साम्योथिम् इङ् 2 - लिम्बुमुरे़क् खारे़क्पा ये़ःङ्घादे़न्नो के़बेःक्पा तङ्बेहाॽ 1 खे़ब्याङ् यहवे दाङ्बे़ल्ले़ आङ्गाॽ मे़त्ताङ्बा कुइसिक् आनिगे नुःक्खिगे़आङ् हे़ःत्ताङ्बा वरःङ् ले़प्माङ् मुरे़क् खारे़क् थेआङ् के़होःप्पादे़न् पिसाङ् पेगिगे़, हे़क्क्याङ् यरिक् ये़न् थारिक् सेइरबा कोःक्मा फाङ्जङ् लाजेन् कबुम्बे़॥ 2 खे़ब्याङ् यहवे दाङ्बे़ल्ले़ आङ्गाॽ मे़त्ताङ्, 3 “खिनिॽ कन् कोःक्मा फाङ्जङ्बा लाजेन् के़गबुम्बा यरिक् ये़न् पोःक्खे़॥ आल्ल थाङ्गे़त् ले़प्माङ् थाआसिम्मे़ॽ॥ 4 खे़ने़ॽ मनाहाॽ अक्खे मे़त्ते़से़ॽआङ् इङ्जाङ् पिरे़से़ॽ, ‘खिनिॽ एसाबरे़ कुमुॽइदाङ्साहाॽ, आप्फेक् खिनिॽ फुॽनुसाॽ सेइर के़युङ्बाहाॽरे़ खुनिॽ लाजेॽओ के़बोःक्खिआङ् पेःक्मा के़इःत्तिॽ॥ खे़ङ्हाॽ खिनिॽनु मे़गिरो, कल्ले़चोगुल्ले़ खिनिॽ यरिक् सिङ्सिङ् ये़क्ये़क् लॽरे़म्मे़ॽ॥ 5 खे़ङ्हाॽ थङ् चोःक्मारे़ लागि खुन्छिॽ सिक् मे़भोक्खे़म्मिन्ने़ॽ, थेआङ्भे़ल्ले़ आङ्गाॽ खिनिॽ खे़ङ्हाॽरे़ खुन्छिॽ लाजेॽओ लाङ्दाप्पेॽ याःप्पा थिक्काङ् लाजेॽ मे़बिनिङ्ङिन्ॽ॥ सेइरबा कोःक्मा फाङ्जङ् लाजेन् आङ्गाॽ एसाबरे़ कुयुक्को पिरुङ्ङाङ् ने़रो॥ 6 चामा कुजा नु थुङ्मा च्वाःत्ले़ लागि खिनिॽ खे़ङ्हाॽ युप्पायाङ् के़बिरुम्सिम्ल पोङ्ॽ॥’” 7 यहवे दाङ्बा खिनिॽ निङ्वाॽफुमाङ्ङिल्ले़ खिनिॽ के़रे़क् परिक्पा याःम्बक्को हाङ्वागे़न् मुॽइसाम् के़बिरिआङ् वाॽ॥ कन् यम्बा मुरे़क् खारे़क् थेआङ् के़होःप्पादे़न्नोबा लाम्दिक् खाराक् खुने़ॽ खिनिॽ ताप्थेक् याम्धेक् के़गत्तिआङ् वाॽ॥ कन् लिबोङ् तङ्बे थारिक् यहवे दाङ्बा खिनिॽ निङ्वाॽफुमाङ्ङिन् खिनिॽनु सोरिक् वाॽ, हे़क्क्याङ् खिनिॽ थे़मा पाःन्निन्ले़ कुहोःप्मा कुसाक्मोआङ् मे़न्धाए के़वयिॽ॥ 8 कल्ले़चोगुल्ले़ सेइरओ के़युङ्बा एसाबरे़ कुमुॽइदाङ्सा, आनिगे फुॽनुसाॽहाॽरे़ खुनिॽ लुम्मोलाम् पेगिगे़॥ यर्दन ने़ने़बादे़न्नोलाम् मे़म्बेःक्के एलात नु एस्योन-गेबेरलाम् हिआसिगे़आङ् थो मोआबबा मुरे़क् खारे़क् थेआङ् के़होःप्पादे़न्लाम् थाआसिगे़॥ 9 खे़ब्याङ् यहवे दाङ्बे़ल्ले़ आङ्गाॽ मे़त्ताङ्, “मोआबबा मनाहाॽ तुक्खेलाक्खे मे़जाःत्ताम्सिम्मे़न्ने़ॽ, हे़क्क्याङ् खे़ङ्हाॽ थङ् चोःक्मारे़ लागि खुन्छिॽ सिक् मे़भोक्खे़म्मिन्ने़ॽ॥ खे़ङ्हाॽरे़ खुन्छिॽ लाजेॽओलाम् थे़माआङ् लाजेॽसिङ्बुङ् मे़बिनिङ्ङिन्ॽ, थेआङ्भे़ल्ले़ आङ्गाॽ मोआब लाजेॽबा हाङ्पाङ् आर ये़क्यक्किन् लोतरे़ कुमुॽइदाङ्साहाॽरे़ खुन्छिॽ युक्को पिरुङ्सिङ्ङाङ् ने़रो॥” 10 (कुभा ये़म् खे़प्मो एमिहाॽ मे़युङे़, खे़ङ्हाॽ साॽरिक् यरिक् मे़योरे़, कुहाङ्वा कुमाङ्वा के़याक्पा नु अनाकिहाॽ हे़क्के केःम्ब केःम्बा मे़जोगे़॥ 11 अनाकिहाॽ हे़क्केए कन्हाॽआङ् रपाइए मे़लेःत्तुसि, कर मोआबिहाॽरे़ग कन्हाॽ एमि मे़मे़त्तुसि॥ 12 उन्छोन् उन्छोन् होरिहाॽआङ् सेइरओ मे़युङे़, कर एसाबरे़ कुमुॽइदाङ्साहाॽरे़ कन्हाॽ मे़नाःत्तुमे़देसुसि॥ यहवे दाङ्बे़ल्ले़ युक् चोःक्से़ पिरुसिबा लाजेन् इस्राइलिहाॽरे़ मे़देॽरुबा हे़क्केए खे़ङ्हारे़ कन्हाॽ मे़मे़क्खुसिआङ् खुन्छिॽ ले़क्वाओ कन्हाॽ मे़युङ्सिङ्॥) 13 हे़क्क्याङ् यहवे दाङ्बे़ल्ले़ पाःत्तु, “आल्ल जेरेद ने़ने़बादे़न्निन् काःक्ताम्मे़ॽ॥” हे़क्क्याङ् आनिगे जेरेद वहःङ् नाधाःम्बि पेगिगे़॥ 14 कादेस-बर्ने ले़रुम्बे़आङ् जेरेद वहःङ्ङिन् काःक्मारे़ लागि सुम्बोङ्ङाङ् ये़त्छि तङ्बे थरु॥ खे़न् ये़म्मो यहवे दाङ्बे़न् माङ्हे़क्सिङ्बा हे़क्केए आनिगे थक्सुबा साःङ्गाहिम्मोलाम् थङ् के़जोःक्पा मनाहाॽ मुरे़क् खारे़क् थेआङ् के़होप्पादे़न्नो के़रे़क् मे़मे़गे़॥ 15 थक्सुबा साःङ्गाहिम्मोलाम् खे़ङ्हाॽ के़रे़क् मे़म्मे़गे़न्ल थारिक् यहवे दाङ्बे़ल्ले़ कुहुक्किन् खे़ङ्हाॽरे़ खुन्छिॽ तक्ले़ङ्वाओ पत्छे़॥ 16 मना सङ्जुम्भोहाॽरे़ खुनिॽ लुम्मोलाम् थङ् के़जोःक्पा मनाहाॽ के़रे़क् मे़मे़गे़आङ् एगाङ् 17 यहवे दाङ्बे़ल्ले़ आङ्गाॽ अक्खे मे़त्ताङ्, 18 “आइन् खिनिॽ मोआबरे़ कुदे़ःङ्गप्पो के़ने़बा आर ये़क्यक्किल्ले़ कुबेसाङ् काःक्माआङ् खिनिॽ पेःक्मा के़बोङ्बा पोःक्खे़आङ् वाॽ॥ 19 आल्ल खिनिॽ अम्मोनिहाॽरे़ खुन्छिॽ इःन्दोओ के़गे़रि, हे़क्केःल्ले़ खिनिॽ खे़ङ्हाॽ तुक्खेलाक्खे मे़जाःत्ते़म्सिम्मे़न्ने़ॽ॥ खे़ङ्हाॽ थङ् चोःक्मारे़ लागि खुन्छिॽ सिक् मे़भोक्खे़म्मिन्ने़ॽ, थेआङ्भे़ल्ले़ अम्मोनिहाॽरे़ खुन्छिॽ लाजेॽलाम् युक् चोःक्मा आङ्गाॽ खिनिॽ थे़माआङ् लक् मे़बिनिङ्ङिन्ॽ॥ आङ्गाॽ खे़न् लाजेन् लोतरे़ कुमुॽइदाङ्साहाॽरे़ खुन्छिॽ युक्को पिरुङ्सिङ्ङाङ् ने़रो॥” 