खाहुन्साबा 12 - लिम्बु1 खे़ल्ले़चोगुल्ले़, “हिङ्मन्नो आङ्गाॽ थेआङ् सःप्मा पान् होप्लो” पाःप्मा के़बोङ्बा ताप्फे़ःम्बा ये़न् नु तङ्बेहाॽ खे़निॽ हिङ्मन्नो तामानुःल्ले़ तगिए थाङ्बे़न् के़वयिरए खे़निॽ नावागे़न् चइःत्दाङ्बान् निङ्वाॽ इःत्ते़म्मे़ॽओ॥ 2 कुभा ये़न्नो नाम्, लाबा नु खेःम्सिक्पा ओःत्तिःन् खे़ने़ॽ खामाक्पा के़निसुरो हे़क्क्याङ् पाङ्गे़न्दिङ् वहित् के़दाःप्पा खाॽमिःप्पान् नुःङ्मा तामानुःल्ले़ तगि खुने़ॽ निङ्वाॽ इःत्ते़ॽओ॥ 3 खे़ने़ॽ के़लाङ्हाॽ, के़हिम् कम्ब्राङ् के़मे़प्पाहाॽ थे़गक्कक्ना यङ्मा हेःक्मानुःल्ले़ तगि, हे़क्क्याङ् खे़ने़ॽ के़धुम्बा के़धक्सुबाहाॽ अःक्खुम् फन्छिङ्मानुःल्ले़ तगि खुने़ॽ निङ्वाॽ इःत्ते़ॽओ॥ खे़ने़ॽ के़हाबोॽबाहाॽ लुःक्मा नु च्यजि के़नम्बा के़से़वारोबाहाॽरे़ कुजा युःप्मा नाॽमानुःल्ले़ तगि खुने़ॽ निङ्वाॽ इःत्ते़ॽओ, खे़ब्याङ् पेधाःप्हाॽओलाम् ओगे़ममार के़युङ्मा मे़न्छुमाहाॽ के़मिक्किल्ले़ नुरिक्काङ् निमा मे़न्छुक्मनाबा पोङ्मानुःल्ले़ तगि खुने़ॽ इःत्ते़ओ॥ 4 खे़ने़ॽ के़ने़भाक्के़ल्ले़ नुरिक् नामे़घे़प्सुन्लो, साम्लो साम्मे़प्मनाबा इक्लान् इग्र लुङ्सुम् लाइक्पान् खे़म्मा के़न्छुक्तुन्लो कर पुःन् साम्लोसाङ् खे़ने़ॽ मिक्युमोलाम् के़सोरो॥ 5 चन्जम्बादे़न्नोलाम् खे़ने़ॽ के़याःङ्लो हे़क्क्याङ् लाम्मो लाङ्गे़घेःक्किल्ले़ खे़ने़ॽ के़गिरो॥ खजङ्सेॽइन् फे़क्पा हे़क्के के़धे़गेक्पान् फुत्त्रिःङ्ग्यारिक् फुत्लो, खे़ने़ॽ लाङ्घेःक्मा के़हक्सुल्ले़, प्याःप्पे़न् हे़क्के मस्सुआङ् खे़ने़ॽ आफेक् पे़ःङ्गाक् पे़ःङ्गाक् के़उःङ्सिङ्लो खे़ब्याङ् थेआङ् चोःक्मा के़सिराॽ मे़धाङ्ने़ल्लो॥ कुनुप्मोबा सदादिङ्बा के़हिम् ले़प्माङ् के़बेःक्ल के़बत्लो हे़क्क्याङ् माराम्मे़न् मे़रिङ् मे़धक्पा मनाहाॽरे़ मे़धिम्सुरो॥ 6 युप्पा सिक्क्रिःन् स्याक् वयाक् पुॽरो, साम्म्याङ् खोर्यान् हे़त्लो, वागे़ङ्ङोबा इदाःक्किन् स्याक् पुॽरो हे़क्क्याङ् कुःन्दाःन् पक्क्रे़ॽ हे़त्लो॥ 7 आनिॽ नासिङ्गे़न् थक्किन् खाम्मोए नुःङ्बेःक्लो हे़क्क्याङ् हिङ्मन्बा साःङ्गुगे़न् सक्मान् निङ्वाॽफुमाङ्ङो नुःङ् पेःक्लो, खे़ङ्ग खुने़ॽ आनिॽ आबिरे़आङ् वये़रो॥ 8 थेनाधे हने़रक्लो, थेनाधे हने़रक्लो, के़रे़क् हने़रक्लो फाॽआङ् खाहुन्साबाल्ले़ पाःत्तुरो॥ कुनुप्मा पान् 9 कर खाहुन्साबान् सिक्कुम्निबा वये़ हे़क्क्याङ् खुने़ॽ ले़सुबा पाःन्निन् मनाहाॽ हुॽरुसि॥ खुने़ॽ यरिक् खाहुन्हाॽ नुरिक्काङ् साप्तु, कोःत्तु, हे़क्क्याङ् नुरिक्काङ् पे़न्छुफत्छु॥ 10 खाहुन्साबे़ल्ले़ से़क्खाबा पाःन्हाॽ खोमा तम्सिङ् चोगु॥ खे़ल्ले़ थे साप्तु, खे़न् से़क्खा वये़॥ 11 सिक्कुम्साबा मनाःल्ले़ कुबाःन्हाॽ मे़ल्लुक्कम्बाहाॽरे़ मे़गत्तुबा मे़ल्लुक्लाम् ओसेःन्धाक्मा हासम्सम्बा तक्कात् हे़क्के लॽ हे़क्क्याङ् फुङ्मनाबा खाहुन्हाॽग के़धुम्बा चोःक्मनाआङ् थे़प्मनाबा फे़न्तिङ् हे़क्के लॽ॥ लत्थिक्लक् मे़ल्लुक्कम्बा निङ्वाॽफुमाङ्ङिल्ले़ खे़ङ्हाॽ आनिॽ आबिरे़बारो॥ 12 आस्साए, आल्लसाङ् कुभा साम्दिङ्हाॽ पिने़रो॥ साप्पन् साप्माल्ले़ कुनुप्मा होप् हे़क्क्याङ् यरिक् साप्ला निःप्मारे़ नासिगे़न् थक्किन् नारो॥ 13 कन् के़रे़क् पाःन्हाॽ के़घे़प्सु, आल्ल लत्छा पाःन्लक् पाःप्मा वाॽरो, निङ्वाॽफुमाङ्ङिन् किरे़ॽओ हे़क्क्याङ् खुने़ॽ कुङ्जाःङ्ङिन् इःत्ते़ नाःत्ते़ॽओ थेआङ्भे़ल्ले़ खे़म्म्याक् चोःक्मारक् मनान् नावागे़न् चइःत् पोःक्खे़बारो॥ 14 आनिॽ चोःक्मनाबा के़रे़क् याःम्बक्किन् नुबा पोङ्साङ् इग्र ताप्फे़ःम्बा पोङ्साङ्, स्वाःत्ताङ् चोःक्मनाबा याःम्बक्किन्नाङ् निङ्वाॽफुमाङ्ङिल्ले़ खासे़न् चोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.