खाहुन्साबा 11 - लिम्बुसिक्कुम्निबा मनाःल्ले़ कुयाःम्बक् 1 के़याङ्साकुन्धेन् निङ्वाॽ हन्दे़आङ् पिरे़से़ॽओ हे़क्क्याङ् यरिक् ये़न् एगाङ् खे़ने़ॽ खे़न् याम्मो के़घोसुरो॥ 2 खे़ने़ॽ नुसि, ये़त्छि मनाहाॽ हाःत्ते़से़ॽओ थेआङ्भे़ल्ले़ खे़ने़ॽ खे़न् के़न्निसुन्लो, लाजेॽओ आक्तङ्बा ये़त्तुक्खे ताइरो॥ 3 खाॽमिःप्पान् च्वाःत्तिल्ले़ तिम्ने़ फग्र खे़ल्ले़ पाङ्गे़न्दिङ् वाहित्मान् थासुरो॥ सिङ्बुङ्ङिन् थाङ्गे़त् ले़प्माङ् चोःन्छाङ् इग्र लाङ्गे़त् ले़प्माङ् चोःन्छाङ् खे़न् आत्तो ले़प्माङ् चाेन् हाबा खे़प्मोए ने़रो॥ 4 सुरित् हुबा मिक्चो के़मे़प्पे़ल्ले़ आप्फाल्ले़आङ् याक्वा मे़देसुन्लो खाॽमित् ओगे़मे़प्पार के़ने़बाल्ले़ आभे़ल्ले़आङ् कुजा मे़सुप्सुन्लो॥ 5 सुरित्ते़ल्ले़ कुलाम्मिन् के़न्निसुन्लो इग्र मे़न्छुक्मा के़वाॽमा मे़न्छुमाःल्ले़ कुसाप्पोःक्पोबा अङे़ःक्वान् नावाचइत् ले़ङ्सिङ्बान् कुसिङ् निःप्मा के़न्छुक्तुन्लो हे़क्केलॽरिक्के के़रे़क् पाःन्हाॽ के़जोःक्पा, निङ्वाॽफुमाङ्ङिल्ले़ कुयाःम्बक्किन् कुसिङ् निःप्मा के़न्छुक्तुन्लो॥ 6 तानाम्सा याॽरिःम्बान् हेॽरे़ओ, युःन्छिक्काङ् याःम्बक् मे़न्जोःक्के स्वाःत् मे़युङे़न्ने़ॽओ॥ थेआङ्भे़ल्ले़ याॽरिःम्बाल्ले़ कुजाॽ फत्छुॽ आल्लो हेॽमनाबा याॽरिःम्बान् इग्र चोःक्मनाबा याःम्बक्किन् इ नुबा पोङ्बि, खे़न् खे़ने़ॽ आप्फाल्ले़आङ् के़न्निसुन्लो॥ 7 खागे़ओःप्पा ओःत्तिःन् नुबा चोक्लो, मिक्किल्ले़ नाम्मिन् ओमे़प्मा कुसिराॽ थाङ्लो॥ 8 हिङ्मन्बा के़रे़क् तङ्बेहाॽरे़ लागि सःत्ते़ॽम्मे़ॽओ॥ खिनिॽ आक्खे़न् केःल्लिक् थाःक् चाॽसाङ् खे़न्नुःल्ले़ केःम्बाग सिमे़न् एगाङ्बा ये़म्मिन् पोङ्लो कन् पाःन्निन् खिनिॽ निङ्वाॽओ युक्खे़म्मे़ॽओ॥ के़दाबा पान् के़रे़क् थेनाधेरो॥ 9 थाङ्बे़न्छे, खिनिॽ थाङ्बे़न् ये़म्मो ये़ये़ लॽरे़म्मे़ॽओ, थाङ्बे़न् के़वयिर थारिक् नुरे़म्मे़ तासे़म्मे़ॽओ॥ निङ्वाःल्ले़ इःत्तुबा सिराॽगे़धाङ्बा हे़क्क्याङ् खिनिॽ मिक् के़लाःप्पा पाःन्हाॽ के़त्ते़म्मे़ॽओ कर कन् पाःन्निन् निङ्वाॽओ युक्खे़म्मे़ॽओ निङ्वाॽफुमाङ्ङिल्ले़ खिनिॽ के़रे़क् पाःन्हाॽ खारात् युक्खुरो॥ 10 खे़ल्ले़चोगुल्ले़ थे पाःन्नोआङ् निङ्साङ् मे़बुगे़न्ने़ॽओ, नासिगे़न् के़धक्कोबा तुक्मालाःक्माओ निङ्वाॽ मे़बिरे़न्ने़ॽओ॥ खे़ने़ॽ सदादिङ् थारिक् थाङ्बे़न् नु के़धुम्बा के़न्वाॽने़न्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.