खाहुन्साबा 10 - लिम्बु1 के़सिबा याङ्ना सिजाहाॽरे़ कुनाम्गे़नुॽबा फुङ्नाम् याङ्मा पर्यामान् नाम्गे़सुबा चोःक्मा मे़सुक्तुरो हे़क्क्याङ् लत्थिक् चुक्सा अदङ् याःम्बक्ले़ यम्बा सिक्कुम्दिङ् निङ्वान् हने़बा चोःक्मा सुक्तुरो॥ 2 सिक्कुम्दाङ्बाल्ले़ कुनिङ्वान् नुबा लाम्मो वाॽरो कर अदङ् मनाःल्ले़ कुनिङ्वान् पे़र्गे़क्के़क्पा लाम्मो पेःक्लो॥ 3 अदङ् मनान्, लाम्मो लाङ् लाङ्घेःक्किल्ले़आङ् खुने़ॽ कुने़हि सुःन्नाङ्, कुअदङ् पाःन्निन् के़रे़क् उसेःन्धाङ् चोगुसिरो॥ 4 हाङ्युक्पान् खे़ने़ॽनु कुयाःक्ले़ॽसाङ् खे़ने़ॽ याःम्बक्किन् मे़ले़रे़न्ने़ॽओ, खे़ने़ॽ नासि थःत्ते़ॽआङ् स्वाःत् युङे़ॽओ, हे़क्केःल्ले़ यम्बा याःम्बक् पेःम्मालाम् ले़प्मि खोमा के़सुक्तुरो॥ 5 इक्सादिङ् खाम्बेःक्मो आङ्गाॽ लत्छा फे़न्याम्बक् थिक् निसुङ्लो, अक्तङ्बा पिर्बेःम्बा पान् सुहाङ्युक्पालाम् पोङ्लो॥ 6 अदङ् मनाहाॽ थोसमा युक्साबा ताक्फा मे़बिरुसिरो हे़क्क्याङ् याङ्साकुन्धेसाबाहाॽ योसमा ताक्फा मे़बिरुसिरो॥ 7 आङ्गाॽ योःग्बाहाॽ अन् मे़युक्तुआङ् मे़बेबा नु लाम्लोबाहाॽ योग्बा हे़क्के लाङ्मे़घेगे़बा निसुङ्सिङ्ङाङ् वाॽरो॥ 8 आत्तिल्ले़ लुम्बात् तयुॽ, खुने़ॽ हाबा खे़प्मोए थारो॥ आत्तिल्ले़ लुङ्धाक्किन् लुःन्दुॽ, आम्भा खे़न् असेःक्किल्ले़ अगुरो॥ 9 लुङ् हे़प्मा याःम्बक् के़जोःक्पान् लुङ्ङिल्ले़ए खाःन्दुरो॥ सिङ् के़घे़ःप्पान् सिङ्ङिल्ले़ए खाःन्दुरो॥ 10 तःन्दिन् हागे़धःप्पा चोःक्काङ् खे़न् याराप्मा मेःन्ने़फग्र खे़न् याङ्माल्ले़ साॽरिक् थुम् याक्मा पोङ्लो॥ कर हुक्चो वाॽमारे़ कुलिङ्दो आगे़त्लो॥ 11 असेःक् के़दे़म्बे़न् असेःक्के़ल्ले़ अगुने़फग्र खे़ल्ले़ असेःक्के़न् कुधना ले़ङ्ल याःम्मा ले़सुबा मुःन्धुम्मिन् थे इन्धा पोःक्खे़बे? 12 सिक्कुम्साबाल्ले़ कुबाःन्निल्ले़ मिङ्सो इङ्धाङ् तारुरो कर अदङ्ङिल्ले़ कुबाःन्निल्ले़ खुने़ॽ आबाङे मे़क्खुरो॥ 13 कुहेःक्सिङ्मो खे़ल्ले़ अदङ्पान् पाःत्तुरो कुनुप्मो खे़ल्ले़ कुबाःन्निन् ताप्फे़ःल्लिक्काङ् नाङ्नाङ् थाप्थाप् के़लॽबा पोङ्लो॥ 14 खासिङ् मे़न्निःप्मनाबा मनान् चक्मे़ल्लॽए पाःत्लो॥ कर ताये़म्मो थे पोङ्ॽ के़लॽबे़न् आत्तिल्ले़ निसुबे? सिमे़न् एगाङ् थे पोङ्ॽ, हाःत्ले़आङ् पाःप्मा मे़सुक्तुन्लो॥ 15 अदङ् मनान् आप्फेक् कुयाःम्बक्किल्ले़ नारो खे़ल्ले़चोगुल्ले़ ये़क्यक्को पेःक्मा लाम्माङ् खे़ल्ले़ निमा मे़सुक्तुन्लो॥ 16 खे़न् लाजेःङ्ग कुदॽयान् के़भे़म्बारो, खे़न् लाजेॽबा हाङ्ङिन् लत्छा कुनिङ्वाॽ के़बाःक्पा चप्प्रक्पा चोक्लो, हे़क्क्याङ् लाम्लोबाहाॽ नाम्के़प्मानु सोरिक् साभःङ्जाओ मे़जर मे़धुङुर मे़याक्लो॥ 17 कर खे़न् लाजेॽबा हाङ्ङिन् नुबा हिम्सयङ्लाम्बा हे़क्क्याङ् लाम्लोबाहाॽ थुम्ले़ लागि सुये़म्मोरक् कुजा मे़जरो, कर सेजङ्वान् मे़धुङुआङ् मे़म्मसिङ्ङिन्लो, खे़न् लाजेन् कुदॽयान् के़नुॽबारो॥ 18 कुले़म्के़युबा मनाःल्ले़ कुहिम्मिन् वायुरो हे़क्क्याङ् खे़न् कुहिम्मिन् यन्नाङ् चोःन्लो॥ 19 साभःङ्जान् चामाल्ले़ पसःत् आसःत्लो हे़क्क्याङ् सेजङ्वाःल्ले़ निङ्वाॽ तासुरो॥ कर याङ्ङिल्ले़ थेसाङ् खोदे़त्लो॥ 20 हाङ्ङिन् चे़ॽया इङ्दो मे़मे़त्ते़न्ने़ॽओ, कन् के़निङ्वाॽओआङ् मे़इःत्ते़न्ने़ॽओ॥ ने़त्ना याक्फाङ्ङोआङ् याङ्साकुन्धेसाबा मनान् साक्मुरा मे़मे़त्ते़न्ने़ॽओ॥ थेआङ्भे़ल्ले़ ताङ्साङ्धोबा पुःल्ले़ इङ्घङ् तेॽरुरो हे़क्क्याङ् के़बे़बा पुःल्ले़ के़बाःन्निन् मनाहाॽ मे़त्तुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.