साम्योथिम् इङ् 1 - लिम्बुहोरेबलाम् लःम्मा पेःक्मा उवा 1 सुपरे़ कुदगिबा यर्दन ने़ने़बादे़न्नो, हे़क्क्याङ् खे़ङ्हाॽ मे़युङे़बादे़न्लाम् थिक्नाहाङ् के़ने़बा पारान, तोफेल, लाबान, हसेरोत नु दिसाहातरे़ कुलुम्मोबा यर्दन नाम् गे़न् पिसाङ्बा मुरे़क् खारे़क् थेआङ् के़होप्पादे़न्नो के़रे़क् इस्राइलिहाॽ मोसाःल्ले़ मे़त्तुसिबा पाःन्जाःक्किन् हाबा कन्लो॥ 2 (सेइर कोःक्मा फाङ्जङ् पोङ्माआङ् होरेबलाम् कादेस-बर्ने थारिक् पेःक्मा थिबोङ्ङाङ् थिक्यान् थरुॽ)॥ 3 मिस्रःन् मे़ले़रुबा लिबोङ् तङ्बेबा थिबोङ्ङाङ् थिक् ला के़रे़बा थिक्सिगेक्पा ये़न्नो यहवे दाङ्बे़ल्ले़ इस्राइलिहाॽरे़ खुन्छिॽ लागि मोसान् थे़मा थे़मा इङ्जाङ्हाॽ पिरुआङ् वये़, खे़न् के़रे़क् पाःन्हाॽ मोसाःल्ले़ इस्राइलिहाॽ मे़त्तुसि॥ 4 हेस्बोनओ हाङ्युक् के़जोःक्पा एमोरिहाॽरे़ खुन्छिॽ हाङ् सिहोने़न् नु एद्रइ हे़क्क्याङ् अस्तारोतओ हाङ्युक् के़जोःक्पा बासानबा हाङ् ओगे़न् मोसाःल्ले़ नाःन्दुसिआङ् कन् अक्खे पोःक्खे़आङ् वये़॥ 5 यर्दन नाधाःम्बि ले़प्माङ् मोआब लाजेॽओ मोसाःल्ले़ अक्खे पाःत्तुआङ् कन् साम्योथिम् इङ्जाङ्ङोबा पाःन्हाॽ चे़ङ्मा पाःप्मा हेःक्तुरो— 6 होरेब कोःक्माओ यहवे दाङ्बा आनिॽ निङ्वाॽफुमाङ्ङिल्ले़ आनिॽ अक्खे आमे़त्ते़, “खिनिॽ कन् कोःक्मा फाङ्जङ्ङो के़युङिबा यरिक् ये़न् पोःक्खे़मारे़॥ 7 आल्ल खिनिॽ साःङ्गाहिम्हाॽ यङे़म्मे़ॽआङ् लाम् थाआसिम्मे़ॽ॥ एमोरिहाॽरे़ खुन्छिॽ कोःक्मा फाङ्जङ्बा लाजेॽओ नु खे़ल्ले़ कुया कुयाओबा के़रे़क् मे़न्छाम् सुवाङ्हाॽओ—यर्दन ने़ने़बादे़न्नो, थे़गु माङ्वाओ, नाम्धा पिसाङ्बा ते़म्बेॽओ, नेगेव लाजेॽओ हे़क्क्याङ् वरःङ्ङिल्ले़ कुयाओ कनानिहाॽरे़ खुन्छिॽ लाजेॽओ थारिक्, लेबनान थारिक् नु पयम् यम्बा वहःङ् युफ्रेतिस थारिक्के पेगे़म्मे़ॽ॥ 