साम्योथिम् इङ् 22 - लिम्बु1 खिनिॽ फुॽनुसाॽहाॽरे़ खुन्छिॽ पित् इग्र मे़ल्लुक्किन् नाना थोधो पेःक्पा के़निसुम्मिल्ले़ मे़न्निःमनाबा मे़ले़ङ्ङासिम्मिन्ने़ॽ॥ खे़न् खिनिॽ फुॽनुसाॽहाॽओ साम्धाम्मे़ॽ॥ 2 कर खे़न् नुॽसाॽइन् निःत्ताङ् मे़युङ्ने़न् इग्र खे़ने़ॽ खे़न् कुसेःन् के़न्निसुन्ने़भग्र, खे़ल्ले़ कुधक्सान् खुने़ॽ मे़गोःत्तुन् मे़दाने़न्ल थारिक् खे़ने़ॽ के़हिम्मो खे़न् तारे़ॽआङ् कत्ते़ॽ॥ खे़न् एगाङ् के़न्साॽ नुःक्ते़ पिरे़ॽ॥ 3 खिनिॽ फुॽनुसाॽइल्ले़ कुअदङ् इग्र कुजाङ् किग्र खे़ल्ले़ मासुबा थे़मासाङ् के़घोसुम्मिल्ले़ हे़क्केए चोगे़म्मे़ॽ, स्वाःत् मे़वये़म्मिन्ने़ॽ॥ 4 खिनिॽ फुॽनुसाॽइल्ले़ कुअदङ् इग्र कुबित्तिन् लाम्मो के़ङे़बा के़निसुम्साङ् मे़न्निःमनाबा मे़ले़ङ्ङासिम्मिन्ने़ॽ॥ खे़न् फोङ्मारे़ लागि खुने़ॽ फाॽरे़म्मे़ॽ॥ 5 ये़म्बित्छारे़ चाङ्मनाबा चाङ्ङिन् मे़न्छुमारे़ चाङ्मा मे़नुॽने़न्, हे़क्क्याङ् मे़न्छुमाःल्ले़ कुजाङ्ङिन्नाङ् ये़म्बित्छारे़ चाङ्मा मे़नुॽने़न्॥ अक्खे के़जोःक्पान् यहवे दाङ्बा खिनिॽ निङ्वाॽफुमाङ्ङिल्ले़ चिःत्तुॽ॥ 6 लाम्मिल्ले़ कुबेसाङ् सिङ्बुङ्ङो इग्र खाम्बाङ्ङो आत्तिसाङ् पुज्याःक् इग्र कुधिःन्निन् कुम्मारे़ कुप्तुआङ् युङ्बा पुहाप् के़घोसुम्ने़भग्र, पुज्याःक्हाॽनु सोसोरिक् कुम्मान् मे़देॽरे़म्मिन्ने़ॽ॥ 7 कुम्मान् ले़प्माआङ् पुज्याःक्हाॽ खिनिॽ तेॽमा के़सुक्तुम्सिम्ॽ॥ अक्खे चोगे़म्मे़ॽ, हे़क्केलॽरिक् खिनिॽ के़नुरि के़दासिर, हे़क्क्याङ् खिनिॽ थाःक् चाॽर॥ 8 कुसङ् हिम् के़जोगुम्मिल्ले़ खाम्बु सम्धाङ् कब्रिङ् पिसाङ् फाङाम्मे़ॽ, खम्भ्याङ् कुभा मना मे़गे़ङ् मे़सिःल्ले़ खिनिॽ हिम्मिन् सिमे़ल्ले़ आप्तिक् मे़धाने़न्॥ 9 चे़ल्ले़क्सेॽ इक्ताप्पो ने़त्छि परिक्पा याॽरिःम्बा मे़लेःत्ते़म्मिन्ने़ॽ, मेःन्ने़भग्र खिनिॽ हे़क्के के़जोगुम्मिल्ले़ खिनिॽ के़लेःत्तुम्बा याॽरिःम्बे़न्लक् मेःन् कर चे़ल्ले़क्सेॽइल्ले़ कुजाॽइन्नाङ् आसुत्थो पोङ्ॽ॥ 10 पित्ते़न् नु अदङ्ङिन् सोरिक् खे़ःप्मासिआङ् तोःङ्मासि मे़नुॽने़न्॥ 11 खि नु नैनासुत् फःम्मनाआङ् थाक्मनाबा चाङ् चाङ्मा मे़नुॽने़न्॥ 