साम्योथिम् इङ् 4 - लिम्बुकुइजाःङ्हाॽ इःप्मा नाःत्मा 1 आल्ल, इस्राइलिसे, आङ्गाॽ खिनिॽ हुॽमा चोःक्निङ्बा साक्थिम्हाॽओ निङ्वाॽ पिरे़म्मे़ॽ॥ खे़ङ्हाॽ खिनिॽ इःत्ते़म् नाःत्ते़म्मे़ॽ, खे़ब्याङ् खिनिॽ के़हिङिॽ, खम्भ्याङ् खिनिॽ पाधे़बाहाॽरे़ खुनिॽ यहवे दाङ्बा निङ्वाॽफुमाङ्ङिल्ले़ खिनिॽ पिमा के़इःत्तिबा लाजेन् युक् के़जोगुम्ॽ॥ 2 आङ्गाॽ खिनिॽ पिनिङ्बा इङ्जाङ्हाॽओ कुभा थे़माआङ् मे़योॽरे़म्मिन्ने़ॽ, थे़माआङ् मे़घक्ते़म्मिन्ने़ॽ कर आङ्गाॽ खिनिॽ पिनिङ्ल पत्ताबा यहवे दाङ्बा खिनिॽ निङ्वाॽफुमाङ्ङिल्ले़ कुइजाःङ्हाॽ इःत्ते़म् नाःत्ते़म्मे़ॽ॥ 3 बाल-पोरओ यहवे दाङ्बे़ल्ले़ थे़मा चोगु खे़न् खिनिॽ आप्फेक् मिक्किल्ले़ के़निसुम्माङ् वाॽ॥ पोरबा बाल माङ्ङिन् के़दिम्बा के़रे़क् मनाहाॽ यहवे दाङ्बा खिनिॽ निङ्वाॽफुमाङ्ङिल्ले़ खिनिॽ लुम्मोलाम् मे़क्खुसि॥ 4 कर यहवे दाङ्बा खिनिॽ निङ्वाॽफुमाङ्ङो चक्मे़ल्लॽए के़बप्पा खिनिॽ लुम्मोबा मनाहाॽ के़रे़क् आइन् थारिक्साङ् कुहिङ्वे़त् मे़वाॽ॥ 5 ओमे़त्ते़म्मे़ॽ, यहवे दाङ्बा आङ्गाॽ माङ्से़वा मे़त्तुङ्बा निङ्वाॽफुमाङ्ङिल्ले़ इङ्जाङ् पिराङ्बा कुइसिक् खिनिॽ युक् चोःक्मा के़जोगुम्बा लाजेॽओ कन्हाॽ के़रे़क् इःप्मा नाःप्मारे़ लागिए आङ्गाॽ खिनिॽ कन् थिम्हाॽ हुॽनिङ्ङाङ् वाॽ॥ 6 खिनिॽ खे़न् इङ्जाङ्हाॽओ ते़न्दे़म्मे़ॽ हे़क्क्याङ् इःत्ते़म् नाःत्ते़म्मे़ॽ, थेआङ्भे़ल्ले़ आम्भा कन्लाम् वेॽ सुवाङ्हाॽरे़ खुन्छिॽ तगि खिनिॽ सिक्कुम्दिङ् निङ्वान् नु खासिङ्निःप्मान् इङ्मे़भोसुॽ॥ कन् के़रे़क् थिम्हाॽ मे़घे़प्सुआङ् खे़ङ्हाॽरे़ अक्खे मे़बाःत्तुॽ, “से़क्खासाङ् कन् पयम् यम्बा सुवाङ्बा मनाहाॽ साॽरिक् सिक्कुम्साबा नु खासिङ् के़निःप्पासिरे़त्छ!” 7 आनिॽ खुने़ॽ पेलि आभाक्तुम्मिल्ले़ यहवे दाङ्बा आनिॽ निङ्वाॽफुमाङ्ङिन् आनिॽ निःत्ताङ् वाॽबा हे़क्के खुन्छिॽ निङ्वाॽफुमाङ् निःत्ताङ् के़वाॽबा वेॽ आत्तिन् पयम् यम्बा मे़न्छाम् सुवाङ् वाॽबे? 8 आङ्गाॽ आइन् खिनिॽ पिनिङ्बा कन् साम्योथिम्हाॽ कुइसिक् साम्यो साक्थिम्हाॽ के़गप्पा वेॽ आत्तिन् पयम् यम्बा सुवाङ् वाॽबे? 