दानिए़ल 9 - लिम्बुदानिए़लरे़ आबाङे कुलागि तुवा चोगु 1 अहासुरसरे़ कुस्सा दाराःल्ले़ हाङ्युक् चोगुबा थिक्सिगेक्पा तङ्बेओ खुने़ॽ बेबिलोनबा हाङ्जुम्मो युक्साबा मे़जोगु, खुने़ॽ मादि थाःक्कोबा वये़— 2 खुने़ॽ हाङ्युक् चोगुबा थिक्सिगेक्पा तङ्बेओ माङ्निङ्वाॽपान् के़बाःप्पा यर्मियान् मे़बिरुबा यहवे दाङ्बे़ल्ले़ कुबाःन्जाक् कुइसिक् साम्यो साप्लाओलाम् आङ्गाॽ दानिए़लरे़ यरुसले़ःम्मिन् नुबोङ् तङ्बे थारिक् खाप्पुथ्यःङ् पोङ्ॽ फाॽआङ् कुसिङ् निःत्तुङ्॥ 3 कल्ले़चोगुल्ले़ आङ्गाॽ तःक्ने़त् युङाङ्ल सागि तेत् चाक्खुङ्ङाङ् खाप्पु हुःत्छिङ्ङा हे़क्क्याङ् पेलिगे़न् तुवा चोःक्नु पेलि फाक्नु यहवे दाङ्बा निङ्वाॽफुमाङ् ले़प्माङ् नुःक्खाङ्॥ 4 आङ्गाॽ लायोलाम् हिन्दाङ्ल यहवे दाङ्बा आनिङ्वाॽफुमाङ्ङिन् पेलि फाक्तुङ्लो— “दाङ्बाए, पयम् यम्बा नु किप्मा के़घुबा निङ्वाॽफुमाङ्ङे, खे़ने़ॽ मिःम्जि के़मे़प्पा नु खे़ने़ॽ के़इङ्जाङ् के़इःप्पा के़नाःप्पा के़रे़क्को खे़ने़ॽ लुङ्माॽ आदुक्तुक्पा के़माङ्हुप्पिन् के़गे़त्तुॽ, 5 आनिगे लायो चोगुम्बे़आङ् वयिगे़ हे़क्क्याङ् याःम्बक् फेःन्दुम्बे़आङ् वयिगे़॥ आनिगे कुॽइगे़भे़म्बा नु पिफ्युङ्बा पोःक्खिगे़आङ् वयिगे़, खे़ने़ॽ के़इङ्जाङ् नु के़साम्योथिम् इङ्जाङ्हाॽलाम् आनिगे माःङ्घा पोःक्खिगे़आङ् वयिगे़॥ 6 आनिगे खे़ने़ॽ के़से़वारोबा माङ्निङ्वाॽपान् के़बाःप्पाहाॽरे़ मे़बाःत्तुबा पाःन्नो निङ्वाॽ मे़बिरुम्बे़न्, खे़ने़ॽ के़मिङ्ङो खे़ङ्हाॽ आनिगे हाङ्हाॽ, आनिगे युक्साबाहाॽ नु आनिगे पाधे़बाहाॽ हे़क्क्याङ् लाजेॽओबा के़रे़क् मनाहाॽनु मे़बारे़आङ् मे़वये़॥ 7 “दाङ्बाए, खे़ने़ॽ साम्योबा के़जोक्, कर खे़ने़ॽ ले़प्माङ् नसान् ले़ङ्माल्ले़ चोगुल्ले़ के़रे़क् लाजेॽहाॽओ फुत्छिङ्ज्याङ् के़बोङ्बा निःत्ताङ् नु माःङ्घा के़युङ्बा, आनिगे यहुदाबा मनाहाॽ नु यरुसले़म हे़क्क्याङ् इस्राइलबा मनाहाॽ सिरिङ्ममो थ्ये़ॽइगे़आङ् वयिगे़॥ 8 यहवे दाङ्बाए, आनिगे नु आनिगे हाङ्हाॽ, आनिगे लाम्लोबाहाॽ हे़क्क्याङ् आनिगे पाधे़बाहाॽ सिरिङ्ममो थ्ये़ॽइगिआङ् वयिगे़, थेआङ्भे़ल्ले़ आनिगे खे़ने़ॽ के़दक्ले़ङ्वाओ लायो चोगुम्बे़आङ् वाॽ॥ 