8 ओमे़त्ते़म्मे़ॽ, आङ्गाॽ खिनिॽ पिनिङ्ल पत्ताबा के़रे़क् इङ्जाङ्हाॽ सिङ्सिङ् ये़क्ये़क्काङ् इःत्ते़म् नाःत्ते़म्मे़ॽ, हे़क्केलॽरिक् खिनिॽ कुहिङ्वे़त् वाॽमा के़सुक्तिर हे़क्क्याङ् यरिक् पोःम्मा थे़ॽमा के़सुक्तिर, हे़क्क्याङ् यहवे दाङ्बे़ल्ले़ खिनिॽ पाधे़बाहाॽ माङ्हे़क्तुसिआङ् माङ्हुप् चोगुबा लाजेन् खिनिॽ पेःक्माआङ् युक् चोःक्मा के़सुक्तुम्लरो॥” मोसाःल्ले़ खासे़न्लोःम्बाहाॽ सेगुसि ( ला १८:१३-२७ ) 9 खे़न् ये़म्मो आङ्गाॽ खिनिॽ मे़त्निङ्, “आङ्गाॽ एःक् खिनिॽ लाम्लोमादेॽमा मे़सुक्निङ्ङिन्॥ 10 यहवे दाङ्बा खिनिॽ निङ्वाॽफुमाङ्ङिल्ले़ खिनिॽ यरिक् के़बोःन्दि के़धे़ॽरिर के़याःन्दिआङ् वाॽ, हे़क्क्याङ् आल्लो खिनिॽ ताङ्साङ्बोबा खेसे खेःम्सिक् कुइसिक् यरिक् के़बोःक्खिआङ् के़वयिॽ॥ 11 यहवे दाङ्बा खिनिॽ पाधे़बाहाॽरे़ खुन्छिॽ निङ्वाॽफुमाङ्ङिल्ले़ खिनिॽ आल्लसाङ् हे़न्छिङ् हे़न्छिङ् के़भोसिर खे़ब्याङ् खुने़ॽ माङ्हुप् चोगुबा कुइसिक् खिनिॽ हाङ्वागे़न् मुॽइसाम् के़बिरिर! 12 कर आङ्गाॽ आक्खेलॽरिक् खिनिॽ तुक्खेहाॽ, कक्हाॽ नु खे़माॽहाॽ एःक् तङ्मा सुक्तुङ्बे? 13 खिनिॽ थाःक्थक्मा कुभा सिक्कुम्साबा, खासिङ् के़निःप्पा नु मिङ्सो इङ्धाङ्साबा मनाहाॽ खिनिॽ सेगे़म्सिम्मे़ॽ, हे़क्क्याङ् आङ्गाॽ खे़ङ्हाॽ खिनिॽ लाम्लोबा युक्तिङ् चोगुङ्सिङ्ॽ॥” 14 खिनिॽ के़बाःत्तुम्, “खे़ने़ॽ याप्मि के़बिरे़बा सुजान् नुबा चोक्॥” 15 कल्ले़चोगुल्ले़ आङ्गाॽ खिनिॽ थाःक्थक्माबा कुधे़गेक् मनाहाॽ सेगुङ्सिङ्॥ खे़ङ्हाॽ के़रे़क् खासिङ् के़निःप्पा नु मिङ्सो इङ्धाङ्साबा मना मे़वये़, खे़ब्याङ् खिनिॽ थाःक्थक्माबा मनाहाॽरे़ लागि खे़ङ्हाॽ हे़न्छिङ्, किप् थिक्, ङाबोङ् नु थिबोङ्ले़ लागि लाम्लोबा सेःन्दुङ्सिङ्॥ थाःक्थाःक्ले़ लागि थाःक्लाम्लोबाहाॽआङ् सेःन्दुङ्सिङ्॥ 