खाहुन्साबा 2 - लिम्बुसुक्खेवा पाःन्हाॽ थेनाधेरक् 1 आङ्गाॽ आनिङ्वाॽओ इःत्तुङ्, “फे़रे़ॽ, आल्ल नुबा पाःन्निन् थे़मा फाॽआङ् निङ्वाॽ खोमारे़ लागि निङ्वाॽ तादाबा सुक्खेवाःन्नु आङ्गाॽ खे़ने़ॽ तङ्ने़साॽने़॥” कर खे़न्नाङ् हने़ थेनाधेरे़त्छ फाॽआङ् तसि पोःक्खे़॥ 2 आङ्गाॽ पाःत्तुङ्, “एःप्मा मे़प्मनाबे़न् अदङ्पान्॥ हे़क्क्याङ् निङ्वाॽदामा सुक्खेवा पाःन्हाॽरे़ थे आजक्पे?” 3 चे़ल्ले़क्सेॽ थि थुङ्नु अदङ्पान् चोगुङ्ङाङ् आङ्गाॽ आप्फेक् निङ्वाॽ ये़ये़लॽमा तम्सिङ् चोःक्मा कोःत्तुङ्—आङ्गाॽ आनिङ्वाःल्ले़ आल्लसाङ् सिक्कुम्दिङ् निङ्वाॽलाम् लाम्लोसाङ्ल पत्छे़॥ ताङ्साङ्बे़ल्ले़ कुसिगाङ् कन् ताङ्सा चप्ले़क्वा हिङ्मन्नो मनारे़ लागि नुबा याःम्बक्किन् थेबे फाॽआङ् खे़न् कुसिङ् निःप्मारे़ लागि आङ्गाॽ निङ्वाॽ चोगुङ्॥ 4 आङ्गाॽ यम्बयम्बा याःम्बक्हाॽ चोगुङ्—आङ्गाॽ आप्फेक् आलागि हिम्हाॽ चोगुङ् खे़ब्याङ् चे़ल्ले़क्सेॽ इक्ताप्हाॽ लेःत्तुङ्॥ 5 आङ्गाॽ सिङ्सेॽइक्हाॽ नु फुङ्इक्हाॽ चोगुङ् हे़क्क्याङ् खे़प्मो के़रे़क् परिक्पा सिङ्सेॽहाॽरे़ कुबुङ्हाॽ लेःत्तुङ्॥ 6 हुरुम् हुरुम् लॽरिक् के़बोबार के़बप्पा सिङ्सेॽइक्कोबा सिङ्बुङ्हाॽ च्वाःत् वरङ्मारे़ लागि आङ्गाॽ वबाक्हाॽ तयुङ्॥ 7 आङ्गाॽ योग्बा योःग्माहाॽ इङुङ्सिङ् हे़क्क्याङ् आहिम्मो सागे़वाःन्छिङ्बा वेॽ योग्बा योःग्माहाॽआङ् मे़वये़॥ आङ्गाॽनुःल्ले़ तगि यरुसले़ःम्मो के़वाॽबा मनाहाॽनुःल्ले़ यरिक् पित्थक्सा लुप्हाॽ नु मे़ल्लुक् मे़ःन्दालुप्हाॽ कत्तुङ्सिङ्॥ 8 आङ्गाॽ आलागि साम्म्याङ् नु युप्पा लुप्सुङ् हे़क्क्याङ् हाङ्हाॽलाम् नु त़ेःङ्गप्हाॽलाम् याङ्साकुन्धे लुप्सुङ्॥ आङ्गाॽ साम्गे़लोबा नु साम्गे़लोमाहाॽ खोसुङ्सिङ् हे़क्क्याङ् मनाहाॽरे़ खुन्छिॽ निङ्वाॽ के़दामा के़बिमा चक्मेःत् मे़न्छुमा युङ्मा हिम्धिक्काङ् खोसुङ्॥ 9 आङ्गाॽनुःल्ले़ तगिबा के़रे़क् मनाहाॽनुःल्ले़ यरुसले़ःम्मो आङ्गाॽ पयम् यम्बा पोःक्खाङ्॥ कन् के़रे़क् पाःन्हाॽओ आङ्गाॽ आसिक्कुम्दिङ् निङ्वान् आङ्गाॽनुए वये़रो॥ 10 आमिक्किल्ले़ निमा निङ्वाॽ चोगुबा पाःन्हाॽ आङ्गाॽ आप्फेक् मे़न्नाॽबाङ्ङिल्लो, आत्तिन् सुक्खेवाःन्छाङ् खोमारे़ लागि आङ्गाॽ आसिक्लुङ्मे़ल्ले़ मे़नाॽरुङ्ङिल्लो॥ आङ्गाॽ के़रे़क् आयाःम्बक्हाॽओ आनिङ्वाॽ त्ये़रो, हे़क्क्याङ् कङ्ग आङ्गाॽ स्याङ्मे़न्दाङ् चोगुङ्बा आयाःम्बक्किल्ले़ थुम्घो वये़रो॥ 11 हे़क्केसाङ् आहुक्किल्ले़ चोगुङ्बा काक् याःम्बक्हाॽ नु खोमारे़ लागि स्याङ्मे़न्दाङ् चोगुङ्बा के़रे़क् पाःन्हाॽ ले़प्माङ् आनारान् हिसुङ्ङिल्ले़ के़रे़क् पाःन्हाॽ हने़बा चोगे़रो॥ साम्मिःत् केजङ्ङिन् नाःप्मनाबा हे़क्के थेनाधे हने़रत्छ, नाम्मिल्ले़ कुसिगाङ् थेआङ् कुजक् मे़बोःक्खे़न्लो॥ सिक्कुम्दिङ् निङ्वाॽ नु अदङ् पाःन्निन् थेनाधेरक् 12 खे़ब्याङ् सिक्कुम्दिङ् निङ्वाॽ नु नाङ्नाङ् थाप्थाप् लॽमे़न् हे़क्क्याङ् अदङ्पान् ले़प्माङ् आनिङ्वान् हिसुङ्लो॥ हाङ्ङिल्ले़ तगिआङ्धो चोगुयुरुबा याःम्बक्किन्नुःल्ले़ खुने़ॽ कुएगाङ् के़दाबे़ल्ले़ वेॽ यरिक् चोःक्मा सुक्तुबि? 13 आङ्गाॽ थे निसुङ्भे़ल्ले़ खामाक्मान्नुःल्ले़ग से़न्दाङ्गे़न् खाओःप्मे़न्ने नुबा चोक्लो, हे़क्केलॽरिक्के अदङ् पाःन्निन्नुःल्ले़ग सिक्कुम्दिङ् निङ्वान् नुबा चोक्लो॥ 14 सिक्कुम्निबा मनाःल्ले़ कुमिक्किन् कुधे़गेःक्पो पत्लो कर अदङ् मनान् खामाक्मो लाङ्घेःक्लो, करसाङ् खे़ङ्हाॽ ने़प्माङ् सम्धाङ् लत्छा परिक्पा तुःन्देःन् इरे़द्ये़बा आङ्गाॽ निसुङ्लो॥ 15 खे़ब्याङ् आङ्गाॽ आनिङ्वाॽओ अक्खे इःत्तुङ्लो, “अदङ्ङिल्ले़ तुमुबान् आङ्गाॽ आसम्धाङ्ङाङ् इदारो, आङ्गाॽ सिक्कुम्निबा पोःक्खाङ्बान् थे इन्धा पोःक्खे़बे?” आनिङ्वाॽओ पाःत्तुङ्, “कन्ने़न्नाङ् हने़ थेनाधेरत्छ॥” 16 थेआङ्भे़ल्ले़ सिक्कुम्निबा मनान्नाङ् अदङ् मनान् कुइसिक् यरिक् ये़म् थारिक् निङ्वाॽ मे़न्इःत्तुन्लो, के़दाबा ये़न्हाॽओ खुन्छिॽ ने़प्माङ् निङ्वाॽ मे़भेःत्छुसिरो, अदङ्ङिन् हे़क्के सिक्कुम्साबा मनाःन्नाङ् सिमाए पोङ्लो॥ स्याङ्मे़न्दाङ् याःम्बक् चोःक्मे़न्नाङ् थेनाधेरक् 17 कल्ले़चोगुल्ले़ आङ्गाॽ आहिङ्मे़न् चिःत्तुङ्, थेआङ्भे़ल्ले़ नाम्मिल्ले़ कुसिगाङ् के़बोङ्बा याःम्बक्हाॽ आङ्गाॽ आलागि तुक्खे लाक्खेरत्छ॥ साम्मिःत् केजङ्ङिन् नाःप्मनाबा कुइसिक् खे़ङ्हाॽ के़रे़क् थेनाधेबा चोःक्ले़त्छ॥ 