साम्योथिम् इङ् 3 - लिम्बुइस्राइलरे़ ओग हाङ्ङिन् नाःन्दु ( खानिःत् २१:३१-३५ ) 1 खे़न् एगाङ् बासान ले़प्माङ् थाआदिगे़॥ बासानबा हाङ् ओगे़न् खुने़ॽ के़रे़क् कुधक्सुबाहाॽ फे़त्तुसिआङ् आनिगे़नु ते़न्धङ् चोःक्से़ एद्रइओ के़रे़भे़रे़॥ 2 कर यहवे दाङ्बे़ल्ले़ आङ्गाॽ मे़त्ताङ्, “खे़ने़ॽ खे़न्नु मे़गिसे़न्ने़ॽ, थेआङ्भे़ल्ले़ खे़न्, के़रे़क् कुधक्सुबाहाॽनु सोसोरिक् खुने़ॽ कुलाजेःन्नाङ् आङ्गाॽ खे़ने़ॽ के़हुक्को पिने़आङ् वाॽ॥ हेस्बोनओ हाङ्युक् के़जोःक्पा एमोरिहाॽरे़ खुनिॽ हाङ् सिहोने़न्, खे़ने़ॽ आक्खे के़मे़त्तु खे़न्नाङ् हाबा हे़क्केए मे़त्ते़ॽ॥” 3 खे़ल्ले़चोगुल्ले़ यहवे दाङ्बा आनिगे निङ्वाॽफुमाङ्ङिल्ले़ बासानबा हाङ् ओगे़न् नु खुने़ॽ के़रे़क् कुधक्सुबाहाॽ आनिगे हुक्को थासुसि॥ आनिगे लत्छाआङ् मे़ल्ले़त्ते खक्पे़त् से़रुम्सिम्बे़॥ 4 हाबा खे़न् ये़म्मो आनिगे लत्छाआङ् मे़ल्ले़त्ते खुने़ॽ तुक्पोङ् कुये़क्यक्हाॽ आनिगे हुक्काप् चोगुम्बे़, बासानबा ओग हाङ्ङिल्ले़ कुहाङ्जुम् अर्गोबबा के़रे़क् ते़ङ्गप्हाॽआङ् हुक्काप् चोगुम्बे़॥ 5 कन् के़रे़क् ये़क्यक्हाॽ केःम्ब केःम्बा लुङ्धाक्हाॽरे़ कबुबा, कुए़प्मा नु यम्बा लाम्धेःत्हाॽ के़ये़प्पा चोगे़॥ कन्नुःल्ले़ वेॽ लुङ्धाक् मे़न्ये़प्मनाबा यरिक् पाङ्भेॽहाॽआङ् ने़स्से़॥ 6 हेस्बोनबा हाङ् सिहोने़न् मे़प्मनाबा हे़क्केए खे़ङ्हाॽरे़ खुनिॽ के़रे़क् ये़क्यक्हाॽ, ये़म्बित्छाहाॽ, मे़न्छुमाहाॽ नु हिन्जाॽबित्छाहाॽ खक्पे़त् आनिगे मे़क्खुम्सिम्बे़॥ 7 कर के़रे़क् पित्थक्साहाॽ नु ये़क्यक्कोबा चिगक्वा याङ्साकुन्धेहाॽ आनिगे नाःम्मनाबा याङ्साकुन्धे कुइसिक् आबाङे लागि तेॽरुम्बे़॥ 8 खे़ल्ले़चोगुल्ले़ खे़न् ये़म्मो कन् ने़त्छि एमोरि हाङ्हाॽरे़ खुन्छिॽ हुक्कोलाम् अर्नोन वहःङ्ङोनु हेर्मोन कोःक्मा थारिक् यर्दन नाङ्गे़न् पिसाङ्बा लाजेन् आनिगे हुक्काप् चोगुम्बे़॥ 9 (हेर्मोने़न् सिदोनिहाॽरे़ सिरिओन नु एमोरिहाॽरे़ सेनिर मे़मे़त्तु॥) 10 ते़ल्लक्को के़रे़क् ये़क्यक्हाॽ नु के़रे़क् गिलादे़न् नु के़रे़क् बासाने़न् नु बासानओ के़ने़बा ओगरे़ कुहाङ्जुम्मोबा सलका नु एद्रइ ये़क्यक्हाॽ थारिक्काङ् आनिगे हुक्काप् चोगुम्बे़॥ 11 (के़दाङ्बा के़याःक्पा रपाइहाॽओ बासानबा ओग हाङ्ङिन् वये़॥ खुने़ॽ कुने़त्ना आःन्धान् फे़न्जेःल्ले़न् ने़स्से़॥ कन् आःन्धान् आइन् थारिक्साङ् अम्मोनिहाॽरे़ खुन्छिॽ ये़क्यक् रब्बाओ ने़रो॥ हुक्किल्ले़ सिःक्मे़ल्ले़ कन् हुक्सिक् फाङ्सि कुलाम्ति नु हुक्सिक् लिसि कुभे़रे़बा चोगे़रो॥) यर्दन नाङ्गे़न् ले़प्माङ्बा लाजेॽहाॽ मे़भःक्खु ( खानिःत् ३२:१-४२ ) 12 खे़न् ये़म्मो खे़न् लाजेन् आनिगे युक्को तारुम्बे़ल्ले़, अर्नोन वहःङ्ङोबा अरोएरलाम् थाङ्गे़त् पिसाङ्बा ते़ङ्गप्पिन् नु गिलादबा कोःक्मा फाङ्जङ्बा लाजेःल्ले़ कुभ्रे़ःक्, खे़प्मोबा ये़क्यक्हाॽआङ् आङ्गाॽ रुबेनिहाॽ नु गादिहाॽ पिरुङ्सिङ्॥ 13 गिलाद लाजेॽओबा के़नम्बा लक्किन् नु ओगरे़ कुहाङ्जुम्बा के़रे़क् बासाने़न् आङ्गाॽ मनस्सेःल्ले़ कुभ्रे़ःक् कुधाःक्हाॽ पिरुङ्सिङ्॥ (बासानओ के़ने़बा अर्गोबबा के़रे़क् ते़ङ्गप्हाॽ रपाइहाॽरे़ खुनिॽ लाजेॽ मे़मे़त्तुआङ् ने़स्से़॥ 14 मनस्सेरे़ कुमुॽइदाङ्सा याइररे़ गसुरि नु माकातिहाॽरे़ खुन्छिॽ इःन्दोओ थारिक् अर्गोबबा के़रे़क् ते़ङ्गप्हाॽ मे़त्छिङ् हे़क्क्याङ् खे़ङ्हाॽ आप्फेक् कुमिङ्लाम् मिङ् वाःत्तु॥ कल्ले़चोगुल्ले़ आइन् थारिक्साङ् बासाने़न् हब्बात याइर मे़मे़त्तु॥) 15 हे़क्क्याङ् गिलादे़न् आङ्गाॽ माकिरे़न् पिरुङ्॥ 16 कर गिलादलाम् अर्नोन हःङ्गुःल्ले़ कुलुम्मो थारिक् नु अम्मोनिहाॽरे़ खुन्छिॽ इःन्दो, यब्बोक वहःङ् थारिक् चिभिॽफिॽबा ने़ने़बादे़न्निन् आङ्गाॽ रुबेनिहाॽ नु गादिहाॽ पिरुङ्सिङ्॥ 17 खे़ल्ले़ नाम्धा पिसाङ्बा इःन्दोन् यर्दन ने़ने़बादे़न्, गालिल वरःङ्ङोलाम् पिसगाबा याक्केःक्किल्ले़ कुसिगाङ् के़ने़बा अराबाबा वरःङ्, खे़न् युम्लाःक्खाङ् वरःङ्ङाङ् मे़मे़त्तु॥ 18 खे़न् ये़म्मो आङ्गाॽ खे़न् सुवाङ्हाॽ अक्खे मे़त्तुङ्सिङ्ङाङ् इङ्जाङ् पिरुङ्सिङ्, “यहवे दाङ्बा खिनिॽ निङ्वाॽफुमाङ्ङिल्ले़ कन् लाजेन् युक् चोःक्मारे़ लागि खिनिॽ के़बिरिआङ् ने़रो॥ हे़क्केसाङ् खिनिॽओलाम् के़रे़क् थक्सुबाहाॽ फे़जुम्भे़या हेॽसिङ्माआङ् खिनिॽ इस्राइलि फुॽनुसाॽहाॽ फाॽमासिरे़ लागि खुन्छिॽ तगि पेःक्मा पोङ्ॽ॥ 19 खिनिॽ मेःत्हाॽ, हिन्जाॽबित्छाहाॽ नु साॽरिक् यरिक् थक्साहाॽग आङ्गाॽ पिनिङ्बा ये़क्यक्हाॽओ मे़वाॽ मे़याःक्॥ 20 यहवे दाङ्बे़ल्ले़ खिनिॽ हे़क्केए खिनिॽ फुॽनुसाॽहाॽ नाःम्सिङ्मा मे़म्बिसे थारिक्, हे़क्क्याङ् यहवे दाङ्बा खिनिॽ निङ्वाॽफुमाङ्ङिल्ले़ यर्दन नाम्धा पिसाङ् पिरुसिबा लाजेन् खे़ङ्हाॽरे़ युक् मे़न्जोःक्के थारिक्, खिनिॽ अक्खे चोगे़म्मे़ॽ॥ खे़न् एगाङ् आङ्गाॽ खिनिॽ युक्को पिनिङ्बा लाजेॽओ खिनिॽ के़रे़क् नुःङ्माभे़म्मा के़सुक्तिॽ॥” 21 आङ्गाॽ खे़न् ये़म्मो यहोसुन् अक्तङ्बा इङ्जाङ् पिरुङ्, “यहवे दाङ्बा खिनिॽ निङ्वाॽफुमाङ्ङिल्ले़ कन् ने़प्फु हाङ्हाॽ आक्खे मे़त्तुसिआङ् वये़ खे़ङ्हाॽ के़रे़क् खिनिॽ आबाङे मिक्किल्ले़ के़निसुम्माङ् के़वयिॽ॥ आल्ल खिनिॽ यर्दन नाधाःम्बि के़बेगिल्ले़ खे़न् के़रे़क् हाङ्जुम्हाॽआङ् यहवे दाङ्बे़ल्ले़ हे़क्केए मे़त्तुसिॽ॥ 22 खे़ङ्हाॽनु खिनिॽ मे़गिसे़म्मिन्ने़ॽ, थेआङ्भे़ल्ले़ यहवे दाङ्बा खिनिॽ निङ्वाॽफुमाङ्ङिन् खिनिॽ लागि थक्लो॥” मोसान् कनान लाजेॽओ लाःप्मा मे़घोने़न् 23 खे़न् ये़म्मो आङ्गाॽ यहवे दाङ्बे़न् कम्भलॽरिक् पेलि फाक्तुङ्, 24 “यहवे दाङ्बा निङ्वाॽफुमाङ्ङे, खे़ने़ॽ आप्फेक् के़से़वारोबे़न् खे़ने़ॽ साॽरिक् पयम् यम्बा के़जोःक्पा नु के़मुक्साम्मिन् ओःन्धाक्मा के़इःत्तुआङ् वाॽ, थेआङ्भे़ल्ले़ साङ्ग्राम्पेदाङ् नु इक्सादिङ् खाम्बेःक्मो खे़ने़ॽ के़जोगुबा हे़क्तङ्बा याःम्बक् नु हाङ्वा माङ्वाबा याःम्बक् चोःक्मा के़सुक्पा हात् वाॽबे? 25 आङ्गाॽ नाधाःम्बि पेःक्मा फाःक्ताङ्ङे़ॽ, हे़क्क्याङ् यर्दन नाधाःम्बिबा खे़न् नुबा लाजेन्, खे़न् नुबा कोःक्मा फाङ्जङ्बा लाजेन् नु ले़बनाने़न् आङ्गाॽ निमा खोसुङ्ल॥” 26 कर खिनिॽ के़जोगुम्मिल्ले़ यहवे दाङ्बान् आङ्गाॽनु कुयाःक्ले़ॽरे़आङ् वये़, हे़क्क्याङ् आङ्गाॽ आबाःन्निन् खुने़ॽ मे़घे़प्सुन्॥ यहवे दाङ्बे़ल्ले़ आङ्गाॽ मे़त्ताङ्, “याःक्तु, आल्ल कल्ले़ कुयाःम्बेओ आङ्गाॽनु वेॽ पान् मे़बाःत्ते़न्ने़ॽ॥ 27 पिसगाःल्ले़ कुजङ्ङो थोःक्सिङ्ङे़ पेगे़ॽ, हे़क्क्याङ् नाम्गे़न् नाम्धा, थाङ्गे़त्, लाङ्गे़त्, के़रे़क् पिसाङ् ओमुये़ॽ॥ आप्फेक् के़मिक्किल्ले़ खे़न् लाजेन् ओमे़त्ते़ॽ, थेआङ्भे़ल्ले़ खे़ने़ॽ यर्दने़न् काःक्मा के़ङ्घोसुन्ॽ॥ 28 परुमाल्ले़ खे़ने़ॽ यहोसुन् इङ्जाङ् पिरे़ॽ, खे़ब्याङ् आःन्छिङ्मा पिरे़ॽआङ् हाङ्हाङ् के़लॽबा चोगे़ॽ, थेआङ्भे़ल्ले़ खे़ल्ले़ए कन् मनाहाॽ नाधाःम्बि तेॽरुसि हे़क्क्याङ् खे़ने़ॽ निमा के़जोगुबा खे़न् लाजेन् खे़ङ्हाॽ युक् चोःक्मा पाङ्घुसिॽ॥” 29 कल्ले़चोगुल्ले़ आनिगे बेथ-पोररे़ कुबेसाङ्बा ने़ने़बादे़न्नो युङिगे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.