9 कर सिङ्सिङ् वये़म्मे़ॽ हे़क्क्याङ् आप्फेक् निङ्वाॽ ये़क्ये़क् लॽरे़म्मे़ॽ, हे़क्केलॽरिक् खिनिॽ मिक्किल्ले़ के़निसुम्बा पाःन्हाॽ निङ्वाॽ मे़भेःत्छे़म्मिन्ने़ॽ हे़क्क्याङ् खे़न् खिनिॽ हिङ्हिङ् थारिक् खिनिॽ निङ्वाॽओनु मे़लःन्ने़न् मे़बेःक्ने़न्ल॥ खे़ङ्हाॽ खिनिॽ साहाॽ नु मे़न्छाॽहाॽ हुॽरे़म्सिम्मे़ॽ॥ 10 होरेब कोःक्माओ खिनिॽ यहवे दाङ्बा निङ्वाॽफुमाङ्ङिल्ले़ कुदगि के़ये़बिबा ये़न्निन् निङ्वाॽ इःत्ते़म्मे़ॽ, आल्ल खुने़ॽ आङ्गाॽ अक्खे मे़त्ताङ्, “आङ्गाॽ आबाःन्जाक् खे़म्मारे़ लागि मनाहाॽ आङ्गाॽ आदगि सुप्से़से़ॽ, हे़क्क्याङ् खे़न् लाजेॽओ खुन्छिॽ हिङ्हिङ् आङ्गाॽनु किमा मे़हुॽसिङ्ल खम्भ्याङ् खे़न् पाःन्जाःक्हाॽ खुन्छिॽ साहाॽआङ् मे़हुॽरुसिर॥” 11 कोःक्मा फाङ्जङ्ङो मिधुङ्दिङ् मिराःक् पोगे़आङ् ताङ्साङ्बो थारिक्के के़रे़, हे़क्क्याङ् कुबःत् कुबःत् खाॽमित् इक्सिङ् त्ये़आङ् खे़प्मो खामाक्ते़बा ये़म्मो खिनिॽ के़द्ये़ॽइ हे़क्क्याङ् कोःक्मा फाङ्जङ्ङिल्ले़ कुबुङ्ङो के़ये़बि॥ 12 खे़ब्याङ् मिधुङ् मिराःक् लुम्मोलाम् यहवे दाङ्बे़न् खिनिॽनु पारे़॥ खे़न् ये़म्मो खिनिॽ पाःन्छेःक्वा इक्लाःन्लक् के़घे़प्सुम्, कर कुभा थे़मा चइःत्ताङ् के़न्निसुम्मिन्॥ खिनिॽ लत्छा इक्लारक् के़घे़प्सुम्॥ 13 खुने़ॽ कुमाङ्हुप्पिन्, थिबोङ् कुइङ्जाङ्हाॽ खिनिॽ के़इःत्तुम् के़नाःत्तुम्ल फाॽआङ् खुने़ॽ के़बिरि, हे़क्क्याङ् ने़त्छि साप्लुङ्ङो खे़ङ्हाॽ साप्तु के़बिरि॥ 14 यर्दन नाधाःम्बि के़गाःक्तुम्माङ् खिनिॽ युक् चोःक्मा के़इःत्तुम्बा लाजेॽओ खिनिॽ इःत्ते़म् नाःत्ते़म्मे़ॽ फाॽआङ् थिम् साक्थिम्हाॽ खिनिॽ हुॽमा इङ्जाङ् यहवे दाङ्बे़ल्ले़ खे़न् ये़म्मो आङ्गाॽ पिराङ्ङाङ् वये़रो॥ नावाइत्ला से़वा मे़प्मा मेःन् 15 होरेब कोःक्माओ मिधुङ्दिङ् मिराःक् लुम्मोलाम् यहवे दाङ्बे़न् पारे़ल्ले़ याःन्दिक् खिनिॽ थे़माआङ् चइःत् के़न्निसुम्मिन्॥ सिङ्सिङ् ये़क्ये़क्काङ् वये़म्मे़ॽ, 16 मेःन्ने़भग्र खिनिॽ फे़क्के़ल्लाॽरिॽ, खिनिॽ आप्फेक् लागि लत्छा नावाइत्ला के़जोगुम्ॽ हे़क्क्याङ् कुभा ये़म्बित्छा इग्र मे़न्छुमा चइःत्, 17 इग्र इक्सादिङ् खाम्बेःक्कोबा थक्साहाॽ किग्र कुभा ताङ्साङ्बो के़बे़बा कुभा पुःल्ले़न्, 18 खाम्बाङ्ङो के़सःन्छिङ्बा कुभा मुन्जिङ् वयाक् के़लॽबा इग्र च्वाःत्तो के़याक्पा कुभा ङाःल्ले़ कुजइःत् मे़जोगे़म्मिन्ने़ॽ॥ 19 ताङ्साङ्बो यहवे दाङ्बा खिनिॽ निङ्वाॽफुमाङ्ङिल्ले़ के़रे़क् मे़न्छाम् याप्मिहाॽरे़ लागि पिरुसिबा नाम्, लाबा, खेःम्सिक्पाहाॽ के़रे़क् खेसेबाहाॽ केनिसुम्सिम्मिल्ले़ खे़ङ्हाॽओ खिनिॽ सिक्मे़सम्ने़न्ल हे़क्क्याङ् खे़ङ्हाॽ माङ्से़वा नु से़वा मे़मे़त्ते़म्सिम्मिन्ने़ॽ॥ 20 कर खिनिॽग यहवे दाङ्बे़ल्ले़ फे़न्जेॽ योःम्मा मिघाङ्ग्रोःक् हे़क्तङ्बा मिस्रलाम् आप्फेक् कुलक्खोमा हे़क्तङ्बा आइन् के़वयिबा हे़क्के कुमना चोःक्मानिङ्ले़ लागि के़लःत्ति के़भे़त्तिबान् निङ्वाॽ इःत्ते़म्मे़ॽ॥ 21 खिनिॽ के़जोगुम्मिल्ले़ यहवे दाङ्बे़न् आङ्गाॽनु कुयाःक्ले़ॽरे़, हे़क्क्याङ् आङ्गाॽ यर्दन नाधाःम्बि पेःक्मा मे़ङ्घोम्नाबा नु यहवे दाङ्बा खिनिॽ निङ्वाॽफुमाङ्ङिल्ले़ खिनिॽ युक् पिमा के़इःत्तिबा खे़न् नुबा लाजेॽओ लाःप्मा मे़घोआन्बा माङ्हे़क् चोगु॥ 22 आङ्गाॽ हाबा कन् लाजेॽओए सिमा के़बोङ्बा वाॽ॥ आङ्गाॽ यर्दन नाधाःम्बि पेःक्मा मे़घोआन्, कर खिनिॽ नाधाःम्बि पेःक्माआङ् खे़न् नुबा लाजेन् युक् चोःक्मा के़जोगुम्ॽ॥ 23 खे़ल्ले़चोगुल्ले़ खिनिॽ सिङ्सिङ् ये़क्ये़क् लॽरे़म्मे़ॽ॥ यहवे दाङ्बा खिनिॽ निङ्वाॽफुमाङ्ङिल्ले़ खिनिॽनु चोगुबा माङ्हुप्पिन् निङ्वाॽ मे़भेःत्छे़म्मिन्ने़ॽ, हे़क्क्याङ् खुने़ॽ चोःक्मा मे़नुॽने़न् पाःत्तुबा आत्तिन् पाःन्निन्नाङ् खिनिॽ नावाइत्ला मे़जोगे़म्मिन्ने़ॽ॥ 24 यहवे दाङ्बा खिनिॽ निङ्वाॽफुमाङ्ङिङ्ग आमे़ङ्मे़ङ्बा मिरो, खुने़ॽग वेॽ माङ्हाॽ नासिमे़न्धःप्मनाबा निङ्वाॽफुमाङ्लो॥ 