9 आनिगे खे़ने़ॽ के़दक्ले़ङ्वाओ पिप्फ्युङ्बा पोःक्खिगे़आङ् वयिगे़, हे़क्केसाङ् आनिगे यहवे दाङ्बा आनिगे निङ्वाॽफुमाङ्ङिन् लुङ्माॽ आदुक्तुक्पा नु ले़प्मि आबिबिबा के़जोःक्लो॥ 10 यहवे दाङ्बा आनिगे निङ्वाॽफुमाङ्ङिल्ले़ के़इङ्जाःङङिन् आनिगे मे़न्इःत्ते मे़न्नाःत्ते वयिगे़ हे़क्क्याङ् खे़ने़ॽ के़से़वारोबाहाॽ माङ्निङ्वाॽपान् के़बाःप्पाहाॽ लाम्बा याप्मि के़बिरे़बा थिम्हाॽआङ् आनिगे मे़न्नाःत्ते मे़न्दिम्मे वयिगे़॥ 11 खे़ने़ॽ के़इङ्जाङ्ङिन् इःप्मा नाःप्मा मे़न्दे़न्ने़न्नाङ् के़रे़क् इस्राइलिहाॽरे़ खे़ने़ॽ के़साम्योथिम् इङ्जाङ्हाॽ मे़भेःन्दुआङ् वाॽ हे़क्क्याङ् खे़ने़ॽलाम् माःङ्घा मे़बोःक्खे़आङ् मे़वाॽ॥ “खे़ल्ले़चोगुल्ले़ निङ्वाॽफुमाङ्ङिल्ले़ के़से़वारोबा मोसाःल्ले़ कुसाम्योथिम्मो साप्ते़आङ् के़बप्पा साक्मुरा माङ्देहाॽ नु माङ्हे़क् निःन्धो के़बोङ्बा पाःन्हाॽ आनिगे सम्धाङ् थ्ये़आङ् वाॽ, थेआङ्भे़ल्ले़ आनिगे खे़ने़ॽ के़दक्ले़ङ्वाओ लायो चोगुम्बे़आङ् वाॽ॥ 12 आनिगे सम्धाङ् यम्बा तुक्खे लाक्खे के़दारुआङ् आनिगे तक्ले़ङ्वाओ नु आनिगे युक्साबाहाॽरे़ खुन्छिॽ तक्ले़ङ्वाओ के़बाःत्तुबा पाःन्हाॽ के़गे़त्तुआङ् वाॽ॥ यरुसले़ःम्मिन् ताप्फे़ःल्लिक् के़मे़त्तुबा कुइसिक् के़रे़क् ताङ्साङ्बे़ल्ले़ कुसिगाङ् आभे़ल्ले़आङ् मे़न्जोःक्के के़वाॽ॥ 13 मोसाःल्ले़ कुसाम्योथिम्मो साप्ते़आङ् के़बप्पा कुइसिक् कन् के़रे़क् तुक्खे लाक्खेहाॽ आनिगे सम्धाङ् थ्ये़आङ् वाॽ, हे़क्केसाङ् आनिगे लायोलाम् नुःक्खिगे़आङ् खे़ने़ॽ के़से़क्खान् निङ्वाॽ पिरुम्बे़बा होप् हे़क्क्याङ् आनिगे लुङ्माॽ आगे़तुक्पा पाःन्निन् कोःत्तुम्बे़बा होप्॥ 14 आनिगे सम्धाङ् तुक्खे लाक्खे ताःप्मारे़ लागि खे़ने़ॽ यहवे दाङ्बा आनिगे निङ्वाॽफुमाङ्ङिल्ले़ के़निङ्वाॽ मे़यासे़न्, थेआङ्भे़ल्ले़ खे़ने़ॽ के़जोगुबा के़रे़क् पाःन्नो खे़ने़ॽ साम्योबा के़जोक्॥ हे़क्केसाङ् आनिगे खे़ने़ॽ के़इङ्जाङ्ङिन् इःत्तुम्बे़ नाःत्तुम्बे़बा होप्॥ 