खाहुन्साबा 1 - लिम्बुके़रे़क् पाःन्हाॽ हने़बा चोक् 1 दाउदरे़ कुस्सा, यरुसले़ःम्बा हाङ्, खाहुन्साबे़ल्ले़ कुबाःन्हाॽ हाबा कन्हाॽरो— 2 खाहुन्साबे़ल्ले़ अक्खे पाःत्तुरो, “हने़ थेनाधेरक्लो, हने़ थेनाधेरक्लो, हिङ्मन्निन् हने़ थेनाधेरक्लो, के़रे़क् पाःन्हाॽ हने़ थेनाधेरक्लो॥” 3 मनाःल्ले़ नाम्मिल्ले़ कुसिगाङ् स्याङ्मे़न्दाङ् मे़जोगुबा खुन्छिॽ सिसिबा याःम्बक्लाम् थे कुजक् खोसुआङ्बे? 4 लत्थिक् थाःक् पेःक्लो, हे़क्क्याङ् वेॽ थाःक्किन् तारो, कर इक्सादिङ् खाम्बेःक्मान् आभे़ल्ले़साङ् हाबा ने़रो॥ 5 नाम्मिन् के़त्लो हे़क्क्याङ् नाम्मिन् थारो, खे़न् कुगे़प्मा ते़न्नो हाराहारा नुःङ्बेःक्लो॥ 6 सुरित् केजङ्ङिन् यो लाङ्गे़त् ले़प्माङ् हुरो, हे़क्क्याङ् थाङ्गे़त् ले़प्माङ् हुधाङ्लो, खे़न् आभे़ल्ले़साङ् कुइमादे़न्नो नुःङ्ङाङ् इआङ् वाॽरो॥ 7 के़रे़क् वहःङ्हाॽ तुङ्गोदिङ् वरःङ्ङो मे़गुङ् मे़लाःत्लो, कर वरःङ्ङिन् आप्फाल्ले़आङ् मे़दिम्ने़न्लो॥ आत्तिन् ते़न्नोलाम् वहःङ्हाॽ मे़गुङ् मे़दाःॽ खे़न् वहःङ्हाॽ याम्मो खे़प्मोए मे़नुःङ् मे़बेःक्लो॥ 8 के़रे़क् पाःन्हाॽ मुदोखाम्दो के़दाबा चोक्लो, हाःत्ले़आङ् खे़न् चे़ङ्मा पाःप्मा मे़सुक्तुम्बा चोक्लो॥ निमनाबा पाःन्निल्ले़ मिक्किन् आभे़ल्ले़आङ् मे़घाने़न्लो, इग्र के़घे़म्बा ने़क्खोॽइन्नाङ् कुनिङ्वाॽ मे़दाने़न्लो॥ 9 थे पोःक्खे़आङ् वाॽ खे़न् याम्मो पोङ्लो, हे़क्क्याङ् थे़मा चोःक्मनाआङ् वाॽ, याम्मो चोःक्मा पोङ्लो, नाम्मिल्ले़ कुसिगाङ् आत्तिन् पाःन्निन्नाङ् कुसङ् होप्लो॥ 10 मनाऱे मे़बाःत्तुॽ, “ओमे़त्ते़म्मे़ॽ, कङ्ग कुसङ् पाःन्लो” फाॽआङ् खे़ल्ले़ कुयाःम्बेओ हाःत्ले़ पाःप्मा सुक्तुबे? खे़ङ्ग आनिॽ आवये़बानुःल्ले़ यरिक् तगिआङ्धोए वये़रो॥ 11 उनाहुरि ये़म्मोबा मनाहाॽ हाःत्ले़आङ् निङ्वाॽ मे़इःत्तुसिन्लो, हे़क्क्याङ् आल्लसाङ् तामा के़बोङ्बा थाःक्हाॽ मे़वाॽरो, खे़ङ्हाॽ खुन्छिॽनुःल्ले़ याङ्सि के़दाबा थाःक्हाॽरे़ मे़न्इःत्तुसिन्लो॥ सिक्कुम्निङ्वान् थेनाधेरक् 12 आङ्गाॽ, खाहुन्साबे़न् इस्राइलबा हाङ् पोःक्खाङ्ङाङ् यरुसले़ःम्मो हाङ्युक् चोगुङ्ङाङ् वये़॥ 13 ताङ्साङ्बे़ल्ले़ कुसिगाङ् थेधे पोङ्ल पत् खे़ङ्हाॽ के़रे़क् सिक्कुम् निङ्वाॽलाम् निःप्मा नु कोःम्भो चोःक्मा आङ्गाॽ आनिङ्वाॽओ निःन्धो चोगुङ्॥ निङ्वाॽफुमाङ्ङिल्ले़ साॽरिक् यम्बा याःम्बक् चोःक्मा लक्पे़न् मे़न्छाम् याप्मिहाॽ पिरुसिआङ् वाॽ! 14 नाम्मिल्ले़ कुसिगाङ् चोःक्मनाबा के़रे़क् याःम्बक्हाॽ आङ्गाॽ निसुङ्ङाङ् वाॽ॥ खे़ङ्हाॽ के़रे़क् हने़ थेनाधे साम्मिःत् केजङ्ङिन् नाःप्मनाबा हे़क्केरक्लो॥ 15 आत्तिन् पाःन्निन् अःक्खुॽखुॽबा चोक्, खे़न् तोःन्दोम्बा चोःक्मा सुक्मे़दे़त्ने़न्लो, आत्तिन् पाःन्निन् होप्, खे़न् निमा सुक्मे़दे़त्ने़न्लो॥ 16 आङ्गाॽ आप्फेक् आनिङ्वाॽओ इःत्तुङ्, “ओमे़त्ते़साॽरे़, आङ्गाॽनुःल्ले़ तगि यरुसले़ःम्मो हाङ्युक् के़जोःक्पा आत्तिन्नुःल्ले़ यरिक् आङ्गाॽ सिक्कुम् निङ्वाॽ याङ्घोःत्तुङ्ङाङ् वाॽ॥ सिक्कुम् निङ्वाॽ नु ने़हिनिङ्वाॽओ आङ्गाॽ यरिक् के़ले़बा पोःक्खाङ्ङाङ् वाॽ॥” 17 खे़ब्याङ् आङ्गाॽ सिक्कुम्दिङ् निङ्वान् कुसिङ् निःप्मारे़ लागि हे़क्क्याङ् नाङ्नाङ् थाप्थाप् लॽमान् नु अदङ् पाःन्निन् निङ्वाॽ खोमारे़ लागि निङ्वाॽ पिरुङ्॥ कर कन्नाङ् साम्मिःत् केजङ्ङिन् नाःप्मनाबा हे़क्केरक् फाॽआङ् आङ्गाॽ निङ्वाॽ खोसुङ्॥ 18 थेआङ्भे़ल्ले़ यरिक् सिक्कुम्निङ्वाःल्ले़ यरिक् तुक्खे तारुरो, यरिक् ने़हिनिङ्वाःल्ले़ यरिक् निङ्वाॽ तुक्खे चामा पाःन् तारो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.