25 खिनिॽ ये़म्बित्छा मे़न्छुमा साहाॽ नु मे़न्छाॽहाॽ के़गत्तुम् के़सुरुम्सिम्माङ् हाबा खे़न् लाजेॽओ यरिक् तङ्बे यारिक् के़युङि के़जुरि हे़क्क्याङ्साङ् फे़त्के़लारिआङ् कुभा पाःन्निल्ले़ कुजइःत् कुइसिक् कुइःत् के़लक्तुम् के़घोःन्दुम्माङ् यहवे दाङ्बा खिनिॽ निङ्वाॽफुमाङ्ङिल्ले़ कुमिक्साओ फे़न्याःम्बक् के़जोगुम्माङ् खुने़ॽ कुसिक् के़भोःक्खुम्ने़भग्र, 26 खिनिॽ युक् चोःक्मारे़ लागि यर्दन नाधाःम्बि पेःक्मा के़इःत्तिबा खे़न् लाजेॽओ हारा ए खिनिॽ के़रे़क् हर्गुप् के़मे़गि फाॽआङ् आङ्गाॽ आइन्बा ये़न्नो साङ्ग्राम्पेदाङ् नु इक्सादिङ् खाम्बेःक्मान् खिनिॽ तक्ले़ङ्वाओ इङ्सुङ्ॽ, हे़क्क्याङ् यरिक् ये़न् युङ्मा के़ङ्घोसुम्मिन्ॽ कर वरे़ङ्ले़ङ् युम्रे़क् के़मे़गिॽ॥ 27 यहवे दाङ्बे़ल्ले़ मे़न्छाम् याप्मिहाॽ लुम्मो फुत्छिङ्ज्याङ् के़जोगिॽ, हे़क्क्याङ् खुने़ॽ खिनिॽ के़नाःत्ति के़देसिबा लाजेॽओबा मे़न्छाम् सुवाङ्हाॽ लुम्मो खिनिॽ साॽरिक् सुःल्लिक् के़बोःक्खिॽ॥ 28 खे़प्मो मनाहाॽरे़ खुन्छिॽ हुक्किल्ले़ मे़जोगुसिबा, निमा मे़न्छुक्मनाबा, खे़म्मा मे़न्छुक्मनाबा, चामा मे़न्छुक्मनाबा, नाम्मा मे़न्छुक्मनाबा सिङ् नु लुङ् माङ्हाॽ खिनिॽ से़वा के़मे़त्तुम्सिम्ॽ॥ 29 कर खे़प्मोआङ् यहवे दाङ्बा खिनिॽ निङ्वाॽफुमाङ्ङिन् खिनिॽ के़गोःत्तुम्ॽ खे़ब्याङ् खिनिॽ के़रे़क् सिक्लुङ्माॽ नु सक्मा साम्मिल्ले़ के़हक्सुम्ने़भग्र खिनिॽ खुने़ॽ के़घोसुम्ॽ॥ 30 याङ्सिबा ये़न्हाॽओ आल्ल खिनिॽ के़साक्पो के़ध्ये़ॽइ हे़क्क्याङ् आङ्गाॽ मे़त्निङ्बा के़रे़क् पाःन्हाॽ खिनिॽ सम्धाङ् इदारो, खे़ब्याङ् यहवे दाङ्बा खिनिॽ आप्फेक् निङ्वाॽफुमाङ् ले़प्माङ् के़नुःक्खिॽ, खम्भ्याङ् खुने़ॽ कुबाःन्जाक्किन् के़इःत्तुम् के़नाःत्तुम्ॽ॥ 31 खुने़ॽ खिनिॽ लाप्के़न्दिसिन्ॽ के़म्मे़क्खिन्ॽ॥ खिनिॽ पाधे़बाहाॽनु खुने़ॽ चोगुबा माङ्हे़क्लाम् निःन्धो चोगुबा माङ्हुप्पिन् खुने़ॽ निङ्वाॽ मे़भेःत्छुन्ॽ, थेआङ्भे़ल्ले़ यहवे दाङ्बा खिनिॽ निङ्वाॽफुमाङ्ङिन् लुङ्माॽ आदुक्तुक्पा चोक्लो॥ निङ्वाॽफुमाङ् लत्छारक् वाॽ 32 अक्तङ्बा पयम् यम्बा हिन्दोक् आप्फाल्ले़ पोःक्खे़आङ् वये़ इग्र खे़म्दे़त्ते़आङ् वये़बे? इक्सादिङ् खाम्बेःक्मो निङ्वाॽफुमाङ्ङिल्ले़ मे़न्छाम् याप्मि नावागे़न् चोगुसिबा तोलिङ्सोमुल्ले़ कुयाःम्बेओ कोःत्ते़म् हक्से़म्मे़ॽ॥ ताङ्साङ्बाल्ले़ कत्नासमा कुयाओनु नासमा कुयाओ थारिक्काङ् हाबा कन् पाःन्निन् निःन्धो चोगे़म्मे़ॽ॥ 33 आत्तिन् सुवाङ्हाॽरे़ खिनिॽ हे़क्केए मिलाम् के़बाःप्पा निङ्वाॽफुमाङ्ङिल्ले़ कुबाःन्निन् मे़घे़प्सुआङ् मे़वाॽबे? हे़क्क्याङ् मे़हिङे़आङ् मे़वाॽबि? 34 यहवे दाङ्बा खिनिॽ निङ्वाॽफुमाङ्ङिल्ले़ खिनिॽ लागि मिस्र लाजेॽओ चोगुबा कुइसिक् आत्तिन् माङ्ङिल्ले़ कुसुवाङ्ङिन् वेॽसमा सुवाङ्लाम् लःत्तुसिआङ् आप्फेक् कुमना चोगुसिआङ् वाॽबे? खिनिॽए मिक् तगि खुने़ॽ पयम् यम्बा कुमुक्साम्मिन् नु कुमुक्किन् ओगप् चोगु॥ खुने़ॽ पयम् यम्बा माङ्दुक्मा नु ते़न्धङ् पोगे़र याःन्दु, ने़हिनिङ्वाॽरे़ मे़न्धाप्मनाबा नु निङ्वाॽ के़माबा याःम्बक्हाॽ चोगुआङ् किप्मा के़घुबा पाःन्हाॽ पोःक्खे़र याःन्दु॥ 35 यहवे दाङ्बे़न्ने निङ्वाॽफुमाङ्, हे़क्क्याङ् खुने़ॽनुःल्ले़ वेॽ हाःत्ताङ् होप् के़लॽबा पाःन्निन् कुसिङ् मे़निःत्तुर फाॽआङ् खे़ङ्हाॽ खुने़ॽ ओःन्धाक्तुसिबारो॥ 36 खिनिॽ हे़न्थिम् याक्मारे़ लागि खुने़ॽ साङ्ग्राम्पेदाङ्लाम् कुइक्लान् के़घे़प्सुम्ल के़याःन्दि, हे़क्क्याङ् इक्सादिङ् खाम्बेःक्मो खुने़ॽ यम्बा मिन् ओःन्गे़धाक्ति॥ मिलाम्बा खिनिॽ खुने़ॽ कुबाःन्हाॽ के़घे़प्सुम्॥ 37 खुने़ॽ खिनिॽ पाधे़बाहाॽ लुङ्माॽ तुक्तुसिबाल्ले़ चोगुल्ले़ हे़क्क्याङ् खे़ङ्हाॽरे़ खुनिॽ एगाङ् खुन्छिॽ थाःक्हाॽ सेगुसिबाल्ले़ चोगुल्ले़, खुने़ॽ आप्फेक् कुवाॽमा नु खुने़ॽ पयम् यम्बा कुमुक्साम्लाम् मिस्रलाम् खिनिॽ के़लःत्ति के़भे़त्ति॥ 38 खिनिॽ आप्फेक्नुःल्ले़ यम्बा नु मुक्साम्बा सुवाङ्हाॽरे़ खुनिॽ लाजेॽओ लाःप्माआङ् युक् चोःक्मारे़ लागि आइन् खुने़ॽ खे़ङ्हाॽ नाःत्तुदेसुसिआङ् वाॽ॥ 39 यहवे दाङ्बे़न्ने थाःङ् साङ्ग्राम्पेदाङ् नु यो इक्सादिङ् खाम्बेःक्माल्ले़ कुसम्धाङ् निङ्वाॽफुमाङ्लो हे़क्क्याङ् खुने़ॽनुःल्ले़ वेॽ हाःत्ताङ् होप् के़लॽबा आइन् खिनिॽ निङ्वाॽ खोसे़म्मे़ॽआङ् सिक्लुङ्माॽओ युक्खे़म्मे़ॽ॥ 40 आइन् आङ्गाॽ खिनिॽ पिनिङ्बा खुने़ॽ कुधिम् नु कुइङ्जाङ्हाॽ इःत्ते़म् नाःत्ते़म्मे़ॽ, खे़ब्याङ् खिनिॽ नु खिनिॽ याङ्सिबा थाःक्हाॽ मे़नुॽमे़दार, खम्भ्याङ् यहवे दाङ्बा खिनिॽ निङ्वाॽफुमाङ्ङिल्ले़ सदादिङ्ले़ लागि के़बिरिबा लाजेॽओ खिनिॽ थाःक् चाॽररो॥ यर्दन नाङ्गे़न् पिसाङ्बा से़ःप्सिङ्मादे़न् ये़क्यक्हाॽ 41 खे़ब्याङ् मोसाःल्ले़ यर्दन नाङ्गे़न् ले़प्माङ् ये़क्यक् सुम्सि लाःत्लाःत् से़न्दु॥ 42 खे़प्मो निङ्मि मे़न्वाॽए नु से़प्मा निङ्वाॽ मे़न्इःत्ते कुभारे़ आन्जानिःल्ले़ मना स्ये़रुने़भग्र खुने़ॽ खे़न् ये़क्यक्हाॽओबा लत्छा ये़क्यक्को खे़त्छिङ्मा पेःक्माआङ् से़ःप्सिङ्मा सुक्॥ 43 खे़न् ये़क्यक्हाॽ कन्हाॽए ने़स्से़—रुबेनिहाॽरे़ खुन्छिॽ लागि मुरे़क् खारे़क् थेआङ् के़होःप्पादे़न् सम्धाङ्बा ते़ल्लक् बेसेर, हे़क्क्याङ् गादिहाॽरे़ गिलादबा रामोत नु मनस्सेरे़ कुमुॽइदाङ्हाॽरे़ लागि बासानबा गोलाने़न् ने़स्से़रो॥ निङ्वाॽफुमाङ्ङिल्ले़ कुधिम्हाॽ खोमानुःल्ले़ तगिबा हिन्दोक्हाॽ 44 मोसाःल्ले़ इस्राइलिहाॽ पिरुसिबा साम्योथिम्मिन् हाबा कन्लो॥ 45 मिस्रलाम् मे़लःन्दे़ मे़भे़रे़आङ् मोसाःल्ले़ इस्राइलिहाॽ मे़त्तुसिबा थिम् नु साक्थिम्हाॽ हाबा कन्हाॽएरो॥ 46 कन् थिम्हाॽ मोसाःल्ले़ यर्दनलाम् नाङ्गे़न् पिसाङ् बेथ-पोर तगाङ्बा ने़ने़बादे़न् हेस्बोनओ हाङ्युक् के़जोःक्पा एमोरिहाॽरे़ खुनिॽ हाङ् सिहोनरे़ कुलाजेॽओ पिरुसिआङ् वये़॥ मोसान् नु इस्राइलिहाॽ मिस्रलाम् मे़लःन्दे़ मे़भे़रे़र मे़बत्छे़ल्ले़ सिहोने़न् मे़नाःन्दु॥ 47 इस्राइलिहाॽरे़ खुने़ॽ कुलाजेन् नु बासानबा हाङ् ओगरे़ कुलाजेन्, हे़क्क्याङ् यर्दन नाङ्गे़न् पिसाङ् के़ने़बा ने़त्छि एमोरि हाङ्हाॽरे़ खुन्छिॽ लाजेॽहाॽ युक् मे़जोगु॥ 48 खे़ल्ले़चोगुल्ले़ इस्राइलिहाॽरे़ अरोएरलाम् अर्नोन हःङ्गुःल्ले़ कुयाओबा चिभिॽभिॽबा के़रे़क् ते़न्हाॽ सिरियोन् कोःक्मा थारिक्, हेर्मोन कोःक्माआङ् मे़मे़त्तुबा थारिक् मे़नाःन्दु॥ 49 हे़क्क्याङ् यर्दन वहःङ् नाङ्गे़न् पिसाङ् पिसगाबा सुरेःम्ले़ःम्बा ते़न्निल्ले़ कुसिगाङ् के़ने़बा युम्लाःक्खाङ् वरःङ्ङोनु यो ले़प्माङ् थारिक् इस्राइलिहाॽरे़ मे़नाःन्दुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.