16 खे़न् ये़म्मो आङ्गाॽ खिनिॽ खासे़न्लोःम्बाहाॽ अक्खे मे़त्तुङ्सिङ्ङाङ् इङ्जाङ् पिरुङ्सिङ्ङाङ् वये़—“खिनिॽ फुॽनुसाॽ लुम्मोबा खे़माॽहाॽ खे़प्से़म्मे़ॽ हे़क्क्याङ् कुदोःप्मा खासे़न् लोःन्दे़म्मे़ॽ, खे़न् खे़माॽइन् खिनिॽ लुम्मो के़युङ्बा वेॽ लाजेॽबा लुम्मोबासाङ् खासे़न् लोःन्दे़म्मे़ॽ॥ 17 खिनिॽ खासे़न् के़लोःन्दुम्मिल्ले़ मनाहाॽ खिनिॽ थिक्के़न् नुरिक् नु वेॽइन् ताप्फे़ःल्लिक् मे़मे़त्ते़म्मिन्ने़ॽ॥ खिनिॽ चुक्पा यम्बा ने़प्माङ्ले़ खुन्छिॽ पाःन्निन् खे़प्से़म्मे़ॽ॥ आत्तिन् मनाःन्नुआङ् मे़गिसे़म्मिन्ने़ॽ, थेआङ्भे़ल्ले़ खासे़न् पाःन्निल्ले़ निःन्धोःङ्ग निङ्वाॽफुमाङ्ङिल्ले़ कुहुक्को वाॽ॥ खिनिॽ के़साक्पा के़दुमुम्बा पाःन्निन् आङ्गाॽओ तारे़म्मे़ॽ, खे़ब्याङ् आङ्गाॽ खे़न् खे़प्सुङ्ॽ॥” 18 खे़न् ये़म्मो खिनिॽ चोःक्मा के़बोङ्बा के़रे़क् पाःन्हाॽ आङ्गाॽ इङ्जाङ् पिनिङ्ङाङ् वये़रो॥ कादेस-बर्नेलाम् थोःम्जिबाहाॽ मे़बाङ्घुसि ( खानिःत् १३:१-२५ ) 19 खे़न् एगाङ् यहवे दाङ्बा निङ्वाॽफुमाङ्ङिल्ले़ कुइङ्जाङ् कुइसिक् होरेबलाम् लाङ्घेगिगे़ हे़क्क्याङ् खे़ने़ॽ के़निसुबा खे़न् पयम् यम्बा नु किप्मा पघुगे़घुबा मुरे़क् खारे़क् थेआङ् के़होःप्पादे़न्लाम् पोःक्खिगे़आङ् एमोरिहाॽ मे़युङ्बा कोःक्मा फाङ्जङ् ले़प्माङ् पेगिगे़॥ खे़न् एगाङ् कादेस-बर्ने लाजेॽओ के़रिगे़॥ 20 हे़क्क्याङ् आङ्गाॽ खिनिॽ मे़त्निङ्, “यहवे दाङ्बा आनिॽ निङ्वाॽफुमाङ्ङिल्ले़ आबिबा एमोरिहाॽरे़ खुन्छिॽ कोःक्मा फाङ्जङ्बा लाजेॽओ खिनिॽ के़गे़रिआङ् के़वयिॽ॥ 21 ओमे़त्ते़म्मे़ॽ, यहवे दाङ्बा खिनिॽ निङ्वाॽफुमाङ्ङिल्ले़ खे़न् लाजेन् खिनिॽ के़बिरिआङ् ने़रो॥ यहवे दाङ्बा खिनिॽ पाधे़बाहाॽरे़ खुन्छिॽ निङ्वाॽफुमाङ्ङिल्ले़ पाःत्तुबा हे़क्के पेगे़म्मे़ॽआङ् खे़न् युक् चोगे़म्मे़ॽ॥ खिनिॽ मे़गिसे़म्मिन्ने़ॽ, निङ्वाॽ स्रोःन् मे़लॽरे़म्मिन्ने़ॽ॥” 22 खे़ब्याङ् खिनिॽ के़रे़क्ले़ आङ्गाॽओ के़द्ये़ॽइआङ् के़बाःत्तुम्, “थोःम्मारे़ लागि आनिॽ तगि मनाहाॽ पाङ्घुम्सिम्॥ खे़न् लाजेॽओ आनिॽ आत्तिलाम् पेःक्मा पोङ्ॽ खे़ब्याङ् आत्तिन् आत्तिन् ये़क्यक्को आगे़त् के़लॽबा इङ्घङ्ङिन् खे़ङ्हाॽरे़ आनिॽओ मे़गे़त्तु॥” 23 कन् पाःन्निन् आङ्गाॽ आलागि नुबा चोगे़॥ हे़क्क्याङ् आङ्गाॽ के़रे़क् थाःक्कोलाम् थिक्थिक् के़रे़क्ले़ थिबोङ्ङाङ् ने़त्छि मनाहाॽ सेगुङ्सिङ्॥ 24 खे़ङ्हाॽ कोःक्मा फाङ्जङ् ले़प्माङ् मे़धासिङ् खे़ब्याङ् एस्कोलबा सेःङ्घाओ मे़गे़रे़आङ् खे़न् खप्पे़त् मे़गन्दु॥ 25 खे़ङ्हाॽरे़ खे़न् लाजेॽओबा कुभा सिङ्सेॽहाॽ मे़भे़त्तु॥ हे़क्क्याङ् खे़ङ्हाॽरे़ अक्तङ्बा इङ्घङ् मे़गे़त्तु, “यहवे दाङ्बा आनिॽ निङ्वाॽफुमाङ्ङिल्ले़ आनिॽ आबिबा खे़न् लाजेन् चाॽरिक् नुबा चोःक्ले़त्छ॥” इस्राइलिहाॽरे़ यहवे दाङ्बे़न् मे़अत्तु ( खानिःत् १३:२६-३३ ) 26 कर खिनिॽ खे़प्मो पेःक्मा के़न्दे़न्दिन्॥ यहवे दाङ्बा खिनिॽ निङ्वाॽफुमाङ्ङिल्ले़ कुइङ्जाङ्ङिल्ले़ तङ्ले़ङ्वाओ खिनिॽ के़बोगि॥ 27 खिनिॽ आप्फेक् आप्फेक् साःङ्गाहिम्हाॽओ मने़गे़धिक्तिआङ् खिनिॽ के़बाःत्तुम् “यहवे दाङ्बे़ल्ले़ आनिॽ आनाॽरे़बाल्ले़ चोगुल्ले़ एमोरिहाॽरे़ खुन्छिॽ हुक्को थामासिआङ् मे़ङ्मासि फाॽआङ् मिस्रलाम् आनिॽ आलःत्ते़ आभे़त्ते़बारो॥ 28 आनिगे आत्ति पेः क्मा सुक्तिगे़बे? आनिगे नुसाॽहाॽरे़ आनिगे निङ्साङ् मे़बुक्खुआङ् वाॽ॥ खे़ङ्हाॽरे़ मे़बाःत्तुॽ, ‘खे़न् मनाहाॽ आनिॽनुःल्ले़ यम्बा नु केःम्बा मे़जोक्॥ खे़ङ्हाॽरे़ खुनिॽ ये़क्यक्हाॽ यम्बा चोक् हे़क्क्याङ् ताङ्साङ् के़दक्पा लुङ्धाक् मे़से़त्तुआङ् ये़प्॥ आनिगे खे़प्मो अनाकिहाॽआङ् निसुम्सिम्बे़॥’” 29 खे़ब्याङ् आङ्गाॽ खिनिॽ मे़त्निङ्, “खिनिॽ यङ्मा मे़स्ये़ॽइन्ने़ॽ॥ खे़ङ्हाॽनु मे़गिसे़म्मिन्ने़ॽ॥ 30 खिनिॽ मिक्ले़ निसुरए खिनिॽ लागि मिस्र लाजेॽओ आक्खेलॽरिक् थङ् थक्ते़ के़बिरिआङ् वये़ हाबा हे़क्केलॽरिक्के खिनिॽ तगाङ् तगाङ् के़बेःक्पा यहवे दाङ्बा खिनिॽ निङ्वाॽफुमाङ्ङिन्ने खिनिॽ लागि थङ् चोक्॥ 