तुबे?” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.