15 “आल्ल दाङ्बा आनिगे निङ्वाॽफुमाङ्ङे, खे़ने़ॽ आप्फेक् के़मनाहाॽ मुक्साम्साबा के़हुक्किल्ले़ मिस्र लाजेॽलाम् के़धे़ॽरुसिआङ् आइन्बा ये़न् थारिक् खे़ने़ॽ के़मिङ्ङिन् मिङ्सो इङ्धाङ्बा के़जोगुआङ् वाॽ, आनिगे लायो चोगुम्बे़आङ् वाॽ, आनिगे याःम्बक् फेःन्दुम्बे़आङ् वाॽ॥ 16 दाङ्बे, खे़ने़ॽ साम्योबा के़याःम्बक् कुइसिक् खे़ने़ॽ के़साक्के़न्निन् नु के़सिक् पोःक्मान् खे़ने़ॽ के़ये़क्यक्, के़सेसे कोःक्मा यरुसले़मलाम् खे़त्ते़देसे़ॽओ॥ आनिगे लायो नु आनिगे पाधे़बाहाॽरे़ खुन्छिॽ फे़न्याःम्बक्किल्ले़ चोगुल्ले़ आनिगे कब्रिङ् पिसाङ्बा मनाहाॽरे़ खुन्छिॽ तगि यरुसले़म नु खे़ने़ॽ के़मनाहाॽ कुनामे़न्छाॽ मे़प्मा चाहाक् पोःक्खिगे़आङ् वयिगे़रो॥ 17 “आल्ल आनिगे निङ्वाॽफुमाङ्ङे, खे़ने़ॽ के़से़वारोबे़ल्ले़ चोगुबा तुवान् नु कुबेलिन् खे़प्से़ॽओ॥ यहवे दाङ्बाए, खे़ने़ॽ आप्फेक् के़लागि मुरे़क् खारे़क् के़बोङ्बा सेसेदे़न्निन् लुङ्माॽ तुक्ते़ॽओ॥ 18 “निङ्वाॽफुमाङ्ङे, खे़प्से़ॽओ हे़क्क्याङ् ओमये़ॽओ खे़म्ब्याङ् के़मिङ् के़दिःप्पा मुरे़क् खारे़क् के़बोङ्बा ये़क्यक्किन् ओमे़त्ते़ॽओ॥ आनिगे साम्योबा चोगिगे़ फाॽआङ् कन् पेलि फाक्कासिगे़बा मेःन्, कर खे़ने़ॽ साॽरिक् के़नुॽबा के़जोःक्पाल्ले़ चोगुल्ले़ पेलि फाक्कासिगे़बारो॥ 19 “दाङ्बाए, खे़प्से़ॽओ! दाङ्बाए, ले़प्मि आबिरे़ॽओ! दाङ्बाए, निङ्वाॽ पिरे़ॽओ हे़क्क्याङ् याःम्बक् चोगे़ॽओ॥ आनिगे निङ्वाॽफुमाङ्ङे, आप्फेक् के़लागि मे़सुसे़न्नेॽओ, थेआङ्भे़ल्ले़ खे़ने़ॽ के़ये़क्यक्किन् के़मिङ्ङो ने़रो हे़क्क्याङ् खे़ने़ॽ के़मनाहाॽ के़मिङ्ङो मे़वाॽरो॥” गाब्रिएलरे़ माङ्निङ्वाॽपान्निल्ले़ कुबे हन्दु 20 आल्ल आङ्गाॽ आप्फेक् आलायो नु आमना इस्राइलिहाॽरे़ खुन्छिॽ लायोलाम् हिन्दाङ्ल पेलिगे़न् तुवा चोगुङ् हे़क्क्याङ् खुने़ॽ कुसेसे कोःक्माल्ले़ लागि यहवे दाङ्बा आङ्गाॽ आनिङ्वाॽफुमाङ्ङिन् चक्मे़ल्लॽए पेलि फाक्तुङ्॥ 21 पेलि फाक्तुङ्ल यागाङ्ङिल्ले़ए, आङ्गाॽ तगिबा सुफोओ निसुङ्बा गब्रिएले़न् युःन्धोबा सिदुङ्जभा तोःम्मा ये़म्मो साॽरिक् चात्ते़र पे़रे़आङ् आङ्गाॽओ ये़॥ 22 खुने़ॽ आङ्गाॽ इङ्जाङ् पिराङ्ङाङ् मे़त्ताङ्, “दानिए़लए, आल्लो आङ्गाॽ खे़ने़ॽ इःत्छिङ्साम् नु खासिङ्निःप्मा निङ्वाॽ पिसे़ य्याङ्आङ् वाॽआ॥ 