20 (खे़न्नाङ् रपाइहाॽरे़ खुन्छिॽ लाजेॽए मे़लेःत्तुआङ् ने़स्से़॥ उन्छोन् खे़प्मो रपाइहाॽ मे़युङे़, कर अम्मोनिहाॽरे़ कन्हाॽ जमजुम्मि मे़मे़त्तुसि॥ 21 कन्हाॽ साॽरिक् यरिक् मे़योरे़ हे़क्क्याङ् कुहाङ्वा कुमाङ्वा के़याक्पा नु अनाकिहाॽ हे़क्के केःम्ब केःम्बा मे़जोगे़॥ कर यहवे दाङ्बे़ल्ले़ कन्हाॽ अम्मोनिहाॽरे़ खुन्छिॽ तगि मे़क्खुसि, हे़क्क्याङ् खे़ङ्हाॽरे़ जमजुम्मिहाॽ मे़नाःत्तु मे़देसुसिआङ् एगाङ् खुन्छिॽ ले़क्वाओ अम्मोनिहाॽ मे़द्ये़आङ् मे़युङ्सिङ्॥ 22 यहवे दाङ्बे़ल्ले़ सेइरओ के़युङ्बा एसाबरे़ कुमुॽइदाङ्साहाॽरे़ लागिआङ् अक्खेए चोगु, खुने़ॽ खे़ङ्हाॽरे़ खुन्छिॽ तगि होरिहाॽ मे़क्खुसिआङ् वये़॥ खे़ङ्हाॽरे़ होरिहाॽ मे़नाःत्तु मे़देसुसिआङ् आइन् थारिक् खुन्छिॽ ते़न्नो एदोमिहाॽ मे़युङ्ॽ॥ 23 हे़क्क्याङ् गाजा थारिक् के़युङ्बा अब्बिहाॽ कप्तोरलाम् के़दाबा कप्तोरिहाॽरे़ मे़मे़क्खुसि, खे़ङ्हाॽरे़ खुन्छिॽ ते़न्नो कन्हाॽ मे़युङ्सिङ्॥) इस्राइलिहाॽरे़ सिहोन हाङ्ङिन् मे़नाःन्दु ( खानिःत् २१:२१-३० ) 24 यहवे दाङ्बे़ल्ले़ याम्मो पाःत्तु, “पोगे़म्मे़ॽ, लाम् थाआसिम्मे़ॽ, हे़क्क्याङ् अर्नोन हःङ्गु नाधाःम्बि पेगे़म्मे़ॽ॥ ओमे़त्ते़म्मे़ॽ, आङ्गाॽ हेस्बोनबा एमोरि सिहोने़न् नु खुने़ॽ कुलाजेन् खिनिॽ हुक्को पिनिङ्ङाङ् ने़रो॥ खे़न् लाजेन् खिनिॽ युक् चोःक्मा हेःक्ते़म्मे़ॽ हे़क्क्याङ् खे़न्नु थङ् चोगे़म्मे़ॽ॥ 25 आइन्बा ये़न् ताङ्साङ्बे़ल्ले़ फत्तुबा के़वाॽबा के़रे़क् मे़न्छाम् याप्मिहाॽ खिनिॽनु मे़गिर हे़क्क्याङ् यङ्मा मे़सिर याःन्दुङ्सिङ्ॽ॥ खे़ङ्हाॽरे़ खिनिॽ मे़न्नो मे़घे़प्सुआङ् थे़गक्कक्ना मे़यङ्, खे़ब्याङ् खुन्छिॽ यङ्मा के़त्लो॥” 26 कदेमोतबा मुरे़क् खारे़क् थेआङ् के़होःप्पादे़न्लाम् आङ्गाॽ तङ्मा पाःन्ले़ सनारुङ् पेलिनु इङ्साबाहाॽ हेस्बोनबा हाङ् सिहोनओ पाङ्घुङ्सिङ्, 27 “खे़ने़ॽ के़हाङ्जुम्मोलाम् पोङ्माआङ् पेःक्मा आनिगे आभाःक्ते़ॽ॥ लाम्मे लाम्लक् आनिगे पेगिगे़ॽ॥ फे़ङ्वा चुक्वा आनिगे मे़लॽरिगे़न्॥ 28 चामा कुजा नु थुङ्मारे़लागि च्वाःत्तिन् युप्पायाङ्ङो आनिगे़ओ सङ्घे़म्मे़ॽ॥ खे़ने़ॽ के़लाजेॽओ लाम्लक् आनिगे लाङ्घेःक्माआङ् पेःक्मा आभाःक्ते़ॽ॥ 