12 खिनिॽ के़जाक्खुम्बा चाङ्ङिल्ले़ कुभे़राओ स्योःङ्स्योःङ् के़लॽबा कुबोराक् फत्छे़म्मे़ॽओ॥ मे़न्छुमा नु ये़म्बित्छा सोरिक् इम्मा थिम् 13 कुभा ते़न्धाम् मेःक्खिम् चोःक्काङ् कुमेःत्तिन्नु सोरिक् इम्से़ पेःक्किल्ले़ खुने़ॽ नुबा पान् मे़घोसुन्, 14 हे़क्क्याङ् खे़न् मे़न्छुमान् कुजाःत्थि तेमा पिमारे़ लागि मे़न्वाॽमना बा आप्तिक् कुःप्मारे़ लागि “आङ्गाॽ तारुङ्मा आमेःत्तिन्नु इप्साङ्ङिल्ले़ खुने़ॽ सिसागे़न् मे़न्छ्या हे़क्के मे़लॽरे़न्” अक्खे पाःत्तुने़भग्र, 15 खे़न् सिसागे़न् मे़न्छ्याःल्ले़ कुम्मा कुम्बारे़ ये़क्यक्कोबा यम्बा लाम्धेःत्तो लाम्लोबाहाॽरे़ खुन्छिॽ मे़न्छुमासान् सिसागे़न् मे़न्छ्या वाॽबा निःन्धो पान् खङ्सुर पोङ्ॽ॥ 16 खे़ब्याङ् खे़न् मे़न्छ्याःल्ले़ कुम्बारे़ लाम्लोबाहाॽ अक्खे मे़त्तुसिर, “आङ्गाॽ आस्सा मे़न्छुमान् कन् मनान् मेःत् पिरुङ्, कर खे़ल्ले़ कन् आस्सान् नाॽरुॽ॥ 17 कन् मनाःल्ले़ खुने़ॽ अक्खे मे़त्तुआङ् आप्तिक् कुःत्तुर पत्, ‘आङ्गाॽ खे़ने़ॽ के़स्सा मे़न्छुमान् सिसागे़न् मे़न्छ्या चोगे़बा पर्माःङ्गि मे़ङ्घोबा’ कर कन् आस्सान् सिसागे़न् मे़न्छ्या चोःक्पा पर्माःङ्गि कॽयो वाॽ॥” खे़ब्याङ् मे़न्छ्याःल्ले़ कुम्बारे़ लाम्लोबाहाॽरे़ खुन्छिॽ तगि ने़त्नान् फे़सुर॥ 18 हे़क्क्याङ् ये़क्यक्कोबा लाम्लोबाहाॽरे़ खे़न् मनान् मे़देॽरुआङ् खुम्दिङ् मे़बिरुर, 19 खम्भ्याङ् इस्राइलबा लत्छा सिसागे़न् मे़न्छ्यान् कुजाःत्थि तेसुबाल्ले़ चोगुल्ले़ खे़ल्ले़ किप्थिक् युप्पा सेकेल मे़न्छ्याःल्ले़ कुम्बाओ साम्बान् हुङुर, हे़क्क्याङ् मे़न्छुमान् खे़ल्ले़ कुमेत् पोङ्ङाङ् हाबा वाॽर॥ खे़न् कुहिङ्हिङ् खुने़ॽ खे़न् मे़न्छ्यान् नाॽमा मे़घोसुन्॥ 20 कर आप्तिक्किन् से़क्खा पोःक्खे़ हे़क्क्याङ् खे़न् मे़न्छ्याओ सिसागे़न् मे़न्छ्या मिक्सेन् वाॽबा पर्माःङ्गि खोमे़दे़त्ते़न्ने़भग्र, 21 कुम्बारे़ कुहिम्मो वये़ल्ले़सा चे़ल्ले़क्ले़क् लॽरे़आङ् इस्राइलरे़ कुना कुसाम् थामा याःम्बक् चोगुबाल्ले़ चोगुल्ले़ खुने़ॽ कुम्बारे़ए कुहिम् लाम्धेःप्पो मे़दारुआङ् ये़क्यक्कोबा मनाहाॽरे़ लुङ्ङिल्ले़ मे़ले़प्तु मे़से़रुर॥ खिनिॽ लुम्मोबा अक्तङ्बा ताप्फे़ःम्बा पाःन्निन् खे़त्ताम्मे़ॽ॥ 