23 खे़ने़ॽ पेलिगे़न् तुवा चोःक्मा के़हेःक्ते़नुमे़ःन्ने के़बेलिगे़न् तुवाःल्ले़ नुगप् के़म्बिरे़, खे़न् आङ्गाॽ खे़ने़ॽ मे़प्मारे़ लागि य्याङ्ङाङ् वाॽआ, थेआङ्भे़ल्ले़ निङ्वाॽफुमाङ्ङो खे़ने़ॽ साॽरिक् इमे़ल्लुङ्बा के़जोक्॥ कल्ले़चोगुल्ले़ इङ्घङ्ङिन् निङ्वाॽ इःत्ते़ॽ खम्भ्याङ् सुफोन् कुसिङ्निःत्ते़ॽ॥ 24 “खे़ने़ॽ के़मना नु के़सेसे ये़क्यक्किल्ले़ लागि फे़न्याःम्बक्किन् मे़ङ्से़, लायोन् नुम्से़, कुॽइगे़भे़म्बान् लायोलाम् ले़प्मि नाःक्से़, नुप्मे़न्दिङ् साम्योबा याःम्बक् ताःत्छे़, सुफो नु माङ्निङ्वाॽपान्निन् निःन्धो चोःक्से़ हे़क्क्याङ् साॽरिक् सेसेबादे़न्निन् माङ्थोःक्ना चोःक्से़ नुबोङ् ‘नुसिहाॽ’ इङ्जाङ् पोःक्खे़आङ् वाॽ॥ 25 कन् पाःन्नो निङ्वाॽ पिरे़ॽ हे़क्क्याङ् कुसिङ्निःत्ते़ॽ, यरुसले़ःम्मिन् याम्मो चोःक्मा नु याम्मो तोःम्मारे़ लागि कन् इङ्जाङ्ङिन् इङ्भन् पोःक्खे़बा ये़म्माङ्धो माङ्थोःक्ना के़बोङ्बा मनान्, इग्र युक्साबा थिक् मे़न्दाए थारिक्, नुसि ‘नुसिहाॽ’ नु तुक्पोङ्ङाङ् ने़त्छि ‘नुसिहाॽ’ पोङ्ॽ॥ माराम्हाॽ नु ये़क्यक् कब्रिङ् पाक्लुम् के़लॽबा ते़न्हाॽ सोसोरिक् कन् याम्मो मे़जोगुॽ, कर तुक्खेलाक्खेबा ये़म् पोङ्ॽ॥ 26 “तुक्पोङ्ङाङ् ने़त्छि ‘नुसिहाॽ’ एगाङ् खे़न् माङ्थोःक्ना के़बोङ्बा मनान् मे़से़रुॽ खे़न्नु थेधिक्काङ् मे़याःक्ने़न्॥ युक्साबा मनाहाॽ मे़दाआङ् खे़न् ये़क्यक्किन् नु सेसेदे़न्निन् खाप्पुथ्यःङ् मे़जोगुॽ॥ वहित् थामा ये़म्मो के़गुङ्बा च्वाःत् हे़क्के कुनुप्मान् तारो—कुनुप्मो थारिक्के थङ् पोङ्ङाङ् पत्, हे़क्क्याङ् मुरे़क् खारे़क् पोङ्मा इङ्जाङ्ङिन् इङ्भन् पोःक्खे़आङ् वाॽ॥ 27 लत्छा ‘नुसि’ रे़ लागि यरिक् मनाहाॽनु खे़ल्ले़ माङ्हुप् थिक् निःन्धो चोगुॽ॥ ‘नुसि’ लुम्मो खे़ल्ले़ सिदुङ्जभा नु हुक्वाहाॽ नुप्सुॽ॥ हे़क्क्याङ् कुमे़क्मा निःन्धो के़बोङ्बा इङ्जाङ्ङिन् खे़ल्ले़ कुसम्धाङ् मे़न्धाए थारिक् खे़ल्ले़ माङ्हिम्मोबा लत्छा कुलक्को आमे़ङ्मे़ङ्बा याम्गे़सिङ्बा नावाइत्ला थिक् ये़प्सुरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.