29 यहवे दाङ्बा आनिगे निङ्वाॽफुमाङ्ङिल्ले़ आनिगे पिमा इःत्तिगे़बा लाजेॽओ के़प्मारे़ लागि यर्दन वहःङ्ङिन् आनिगे मे़ङ्गाःक्के थारिक् सेइरओ के़युङ्बा एसाबरे़ कुमुॽइदाङ्साहाॽ नु आरओ के़युङ्बा मोआबिहाॽरे़ आनिगे लागि हे़क्के मे़जोगुआङ् वये़॥” 30 “कर हेस्बोनबा हाङ् सिहोनरे़ आनिगे पेःक्मा मे़भाःक्तिगे़न्, थेआङ्भे़ल्ले़ यहवे दाङ्बा खिनिॽ निङ्वाॽफुमाङ्ङिल्ले़ खिनिॽ हुक्को थामारे़ लागि कुनिङ्वाॽ के़जिःप्पा नु पाःन्मे़ङ्घे़म्मनाबा चोगु पिरुआङ् वये़॥ हे़क्क्याङ् आइन्बा ये़न् थारिक् खे़न् खिनिॽए हुक्को वाॽ॥” 31 हे़क्क्याङ् यहवे दाङ्बे़ल्ले़ आङ्गाॽ मे़त्ताङ्, “सिहोने़न् नु खुने़ॽ कुलाजेन् आल्ल आङ्गाॽ खिनिॽ पिनिङ्ॽ॥ आल्ल खे़ल्ले़ कुलाजेन् युक् चोःक्मा नु हुक्को थामा हेःक्ते़म्मे़ॽ॥” 32 सिहोने़न् नु खुने़ॽ के़रे़क् कुधक्सुबाहाॽ यहसा मे़प्मनाबादे़न्नो आनिगे़नु थक्से़ मे़भे़रे़ल्ले़, 33 यहवे दाङ्बा आनिगे निङ्वाॽफुमाङ्ङिल्ले़ खे़न् आनिगे हुक्को थासु, हे़क्क्याङ् खे़न्, खुने़ॽ कुस्साहाॽ नु खुने़ॽ कुमनाहाॽ के़रे़क् आनिगे से़रुम्सिम्बे़॥ 34 खे़न् ये़म्मो खुने़ॽ के़रे़क् कुये़क्यक्हाॽ आनिगे हुक्काप् चोगुम्बे़, हे़क्क्याङ् ये़म्बित्छाहाॽ, मे़न्छुमाहाॽ नु हिन्जाॽबित्छाॽ सोसोरिक् मनाहाॽ मे़युङे़बा के़रे़क् ये़क्यक्हाॽ वरे़ङ्ले़ङ् खाप्पुथ्यःङ् चोगुम्बे़॥ आनिगे आत्तिन्हाॽआङ् मे़ले़रुम्सिम्बे़न्॥ 35 आनिगे हुक्काप् चोगुम्बे़बा ये़क्यक्हाॽओबा पित्थक्साहाॽ नु याङ्साकुन्धेहाॽरक् आनिगे आप्फेक् लागि थङ् नाःन्दुम्बे़बा चिगक्वा कुसिङ् मे़त्तासिगे़॥ 36 अर्नोन हःङ्गुःल्ले़ कुबेसाङ् के़ने़बा अरोएरलाम् नु हःङ्गुओ के़ने़बा ये़क्यक्काङ् कत्ना गिलाद थारिक् आनिगे हुक्को थामा मे़सुक्तुम्बे़म्बा मुक्साम्बा ये़क्यक् आत्तिआङ् मे़ने़स्से़न्॥ यहवे दाङ्बा आनिगे निङ्वाॽफुमाङ्ङिल्ले़ के़रे़क् आनिगे हुक्सुप्तिगे़॥ 37 अम्मोनिहाॽरे़ खुनिॽ मुॽइदाङ्साहाॽरे़ खुन्छिॽ लाजेःल्ले़ कुयाओ, यब्बोक वहःङ्ङिल्ले़ के़रे़क् कुयाहाॽओबा लाजेॽओ नु कोःक्मा फाङ्जङ् लाजेॽबा ये़क्यक्हाॽओरक् यहवे दाङ्बा आनिगे निङ्वाॽफुमाङ्ङिल्ले़ इङ्जाङ् चोगुबा कुइसिक् मे़बेगिगे़न्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.