22 कुभा ये़म्बित्छा मनान् वेॽइल्ले़ कुमेःत्तिन्नु इम्मा याःम्बक् चोगुर पप्पा के़दुमुम्ने़भग्र, खे़न्नु के़इम्बा ये़म्बित्छान् नु खे़न् मे़न्छुमान् ने़प्माङ् से़प्मासि पोङ्ॽ॥ इस्राइललाम् खिनिॽ अक्तङ्बा फे़न्याःम्बक्किन् खे़प्मा पोङ्ॽ॥ 23 पाःन्मे़भुॽरुआङ् के़ये़प्मा सिसागे़न् मे़न्छ्यान् कुभा ये़म्बित्छा थिक्ले़ तुमुआङ् ये़क्यक्को खे़न् इप्तुबा के़दुमुम्ने़भग्र, 24 खे़ङ्हाॽ ने़प्माङ् ये़क्यक् लाम्धेत् लाःक्कात् तेॽरे़म्सिम्मे़ॽआङ् लुङ्ङिल्ले़ ले़प्ते़म् से़रे़म्सिम्मे़ॽ, ये़क्यक्कोए वये़साङ् कुभाॽरे़ लागि मे़अःक्ते़म्बे़ल्ले़ चोगुल्ले़ खे़न् मे़न्छुमान् से़रे़म्मे़ॽ, हे़क्क्याङ् वेॽ ये़म्बित्छाःल्ले़ कुमेःत्तिन् मेःत्मे़त्तुबाल्ले़ चोगुल्ले़ ये़म्बित्छाःन्नाङ् से़प्मा पोङ्ॽ॥ खिनिॽ लुम्मोलाम् अक्तङ्बा ताप्फे़ःम्बा पाःन्निन् खे़त्ताम्मे़ॽ॥ 25 कर कुभा ये़म्बित्छाःल्ले़ पाःन्मे़भुॽरुआङ् के़ये़प्मा मे़न्छ्यान् लाःक्कात् चिजि खक्खक्पा ते़न्नो तुमुॽ हे़क्क्याङ् उःक्खुआङ् मेःत्मे़त्तुने़भग्र खे़न् ये़म्बित्छाःन्लक् से़रे़म्मे़ॽ॥ 26 कर खे़न् मे़न्छ्यान् थेआङ् मे़मे़त्ते़म्मिन्ने़ॽ, खे़ल्ले़ सिमा यारिक्पा लायो चोगुबा होप्, कन् पाःन्निङ्ग कुभा मनाःल्ले़ आप्फेक् कुहिम्बेसाङ्बे़न् फत्तुआङ् से़रुबा कुइसिःक्लो॥ 27 थेआङ्भे़ल्ले़ खे़न् पाःन्मे़भुॽरुआङ् के़ये़प्मा मे़न्छ्यान् अःक्ते़साङ् चिजि खक्खक्पा ते़न्नो खे़ल्ले़ मेःत्मे़त्तुल्ले़ खे़प्मो खुने़ॽ के़भाॽबा हाःत्ताङ् होःप्ते़॥ 28 कुभा ये़म्बित्छाःल्ले़ पाःन्मे़म्भुॽए के़ये़प्मा सिसागे़न् मे़न्छ्यान् उःक्खुआङ् मेःत्मे़त्तुबा तुम्दे़त्ते़ने़भग्र, 29 खे़न् ये़म्बित्छाःल्ले़ खे़न् मे़न्छ्याःल्ले़ कुम्बा ङाबोङ् सेकेल युप्पा पिरुर पोङ्ॽ॥ खे़न् ये़म्बित्छाःल्ले़ खे़न् सिसागे़न् मे़न्छ्यान् उःक्खुआङ् मेःत्मे़त्तुबाल्ले़ चोगुल्ले़ खुने़ॽ खे़न् कुमेत् चोगुर पोङ्ॽ, हे़क्क्याङ् खुने़ॽ कुहिङ्हिङ् खे़न् नाॽमा मे़घोसुन्ॽ॥ 30 आत्तिन् मनाःल्ले़आङ् कुम्बारे़ कुमेःत्तिन् मे़गत्तुन्ल, हे़क्क्याङ् कुम्बारे़ कुइप्नान् कुनामे़न्छाॽ मे़मे़त्तुन्लरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.