18 नाम्मिल्ले़ कुसिगाङ् के़रे़क् पाःन्हाॽरे़ लागि आङ्गाॽ स्याङ्मे़न्दाङ् याःम्बक् चोगुङ्ङाङ् वाॽबा के़रे़क् आङ्गाॽ चिःत्तुङ्, थेआङ्भे़ल्ले़ आङ्गाॽ खे़न् पाःन्हाॽ आङ्गाॽ आएगाङ् के़दाबाल्ले़ कुलागि ले़प्मा थामाए पोङ्ॽ॥ 19 हे़क्क्याङ् खे़न् सिक्कुम्निबाबि इ अदङ्बि फाॽआङ् हाःत्ले़ निसुबे? हे़क्केसाङ् नाम्मिल्ले़ कुसिगाङ् आङ्गाॽ स्याङ्मे़न्दाङ् चोगुङ्बा के़रे़क् पाःन्हाॽ खे़ल्ले़ए कुयुक्को वाॽयाःक्, खे़प्मो आङ्गाॽ के़रे़क् चोःक्मा कोःत्तुङ्बाहाॽ नु आहुक्वाहाॽ केःत्तुङ्ङाङ् याक्॥ कन्नाङ् हने़ थेनाधेरक्लो॥ 20 खे़ब्याङ् नाम्मिल्ले़ कुसिगाङ् आङ्गाॽ के़रे़क् याःम्बुदिक् चोगुङ्बान् इःत्तुङ्ङाङ् आङ्गाॽ आप्फेक् आनिङ्साङ् पुगे़॥ 21 थेआङ्भे़ल्ले़ सिक्कुम्दिङ् निङ्वाॽ, ने़हिनिङ्वाॽ नु हुक्वानुॽर कुभा मनाःल्ले़ याःम्बक् चोगुसाङ् खुने़ॽ खोसुबा के़रे़क् पाःन्हाॽ कुभा वेॽधिक्ले़ कुलागि ले़प्मा पिमाए पोङ्ॽ, खे़ल्ले़ कुलागि याःम्बुदिक् चोगुबाए होप्॥ कन्नाङ् थेनाधे नु यम्बा तॽयान् फे़म्मारक्लो॥ 22 नाम्मिल्ले़ कुसिगाङ् आप्फेक् याःम्बुदिक्काङ् निङ्वाॽ तुक्खेनु चोगुबा याःम्बक्लाम् मनाःल्ले़ थे़माःन् खोसुआङ्बे? 23 खे़ल्ले़ के़रे़क् कुये़न्नोबा याःम्बक्हाॽग कुनिङ्वाॽ तुक्खे चामारो, से़न्दिक्काङ् खे़ल्ले़ कुनिङ्वाःल्ले़ नाःम्सिङ्मा मे़घोसुन्॥ खे़न्नाङ् हने़ थेनाधेरक्लो॥ 24 मनाःल्ले़ चामा, थुङ्मा नु कुयाःम्बक्को कुनिङ्वाॽ तामाआङ्धो वेॽ यरिक् थेआङ् चोःक्मा मे़सुक्तुन्ॽ॥ कन्नाङ् निङ्वाॽफुमाङ्ङिल्ले़ कुहुक्को लाम्बाए ताबा आङ्गाॽ निसुङ्ॽ॥ 25 थेआङ्भे़ल्ले़ खुने़ॽ मेःन्ने हाःत्ले़ चामा इग्र निङ्वाॽ तामा खोसुआङ्बे? 26 आत्तिन् मनाःल्ले़ निङ्वाॽफुमाङ्ङिन् कुनिङ्वाॽ तासुॽ, खुने़ॽ खे़न्ने सिक्कुम् निङ्वाॽ, ने़हिनिङ्वाॽ नु निङ्वाॽ तामा पान् पिरुॽ॥ कर निङ्वाॽफुमाङ्ङिल्ले़ कुनिङ्वाॽ के़दाबा मनान् पिमा फाॽआङ् खुने़ॽ लायोबा मनान् याङ्साकुन्धे फुङ्मा नु लुम्मा याःम्बक् पिरुॽ॥ कन्नाङ् हने़ थेनाधे, साम्मिःत् केजङ्ङिन् नाःप्मनाबा हे़क्केरक्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.