31 मुरे़क् खारे़क् थेआङ् के़होप्पादे़न्नो खिनिॽ लाङ्गे़घेगिबा लाम् खाराक् कुम्बारे़ कुस्सान् कुयुबा हे़क्के यहवे दाङ्बा खिनिॽ निङ्वाॽफुमाङ्ङिल्ले़ खिनिॽ कप्मो मे़ङ्गे़त्ते थारिक् आक्खेलॽरिक् खिनिॽ के़बक्खि के़भे़त्तिआङ् वये़, खे़न् खिनिॽ खे़प्मो के़निसुम्माङ् वये़॥” 32 हे़क्केसाङ् यहवे दाङ्बा खिनिॽ निङ्वाॽफुमाङ्ङो खिनिॽ ताःक्पो के़न्युक्खुम्मिन्, 33 खुने़ॽ खिनिॽ लागि साःङ्गाहिम् लेःप्मादे़न् कोःत्छे़ नु खिनिॽ पेःक्मा के़बोङ्बालाम् ओःन्धाक्से़ से़न्दिक् मिधुङ् मिराःक् सित्लाङ् नु ले़न्दिक् खाॽमित् सित्लाङ् पोःक्खे़आङ् लाम्दिक् खाराक् तगाङ् तगाङ् थासिङ् पेर वये़रो॥ यहवे दाङ्बे़ल्ले़ इस्राइलिहाॽ खुम्दिङ् पिरुसि ( खानिःत् १४:२०-४५ ) 34 खिनिॽ मने़के़धिक्तिबा पाःन्निन् यहवे दाङ्बे़ल्ले़ खे़प्सुआङ् खुने़ॽ साॽरिक् कुसाक्के़न् पोगे़, हे़क्क्याङ् अक्खे पाःत्तुआङ् माङ्हे़क्सिङ्, 35 “कन् आसुत्थो थाःक्कोबा लत्छारे़आङ् आङ्गाॽ खिनिॽ पाधे़बाहाॽ पिनिङ् मे़त्तुङ्सिङ्ङाङ् माङ्हुप् चोगुङ्बा खे़न् नुबा लाजेन् निमा के़ङ्घोसुम्मिन्ॽ॥ 36 यपुन्नेरे़ कुस्सा कालेबरे़रक् खे़न् लाजेन् निमा खोसुॽ॥ खुने़ॽ तोॽरुबा लाजेन् आङ्गाॽ खुने़ॽ नु कुमुॽइदाङ्साहाॽ पिरुङ्सिङ्ॽ, थेआङ्भे़ल्ले़ खे़ल्ले़ यहवे दाङ्बान् कुलिङ्दो के़रे़र तिम्दुआङ् वाॽ॥” 37 खिनिॽ के़जोगुम्मिल्ले़ यहवे दाङ्बान् आङ्गाॽनु कुयाःक्ले़ॽरे़आङ् मे़त्ताङ्, “मोसाए, खे़ने़ॽआङ् खे़प्मो लाःप्मा के़ङ्घोने़न्॥ 38 कर खे़ने़ॽ के़भाॽबाङ् नुनरे़ कुस्सा यहोसुन् खे़प्मो लाःत्॥ खे़ने़ॽ खे़न् आःन्छिङ्मा पिरे़ॽ, थेआङ्भे़ल्ले़ खुने़ॽ खे़न् लाजेन् इस्राइलिहाॽरे़ खुन्छिॽ हुक्को थार चोगुॽ॥ 39 खिनिॽ अङे़ःक्वा साहाॽरे़ खुन्छिॽ याःम्बेओ खे़ङ्हाॽ पुङ्लाधाबा मे़बोङ्ॽ फाॽआङ् के़बाःत्तुम्, कर परुमाल्ले़ खे़न् नुबा नु ताप्फे़ःम्बा कुसिङ् मे़न्निःप्मनाबा आम्भ्रे़ःङ्वा अङे़ःक्वाहाॽ चाए खे़प्मो मे़लात्॥ आङ्गाॽ खे़न् लाजेन् खे़ङ्हाॽ पिरुङ्सिङ्ॽ हे़क्क्याङ् खे़न् खे़ङ्हाॽरे़ युक् मे़जोगुॽ॥ 40 कर खिनिॽग नुःक्खे़म्मे़ॽआङ् हे़ःत्ताङ्बा वरःङ् ले़प्माङ् मुरे़क् खारे़क् थेआङ् के़होःप्पादे़न्हाॽओ पेगे़म्मे़ॽ॥” 41 कर खिनिॽ आङ्गाॽ आग्मे़त्ते़, “यहवे दाङ्बे़ल्ले़ कुदक्ले़ङ्वाओ आनिगे लायो चोगुम्बे़आङ् वयिगे़ॽ॥ यहवे दाङ्बा आनिगे निङ्वाॽफुमाङ्ङिल्ले़ पाःत्तुबा कुइसिक् आनिगे पेगिगे़आङ् थक्तिगे़॥” कन् कोःक्माबा लाजेॽओ थोःक्सिङ्मा उसुरु के़निसुम्माङ् खिनिॽ के़रे़क्ले़ आप्फेक् आप्फेक् फे़जुम्भे़या खजुम्घयाहाॽ के़हेॽआसि॥ 42 कर यहवे दाङ्बे़ल्ले़ आङ्गाॽ मे़त्ताङ्, “खे़ङ्हाॽ मे़त्ते़से़ॽ, ‘मे़धोःक्कासिम् मे़बेगे़म्मिन्ने़ॽ हे़क्क्याङ् थङ् मे़जोगे़म्मिन्ने़ॽ॥ मेःन्ने़भग्र खिनिॽ निङ्मिहाॽरे़ खुनिॽ तगि हारि के़द्ये़ॽइ, थेआङ्भे़ल्ले़ आङ्गाॽ खिनिॽ लुम्मो होःप्पा॥’” 43 कन् पाःन्निन् आङ्गाॽ खिनिॽ मे़त्निङ्, कर खिनिॽ खे़म्माए के़ङ्घे़प्सुम्मिन्॥ यहवे दाङ्बे़ल्ले़ कुइङ्जाङ्ङिल्ले़ कुदक्ले़ङ्वाओ खिनिॽ के़बेगि, हे़क्क्याङ् आधिङ्गानि के़बोःक्खिआङ् कोःक्मा फाङ्जङ्बा लाजेॽओ के़धोःक्कासि॥ 44 हे़क्क्याङ् कोःक्माओ के़युङ्बा एमोरिहाॽ खिनिॽनु मे़धक्ते़, खम्भ्याङ् सक्वा पन्ज्याङ्मे़ल्ले़ मनान् मे़नाःत्तुबा हे़क्के खे़ङ्हाॽरे़ खिनिॽ पुबेलाप्सा के़म्नाःत्ति, खे़ब्याङ् सेइरलाम् होर्मा थारिक् खे़ङ्हाॽरे़ खिनिॽ के़म्नाःन्दि॥ 45 हे़क्क्याङ् खिनिॽ के़नुःक्खि के़ये़ॽइआङ् यहवे दाङ्बे़ल्ले़ कुदगि के़हाबि, कर खुने़ॽ खिनिॽ के़हाबि के़जिःक्तिबान् मे़घे़प्सुन्, खे़म्घे़म्माङ् मे़लाप्तुन्॥ 46 कल्ले़चोगुल्ले़ खिनिॽ खे़न् कादेसओ यरिक् ये़न् तेमा के़बोङ्बा पोःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.